Kapitulo 2

Ang mga Hulusayon nga Nagapat-od sang Aton Palaabuton

SANG nagligad nga mga tinuig paagisod nga gin-atubang naton ang mainit nga mga hulusayon nga nagadalahig sang aton palaabuton. Ang mga kahimtangan amo nga ang mga tawo bisan diin nagakinahanglan sing paumpaw. Ayhan nagatuo sila sa Dios, apang para sa ila daw subong bala nga kon ang kahimtangan diri sa duta magauswag pa, mga tawo ang magapahanabo sini. Ang iban nagtinguha sa paghimo sini paagi sa nagaluntad nga mga pangulohan ukon paagi sa mga pagprotesta sang masa batok sa mga desisyon sining mga pangulohan. Ang iban pa gid nagapati nga ang rebolusyon amo ang lamang nga paagi. Nagapati sila nga ang pagbalhin sa kasugoan, pagbaylo sing mga gumalahom ukon sa bug-os nga mga pangulohan pat-od nga magapauswag sang mga kahimtangan. Apang ano ang ginapakita sang mga kamatuoran? Sa tapos magtinguha sing linibo ka tuig, ang mga tawo wala makapatubas sing bisan isa lang ka pangulohan nga nagdala sing walay ginadampigan nga katarungan, matuod nga kalig-onan kag dayon nga kalipay sa tanan nga sakop sini. Ano ang kabangdanan sini?

² Bisan pa daw ano ka dungganon ang mga tulumuron sang mga tawo nga yara sa awtoridad, ang tanan nga pangulohan sang tawo ginamaniobra sang mga puersa nga indi makontrol sang mga tawo nga yara sa palangakoan. Sin-o ang nagamaniobra? Amo ang labaw sa tawo nga mga espiritu, si Satanas nga Yawa kag ang iya mga demonyo. Matuod, madamo nga tawo ang nagayubit sa pagpati sa espiritu nga mga persona. Apang si Jesucristo wala magyubit. Nahibaloan gid niya ang ginsuguran ni Satanas kag gintawag niya sia subong “ang manuggahom sining kalibutan.” (Juan 12:31) Sa simbuliko nga hambal, ginalaragway sang Biblia ang bug-os globo nga sistema sang politika subong isa ka mapintas nga sapat kag nagapahayag nga ‘ang dragon [Satanas] naghatag sa sapat sang iya gahom kag sang iya trono kag sang iya dakung awtoridad.’ (Bugna 13:1, 2; ipaanggid ang Daniel 7:2-8, 12, 23-26.) Kag para sa aton adlaw ang Biblia nagtagna sing dugang pa nga “kailo sa duta . . . bangod ang Yawa nagpanaug sa inyo.” (Bugna 12:12) Wala na sing iban pa nga kabangdanan sang kagubot sa tunga sang katilingban sang tawo. Apang paano ini nagluntad? Ano ang aton mahimo agod makatigayon sing paumpaw?

ANG HULUSAYON SANG PAGKASOBERANO

³ Ang nagabukas nga mga kapitulo sang Biblia nagapahibalo sa aton nga sang gintuga ni Jehova nga Dios ang unang mag-asawa, sanday Adan kag Eva, kag ginbutang sila sa katamnan sang Eden, ginpaathag niya sa ila ang ila kaangtanan sa iya. Sia ang ila Amay, ang ila maalwan nga Manug-aman kag subong man ang Bug-os Uniberso nga Soberano. Para sa ila kaugalingon nga kaayohan, dapat nila mahangpan nga ang ila padayon nga pagkabuhi nasandig sa ila pagtuman sa Dios.—Genesis 2:16, 17; ipaanggid ang Binuhatan 17:24, 25.

⁴ Sadto nga tion ang tanan nga tinuga himpit. Indi subong sang mga sapat, ang mga anghel kag mga tawo may kahilwayan sa pagpamat-od. Apang wala magdugay sa tapos matuga ang tawo ang isa sang mga anghel, sa pag-abuso sang dalayawon nga ikasarang sa paghimo sing personal nga mga desisyon, nagrebelde batok sa pagkasoberano ni Jehova. Sa amo ginhimo niya ang iya kaugalingon subong kaaway, ukon manugpamatok, nga amo ang literal nga kahulugan sang ngalan nga Satanas. (Ipaanggid ang Santiago 1:14, 15; Bugna 12:9) Ginpahulag sang ambisyon, nagtinguha si Satanas nga hayluhon ang unang mag-asawa gikan kay Jehova kag dalhon sila sa iya kaugalingon nga impluwensia. Nakita niya sa ila ang posibilidad nga ang duta mapuno sing mga tawo nga nagapadungog sa iya subong ila dios. (Ipaanggid ang Isaias 14:12-14; Lucas 4:5-7.) Ang kasaysayan tuhoy sa natabo sa Eden indi isa ka himuhimo lamang nga sugilanon. Ginpatuhuyan ini ni Jesucristo subong isa ka maragtason nga kamatuoran.—Mateo 19:4, 5.

⁵ Si Jesus nagsiling tuhoy sa Yawa: “Wala sia magtindog sa kamatuoran . . . Butigon sia kag amay sang kabutigan.” (Juan 8:44) Ang una nga butig sang Yawa nga narekord amo ang sa kay Eva sang ginduhaduhaan niya ang pagkamaminatud-on sang Dios. Ginpalig-on niya ang pagsikway sa sugo sang Dios kag nangatarungan sia nga para sa kaayohan sang tagsatagsa nga maghimo sia sang iya kaugalingon nga mga talaksan sa kabuhi. (Genesis 3:1-5; ipaanggid ang Jeremias 10:23.) Sa amo ang pagkasoberano ni Jehova ginhangkat didto sa Eden. Subong ginpakita sang mga hitabo sang ulihi, ang integridad sa Dios sang tanan intelihente nga mga tinuga ginduhaduhaan man. Nag-alagad bala sila sa Dios bangod ginhigugma gid nila sia, ukon sarang bala sila masulay sa pagtalikod sa iya? (Job 1:7-12; 2:3-5; Lucas 22:31) Ining mga hulusayon magaapektar sa tanan sa langit kag sa duta. Ano ang ginhimo sang Bug-os Uniberso nga Soberano?

⁶ Sa baylo nga laglagon sa gilayon ang mga rebelde, maalamon nga gintugutan ni Jehova ang isa ka hut-ong sang tion agod mahusay ang mga hulusayon sing makaisa. Ginhimo ini sang Dios, indi agod pamatod-an ang bisan ano nga punto sa iya kaugalingon, kundi sa pagtugot sa mga tinuga nga may kahilwayan sa pagdesisyon nga makita nila para sa ila kaugalingon ang malain nga mga bunga nga ginpatubas sang pagrebelde batok sa iya pagkasoberano, kag sa paghatag man sa ila sing kahigayunan nga ipakita kon sa diin sila nagatindog sa sining importante nga mga butang. Kon mahusay na ang hulusayon, indi na gid liwat pagtugutan ang bisan sin-o sa pagtublag sang paghidait.

⁷ Si Jehova nga Dios, subong Manunuga sang katawhan, amo man ang ila may kinamatarong nga Manuggahom. (Bugna 4:11) Apang, sang ulihi ginpukaw ni Satanas kag sang iya mga demonyo sa mga tawo ang handum indi lamang sa pagtukod sang ila kaugalingon nga mga talaksan sang maayo ukon malain kundi sa paggahom man sa ila mga isigkatawo. Si Nimrod amo ang una nga nagpalig-on sang iya kaugalingon subong hari kag naggahom sia sa mga siudad sa Mesopotamia. Sia “gamhanan nga mangangayam [sang mga sapat kag sang mga tawo] batok kay Jehova.” (Genesis 10:8-12) Kutob sang mga adlaw ni Nimrod tubtob sa karon, natilawan na ang tanan nga sahi sang tawhanon nga pangulohan. Apang ang kabilogan nga rekord, subong nahibaloan sang bisan sin-o nga estudyante sang maragtas, may kalautan kag pagpaagay sing dugo.—Manugwali 8:9.

⁸ Sang si Jesucristo yari sa duta, nagtinguha si Satanas nga ipaidalom sia sa iya impluwensia. Gintanyag niya kay Jesus ang “tanan nga ginharian sang napuy-an nga duta” bilang baylo sa isa ka buhat sang pagsimba. Nagdumili si Jesus. (Lucas 4:1-13) Sang ulihi luyag sia nga himuon sang katawhan nga mangin hari, apang nalagyo si Jesus. (Juan 6:15) Nahibaloan niya kon ano sadto ang sistema politika sang kalibutan, kag nasayasat niya nga indi kabubut-on sang Dios para sa iya nga magtinguha sa pagpauswag sini.

⁹ Nagpakita si Jesus sing bug-os nga katutom kay Jehova, nga iya Dios kag Amay. Ginhigugma niya ang mga dalanon sang iya Amay kag pirme niya ginhimo ang mga butang nga kalahamut-an sa iya. (Juan 8:29) Nahibaloan niya nga ang mga solusyon sa mga palaligban sang katawhan magaabot paagi sa Ginharian sang Dios, isa ka matuod gid nga pangulohan nga magagahom gikan sa langit kag magaaman sing matarong kag mahigugmaon nga pagtuytoy nga kinahanglanon sang katawhan. Ina nga Ginharian lamang ang makadula sang impluwensia ni Satanas kag sang iya mga demonyo. Ini lamang ang makapahiusa sa katawhan sang tanan nga rasa kag mga pungsod sa isa ka bug-os globo nga pamilya nga nagakabuhi sa paghidait. Ini lamang ang makahilway sa katawhan gikan sa pagkaulipon sa sala kag kamatayon. Ini lamang ang makadala sing dayon nga kalipay sa katawhan. Ini nga Ginharian indi isa ka kahimusan nga gintukod sang mga politiko kag ginpakamaayo sang mga klero. Ang matuod nga mga Cristiano wala nagagamit sing mga hinganiban sang lawasnon nga pagpakig-away sa pagpauswag sang mga intereses sini. Amo ini ang pangulohan sang Dios, nga may langitnon nga Hari nga ginpalingkod sa trono sang Dios mismo. Amo ini ang Ginharian nga ginbantala ni Jesus kag para sa amo gintudloan niya ang iya mga sumulunod nga ipangamuyo.—Daniel 2:44; Bugna 20:1, 2; 21:3, 4.

DIIN NGA BAHIN ANG PILION MO?

¹⁰ Ang hulusayon nga dapat mo atubangon amo ini: Ginakilala mo bala nga si Jehova nga Dios, ang Manunuga sang uniberso, amo man ang may kinamatarong nga Soberano kag Supremo nga Manuggahom sini? Nakahinguyang ka na bala sing tion sa pagtuon sang iya katuyoan kag sang iya mga ginapatuman nga yara sa Biblia? Bilang pagtahod sa iya palangakoan kag bilang apresasyon sa iya mga dalanon, ginapamatod-an mo bala ang imo kaugalingon subong mahigugmaon kag matinumanon sa iya?—Salmo 24:1, 10; Juan 17:3; 1 Juan 5:3.

¹¹ Mas malipayon bala ang mga tawo nga nagapili sang tuhay nga dalanon? Ano ang nangin resulta sang argumento ni Satanas nga ang mga tawo makabenepisyo kon mangin independiente sila sa baylo nga mamati sa Dios? Ang pagdumili sa pagkilala nga ang Dios nagapanag-iya sang duta kag nga ang tanan nga katawhan, subong mga kaliwat sang unang mag-asawa, dapat mangin mag-ulutod nagresulta sa pagpatay sa dimagkubos 99 milyones ka mga lalaki, mga babayi kag kabataan sa mga inaway sini nga siglo lamang. Ang kapaslawan sa pag-aplikar sang mga talaksan sa moral sang Biblia nagpatubas sing nabungkag nga mga pamilya, epidemya sang balatian sa kinatawo, pagpierdi sa lawas paagi sa pagkagiyan sa droga, kag sa masingki nga krimen. Bisan ang mga tawo nga nakalikaw sa masingki nga katapusan ginaatubang sang kamatayon bangod sang sala nga napanubli kay Adan. Ginapakita sang tanan nga pamatuod nga ginahalitan lamang sang mga tawo ang ila kaugalingon kag ang mga tawo sa palibot nila kon sikwayon nila ang maalamon kag mahigugmaon nga mga ginapatuman sang Manunuga. (Roma 5:12; ipaanggid ang Isaias 48:17, 18.) Sa pagkamatuod indi ina ang sahi sang kabuhi nga luyag mo. Makapili ka sing mas maayo pa.

¹² Upod ang mapagsik nga pangabay, ang Biblia nagapangagda: “Tilawi kag tan-awa nga maayo si Jehova, kamo nga katawhan; malipayon ang mabukod nga tawo nga nagadangop sa iya.” (Salmo 34:8) Sa paghimo sina, dapat mo makilala si Jehova kag dayon iaplikar mo ang iya laygay. Samtang ginahimo mo ina, ang imo kabuhi mapuno sing kahulugan. Sa baylo sang malip-ot nga tinion sang pagkalipay nga mahimo makabulig sa imo sa makadali sa pagkalipat sang imo mga palaligban apang sa masami nagapatubas sing kasubo sa ulihi, makatuon ikaw kon paano landason sing madinalag-on ang mga palaligban sang kabuhi kag kon paano makatigayon sing dayon nga kalipay. (Hulubaton 3:5, 6; 4:10-13; 1:30-33) May paglaum man ikaw nga makaambit sa dalayawon nga mga pagpakamaayo nga magaabot paagi sa Ginharian sang Dios. Kon amo ini nga sahi sang kabuhi ang ginakalangkagan mo, importante nga maghikot ka karon. Ngaa?

ANG TANAN NGA PUNGSOD NAGAPADULONG SA ARMAGEDON

¹³ Si Jehova indi magapabaya sing dayon sa mga tawo kag mga organisasyon nga hungod ukon walay pagsapak nga nagasunod sa pagpanguna ni Satanas. Indi sila pagtugutan nga magpadayon sa pagsikway sa kasugoan sang Dios, nga ginaabusuhan ang duta kag ginapierdi ang kabuhi para sa iban. Nagaatubang sila sing adlaw sang pagpakighusay sa ginatawag sang Biblia nga “dakung adlaw ni Jehova.”—Sofonias 1:2, 3, 14-18.

¹⁴ Sa pagpahayag sang mga hitabo nga mahanabo sa tion sang nagatakop nga mga adlaw sang karon nga sistema sang mga butang, ginpahayag ni Jesucristo nga ang “mga ekspresyon nga gin-inspirar sang mga demonyo” “nagakadto sa mga hari sang bug-os napuy-an nga duta, sa pagtipon sa ila sing tingob sa inaway sang dakung adlaw sang Dios nga Labing Gamhanan.” Subong ginapakita sina nga bugna, “gintipon nila sila sing tingob sa duog nga ginatawag sa Hebreo Har–Magedon [ukon, Armagedon].” Ina nga pagtipon ginahimo na karon!—Bugna 16:14, 16; Authorized Version.

¹⁵ Ang Armagedon nga ginahambal sang Biblia indi butang nga malikawan sang nu­clear ­freeze. Indi ini mapunggan sang mga negosiasion sang mga pungsod. Ang ngalan ginkuha sa dumaan nga siudad sang Megido, apang kapin pa ang nadalahig sang sa isa ka lokasyon sa Natung-an nga Sidlangan. Sa pagsutsot sang dimakita nga “manuggahom sining kalibutan,” ang tanan nga pungsod, walay sapayan sang ila nanuhaytuhay nga ideolohiya sa politika, ginatipon sa isa ka bug-os kalibutan nga kahimtangan nga nagapakita sang ila pagpamatok kay Jehova nga Dios. “Ang mga hari sang bug-os napuy-an nga duta,” upod ang tanan nila nga mga sumulunod, ginatiklod sa pagpakita sang ila ginatindogan. Sa gilayon sa wala pa ang Armagedon ang ila pagpamatok sa Ginharian sang Dios kag sa tanan nga nagawali sini magabaskog sing daku sa bug-os nga duta. Ginakilala man nila ang pagluntad ni Satanas ukon wala, “ang bug-os nga kalibutan yara sa gahom sang malauton,” subong ginapabutyag sang Pulong sang Dios. Ang bug-os malauton nga kalibutan kag ang tanan nga nagasalig sa sini, huo, ang tanan nga nagailog sang iya mga dalanon, dapat magtaliwan.—1 Juan 5:19; 2:15-17.

¹⁶ Gikan sa ibabaw paubos, ining kalibutan puno sing kalautan. Indi lamang kilala sa kalainan nga mga kriminal kundi kinaandan man nga mga banwahanon ang nagapakita sing batinggilan nga pagsikway sa kasugoan kag kakulang sing kabalaka sa tawo kag sa propiedad sang ila isigkatawo. Labaw sa tanan, nagadumili sila sa pagpamati sa ginasiling sang Dios sa iya Pulong, ang Biblia. Wala nila ginatahod ang iya pagkasoberano. Kinahanglan nga maghikot ang Dios agod tinloan ang iya ngalan sang pagpakahuya nga ginhimo sa sini, kag agod ihanda man ang dalan sa paghimo sang duta nga isa ka Paraiso nga sa diin ang mga nagahigugma sang pagkamatarong makatigayon sing matuod nga paghidait kag kalig-onan.

¹⁷ Kon mag-abot ang kalaglagan, indi maduhaduhaan nga ini gikan kay Jehova. Ang kahapayan magalambas sa bilog nga globo. Makilala sang mga pungsod nga si Jehova nagahikot samtang ang iya puersa sa paglaglag nagahikot. Samtang nagakalusod ang awtoridad sang pangulohan, ang kamut sang tagsa ka tawo mangin batok sa iya kaupod. Gikan sa langit, tuytuyan sang Anak sang Dios ang mangin resulta.—Bugna 6:16, 17; 19:11-13; Zacarias 14:13.

¹⁸ Indi subong sang mga resulta sang nuklear nga inaway sang mga tawo, ining kalaglagan may pili. Apang sin-o ang mga makalampuwas? Sila bala tanan nga nagapangangkon may relihion sila, ukon ayhan ang tanan nga nagapangangkon mga Cristiano sila? Ginatawag ni Jesus ang “madamo” sa ila subong “mga manugbuhat sing kalautan.” (Mateo 7:21-23) Ang mga makalampuwas pasulod sa “bag-ong duta” amo lamang sila nga nagpalambo gid sing isa ka suod nga kaangtanan kay Jehova kag sa iya hari nga Anak, si Cristo Jesus. Paagi sa ila pagkabuhi kag sa ila pagpanaksi nahanungod sa Ginharian, ginpakita nila nga sila gid “nakakilala sa Dios” kag nga ila ‘ginatuman ang maayong balita nahanungod sa aton Ginuong Jesus.’ Ginapamatod-an mo ang imo kaugalingon subong amo sina nga tawo?—2 Tesalonica 1:8; Juan 17:3; Sofonias 2:2, 3.

[Mga Pamangkot sa Pagtinuon]

1. (a) Ano nga mga hulusayon karon ang nagapangibabaw sa hunahuna sang madamo nga tawo, kag sa diin sila nagapangita sing mga solusyon? (b) Ano sa masami ang ila mabinagbinag?

2. Ngaa kalain gid sang mga kahimtangan sa kalibutan?

3. Ano ang ginapakita sang Genesis 2:16, 17 tuhoy sa nagakaigo nga kaangtanan sang katawhan sa Dios?

4. (a) Sa diin maghalin si Satanas? (b) Anong malain nga handum ang gintugutan niya nga magtubo?

5. (a) Ano nga mga hulusayon ang ginpautwas sa Eden? (b) Sin-o ang naapektohan sini?

6. Ngaa wala sa gilayon ginlaglag ni Jehova ang mga rebelde?

7. (a) Paano nagsugod ang tawhanon nga mga pangulohan? (b) Ano nga sahi sang rekord ang ila nahimo?

8. Ngaa nagdumili si Jesus nga madalahig sa sistema politika sang kalibutan?

9. (a) Agod malubad ang mga palaligban sang katawhan, ano ang dapat himuon nga ang makahimo lamang amo ang Ginharian sang Dios? (b) Ano ina nga Ginharian?

10. (a) Ano ang daku nga hulusayon nga dapat atubangon sang kada isa sa aton? (b) Ano dapat ang aton ginahimo nahanungod sini?

11. Ngaa ang pagpili sang tuhay nga dalanon wala nagadala sing kalipay?

12. (a) Ano ang mainit nga pangagda sa aton sang Biblia? (b) Samtang amat-amat nga ginaaplikar naton ang Pulong sang Dios sa aton kabuhi, ano ang aton maeksperiensiahan?

13. Ngaa importante nga magtindog kita sing malig-on sa bahin ni Jehova karon?

14. Sa ano ginatipon karon ang tanan nga pungsod?

15, 16. (a) Ano ang Armagedon? (b) Ngaa kinahanglanon ini?

17. (a) Daw ano kadaku ang kalaglagan? (b) Sin-o ang magatuytoy sang resulta?

18. Sin-o ang mga makalampuwas?