Bag-ong Paraiso sa Duta

TAN-AWA ang matag-as nga kakahoyan, matahom nga kabulakan kag matag-as nga kabukiran. Tan-awa ang usa nga nagakaon sa palad sang bata. Kag tan-awa ang mga leon kag mga kabayo nga nagatindog sa latagon. Indi mo bala luyag magpuyo sa duog kaangay sini?

Luyag sang Dios nga mabuhi ka sing dayon sa duta sa paraiso. Amo ini ang saad sang Biblia sa mga magapuyo sa bag-ong paraiso: ‘Ang Dios magaupod sa ila. Wala na sing kamatayon ukon paghibi ukon kasakit pa. Ang daan nga mga butang nagtaliwan na.’

Pat-uron ni Jesus nga matabu ining dalayawon nga pagbalhin. Nahibal-an mo bala kon san-o? Huo, sa tapos niya matinloan ang duta sa tanan nga kalainan kag malain nga mga tao. Dumdoma kon paano gin-ayo ni Jesus ang mga tao kag ginbanhaw pa ang patay sang yari sia sa duta? Ginhimu niya ini agod ipakita ang himuon niya sa bug-os nga duta kon mangin Hari sia sang ginharian sang Dios.

Indi bala makadalayaw nga magpuyo sa sining bag-ong paraiso sa duta? Si Jesus, upod sa pila nga ginpili niya, magagahom sa langit. Pat-uron nila nga ang tanan sa duta malipayon. Tan-awon ta kon ano ang dapat naton himuon agod papuy-on kita sang Dios sa iya bag-ong paraiso.