Gindesinyo Bala Ini?
Ang Baba sang Lukos
◼ Nagapalibog gid ang mga scientist sa baba sang lukos. Indi nila mahangpan kon paano ang isa ka matig-a nga bagay naangot sa isa ka lawas nga wala sing tul-an. Indi bala sini mapilas ang mga unod sang lukos kag masakitan ini?
Binagbinaga: Matig-a ang punta nga bahin sang baba sang lukos pero mahumok ang puno sini. Ang baba sang lukos nahuman sa chitin, tubig, kag protina. Halin sa mahumok nga bahin amat-amat lang ini nga nagatig-a pakadto sa punta agod indi mapilas ang lukos kon ginagamit niya ang iya baba.
Si Propesor Frank Zok, sang University of California, nagsiling nga “magabag-o gid ang ideya sang mga engineer sa pagpatapik sang mga materyal nga lainlain nga klase” kon tun-an nila sing maayo ang baba sang lukos. Ang isa ka halimbawa amo ang paghimo sing artipisyal nga tiil ukon kamot. Si Ali Miserez, nga isa ka researcher sa amo man nga unibersidad, nagahunahuna sa “paghimo sing artipisyal nga bahin sang lawas nga pareho sa pagkahuman sa baba sang lukos agod maangot ang “matig-a nga materyal sa mahumok nga cartilage nga indi mapilas bisan pa magsag-idanay ini.”
Ano sa banta mo? Natabuan lang bala ang pagkahuman sang baba sang lukos nga mahumok sa puno kag amat-amat nga nagatig-a sa punta? Ukon gindesinyo ini?
[Credit Lines sang retrato sa pahina 9]
© Bob Cranston/SeaPics.com
© Richard Herrmann/SeaPics.com