PAGBANTAY SA KALIBUTAN

Espanya

Ang isa ka grupo sang sientipiko nagapati nga ang mga ginahimo sang tawo mahimo amo ang isa sang gintunaan sang linog sang 2011 sa Lorca, sa nabagatnan nga Espanya nga nagpatay sang siam ka tawo kag naghalit sa madamo. Nasapwan sang mga geologist nga may kaangtanan ang makamamatay nga linog sa mga lugar nga ginakuhaan sang madamo nga tubig para sa irigasyon.

China

Ang mga turista halin sa China nagagasto sing $102 bilyones (U.S.) sa pagbiyahe sa bilog nga kalibutan sang 2012. Suno sa UN World Tourism Organization, amo pa lang ini ang tion nga nanguna ang China sa may pinakadaku nga gasto sa pagbiyahe sa bilog nga kalibutan. Ginlabawan pa sini ang Germany kag Estados Unidos. Ang mga turista nga halin sa sining tagsa ka pungsod naggasto sing mga $84 bilyones (U.S.).

Japan

Ginreport sa BMJ, isa ka balasahon parte sa medisina sa Britanya, ang pagtuon sa mga 68,000 ka tawo sa Japan nga nagaedad sing mga 23. Nasapwan sang mga researcher nga ang mga babayi nga natawo sang mga 1920 asta 1945 nga nagapanigarilyo antes mag-edad sing 20 mas manubo ang kabuhi sing mga pulo ka tuig sangsa mga babayi nga wala gid nagapanigarilyo; ang mga lalaki mas manubo sing walo ka tuig.

Mauritania

Gindumilian ang pagpasulod, paghimo, kag paggamit sang mga plastic bag agod amligan ang mga sapat sa dagat kag duta, nga mahimo mapatay kon makaon nila ini. Ginapasanyog sang gobierno ang paggamit sang nagakadunot nga mga suludlan.

Bilog nga Kalibutan

Nagabayad sing mga $50 bilyones (U.S.) kada tuig ang mga kompanya sang insurance para sa nahalitan sing mga kalamidad. Nagataas pa gid ini sing duha ka pilo kada dekada halin sang 1980.