6 Mangayo sing Bulig sa Dios
“Sang ginbiyaan kami sang akon bana, nangamuyo ako sa Dios nga buligan niya kami sang akon mga bata. Ginsabat gid niya ako. Wala gid sing nakulang sa amon mga kinahanglanon. Ginbuligan kag gingiyahan niya kami.”—MAKI, JAPAN.
SA SINING materyalistiko nga kalibutan, daw indi na interesado sa Dios ang mga tawo. Pero, importante gihapon kita sa aton Manunuga kag gusto niya nga mangin madinalag-on kita. Mabasa ini sa Isaias 41:10: “Dili ka mahadluk, kay ako nagaupud sa imo, . . . buligan ko ikaw.”
Sang nagligad nga artikulo, ginbinagbinag naton kon paano kita ginabuligan sang Dios paagi sa mga pagsulundan sa Biblia. (2 Timoteo 3:16) Pero ang Biblia indi lamang libro sang mga giya. Ginasugid man sini ang matahom nga personalidad sang Dios kag ang iya gugma sa aton. Gani, madamo nga Cristianong ginikanan—kompleto man ukon nagasolo—ang nakapamatuod nga kon sundon naton ang ginatudlo sang Biblia, mabatyagan naton ang kaayo sang Dios.
Robert, Austria: “Si Jehova nga Dios mas maayo nga amay ukon iloy sangsa kay bisan sin-o. Nahibaluan niya ang kinahanglanon sang aton kabataan, kag kon paano sila proteksionan. Gani, pirme ako nagapangamuyo sa iya upod sa akon bata nga babayi.”
Ayusa, Japan: “Nalipay gid ako nga makita ang akon bata nga nagasalig sa bulig ni Jehova kon magsiling sia, ‘Kaupod naton si Jehova, gani mangin OK lang ang tanan.’”
Cristina, Italy: “Kon indi ko masarangan solbaron ang problema, nagapangamuyo ako kay Jehova kag ginatugyan ini sa iya. Mabatyagan ko dayon ang kalinong, kay nahibaluan ko nga masolbar ini sa pinakamaayo nga paagi.”
Laurentine, France: “Napamatud-an ko gid nga ginapakamaayo ako ni Jehova subong nagasolo nga ginikanan. Ginabuligan gid niya ang mga nagaantos kag ang mga ilo.”
Keiko, Japan: “Ang Dios wala sing ginapasulabi. Ginaulikdan niya ang tanan nga pamilya, kompleto man ukon nagasolo ang ginikanan.”—Binuhatan 10:34.
Ginpakita man ni Jesucristo ang kaluoy kag kabalaka sang Dios sa aton sang magsiling sia: “Kari sa akon, kamo tanan nga ginabudlayan kag ginabug-atan, kag paumpawan ko kamo . . . , kay ako malulo kag mapainubuson sing tagipusuon, kag makakita kamo sang kaumpawan sa inyo kaugalingon.” (Mateo 11:28-30) Sigurado gid nga gusto ni Jesus kag sang iya Amay nga si Jehova nga Dios nga mabatyagan naton ang ila mapinalanggaon nga pag-atipan. Ang Salmo 34:8 nagasiling: “Tilawi kag tan-awa nga maayo ang GINOO!” Huo, gusto sang Dios nga mapamatud-an mo nga makabulig gid ang iya mga laygay, kag para ini sa imo kaayuhan. Batunon mo bala ang iya pangagda?