TOPIKO SA KOBER | KONTROLADO MO BALA ANG IMO KABUHI?
Makontrol Mo Bala ang Imo Kabuhi?
ANG kabuhi ginapaanggid sang iban sa paghampang sing baraha, ang kadalag-an sang isa wala nagadepende sa maayo nga mga baraha kundi sa kon paano ini ginahampang. Sa karon, wala sing isa sa aton ang may perpekto nga mga baraha ukon kahimtangan. Sa masami, ang sekreto agod makontrol ini amo ang pagbaton sini nga kahimtangan kag himuon ang masarangan lang naton. Kon makontrol mo liwat ang imo kabuhi bisan pa sa indi maayo nga kahimtangan, maayo ina. Kon mag-uswag sa ulihi ang imo kahimtangan, mas maayo. Apang ang pinakamaayo, magaabot pa.
Ang Biblia nagasaad sang tion nga ang tanan nga tawo mangin malipayon kay may kontrol na sila sa ila kabuhi. Magamit na nila ang ila tanan nga ikasarang, nga wala na sing makapasubo nga kahimtangan, kabudlayan kada adlaw, kag negatibo nga balatyagon. (Isaias 65:21, 22) Ginapatuhuyan ini sang Biblia subong “matuod nga kabuhi.”—1 Timoteo 6:19.
“Magapatindog sila sing balay kag magapuyo sa sini, kag magatanom sila sing mga ulubasan kag magakaon sang bunga sini. Indi sila magpatindog kag iban ang magapuyo, ukon magtanom kag iban ang magakaon. Kay ang mga adlaw sang akon katawhan mangin kaangay sang mga adlaw sang kahoy, kag ang akon mga pinili magakalipay sa binuhatan sang ila kamot.”—Isaias 65:21, 22.