Pagtalupangod sa Asia

Ang Edukasyon Nagaamlig sa Kabataan

Ang mga bata yara sa daku nga katalagman nga maabusuhan kon indi sila matudluan sang ila mga ginikanan tuhoy sa sekso samtang bata pa sila, suno sa mga Intsik nga eksperto sa kasuguan. Ang mga abogado sa China nag-uyat sang mga 8,000 ka kaso tuhoy sa seksuwal nga pag-abuso sa mga bata sang nagligad lang nga apat ka tuig. Ang mga bata “amo ang ginapuntariya kag mahapos sila mabiktima,” siling sang propesor sa kasuguan sa Beijing Normal University. “Ang edukasyon importante sa pagtapna sa seksuwal nga pag-abuso.”

ANG GINASILING SANG BIBLIA: Ang maalam nga mga ginikanan nagatudlo sa ila mga bata kon paano amligan ang ila kaugalingon batok “sa tawo nga nagahambal sing kabutigan.”—Hulubaton 2:1, 10-12.

Nagakapatay sa Tapos sang Bagyo

Suno sa isa ka pagtuon, ang aberids nga nagakapatay nga lapsag nga babayi sa Pilipinas pagkatapos sang bagyo mas madamo sing mga 15 sa kada 1 nga nagakapatay sa bagyo mismo. Ang pila ka posible nga rason amo nga wala pa sing trabaho sa tapos sang bagyo, ang daku nga gasto sa pagpanukod liwat, kag ang paagi sa paghatag sing mga kinahanglanon sang mga lapsag nga babayi, lakip ang nutrisyon kag pag-atipan sa panglawas.

ANG GINASILING SANG BIBLIA: ‘Ipaambit ang inyo pagkaon sa ginagutom, papuy-a sa inyo balay ang mga imol kag mga wala sing puluy-an, hatagi sing panapton ang tawo nga hubo.’—Isaias 58:7.

Paghikog sang mga Tigulang sa South Korea

Sang 2011, ang sobra sa 25 porsiento sang tanan nga naghikog sa South Korea ginhimo sang 65 anyos pataas. Ginabasol sang pila ka researcher ang nagabag-o nga panimuot sa pag-atipan sa mga tigulang kag ang kapigaduhon—halos 50 porsiento sang mga tigulang sa South Korea ang imol. Wala pa katunga sang mga pumuluyo sa South Korea karon ang nagahunahuna nga dapat buligan sang kabataan ang ila nagatigulang nga mga ginikanan.

ANG GINASILING SANG BIBLIA: “Padunggi ang imo amay kag ang imo iloy.”—Efeso 6:2.