Sekreto nga Pag-inom sang Ginareseta nga mga Bulong

“NAGSUGOD ako inom sang ginareseta nga mga bulong sang 14 anyos ako,” siling ni Lena.a “Gusto ko magniwang para manami ako lantawon, gani ginresetahan ako sang amon doktor sang bulong nga pangpaniwang. Nangin malipayon lamang ako sang ginhatagan na ako sang atension sang mga lalaki. Sang ulihi, nagdroga ako kag nagkabuhi sing imoral. Gusto ko pirme ma-high sa droga.”

Ang isa pa ka babayi nga si Myra may migraine, amo nga ginresetahan sia sang iya doktor sang pain reliever. Sang ulihi, nagadamo nga nagadamo ang iya ginatomar nga bulong—indi lang agod madula ang kasakit sang iya ulo kundi bangod naadik na sia sa sini. Isa pa, ginatomar man niya ang mga bulong nga ginreseta sa iban nga miembro sang iya pamilya.

Huo, ginapakita sang mga report nga nagadamo ang mga pamatan-on kag subong man ang mga may edad na nga nagaabuso sa ginareseta nga mga bulong agod magkalma sila, malimtan ang ila problema, mangin alerto, magniwang, ukon agod ma-high. Ang pila sining ginaabusuhan pirme nga mga bulong masapwan sa madamo nga puluy-an: mga pain reliever, pangpakalma, pangpapagsik, kag mga tranquilizer.b Ginaabusuhan man ang mga bulong nga mabakal bisan wala na sing reseta subong sang sleeping pills, bulong sa sip-on kag mga alerdyi.

Ini nga problema lapnag kag labi pa gid nga nagadugang. Halimbawa, sa mga bahin sang Aprika, Europa, kag Bagatnan nga Asia, ang pag-abuso sa ginareseta nga mga bulong mas lapnag sangsa pag-abuso sa ilegal nga mga droga. Sa Estados Unidos, ang pag-abuso sa ginareseta nga bulong mas malala pa sangsa halos tanan nga ilegal nga droga luwas lang sa marijuana. Suno sa bag-o nga report sang isa ka pamantalaan, nagadamo ang mga tin-edyer (12 tubtob 17 anyos) nga “nagaabuso sa ginareseta nga mga bulong sangsa cocaine, heroina kag shabu, bisan pa tingubon ining tatlo.” Ang matuod, madamo ang nagabakal sang ginareseta nga bulong, amo nga nagadamo ang nagahimo sang peke nga mga bulong.

Paano mo maamligan ang imo kaugalingon kag ang imo kabataan batok sa pag-abuso sa bulong—ginareseta man ukon ginadumilian? Ini nga mga pamangkot binagbinagon sa masunod nga mga artikulo.

[Mga Nota]

[Kahon sa pahina 3]

“Ang pagkaadik sa droga amo ang sigesige nga paggamit sang bulong bisan wala sing balatian, kag padayon nga paggamit sini wala sapayan sang halit ukon katalagman,” siling sang Physicians’ Desk Reference. Ang pagkaadik amo ang wala sing kontrol nga paggamit sang droga kag sobra nga paghandum sa sini.

Ang pagkaanad sang lawas sa bulong makita kon may malain nga epekto sa pasyente ang pag-untat sa paggamit sang ginareseta nga bulong subong sang mga bulong nga halin sa opium. Normal ini nga reaksion sang lawas kag indi ini makabig nga pagkaadik.

Ang pagkaresistensiado sa bulong nagapatuhoy sa pagdugang sang dosis agod makahatag sing amo gihapon nga epekto sa pagpahaganhagan sang sakit.