Makapapagros nga Pagkaon Para sa Tanan—Malapit Na!

MAY mga paagi para mangin luwas sa katalagman ang imo ginakaon. Pero may mga butang nga indi mo makontrol. Halimbawa, indi mo gid mausisa ang tanan nga pagkaon antes mo ini baklon ukon ihanda. Mahimo nga ang imo ginbakal nga pagkaon naproseso na kag malayo pa ang ginhalinan. Kag ang iban nga mabakal mo mahimo kontaminado sang mga kemikal nga halin sa hangin, tubig, ukon duta.

Sa report nga “Foodborne Disease Control: A Transnational Challenge,” ang mga opisyal sang World Health Organization nagsiling nga ang iban nga problema parte sa pagkaon “indi masolbar sang isa lang ka pungsod; nagakinahanglan ini sang kooperasyon sang bilog nga kalibutan.” Gani, ang balatian nga halin sa pagkaon problema gid sang kalibutan!

Indi katingalahan nga madamo ang indi magpati kon magsiling kita nga sa dili madugay makapapagros na ang pagkaon para sa tanan. Kay man si “Jehova, ang Ginuo sang bug-os nga duta,” nagpromisa nga solusyonan niya ang problema sa pagkaon. (Josue 3:13, NW) Mahimo masiling ang iban nga ang delikado nga mga pagkaon nagapamatuod nga ang Dios indi masaligan. Pero hunahunaa: Kon pabay-an sang weyter nga magpan-os ang isa ka manamit nga pagkaon, mabasol bala ang kusinero? Siempre indi.

Sing kaanggid, ang mga tawo kag indi ang Manunuga ang balasulon kon ngaa nagakahalitan ang suplay sang pagkaon sa duta. Nagalapnag ang makahalalit nga pagkaon bangod sa tawo. Pero nagpromisa ang Dios nga ‘laglagon niya ang mga nagalaglag sang duta.’—Bugna 11:18.

Ginpakita sang Dios nga nagaulikid gid sia sa kalidad sang aton ginakaon. Wala lamang niya ginhimo ang duta kag mga kahoy nga “maanyag sa itololok” kundi ‘maayo man nga kalan-on.’ (Genesis 2:9) Bisan pa nagabalatian na ang mga tawo bangod sa pagkadihimpit, ginhatagan gihapon ni Jehova nga Dios ang iya katawhan sing detalyado nga pagsulundan agod maproteksionan ang ila pagkaon kag panglawas.—Tan-awa ang kahon nga “Mga Pagsulundan Para sa Ikaayong Lawas.”

Ano nga sahi sang pagkaon ang gusto sang Dios nga kaunon naton? Ang Biblia nagasiling: “Ginapatubo niya ang mga hilamon nga sa kahayupan, kag ang gamhon nga sa pag-alagad sang tawo, agud nga makapagowa sia sing kalan-on gikan sa duta, kag alak nga nagapasadya sang tagiposoon sang tawo, lana nga nagapakanaw sang iya nawung, kag tinapay nga nagapabakud sang tagiposoon sang tawo.” (Salmo 104:14, 15) Nagsiling man ini nga ang “tagsa ka butang nga nagagiho nga nagakabuhi manginkalan-on.”—Genesis 9:3.

Parte sa palaabuton, ang iya Pulong nagapromisa: “Magahatag sia sing ulan tungud sa imo binhi nga imo isab-ug sa duta, kag sing kalan-on sang patubas sang duta, kag ini magatambok kag magabugana. Sa sadto nga adlaw ang imo kahayupan magahalab sa malapad nga mga halalban.” (Isaias 30:23) Huo, ang makapasubo nga mga balita subong pagabuslan na sang pahibalo: “Makapapagros nga pagkaon para sa tanan!”

[Blurb sa pahina 9]

Ang Manunuga nagapromisa nga sa ulihi may yara kita bugana kag makapapagros nga pagkaon

[Kahon sa pahina 8]

“MGA PAGSULUNDAN PARA SA IKAAYONG LAWAS”

Mga 3,500 ka tuig na ang nagligad, ginhatagan ang Israel sing Kasuguan. Ginproteksionan sini nga Kasuguan ang mga Israelinhon batok sa madamo nga balatian nga halin sa pagkaon. Binagbinaga ang masunod nga mga sugo:

● Indi maggamit sing mga kubyertos kag mga pinggan nga nakatandog sa patay nga sapat: “Bisan ano nga gamit ini nga ginagamit sa bisan ano nga buluhaton; dapat ilumoy ini sa tubig, kag mangindimatinlo ini tubtub sa kahaponon; niyan manginmatinlo ini.”—Levitico 11:31-34.

● Indi magkaon sang sapat nga napatay nga wala maihaw: “Ang bisan ano nga butang nga mapatay sa iya kaugalingon dili ninyo pagkaonon.”—Deuteronomio 14:21.

● Indi pagpadugaya ang sobra nga pagkaon: “Sa adlaw nga madason kaonon ang nabilin sini, apang ang mabilin sang unud sang halad sa adlaw nga ikatlo sonogon sa kalayo.”—Levitico 7:16-18.

Si A. Rendle Short, M.D., natingala gid kon ngaa ang Kasuguan nga ginhatag sa mga Israelinhon—kon ikumparar sa mga kasuguan sadto sang iban nga pungsod—puno sang “praktikal kag makatarunganon nga mga pagsulundan para sa ikaayong lawas.”