Ang Mabakod nga Utok sang Arctic Ground Squirrel

SAMTANG nagatulog sing malawig ini nga sapat, ang temperatura sang iya lawas nagabugnaw. Daw ano ini kabugnaw? May pila ka arctic ground squirrel nga nakalab-ot sa -2.9°Celcius! Sa sina nga kabugnawon, mapaabot naton nga magatig-a ang iya utok. Paano ini makalampuwas?

Binagbinaga: Kada duha ukon tatlo ka semana sa tion sang malawig nga pagtulog sini, nagakurog ang arctic ground squirrel para magbalik sa normal nga temperatura ang lawas sini nga 36.4°Celcius kag indi na ini matugnawan liwat sa sulod sang mga 12 tubtob 15 ka oras. Nagasiling ang mga researcher nga sa sini nga pagpainit, bisan pa malip-ot lang, may importante nga papel para makalampuwas ang utok. Dugang pa, ang ulo sini daw nagapabilin nga mas mainit kon ipaanggid sa lawas sa tion sang malawig nga pagtulog. Sa isa ka eksperimento sa laboratoryo, ang temperatura sang liog sini wala nagnubo sa 0.7°Celcius.

Kon matapos na ang malawig nga pagtulog sang squirrel, nagabalik sa normal ang pagpanghikot sang utok sini sa sulod sang mga duha ka oras. Ang matuod, ginapakita sang isa ka pagtuon nga mas maayo ang pagpanghikot sang utok sini pagkatapos sang malawig nga pagtulog! Natingala gid ang mga eksperto sa madasig nga pagbalik sa normal sang utok sini. Ginapaanggid nila ini sa pagtugdo sang bag-o nga tanom pagkatapos sang pila ka adlaw nga sunog sa kagulangan.

Nagalaum ang mga researcher nga paagi sa ila pagtuon sa arctic ground squirrel mas maintiendihan pa nila ang kapasidad sang utok sang tawo. Tulumuron nila nga mahibal-an pa ang parte sa kon paano malikawan ukon mabaliskad ang pagkaguba sang mga selula bangod sa mga balatian sa utok, lakip ang Alzheimer.

Ano sa banta mo? Ang mabakod bala nga utok sang arctic ground squirrel resulta sang ebolusyon? Ukon gindesinyo ini?