Kontrolado Mo Bala ang Imo Kabuhi?

SANG bataon ka pa, ano ang imo mga handum sa kabuhi? Ayhan gusto mo mangasawa ukon mamana, mangin eksperto sa isa ka obra, ukon makatigayon sing makalilipay nga propesyon. Pero indi naton pirme matuman ang aton mga handum. Mahimo magbag-o sing bug-os ang imo mga plano bangod sang wala ginapaabot nga mga kabudlayan. Amo sina ang natabo kanday Anja, Delina, kag Gregory.

• Si Anja, nga taga-Germany, may kanser sa edad nga 21 anyos, kag halos nagatener na lang sia sa balay.

• Si Delina, nga taga-Estados Unidos, may balatian sa kaunuran nga ginatawag dystonia. Sia man ang nagaatipan sa iya tatlo ka magulang nga dis-ebol na.

• Si Gregory, nga taga-Canada, nagabalatian sing malubha nga anxiety disorder.

Bisan pa sang ila mga kahimtangan, kontrolado gihapon nanday Anja, Delina, kag Gregory ang ila kabuhi. Ngaa?

Ang hulubaton sa Biblia nagasiling: “Kon maluya ang imo buot sa tion sang kabudlayan, magaluya man ang imo kusog.” (Hulubaton 24:10, footnote) Maathag ang ginapahangop sini: Importante gid ang imo panimuot. Ang mga tawo nga nagapadala sa ila negatibo nga panimuot nagapabaya na lang sa mahimo pa kuntani nila, samtang ang mga may positibo nga panimuot masami nga nagatipon sing kusog agod makontrol nila ang ila kabuhi.

Binagbinaga kon paano ina ginhimo nanday Anja, Delina, kag Gregory.