Ang Kasubo Bangod sa Kamatayon

“Sobra 39 ka tuig na kami nga mag-asawa ni Sophiaa sang napatay sia bangod sang malubha nga balatian. Ginbuligan ako sang akon mga abyan, kag nangin masako ako. Pero sa sulod sang isa ka tuig, grabe gid nga kasakit ang akon nabatyagan. Daw indi ko makontrol ang akon balatyagon. Asta subong, bisan halos tatlo ka tuig na ang nagligad, may mga bes nga gulpi lang ako nagabatyag sang grabe nga kasubo.”—Kostas.

Napatyan ka bala sing pinalangga? Kon huo, mahimo naeksperiensiahan mo man ang ginbatyag ni Kostas. Wala na sing mas makapa-stress ukon mas masakit pa sangsa mapatyan sang bana ukon asawa, pamilya, ukon suod nga abyan. Nagaugyon gid sa sini ang mga eksperto nga nagatuon parte sa kasubo sang mga napatyan. Ang artikulo sa The American Journal of Psychiatry nagsiling nga “ang mapatyan amo ang pinakamasakit nga mabatyagan sang isa kag daw indi ini madula.” Bangod sang grabe nga kasubo sang namatyan, mahimo sia maghunahuna: ‘San-o pa ini ayhan madula? Mangin malipayon pa bala ako liwat? Paano ako maumpawan?’

Ini nga mga pamangkot sabton sa sini nga isyu sang Magmata! Ang masunod nga artikulo magabinagbinag sang mahimo maeksperiensiahan sang mga napatyan sang pinalangga. Ang masunod pa nga mga artikulo magahatag sing mga paagi kon paano mo mapahaganhagan ang imo kasubo.

Kabay nga makapaumpaw ini kag makahatag sing praktikal nga bulig sa mga nasubuan bangod sa kamatayon.