Pagkabihag sa Babilonia Tubtob sa Pagpatindog Liwat sang Pader sang Jerusalem

Samtang sa Babilonia, ang mga Israelinhon may madamu nga pagtilaw sa ila pagtuo. Sanday Sadrac, Mesac kag Abednego gindap-ong sa kalayuhon nga hurno, apang ginpagua sila sang Dios nga buhi. Sang ulihi, si Daniel ginhulog sa lungib sang mga leon, apang gin-amligan man sia sang Dios.

Sang ulihi, ginhilway sang Persianhon nga si Hari Ciro ang mga Israelinhon. Nagbalik sila sa ila duta pagligad sang 70 ka tuig nga pagkabihag nila. Sa gilayon, ginpatindog nila ang templo ni Jehova. Apang, bangod sang pagtublag sang ila mga kaaway, natapos ini pagligad lamang sing mga 22 ka tuig.

Masunod maton-an naton ang tuhoy sa pagbalik ni Esdras sa Jerusalem agod patahumon ang templo, mga 47 ka tuig sa tapos makompleto ini. Nian, 13 ka tuig sang ulihi, nagbulig si Nehemias sa pagpatindog liwat sang naguba nga pader sang Jerusalem. Ang bahin SINGKO nagatuptop sing 152 ka tuig sang maragtas tubtob sining tion.