Kon Paano Ipakita ang Apresasyon

NGAA ISA KA HANGKAT?

Ang pagpabutyag sing apresasyon importante gid para magmadinalag-on ang pag-asawahay. Pero madamo nga bana kag asawa ang wala na nagasapak sa maayo nga mga batasan sang ila tiayon, amo nga wala na sila nagapabutyag sing apresasyon sa sini. Sa libro nga Emotional Infidelity, ang isa ka manuglaygay nagsiling nga madamo sa mag-asawa nga nagakadto sa iya “ang mas nabalaka sa wala nagakatabo [sa ila pag-asawahay] sangsa matuod nila nga sitwasyon. Nagakadto sila sa akon opisina para isugid kon ano ang dapat nila bag-uhon, indi sa kon ano ang dapat nila padayon nga himuon. Ang sala sa sini nga mga mag-asawa amo nga wala nila napakita ang pagpalangga paagi sa apresasyon.”

Ano ang himuon ninyo nga mag-asawa para malikawan ini nga problema?

ANO ANG DAPAT MO MAHIBALUAN?

Ang pagpabutyag sang apresasyon nagabuhin sang problema sa pag-asawahay. Kon ginatinguhaan sang bana kag asawa nga talupangdon kag apresyahon ang maayo nga mga kinaiya sang ila tiayon, masami nga mangin maayo ang ila relasyon. Bisan mabug-at ang ila buot sa isa kag isa, mabuhinan ini kon ginaapresyar nila ang isa kag isa.

Para sa mga asawa. “Madamo nga babayi ang nagabalewala sa kabug-aton sang responsibilidad sang mga bana sa pag-aman sa ila pamilya,” siling sang ginsambit kaina nga libro nga Emotional Infidelity. Sa iban nga lugar, may amo gihapon sini nga problema bisan duha na sila ang may palangitan-an.

Para sa mga bana. Masami nga wala ginasapak sang mga lalaki ang panikasog sang mga asawa sa pag-atipan sa panimalay, pagtrabaho man ini, pagtatap sa kabataan, ukon ulubrahon sa balay. Si Fiona,a nga mga tatlo ka tuig na nga kasal, nagsiling: “Tanan kita makahimo sing sala, kag kon makasala ako, nagalalain gid ako. Gani kon hambalan ako sang akon bana nga maayo gid ang akon ginhimo sa balay—halimbawa, sa mga ulubrahon—nabatyagan ko nga palangga gihapon niya ako bisan pa may kakulangan ako. Nabatyagan ko man ang iya suporta kag mas malipayon ako!”

Sa kabaliskaran, kon magbatyag ang tiayon nga ginabalewala sia, indi maayo ang epekto sini sa pag-asawahay. “Kon magbatyag ka nga wala ginaapresyar sang imo tiayon,” siling sang asawa nga si Valerie, “madali ka masulay nga makigsuod sa isa nga nagapabatyag sa imo nga ginaapresyar ka.”

ANO ANG MAHIMO MO?

Mag-obserbar. Sa masunod nga semana, talupangda ang maayo nga mga kinaiya sang imo tiayon. Talupangda man ang iya ginahimo para mangin matawhay ang inyo panimalay—mga butang nga mahimo ginabalewala mo asta subong. Sa katapusan sang semana, ilista ang (1) mga kinaiya nga ginaapresyar mo sa imo tiayon kag (2) mga butang nga ginhimo niya para sa inyo pamilya.—Prinsipio sa Biblia: Filipos 4:8.

Ngaa importante nga mag-obserbar? “Sa tapos sang pila ka tuig nga pag-asawahay,” siling sang asawa nga si Erika, “mahimo nga ginabalewala mo na ang imo tiayon. Wala mo na ginatalupangod ang maayo nga mga butang nga ginahimo niya kag nagapokus ka na lang sa wala niya ginahimo.”

Pamangkuta ang imo kaugalingon: ‘Ginabalewala ko bala ang ginahimo sang akon tiayon?’ Halimbawa, kon may ginkay-o ang imo bana sa inyo balay, wala ka bala nagapasalamat sa iya kay pamatyag mo obligasyon niya ini? Kon ikaw isa ka bana, nagabatyag ka bala nga indi na kinahanglan hatagan sing komendasyon ang imo asawa sa pag-atipan sa inyo kabataan kay amo gid man sini ang dapat niya himuon? Tinguhai nga talupangdon kag apresyahon ang tanan nga ginahimo sang imo tiayon—gamay man ini ukon daku—para sa inyo pamilya.—Prinsipio sa Biblia: Roma 12:10.

Pirme sia dayawa. Ang Biblia nagasiling nga “ipakita [naton] nga mapinasalamaton” kita. (Colosas 3:15) Gani pirme pasalamati ang imo tiayon. Ang bana nga si James nagsiling, “Kon ginaapresyar sang akon asawa ang akon mga ginahimo, nagapalig-on ini sa akon nga manikasog pa gid nga mangin mas maayo nga bana kag dugangan ang akon ginahimo para sa amon pag-asawahay.”—Prinsipio sa Biblia: Colosas 4:6.

Ang mga bana kag mga asawa nga nagapabutyag sing apresasyon sa isa kag isa nagapabakod sang ila relasyon. “Nagapati ako nga madamo kuntani nga mag-asawa ang wala nagbulagay kon nagpokus sila sa kon ano ang naluyagan nila sa isa kag isa,” siling sang bana nga si Michael. “Kon may problema, wala sila dayon nagadesisyon nga magbulagay bangod pirme nila ginadumdom ang maayo sa isa kag isa.”