Nakabulig ang Magmata! nga Maluwas ang Wala Pa Matawo nga Lapsag

● Si Anita nga taga-Mexico may tatlo ka kabataan kag nagabusong naman.a Ginsilingan niya ang iya bana nga indi na sia gusto magbata sing isa pa kag himuon niya ang tanan para indi ini madayon. Nagsiling pa sia gani nga mahikog sia! Sina nga tion, nagatuon si Anita sing Biblia upod sa isa sa mga Saksi ni Jehova pero daw wala man sia nagabag-o. “Kaarogante gid sa akon,” siling niya.

Ginpaathag sang Saksi nga nagatudlo kay Anita ang mga prinsipio sa Biblia nga makabulig sa iya. Halimbawa, ginpakita niya kay Anita nga ang kabuhi sang wala pa matawo nga lapsag sagrado sa Dios. Sa Israel sang una, kon mahalitan sang isa ang nagabusong kag napatay sia ukon ang iya ginabusong, pagahukman sang Kasuguan sang Dios ang nakasala subong manugpatay. (Exodo 21:22, 23)b Pero wala ini sa bungog ni Anita kay nakadesisyon na sia.

“May nagsiling sa akon nga may bulong nga kon i-indyeksion ko,” siling ni Anita, “mahulog ang akon ginabusong. Gani ginbakal ko ato nga bulong kag ginpangabay ang isa ko ka abyan nga i-indyeksion ini sa akon. Pero wala gihapon ako mahulugan. Nahibaluan ko sang ulihi nga tubig gali ang gin-indyeksion niya sa akon, kay indi niya gusto nga madalahig sa akon ginaplano.”

Pero gusto gihapon ni Anita nga ipahulog ang iya ginabusong. Sang apat na ka bulan ang iya tiyan, nakakita gid man sia sing doktor nga magahulog sini. Anom ka adlaw antes sang iya iskedyul, ginhatagan sia sang Saksi sing kopya sang artikulo nga “Ang Lista-Adlawan sang Wala Pa Mabun-ag nga Bata,” sa Nobiembre 8, 1980 nga Magmata! Sa katapusan sang “lista-adlawan” mabasa: “Karon ginpatay ako sang akon iloy.” Natandog gid sini si Anita, amo nga inoras sia nga naghinibi. “Ini nga artikulo nakabulig sa akon nga marealisar nga sala ang gusto ko himuon,” siling niya.

Ginbun-ag ni Anita ang mapagros nga lapsag nga babayi. “Subong,” siling ni Anita, “nalipay ako nga nakilala ko si Jehova nga Dios, kag ginahigugma ko gid sia.” Ginatudluan man niya karon ang iya bata parte sa Pulong sang Dios para magdaku sia nga nagahigugma man kay Jehova. Ang matuod, ang iya bata nagsiling nga utang niya sa Dios ang iya kabuhi. Una, bangod ang Dios amo ang Ginahalinan sang kabuhi, kag ikaduha, ang mga panudlo sang iya Pulong, subong sang mabasa sa Magmata!, nagluwas sang iya kabuhi.

[Mga Nota]