Depresyon—Paano ini Mabulong?

“AKO kag ang akon bana nagpakonsulta na sa doktor, naghimo sing mga pagbag-o sa amon pagkabuhi, naghimo sing maayo nga rutina kag nanikasog nga sundon ini,” siling ni Ruth nga nagaantos sang depresyon sa sulod na sang pila ka tuig. “Daw nakita na namon ang epektibo nga pagbulong, kag nauluumpawan na ako karon. Pero sang wala pa, ang pagpalangga sang akon bana kag mga abyan nakabulig sa akon nga indi madulaan sing paglaum.”

Suno sa eksperiensia ni Ruth, ang mga tawo nga may clinical nga depresyon nagakinahanglan gid sang pagsuporta kag sang nagakaigo nga pagbulong. Indi dapat pagpabay-an ang depresyon kay kon kaisa mahimo ini bangdan sang kamatayon. Halos duha ka libo ka tuig ang nagligad, nahibaluan ni Jesus nga makabulig ang eksperiensiado nga mga manugbulong, kay nagsiling sia nga ‘ang mga nagamasakit nagakinahanglan sang manugbulong.’ (Marcos 2:17) Buot silingon nga daku ang mabulig sang mga manugbulong agod mapahaganhagan ang pag-antos sang mga may depresyon.a

Mga Bulig

May madamo nga paagi sa pagbulong sang depresyon. Nagadepende ini sa sintomas kag kon daw ano kalala ang balatian. (Tan-awa ang kahon sa “Mga Klase sang Depresyon”) Mahimo mabuligan sang doktor ang madamo nga tawo, pero ang iban nagakinahanglan sang espesyalista. Mahimo magreseta ang doktor sang antidepressant nga bulong ukon magpanugda sang iban pa nga pagpabulong. Ang iban nabuligan sang herbal nga mga bulong, pagkontrol sa ginakaon, kag nagakaigo nga ehersisyo.

Ang Kalabanan nga mga Problema

1. Ang maayo nga mga abyan nga may diutay lang ukon wala sing nagakaigo nga ihibalo sa pagbulong, mahimo manugda kon ano nga pagpabulong ang imo dapat batunon ukon likawan. Mahimo nga ipilit nila ang ila opinyon sa kon bala dapat ka mag-inom sing herbal, sang ginareseta nga bulong, ukon indi ka na lang mag-inom sing bisan ano nga bulong.

Binagbinaga: Siguraduha nga masaligan ang mga panugda nga imo batunon. Kay sa ulihi, ikaw man gihapon ang magadesisyon.

2. Ang kapaslawan mahimo mangin rason kon ngaa untatan sang pasyente ang pagpabulong, kay sa pamatyag niya wala sia gihapon nagaayo ukon may malain ini nga epekto sa iya.

Binagbinaga: “Sa wala sing laygay, ang mga katuyoan napaslawan, apang sa kadam-an sang manuglaygay napalig-on sila.” (Hulubaton 15:22) Mangin mas epektibo ang isa ka pamaagi sang pagpabulong kon may maayo nga komunikasyon ang pasyente kag ang doktor. Isugid sa imo doktor kon ano ang imo ginakabalak-an ukon ginabatyag, kag pamangkuta sia kon puede maislan ang paagi sa pagbulong ukon dapat ini padayunon agod makita ang mga resulta.

3. Ang sobra nga kompiansa mahimo mangin rason nga untatan na sang mga pasyente ang pagpabulong bangod daw maayo na ang ila pamatyag. Mahimo nga nalipat na sila kon ano ang ila ginabatyag sang wala pa sila makapabulong.

Binagbinaga: Ang pag-untat dayon sang pagbulong nga wala nagakonsulta sa doktor mahimo peligruso ukon makamamatay pa gani.

Bisan pa ang Biblia indi isa ka libro parte sa medisina, ang awtor sini nga si Jehova nga Dios, amo ang aton Manunuga. Binagbinagon sang masunod nga artikulo ang lugpay kag panuytoy sang Pulong sang Dios sa mga nagaantos sang depresyon kag sa mga nagaatipan sa ila.