Ano ang Ginatudlo sang Biblia Parte sa Espiritismo?

BISAN pa madamo nga tawo ang indi magpati sa bisan ano nga parte sa makatilingala nga mga butang kag espiritismo​—nga para sa ila indi ini matuod ukon himuhimo lang sang mga nagasulat sing iskrip sa pelikula—​lain ang ginasiling sang Biblia parte sini. May maathag ini nga mga paandam parte sa espiritismo. Halimbawa, ang Deuteronomio 18:10-13 nagsiling: “Wala sing bisan sin-o sa inyo nga . . . nagapamakot, nagahimo sing madyik, nagapamakot pasad sa mga panimad-on, babaylan, nagapanglumay, nagadangop sa espiritista ukon sa manugpakot sing mga hitabo, ukon bisan sin-o nga nagapamangkot sa patay.” Ngaa? Nagsiling pa gid ini: “Kay ang nagahimo sini nga mga butang makangilil-ad kay Jehova . . . Dapat wala kamo sing kasawayan sa atubangan ni Jehova nga inyo Dios.”

Ngaa ginapakamalaut sang Biblia ang tanan nga klase sang espiritismo?

MALAIN GID NGA GINHALINAN

Ginasugiran kita sang Biblia nga antes pa ginhimo sang Dios ang duta, gintuga niya ang minilyon ka espiritu nga tinuga, ukon mga anghel. (Job 38:4, 7; Bugna 5:11) Ang kada anghel ginhatagan sing kahilwayan sa pagdesisyon​—ang ikasarang sa pagpili sing husto ukon sala. Ang pila sa ila nagrebelde sa Dios, kag nagbiya sa ila katungdanan sa langit para manggamo sa duta. Bangod sini, “napuno ang duta sang kasingki,” ukon kapintas.​—Genesis 6:2-5, 11; Judas 6.

Suno sa Biblia, daku gid ang impluwensia sining malain nga mga anghel, nga nagapatalang sa minilyon ka tawo. (Bugna 12:9) Ginahingalitan pa gani nila ang handum sang mga tawo nga mahibaluan ang palaabuton.​—1 Samuel 28:5, 7; 1 Timoteo 4:1.

Ang pila sa makatilingala nga mga gahom daw nakabulig man sa mga tawo. (2 Corinto 11:14) Pero ang matuod, ang malain nga mga anghel nagatinguha sa pagbulag sa hunahuna sang mga tawo sa kamatuoran parte sa Dios.​—2 Corinto 4:4.

Gani suno sa Biblia, ang pagpakig-angot sa malain nga mga espiritu may malain gid nga resulta. Amo ini ang rason kon ngaa sang gintudluan sang kamatuoran parte sa sina nga mga butang ang gusto mangin disipulo ni Jesus, “ang mga nagahimo sing makatilingala nga mga butang nagdala kag nagtipon sang ila mga libro kag ginsunog ini” bisan pa daku ang ila mapierde nga kuarta.​—Binuhatan 19:19, Byington.

Amo man sini subong, madamo ang nagdesisyon nga maglikaw sa mga buhat kag mga kalingawan nga may kaangtanan sa espiritismo. Halimbawa, sang 12 anyos si Mariaa daw mapaktan niya ang mga matabo ukon katalagman sa palaabuton. Ginbasahan niya sing baraha ang iya mga kaeskwela, kag bangod natabo ang iya ginpakot, nanamian na sia sa espiritismo.

Abi ni Maria ginhatagan sia sang Dios sing talento para buligan ang mga tawo. “Pero may nagatublag sa akon,” siling niya. “Kon nagabasa ako sing baraha, ginabasa ko ini para sa iban. Indi ko ini mahimo sa akon kaugalingon, bisan pa gusto ko man mahibaluan ang akon palaabuton.”

Bangod madamo sing pamangkot si Maria, nangamuyo sia sa Dios kag sang ulihi naistorya sia sang mga Saksi ni Jehova nga nagbulig sa iya sa pagtuon sa Biblia. Natun-an ni Maria sa Biblia nga ang iya talento sa paghibalo sang palaabuton wala naghalin sa Dios. Natun-an man niya nga ang mga gusto makig-abyan sa Dios dapat wala sing bisan ano nga butang nga may kaangtanan sa espiritismo. (1 Corinto 10:21) Ano ang iya ginhimo? Ginhaboy niya ang iya mga gamit kag mga libro parte sa espiritismo. Ginasugid na niya subong sa iban ang kamatuoran nga natun-an niya sa Biblia.

Sang tin-edyer si Michael, nanamian sia magbasa sing mga nobela parte sa makatalanhaga nga mga karakter. “Ginaimadyin ko nga daw pareho ako sa mga hero nga kaedad ko nga ara sa indi matuod nga kalibutan,” siling niya. Sang ulihi nanamian na si Michael magbasa sing mga libro parte sa madyik kag satanismo nga mga ritwal. “Bangod gusto ko pa mahibaluan ang parte sa sini, nagabasa ako sing mga libro kag nagatan-aw sing mga pelikula nga may amo sini nga mga topiko,” siling niya.

Pero natun-an ni Michael sa Biblia nga dapat niya usisaon sing maayo ang iya mga ginabasa. “Ginlista ko ang tanan nga butang nga may kaangtanan sa espiritismo kag ginpanghaboy ini tanan,” siling niya. “May importante ako nga natun-an. Sa 1 Corinto 10:31, ang Biblia nagasiling: ‘Himua ang tanan para sa himaya sang Dios.’ Gani ginapamangkot ko ang akon kaugalingon, ‘May kaangtanan bala ang akon ginabasa sa mga butang nga wala nagahimaya sa Dios?’ Kon huo, dapat ko ini likawan.”

Ang Biblia nagakaigo nga ginlaragway bilang suga. May pinasahi ini nga kasanag nga nagapakita kon ano gid ang espiritismo. (Salmo 119:105) Pero indi lang amo sina ang ginahimo sang Biblia. May promisa man ini parte sa isa ka kalibutan nga wala na ang impluwensia sang malain nga mga espiritu. Daku gid ang epekto sini sa mga tawo. Halimbawa, ang Salmo 37:10, 11 nagasiling: “Sa indi na lang madugay, madula na ang mga malauton; pangitaon mo sila sa ila nahamtangan, kag wala na sila didto. Apang ang mga mahagop magapanubli sang duta, kag mangin malipayon gid sila sa bugana nga paghidait.”