Ang Maisog nga Tao

SAMTANG nagadamu ang tao sa duta, kalabanan sa ila naghimu sing malain kaangay ni Cain. Apang ang isa ka tao tuhay. Ining tao amo si Enoc. Si Enoc isa ka maisog nga tao. Nag-alagad sia sa Dios.

Nahibaloan mo bala kon ngaa ang mga tao sadto naghimu sing madamu gid nga kalainan? Ti, hunahonaa, Sin-o ang nagpalalis kanday Adan kag Eva sa Dios? Huo, isa yadto ka malain nga anghel. Ang Biblia nagatawag sa iya nga Satanas. Luyag niya nga ang tanan maglain.

Isa ka adlaw ginsugo ni Jehova nga Dios si Enoc nga isugid sa mga tao ang indi nila luyag mabatian. Amo ini: ‘Sa pila ka adlaw laglagon sang Dios ang tanan nga malain.’ Ayhan naakig gid ang mga tao sa pagpamati sini. Gani dapat magmaisog gid si Enoc.

Wala ginpalawig sang Dios ang kabuhi ni Enoc sa tunga sadtong malain nga kataohan. Si Enoc nagkabuhi sing 365 ka tuig lamang. Sa pagkamatuod, mas malaba ang kabuhi sang mga tao sadto sang sa karon. Ti, ang anak nga lalaki ni Enoc nga si Metusela nagkabuhi sing 969 ka tuig!

Bueno, sang mapatay si Enoc, naglain pa gid ang kataohan. Ang Biblia nagasiling nga ‘ang duta napuno sing kasingki.’

Nahibaloan mo bala ang isa sa mga rason kon ngaa may tuman nga kagamo sadtong mga adlaw? Bangod si Satanas may bag-ong paagi sa paghaylo sa mga tao nga maghimu sing malain. Maton-an naton ini sa masunod.