Ang Suga sang Photuris nga Ipot-ipot

ANG suga, ukon organo nga nagapagua sang kasanag sang Photuris nga ipot-ipot nakulapan sang nagakudolkudol nga mga himbis nga nagapasanag pa gid sang kasanag nga ginapagua sang insekto.a

Binagbinaga: Nadiskobrehan sang mga researcher nga ang magagmay nga mga himbis sa nagasiga nga bahin sang lawas sang pila ka ipot-ipot nagakudolkudol, nga daw nagasampaw-sampaw nga tile. Nagatuwas ang punta sini sing mga 3 micrometer—beinte ka beses nga mas magamay sangsa buhok sang tawo. Pero bisan amo sini kagamay ang pagtuwas, mga 50 porsiento nga mas masanag ini sangsa wala nagatuwas nga himbis!

Ini bala nga desinyo magapauswag sang kasanag sang mga light-emitting diode (LEDs), nga ginagamit subong sa elektroniko nga mga kagamitan? Para mahibaluan, ginbutangan sang mga sientipiko ang LEDs sing kudolkudol pareho sang himbis sang ipot-ipot. Ang resulta? Nagsanag pa gid ang LEDs sing 55 porsiento! Ang physicist nga si Annick Bay nagsiling: “Ang pinakaimportante nga bahin sini nga eksperimento amo nga ginapakita sini nga madamo kita sing matun-an kon obserbahan naton sing maayo ang kinaugali.”

Ano sa banta mo? Ang suga bala sang Photuris nga mga ipot-ipot resulta sang ebolusyon? Ukon gindesinyo ini?