Mito Ukon Kamatuoran?

Ang Cristianong gulang nga si Timoteo nagpaandam sa mga luyag magsimba sa matuod nga Dios nga indi magpamati sa “nagabulubag-o nga mga doktrina” kag “mga mito.” (1 Timoteo 1:3, 4, Byington) Importante pa bala ini karon? Huo, bangod ang sayop nga mga ideya tuhoy sa Biblia kag ang sayop nga mga panudlo sini nagapahilayo sa mga tawo gikan sa matuod nga pagsimba. Ang masunod amo ang pila sang mga ginapatihan sang mga tawo tuhoy sa Biblia. Apang, talupangda ang ginasiling mismo sang Biblia. Makabulig ini sa imo nga makilala kon ano ang mito kag kon ano ang kamatuoran.

◼ Mito: Imposible ang mga milagro nga ginasugid sang Biblia.

Kamatuoran: Madamo sing matun-an ang mga tawo tuhoy sa mga tinuga sang Dios. Indi mapaathag sang mga sientipiko kon ano gid ang grabidad kag kon ano ang mga elemento sang atomo. Kag indi man gani nila mahangpan kon ano gid ang tion. “Matungkad mo bala ang katingalahan sang Dios, kag malab-ot mo bala ang katumanan sang pagkagamhanan?” (Job 11:7, Biblia) Bangod indi naton mahangpan sing bug-os ang mga tinuga sang Dios, nagahalong gid ang mga sientipiko sa pagsiling nga ang isa ka butang imposible nga matabo.

◼ Mito: Ang tanan nga relihion padulong sa Dios.

Kamatuoran: “Kon kamo magpadayon sa akon polong,” siling ni Jesus, “kamo matuud gid nga mga gintoton-an nakon, kag kamo makakilala sang kamatooran, kag ang kamatooran magahilway sa inyo.” (Juan 8:31, 32) Kon ang tanan nga relihion padulong sa Dios, ngaa kinahanglan pa hilwayon ang mga katapo sini? Sa pagkamatuod, si Jesus nagtudlo nga diutay lamang ang katawhan nga yara sa “dalan nga nagapadulong sa kabuhi.”—Mateo 7:13, 14.

◼ Mito: Ang tanan nga maayo nga tawo mapalangit kon mapatay sila.

Kamatuoran: “Ang mapainubuson magapanubli sang duta, kag magakalipay sila sa kabuganaan sang paghidait. Ang mga matarung magapanubli sang duta, kag magapuyo dira sa gihapon. Hulata ang GINOO, kag bantayi ang iya dalanon, kag sia magapataas sa imo sa pagpanubli sang duta.” (Salmo 37:11, 29, 34) Ang makapalangit amo lamang ang 144,000 ka matutom nga tawo. Gintangduan sila sang Dios nga “magagahum sila sa duta” subong mga hari.—Bugna 5:9, 10; 14:1, 4.

◼ Mito: Ang “Daan nga Testamento” indi na mapuslanon para sa mga Cristiano.

Kamatuoran: “Ang bug-os nga kasulatan ginbugna sang Dios kag mapuslanon.” (2 Timoteo 3:16, 17) “Ang bisan ano nga nasulat sadto anay ginsulat sa pagtudlo sa aton, agud nga paagi sa pagkalig-on kag pagpabakud sang mga kasulatan may paglaum kita.” (Roma 15:4) Ang “Daan nga Testamento,” ang Hebreo nga Kasulatan, nagahatag sa aton sing importante nga instruksion tuhoy sa Dios kag nagabulig sa aton nga tuuhan man ang “Bag-o nga Testamento,” ang Cristianong Griegong Kasulatan.

◼ Mito: Ang daku nga bahin sang tulun-an nga Genesis, lakip ang kasaysayan tuhoy kay Adan kag Eva, mga sugilanon lamang.

Kamatuoran: Ang listahan sang kaliwatan ni Jesus halin kay Adan ginrekord sang manunulat sang Ebanghelyo nga si Lucas. (Lucas 3:23-38) Kon ang Genesis mito lamang, sin-o sa listahan sang kaliwatan ang matuod kag indi? Si Jesus, nga nagkabuhi na sa langit antes magkari sa duta, nagpati sa kon ano ang nasulat sa Genesis, lakip na ang kasaysayan ni Adan kag ni Eva. (Mateo 19:4-6) Gani, kon ginaduhaduhaan mo ang kasaysayan sang Genesis ginaduhaduhaan mo man si Jesus kag ang iban pa nga mga manunulat sang Biblia.—1 Cronica 1:1; 1 Corinto 15:22; Judas 14.