NAGALALA NGA SITWASYON SA KALIBUTAN

3 | Proteksioni ang Imo Relasyon sa Imo mga Pinalangga

KON NGAA IMPORTANTE INI

Bangod sa nagadugang nga kabalaka sa nagalala nga sitwasyon sa kalibutan, madamo ang indi hungod nga nagaguba sang ila relasyon sa ila mga pinalangga.

Ang iban nagapalayo sa ila mga abyan.
Mas pirme nagainaway ang mga mag-asawa.
Halos wala ginasapak ukon ginabalewala lang sang mga ginikanan ang mga ginakabalak-an sang ila kabataan.

Ang Dapat Mo Mahibaluan

Importante ang mga abyan kay makabulig sila sa imo para mangin mapagros ang imo panglawas kag mangin maayo ang imo pamatyag, ilabi na kon ara ka sa mabudlay nga sitwasyon.
Ang stress bangod sa nagalala nga sitwasyon sa kalibutan mahimo magresulta sa wala ginapaabot nga mga problema sa inyo pamilya.
Kon may makahaladlok nga mga balita, mahimo nga daw wala lang ini sa imo. Pero ang imo mga bata mahimo nga nagalalain gid sa sini.

Ang Puede Mo Himuon Subong

Ang ginasiling sang Biblia: “Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.”—Hulubaton 17:17.

Pamensara kon sin-o sa imo mga abyan ang makabulig sa imo kag makahatag sang praktikal nga mga panugda. Kon nabal-an mo nga may nagaulikid sa imo, mangin mas determinado ka nga atubangon ang mga problema nga nagaabot kada adlaw.

KON ANO ANG PUEDE HIMUON—Mga Tip nga Makabulig

Sa mabudlay nga mga sitwasyon, proteksioni ang imo relasyon sa imo mga pinalangga paagi sa pagsunod sa sining praktikal nga mga tip

PABAKURA ANG INYO PAG-ASAWAHAY

Pabakura ang inyo pag-asawahay

Ang ginasiling sang Biblia: “Ang duha mas maayo sangsa isa . . . Kay kon matumba ang isa, mapabangon sia sang iya kaupod.” (Manugwali 4:9, 10) Ang mga mag-asawa dapat pareho sa duha ka piloto nga nagapalupad sang isa lang ka eroplano. Wala sila nagakontrahanay pareho sang duha ka fighter jet.

Mangin determinado nga kon gina-stress kamo, indi ninyo ini pag-ipaupok sa isa kag isa. Mangin mapinasensiahon.
Istoryahi ninyo nga mag-asawa bisan kis-a lang kada semana ang inyo mga problema. Magpokus kamo sa pagsolbar sang mga problema, kag indi sa diperensia sang isa kag isa.
Mag-iskedyul sing tion nga makaupdanay kamo nga duha sa paghimo sang mga butang nga nanamian gid ninyo.
Istoryahi ninyo ang makalilipay nga mga butang nga natabo sa inyo kabuhi. Puede ninyo tan-awon ang mga piktyur ninyo sa kasal ukon sa iban pa nga makalilipay nga mga okasyon.

“Ang mag-asawa mahimo nga indi mag-ugyunay sa tanan nga butang, pero indi buot silingon nga indi na sila makabuligay. Makabuligay sila sa paghimo sang desisyon kag dayon makabuligay man sila para magmadinalag-on ang ila desisyon.”—David.

INDI MAGPALAYO SA IMO MGA ABYAN

Indi magpalayo sa imo mga abyan

Magpamensar kon paano ka makahatag sang bulig sa imo mga abyan, imbes nga ikaw lang pirme ang nagabaton sang bulig. Kon ginapalig-on mo ang iban, ginapalig-on mo man ang imo kaugalingon.
Kontaka ang pila mo ka abyan kada adlaw kag kamustaha sila.
Pamangkuta ang imo mga abyan kon ano ang ila ginhimo sang naagyan nila ang mga problema nga pareho man sa ginaatubang mo subong.

“Kon makaatubang ka sang mabudlay gid nga problema kag daw indi ka na kabalo sang imo himuon, mabuligan ka sang imo mga abyan bisan magpahanumdom lang sa imo sang maayo mo nga himuon. Palangga ka sang imo mga abyan kag kabalo sila nga palangga mo man sila.”—Nicole.

SUPORTAHI ANG IMO KABATAAN

Suportahi ang imo kabataan

Ang ginasiling sang Biblia: “Mangin maabtik sa pagpamati, mahinay sa paghambal.” (Santiago 1:19) Sa primero, mahimo nga daw indi magsugid sa imo ang imo mga kabataan sang parte sa ila mga ginakahadlukan kag mga ginakabalak-an. Pero kon mangin mapinasensiahon ka lang kag magpamati sing maayo, mahimo nga sa ulihi isugid gid nila ang ila matuod nga ginabatyag.

Maghimo sing paagi para mangin komportable ang imo kabataan sa pagsugid sang ila ginabatyag. Mas gusto sang iban nga bata nga mag-istorya sa indi pormal nga mga sitwasyon pareho abi kon nagasakay sa salakyan ukon nagalakatlakat, sangsa magpungko gid kag mag-atubangay para mag-istoryahanay.
Siguraduha nga ang imo mga bata indi magpatama sa pagtan-aw sang makahaladlok nga mga balita.
Sugiri ang imo kabataan kon ano ang ginahimo mo para maproteksionan ang inyo pamilya.
Maghanda para sa mga emergency kag praktisa ini upod sa imo kabataan.

“Istoryaha ang imo kabataan kag pasugira sila kon ano ang matuod nila nga ginabatyag. Kay basi daw OK lang sila pero ang matuod nahadlok gali sila, nagakabalaka, ukon naakig. Isugid sa ila nga kon kis-a amo man sina ang imo ginabatyag, kag sugiri sila kon ano ang imo ginahimo para atubangon ina nga mga balatyagon.”—Bethany.