TOPIKO SA KOBER | PAANO MO MAPAUSWAG ANG IMO BATASAN?
2 Ang Imo Sitwasyon kag Kaupdanan
Determinado ka nga magkaon sing mas masustansia nga pagkaon, pero sang nakita mo ang ice cream daw indi mo ini mapangindian.
Desidido ka na gid nga mag-untat sa pagpanigarilyo, pero gintanyagan ka na naman sang imo abyan sing sigarilyo bisan pa nabal-an niya nga gusto mo na ini untatan.
Plano mo mag-ehersisyo, pero daw nabudlayan ka bisan sa pagpangita lang sang imo sapatos!
Nakita mo bala kon ano ang pareho sa sini nga mga sitwasyon? Ginapakita sang mga eksperiensia nga ang aton sitwasyon kag ang mga tawo nga pirme naton kaupod makabulig sa aton nga pauswagon ang maayo nga mga batasan kag untatan ang indi maayo nga mga batasan.
PRINSIPIO SA BIBLIA: “Makita sang tawo nga maalamon ang katalagman kag nagapanago sia, apang ang kulang sing kinaalam nagadiretso lang kag nagaantos sang malain nga resulta.”—Hulubaton 22:3.
Ang Biblia nagalaygay sa aton nga maghunahuna sing abanse. Kon himuon naton ini, malikawan naton ang mga sitwasyon nga makadula sang aton gana nga lab-uton ang gusto naton, kag mabutang naton ang aton kaugalingon sa maayo nga mga sitwasyon. (2 Timoteo 2:22) Gani kinahanglan naton nga kontrolon ang aton sitwasyon kag pilion ang aton ginaupdan.
Pabudlaya ang paghimo sang indi maayo nga butang kag pahapusa ang paghimo sang maayo nga butang
ANO ANG MAHIMO MO?
Pabudlaya ang paghimo sang indi maayo nga butang. Halimbawa, kon gusto mo nga indi na gid magkaon sing junk food, indi ka magtago sini sa kusina. Kon matentar ka man gid magkaon, mabudlayan ka mangita sini.
Pahapusa ang paghimo sang maayo nga butang. Halimbawa, kon gusto mo mag-ehersisyo sing aga pa, sa gab-i pa lang, ibutang na nga daan ang imo bayo nga pang-ehersisyo sa tupad sang imo hiligdaan. Kon mahapusan ka sa pagsugod, daku ang tsansa nga mapadayon mo ini.
Pilia sing maayo ang imo mga abyan. Ginailog naton ang mga tawo nga pirme naton kaupod. (1 Corinto 15:33) Gani indi pirme makig-upod sa mga tawo nga nagapabudlay sa imo nga untatan ang malain nga batasan, kundi makig-upod sa mga nagapalig-on sa imo nga pauswagon ang maayo nga batasan.