Paano Kamo Magsugtanay?

NGAA MABUDLAY?

Indi pareho ang gusto mo kag sang imo tiayon. Pero ang matuod indi magkubos sa tatlo ang inyo pililian:

1. Mahimo mo ipilit ang imo gusto asta nga magpasugot ang imo tiayon.

2. Mahimo pasugtan mo na lang ang gusto sang imo tiayon.

3. Mahimo nga magsugtanay kamo nga duha.

‘Pero indi ko gusto nga magsugtanay kami,’ mahimo ka magsiling. ‘Daw pareho lang nga indi namon mahimo nga duha ang amon gusto!’

Makasalig ka nga ang pagsugtanay wala nagakahulugan nga pareho kamo nga indi magmalipayon kon himuon ninyo ini sing nagakaigo. Pero antes naton hibaluon kon paano magsugtanay, may pila ka butang nga dapat mo hibaluon.

ANO ANG DAPAT MO MAHIBALUAN?

Agod magsugtanay dapat magbuligay. Mahimo nga naanad ka magdesisyon nga ikaw lang sang wala ka pa sing tiayon. Pero lain na subong. Dapat ang pinakaimportante sa imo kag sa imo tiayon amo ang inyo pag-asawahay, indi ang imo lang nga gusto. Binagbinaga ang mga bentaha sini imbes nga ang mga disbentaha. “Mas maayo ang solusyon nga mahimo sang duha ka tawo sangsa isa lang,” siling sang asawa nga si Alexandra.

Agod magsugtanay dapat mangin mabinatunon. “Indi man kinahanglan nga mag-ugyon ka na lang sa ginahambal ukon ginapatihan sang imo tiayon, pero dapat binagbinagon mo man ang iya gusto,” siling sang manuglaygay sa pag-asawahay nga si John M. Gottman. “Kon nagapungko ka nga nagakursimano kag nagalungolungo (ukon ginahunahuna mo ini nga himuon) samtang gusto hambalan sang imo tiayon ang problema, wala gid sing pasingadtuan ang inyo pag-istoryahanay.”a

Agod magsugtanay dapat magsakripisyo. Indi gid magmalipayon ang pag-asawahay kon ang isa nagapati nga “sundon mo ako kay amo ini ang pinakamaayo.” Mas maayo kon ang mag-asawa mapatugsilingon. “May mga tion nga nagapasugot ako para malipay ang akon bana, pero kon kaisa, sia man ang nagahimo sini,” siling sang asawa nga si June. “Dapat amo sina ang pag-asawahay—ang paghunahuna sang imo mahimo para sa imo tiayon, indi lang ang imo makuha sa iya.”

ANO ANG MAHIMO MO?

Sugdi sing nagakaigo. Kon paano ginsugdan ang pag-istoryahanay, sa masami amo man sina kon matapos. Kon sugdan mo ini sing masakit nga mga tinaga, mahimo nga indi gid kamo magsugtanay. Gani sunda ang laygay sang Biblia: “Panapti ang inyo kaugalingon sang . . . kaawa, kaayo, pagpaubos sang hunahuna, kalulo, kag pagkamapinasensiahon.” (Colosas 3:12) Ini nga mga kinaiya ang makabulig sa imo kag sa imo tiayon nga likawan ang pagbaisay kag solusyonan ang problema.—Prinsipio sa Biblia: Colosas 4:6.

Hibalua kon sa diin kamo mag-ugyunay. Kon padayon gihapon nga nagabaisay kamo, mahimo nga nagapokus lang kamo sa wala ninyo ginaugyunan. Gani hibalua kon sa diin kamo mag-ugyunay. Tilawi ini:

Maghimo ang kada isa sa inyo sing listahan nga may duha ka kolumna. Sa una nga kolumna, isulat ang mga butang nga gusto mo gid. Sa ikaduha nga kolumna, isulat ang mga butang nga pamatyag mo mapasugot ka. Dayon istoryahi ninyo ang inyo ginlista. Mahimo nga magsugtanay man gali kamo sa mga butang nga pamatyag ninyo imposible gid. Kon amo, indi dapat mabudlay ang pagsugtanay. Pero bisan indi pareho ang inyo ginlista, mabuligan kamo sini nga mahibaluan kon ano gid ang problema.

Mag-istoryahanay. May pila ka problema nga mahapos lang solbaron. Pero sa mabudlay nga mga problema, mapabakod ang pag-updanay sang mag-asawa kon istoryahan nila ang solusyon nga mahimo indi nila mapamensaran kon wala sila nagaistoryahanay.—Prinsipio sa Biblia: Manugwali 4:9.

Mangin handa nga bag-uhon ang imo pagtamod. Ang Biblia nagasiling: “Ang kada isa sa inyo maghigugma man sang iya asawa subong sang paghigugma niya sa iya kaugalingon; kag ang asawa dapat may tudok nga pagtahod sa iya bana.” (Efeso 5:33) Kon may gugma kag pagtahod ang mag-asawa, handa nila nga binagbinagon ang pagtamod sang isa kag isa, kag batunon ini. Ang bana nga si Cameron nagsiling, “May mga butang nga indi mo anay gusto himuon—pero bangod sa impluwensia sang imo tiayon—sa ulihi manamian ka na sa sini.”—Prinsipio sa Biblia: Genesis 2:18.