Ang Katuyuan sang Bungot sang Kuring

ANG kalabanan nga mga kuring wala nagatulog kon gab-i. Ang ila bungot amo ang nagabulig sa ila ilabi na kon madulom para mahibaluan ang malapit nga mga butang kag madakop ang ila biktima.

Binagbinaga: Ang bungot sang kuring nagaangot sa mga tisyu nga may madamo nga nerve. Ini nga mga nerve tama ka sensitibo bisan sa pinakamahinay nga huyop sang hangin. Amo kon ngaa mahibaluan sang mga kuring ang malapit nga mga butang bisan indi nila makita—bentaha gid ini kon madulom.

Ang bungot sensitibo man sa pressure, amo nga ginagamit ini sang mga kuring agod mahibaluan ang posisyon kag hulag sang isa ka butang ukon biktima. Nagabulig man ini sa mga kuring nga mabanta ang kadakuon sang buho antes sila magsulod sa sini. Ang Encyclopædia Britannica nagsiling nga “wala pa mahangpan sing bug-os ang pagpanghikot sang bungot (vibrissae); pero, ang nahibaluan lang nga kon utdon ini, ang kuring mabudlayan gid.”

Nagadesinyo ang mga sientipiko sing mga robot nga may mga sensor nga daw pareho sang bungot sang kuring para makalikaw ang mga robot sa mga balagbag kon nagahulag sila. Ini nga mga sensor, nga ginatawag nga e-whiskers, “magamit sa moderno nga mga robot, sa kontrol sang de-makina nga mga kagamitan, kag magamit man ini sa mga butang nga may kabuhi,” siling ni Ali Javey, isa ka sientipiko sa University of California, sa Berkeley.

Ano sa banta mo? Ang bungot bala sang kuring resulta sang ebolusyon? Ukon gindesinyo ini?