Kon Magpain Na ang mga Kabataan

NGAA ISA KA HANGKAT?

Sa masami, ang pinakadaku nga kabudlayan sang mag-asawa maeksperiensiahan nila kon magdalagku na kag magpain ang ila mga kabataan. Kon wala na sa balay ang mga bata, daw mga estranghero na sila sa isa kag isa. “Ginalaygayan ko ang madamo nga tawo nga wala makahibalo kon paano makigsuod liwat sa ila mga tiayon,” siling sang eksperto sa pamilya nga si M. Gary Neuman. “Kon magpain na ang mga kabataan, daw wala na sing istoryahan [ang mga ginikanan].”a

Daw amo man bala sina ang nagakatabo sa inyo pag-asawahay? Kon huo, mahimo pa mapauswag ang inyo kaangtanan sa isa kag isa. Pero, binagbinagon anay naton ang pila sa mga kabangdanan nga mahimo nagpahilayo sa inyo nga mag-asawa.

NGAA NAGAKATABO INI?

Tinuig na nga ginauna gid sang mag-asawa ang ila kabataan. Gusto sang madamo nga ginikanan nga mangin maayo ang ila kabataan, gani ginauna nila ang ila kabataan sangsa ila pag-asawahay. Bangod sini, naanad sila sa ila papel bilang amay kag iloy kag nadula nila ang ila kaangtanan bilang bana kag asawa—kag makita gid ini nga problema kon magpain na ang kabataan. “Sang ara pa sa poder namon ang mga bata, may mga butang nga ginahimo namon sing magkaupod,” siling sang 59 anyos nga asawa. Pero sang nagpain na ang kabataan, siling niya, “indi na pareho ang amon mga prioridad.” Naglab-ot pa gani sa punto nga ginsilingan niya ang iya bana, “Wala na ’ta bala hilabtanay.”

Ang pila ka mag-asawa indi handa sa sini nga pagbag-o. “Para sa madamo nga mag-asawa, daw bag-o lang sila nag-asawahay,” siling sang libro nga Empty Nesting. Nagabatyag ang madamo nga bana kag asawa nga daw wala na sang mga butang nga pareho sila, gani lainlain na ang ila mga prioridad, kag daw nangin mag-roommate na lang sila imbes nga mag-asawa.

Pero, malikawan ninyo ini nga mga problema kag mahimo pa gani kamo makabenepisyo sa sining bag-o nga bahin sang inyo kabuhi. Mabuligan kamo sang Biblia para mahimo ini. Binagbinagon naton kon paano.

ANO ANG MAHIMO MO?

Batuna ang pagbag-o. Parte sa dalagku na nga kabataan, ang Biblia nagsiling: “Bayaan sang lalaki ang iya amay kag ang iya iloy.” (Genesis 2:24) Bilang mga ginikanan, ang inyo katungdanan amo nga ihanda sila sa sina nga tion kag buligan sila nga mapauswag ang mga ikasarang nga magamit nila kon dalagku na sila. Kon amo sini ang inyo pagtamod, ang pagpain sang inyo kabataan isa ka butang nga mapabugal gid ninyo.—Prinsipio sa Biblia: Marcos 10:7.

Siempre, bisan pa nagpain na ang inyo kabataan, mga ginikanan gihapon nila kamo. Pero subong, asta na lang kamo sa laygay imbes nga kamo ang masunod. Makabulig ini para mangin suod gihapon kamo sa inyo kabataan samtang ginahatagan ninyo sing daku nga atension ang isa kag isa bilang mag-asawa.b—Prinsipio sa Biblia: Mateo 19:6.

Istoryahi ninyo ang inyo mga ginakabalak-an. Isugid sa imo tiayon kon ano ang epekto sa imo sini nga pagbag-o sa inyo kabuhi, kag pamatii man ang iya isiling sa imo. Mangin mapinasensiahon kag mahinangpanon. Mahimo nga malawig nga tion ang kinahanglan para mapabakod ninyo ang inyo kaangtanan sang imo tiayon, pero maayo gid ang resulta kon himuon ninyo ini.—Prinsipio sa Biblia: 1 Corinto 13:4.

Mangita sing pila ka butang nga obrahon ninyo sing magkaupod. Istoryahi ninyo kon ano nga mga tulumuron ang gusto ninyo malab-ot ukon kon ano nga mga butang ang inyo gusto nga himuon sing magkaupod. Madamo kamo sing natigayon nga praktikal nga kaalam sa pagpadaku sa inyo kabataan. Ngaa indi ninyo ini paggamiton para buligan ang iban?—Prinsipio sa Biblia: Job 12:12.

Pabakura liwat ang inyo relasyon. Panumduma ang mga kinaiya nga naluyagan ninyo sang una sa isa kag isa. Panumduma man ang mga butang nga ginhimo ninyo, kag ang mga kabudlayan nga nalampuwasan ninyo sing magkaupod. Ining bag-o nga bahin sang inyo kabuhi mahimo nga may maayo nga resulta sa ulihi. Ang matuod, kon magbuligay kamo mapauswag ninyo ang inyo relasyon bilang mag-asawa kag mapabakod pa gid ang inyo gugma sa isa kag isa.