Ang Dios Nagpromisa nga Indi Maguba ang Aton Planeta

Amo ini ang ginsiling sang internasyonal nga grupo sang mga researcher parte sa pagbag-o sang klima. Kon nagapati ka nga may ara sing Manunuga nga nagapalangga sa mga tawo, mahimo nga ang ila ginsiling nagpahanumdom sa imo nga gindesinyo sang Dios ang aton planeta nga may natural nga ikasarang nga makarekober.

Pero, bangod grabe na gid ang halit sang mga tawo sa planeta, indi bastante ang natural nga mga proseso para makay-o ini. Ngaa makasalig gid kita nga may himuon ang Dios para makay-o ini?

Ang masunod nga mga teksto sa kahon nagapasalig sa aton nga indi maguba ang aton planeta kag magapabilin ini asta sa wala sing katapusan.

• Ang aton planeta gintuga sang Dios. “Sa ginsuguran gintuga sang Dios ang langit kag ang duta.”​—Genesis 1:1

• Ang Dios ang tag-iya sang aton planeta. “Ang duta iya ni Jehovaa kag ang tanan nga yara sa sini.”​—Salmo 24:1

• Gindesinyo sang Dios ang aton planeta nga indi maguba. “Ginpasad mo sing malig-on ang duta sa mga sadsaran sini; indi ini matay-ug sa nahamtangan sini tubtob sa wala sing katubtuban.”​—Salmo 104:5

• Ang Dios nagpromisa nga magapadayon ang kabuhi sa duta sa wala sing katapusan. “Ang matuod nga Dios, ang Manughimo sang duta, . . . wala nagtuga sini sa wala sing pulos, kundi nagbuhat sini agod puy-an.”​—Isaias 45:18

• Ang Dios nagpromisa nga ang mga tawo mabuhi sing wala katapusan sa duta. “Ang mga matarong magapanubli sang duta, kag magapuyo sila sa sini sa wala sing katubtuban.”​—Salmo 37:29

Gindesinyo sang Dios ang duta nga indi maguba bisan pa ginaistaran ini sang mga tawo. Mabasa sa Biblia nga dulaon ni Jehova nga Dios ang halit nga ginahimo sang mga tawo kag laglagon niya ang mga nagalaglag sang duta sa iya gintalana nga tion.​—Bugna 11:18

Nagpromisa ang Biblia nga sa indi madugay, himuon sang Dios ang duta nga isa ka matahom nga paraiso kag ihumlad ang iya kamot para ‘ihatag ang handum sang tagsa ka buhi nga butang.’—Salmo 145:16