Ang Korte sang mga Pakinhason

ANG mga alukaba amo ang rason nga mabuhi ang mga pakinhason bisan pa grabe ang puersa sa idalom sang dagat. Bangod mabakod gid ini nga proteksion, gusto tun-an sang mga enhinyero ang korte kag ang desinyo sini nga mga pakinhason para makadesinyo sang mga salakyan nga makaamlig sa mga pasahero kag sang mga bilding nga makaamlig sa mga tawo sa sulod sini.

Binagbinaga: Gintun-an sang mga enhinyero ang duha ka klase sang pakinhason—ang nagatakoptakop (pareho sang litob) kag ang nagatiyog (nga daw screw ang korte).

Sa mga pakinhason nga nagatakoptakop ang korte, nakita nila nga bangod sa mga linya sa gua sang alukaba nagadiretso ang puersa sa tinabuan kag sa kilid sang pakinhason. Pero sa mga pakinhason nga nagatiyog ang korte, ang puersa nagadiretso sa sentro sini. Sa sining duha ka klase sang pakinhason, ang korte sini amo ang rason nga ang puersa nagadiretso sa pinakamabakod nga bahin sang alukaba, gani kon masamaran ang alukaba indi mahalitan ang pakinhason sa sulod.

Gintestingan man sang mga researcher ang kabakod sang matuod nga pakinhason kon ikumparar sa simple nga daw paya kag daw apa nga mga korte (ginhimo paagi sa 3-D nga printer) nga gin-ilog sa korte kag desinyo sang pakinhason. Ginapakita sang resulta nga doble ang kapag-on sang matuod nga alukaba sang pakinhason sangsa simple lang nga mga korte.

Ang Scientific American nagkomento parte sa sini nga pagtuon, nga nagasiling: “Kon makadesinyo gid man sa ulihi sang salakyan nga daw pakinhason ang korte, manami gid ini tan-awon kag makaamlig gid sa nagasakay sa sini.”

Ano sa banta mo? Ang korte bala sang pakinhason natabuan lang? Ukon may nagdesinyo sini?