Matahom nga Katamnan

TAN-AWA diri ang duta! Daw ano katahom ang tanan! Makita mo bala ang kakahoyan, kabulakan kag tanan nga sapat? Diin naghalin ining matahom nga katamnan? Ti, ginhimu ini sang Dios.

Una, ginhimu sang Dios ang lunhaw nga kahilamnan sa pagtabon sang duta. Nian ginhimu niya ang tanan nga sahi sang diutay nga mga tanum kag kakahoyan. Nagpatahom ini sang duta, kag ang iban sini nagahatag sa aton sing pagkaon nga tuman kanamit.

Nian ginhimu sang Dios ang isda sa paglangoy sa tubig, kag ang pispis sa paglupad sa langit. Naghimu sia sing dalagku kag diutay nga sapat. Ano nga sapat ang nagakabuhi malapit sa inyo balay?

Sang ulihi naghimu ang Dios sing duog nga gintawag katamnan sang Eden. Pinasahi gid yadto nga duog. Ang tanan matahom didto, kag luyag sang Dios nga ang bug-os nga duta mangin kaangay sining matahom nga katamnan.

Apang tan-awa liwat ang laragway sang katamnan. Nakahibalo ka bala kon ano ang kulang? Tan-awon ta.