Mga Paagi sa Pagbulong nga Tal-us sa Pagtughong sing Dugo

ANG kilala nga mga eksperto halin sa 40 ka pungsod nagtipon sa Moscow para sa 60^th Jubilee International Congress of the European Society for Cardiovascular and Endovascular Surgery sang Mayo 20-22, 2011. “Para sa mga doktor, ini nga klase sang mga pagtilipon importante gid pareho sang Olympics para sa mga atleta,” siling sang dyurnalista sa TV sa Rusya.

Sa sining tatlo ka adlaw nga kombension, nakakuha gid sing atension ang booth nga nagahatag sing impormasyon parte sa mga paagi sa pagbulong nga tal-us sa pagtughong sang dugo. Ang Hospital Information Services sang mga Saksi ni Jehova (HIS) ang nagabantay sa sini nga booth. Nagkuha sa sini ang mga doktor sing ginatos ka folder sang mga impormasyon, libro, DVD, kag mga artikulo sa medisina parte sa sining importante nga topiko. Madamo gid ang nagkuha sang DVD parte sa video nga Transfusion-Alternative Strategies—Simple, Safe, Effective.a

Madamo nga doktor nga nagkadto sa booth ang nag-ugyon nga kinahanglan likawan ang pag-uyang sang dugo sa tion sang pag-opera. Ang manug-opera sa tagipusuon halin sa Italya nga nagpamulongpulong sa sini nga pagtinipon nagsiling nga pamilyar gid sia sa mga Saksi ni Jehova kag nangin madinalag-on sia sa 70 ka operasyon sa tagipusuon nga wala nagagamit sing dugo sa mga Saksi niya nga pasyente. Nagsiling man sia nga normal na lang sa iya clinic ang pag-opera nga wala nagagamit sing dugo. Ang isa ka propesor sa Deutsches Herzzentrum Berlin (German Heart Institute Berlin) nagkuha sang DVD para sa iya kag para sa isa pa ka propesor. Ginsilingan niya ang mga tumalambong nga bag-o lang niya naoperahan ang lapsag nga nagabug-at lamang sang 2.5 ka kilo kag wala sia naggamit sing dugo. Kag sa iya clinic, madamo na sila sing naoperahan nga lapsag nga mas mamag-an pa sa sini.

Isa ka bulan pagkatapos sang kombension sa Moscow, ang mga doktor sa lainlain nga pungsod nagtambong sa Fourth Belomorsk Symposium of Anesthesiologists and Intensive Care Physicians of the Northwest Region of Russia, sa siudad sang Arkhangel’sk. Nagbutang ang HIS sang booth didto, kag sa liwat nakakuha ini sing atension. Sang nakita sang doktor halin sa St. Petersburg ang mga materyal nga ginpresentar, nagsiling sia, “Amo gid ini ang kinahanglan namon!” Nasubuan gid sia nga bangod lang naandan na, ginatughungan gihapon sang iban nga doktor sing dugo ang mga pasyente nga napaso. “Makabulig gid ang inyo mga impormasyon sa komperensia parte sa pagbulong sa mga pasyente nga napaso nga ginaplano nga hiwaton sa St. Petersburg,” siling niya.

Sa bilog nga kalibutan, nagadamo na gid ang mga doktor nga nakarealisar nga mas epektibo ang pagbulong kag pag-opera nga wala nagagamit sing dugo. Wala kita makahibalo kon bala sa ulihi, amo na ini ang himuon nga standard nga pagbulong sa bilog nga kalibutan.