Ang Relihion Bala Nagakaalimunaw Na?

WALA ka na bala nagapati sa relihion? Kon amo, wala ka nagaisahanon. Sa madamo nga pungsod, nagadamo ang mga tawo nga nagakabig sang ila kaugalingon nga ‘indi relihioso’—nga nagapakita nga wala sing kasiguruhan ang madangatan sang relihion. Ang pila sina nga pungsod makita diri.

Ngaa Madamo ang Nagabiya?

Madamo ang rason kon ngaa indi na interesado ang mga tawo sa relihion. Mahimo nga bangod ini sa kasingki kag kagamo nga ginasakdag ukon ginakunsinti sang relihion, sa eskandalo sa sekso nga nagadalahig sa mga lider sang relihion, kag sa iban pa nga indi hilmunon nga rason, nga mahimo ginatunaan sang pagbiya sang madamo sa relihion. Nagalakip ini sang masunod:

• Materyal nga kahamungayaan: “Samtang mas nagamanggaranon ka, mas nangin indi ka relihioso,” siling sang Global Index of Religion and Atheism. Talalupangdon gid ina bangod sa madamo nga pungsod, nagadamo ang manggaranon. Sa iban nga lugar, ang mga tawo “nagapangabuhi [sing hamungaya] nga mahimo kahisaan bisan sang pinakabantog nga hari nga nagkabuhi sang nagligad nga duha ka gatos ka tuig,” siling ni John V. C. Nye, isa ka propesor sa economics.

  ANG GINASILING SANG BIBLIA: Gintagna sang Biblia nga “sa katapusan nga mga adlaw,” ang gugma sa kuarta kag kinasadya magabulos sa gugma sa Dios kag isigkatawo. (2 Timoteo 3:1-5) Ang manunulat sang Biblia, nga nakahibalo sang katalagman sa espirituwal bangod sa manggad, nagsiling kay Jehova nga Dios: “Indi ako pagpaimula ukon pagpamanggara.” Ngaa amo ina ang iya luyag? “Agod indi ako mabusog kag ipanghiwala ko ikaw,” siling niya.—Hulubaton 30:8, 9.

• Relihioso nga tradisyon kag moralidad: Ginatamod sang madamo nga tawo, ilabi na sang mga pamatan-on ang relihion nga indi mapuslanon sa pagpangabuhi. Ang iban wala na sing pagsalig sa relihion. “Kon talupangdon mo ang paggawi sang simbahan sa sulod sang mga siglo,” siling ni Tim Maguire, opisyal sang media sang Humanist Society Scotland, “ang mga tawo nagbiya sa [simbahan] bangod wala na sila nagapati sa sini subong sulundan sang moralidad.”

  ANG GINASILING SANG BIBLIA: Parte sa butig nga mga manunudlo, si Jesucristo nagpaandam: “Makilala ninyo sila sa ila mga bunga. . . . Ang tanan nga maayo nga kahoy nagapamunga sing maayo nga bunga, apang ang tanan nga malain nga kahoy nagapamunga sing malain nga bunga.” (Mateo 7:15-18) Ang “malain nga bunga” nagalakip sang pagpasilabot sa pulitika kag pagkunsinti sang mga paggawi nga nagapaakig sa Dios, kaangay sang homoseksuwalidad. (Juan 15:19; Roma 1:25-27) Ginbuslan man nila sang wala pulos nga mga ritwal kag tradisyon ang mapuslanon nga mga panudlo nga mabasa sa Kasulatan. (Mateo 15:3, 9) “Pahalba ang akon magagmay nga mga karnero,” siling ni Jesus. (Juan 21:17) Apang sa karon, madamo nga tawo ang ginagutom sa espirituwal.

• Relihion kag kuarta: Suno sa Pew Research Center, madamo nga tawo ang nagabatyag nga ginahatagan sang relihion sing daku nga importansia ang kuarta. Dugang pa, ang pila ka lider sa relihion—indi kaangay sa ila sumulunod—nagapangabuhi sing maluho. Halimbawa, sa isa ka siudad sa Germany diin madamo nga sumilimba ang nabudlayan sa pag-aman sang ila panguna nga mga kinahanglanon, ang obispo nagapangabuhi sing sobra ka luho. Nagpaakig gid ini sa madamo nga Katoliko didto. Ang report sa GEO nga magasin nagsiling man nga sa Nigeria, “diin 100 ka milyon nga tawo ang nagapangabuhi sing wala pa isa ka euro kada adlaw, nangin problema ang maluho nga pagpangabuhi sang pila ka pastor.”

  ANG GINASILING SANG BIBLIA: Ang manunulat sang Biblia nga si Pablo nagsulat: “Wala kita nagaginansia tungod sang pulong sang Dios.” (2 Corinto 2:17, footnote) Bisan pa si Pablo kilala nga ministro sa Cristianong kongregasyon sang una, nag-obra sia agod indi sia makapabug-at sa iban. (Binuhatan 20:34) Ang iya panimuot nagapakita nga ginatuman niya ang sugo ni Jesus: “Nakabaton kamo nga wala sing bayad, gani maghatag kamo nga wala sing bayad.”—Mateo 10:7, 8.

Pasad sa sina nga mga prinsipio, ang mga Saksi ni Jehova wala nagapabayad sa ila mga literatura ukon sa pagtudlo sing Biblia. Wala man sila sing diesmos ukon nagapangolekta sa ila mga pagtilipon. Sa baylo, ang kinahanglanon nga pondo ginasuportahan sang indi pakitakita nga boluntaryo nga mga donasyon.—Mateo 6:2, 3.

Gintagna ang Pagbiya sang Madamo sa Relihion!

Sang nagligad lang nga mga dekada, daw indi mo mahunahuna nga amo sini ang mangin kahimtangan sang relihion karon. Apang nahibaluan na sang Dios nga matabo ini kag ginsugid niya ini sing abanse paagi sa Biblia. Malaragwayon nga ginpaanggid sang Dios ang tanan nga relihion nga indi matutom sa iya sa isa ka maluho nga makihilawason nga babayi nga ginatawag “Babilonia nga Daku.”—Bugna 17:1, 5.

Nagakaigo gid ina nga paglaragway bangod ang butig nga relihion, bisan pa nagapangangkon nga matutom sa Dios, nakigrelasyon sa mga manuggahom sang kalibutan agod makatigayon sing gahom kag manggad. “Ang mga hari sang duta . . . naghimo sang seksuwal nga imoralidad upod sa iya,” siling sang Bugna 18:9. Nagakaigo man ang termino nga “Babilonia,” bangod madamo sang butig nga mga panudlo sang relihion kag paggawi, pareho sang indi mamalatyon nga kalag, trinidad, kag okultismo, ang naggikan sa dumaan nga Babilonia, ang siudad nga puno sang butig nga relihion kag disparatis.a—Isaias 47:1, 8-11.

Ang gamhanan nga Babilonia napukan sang ang depensa nga katubigan sini—ang daku nga kanal nga ang tubig naghalin sa Suba Eufrates—‘naghubas,’ nga naghatag sang kahigayunan sa mga soldado nga Medianhon kag Persianhon nga masakop ang siudad. (Jeremias 50:1, 2, 38) Ang matuod, naagaw ang Babilonia sa isa lang ka gab-i!—Daniel 5:7, 28, 30.

Ang Babilonia nga Daku “nagapungko [man] sa ibabaw sang madamo nga tubig.” Ginasugiran kita sang Biblia nga ini nagarepresentar sang “mga katawhan, mga kadam-an”—ang minilyon nga nagasuporta sa butig nga relihion. (Bugna 17:1, 15) Gintagna sang Biblia nga ining malaragwayon nga tubig mahubas—isa ka hitabo nga nagasugid sang madasig nga kalaglagan sang moderno nga Babilonia sa indi madugay. (Bugna 16:12; 18:8) Apang sin-o ang magahimo sini? Ang iya karelasyon nga mga pulitiko, nga ang ila gugma sa iya mangin dumot. Kuhaon man nila ang iya mga pagkabutang ukon kaunon ang iya malaragwayon nga unod.—Bugna 17:16, 17.b

“Gua Kamo sa Iya”!

Bangod malapit na lang ang kalaglagan sang Babilonia nga Daku, mahigugmaon nga nagapaandam ang Dios: “Gua kamo sa iya, katawhan ko, kon indi ninyo luyag makig-ambit sa iya mga sala, kag kon indi ninyo luyag magbaton sang bahin sang iya mga kalalat-an.” (Bugna 18:4) Talupangda nga ang tinaga nga “kon” duha ka beses nga ginsambit. Huo, ang paandam sang Dios para gid sa mga tawo nga natublag sang makahalalit nga mga panudlo kag luyag nga kahamut-an sang Dios—mga tawo nga pareho nanday Gaffar kag Hediye nga ginsambit kaina.

Antes nagtuon sa Biblia, nagatuman lamang si Gaffar sa Dios bangod sa kahadlok. “Isa gid ka paumpaw nga mahibaluan nga si Jehova isa ka Dios sang gugma,” siling niya, “kag luyag niya nga tumanon naton sia bangod ginahigugma naton sia.” (1 Juan 4:8; 5:3) Si Hediye nakatigayon sang malinong nga panghunahuna sang matun-an niya nga indi ang Dios ang kabangdanan sang iya pagkailo, kag indi kapalaran ang iya kahimtangan. Nakatigayon sia sing kaumpawan paagi sa mga teksto sa Biblia subong sang Santiago 1:13, nga nagasiling nga ang Dios wala nagatilaw sa mga tawo paagi sa malaut nga mga butang. Ginbaton niya kag ni Gaffar ang kamatuoran sa Biblia kag naggua sila sa “Babilonia.”—Juan 17:17.

Kon malaglag na ang Babilonia nga Daku, indi mahalitan ang mga matinumanon nga naggua sa iya agod “magsimba sa Amay sa espiritu kag kamatuoran.” (Juan 4:23) Nagalaum sila nga makita ang duta nga “mapuno sang ihibalo tuhoy kay Jehova kaangay sang tubig nga nagahil-ob sa dagat.”—Isaias 11:9.

Huo, ang butig nga pagsimba kag ang malain nga bunga sini tapuson na, kay ang Dios “indi makabutig.” (Tito 1:2) Sa pihak nga bahin, ang matuod nga pagsimba magapabilin sing dayon!