Kapitulo 8
Mga Nakalampuwas Gikan sa Tanan nga Pungsod
SI JEHOVA mahigugmaon nga interesado sa katawhan sang tanan nga pungsod kag tribo. Naghimo sia sing aman agod nga ang tanan nga pamilya sang duta makatigayon sang iya kahamuot kag pagpakamaayo. Kay Abram (Abraham), nga kaliwat sang anak ni Noe nga si Sem, si Jehova nagsiling: “Halin ka sa imo duta kag sa imo kahimataan kag sa balay sang imo amay pakadto sa duta nga akon igapakita sa imo; kag himuon ko gikan sa imo ang isa ka pungsod nga daku, kag pakamaayuhon ko ikaw kag padakuon ang imo ngalan; kag manginpagpakamaayo ikaw. Kag pakamaayuhon ko ang mga nagapakamaayo sa imo, kag ang nagapakamalaut sa imo pakamalauton ko, kag sa imo pakamaayuhon ang tanan nga mga panimalay sang duta.” (Genesis 12:1-3; Binuhatan 7:2-4) “Ang tanan nga mga panimalay sang duta”—nagalakip ina sa aton karon, walay sapayan kon ano nga pungsod ang aton natawhan ukon ang hambal nga aton ginahambal.—Salmo 65:2.
2 Ang ginhambalan ni Jehova sini nga saad isa ka tawo sang pagtuo, kag dapat man kita magtuo kon luyag naton makaambit sa pagpakamaayo gikan sa Dios nga ginsaad diri. (Santiago 2:23; Hebreo 11:6) Ang pagtuo ni Abraham indi lamang isa ka mabugnaw nga pagtuo kundi naupdan sing buhat. Ginpahulag sia sini nga maghalin sa Mesopotamia pakadto sa isa ka malayo nga duog nga wala pa gid niya makita sang una. “Bangod sa pagtuo nanginmanlulugayaw sia sa duta sang saad, subong sa duta nga indi iya,” kag wala sia makig-angot sa bisan ano nga siudad nga ginharian diri. “Kay ginahulat niya ang siudad [Ginharian sang Dios] nga may matuod nga mga sadsaran, nga ang manunukod kag manugbuhat sini nga siudad amo ang Dios.”—Hebreo 11:8-10.
3 Sang makalab-ot si Abraham sa edad nga 100 anyos kag ang iya asawa nga si Sara 90 anyos, milagruso nga ginpakamaayo sila ni Jehova sing anak nga lalaki, si Isaac. May kaangtanan sa sining anak nga lalaki, gintilawan ang pagtuo kag pagkamatinumanon ni Abraham sa Dios. Ginsugo ni Jehova si Abraham nga paupdon si Isaac, nga karon pamatan-on na, sa duta sang Moria kag ihalad sia didto subong isa ka halad nga sinunog. May pagtuo sa ikasarang sang Dios nga ipasag-uli ang iya anak sa kabuhi paagi sa pagkabanhaw, nagtuman si Abraham. (Hebreo 11:17-19) Si Isaac, nga mapinasakupon sa iya Amay, ginhigot sa ibabaw sang altar kag ginahana na ni Abraham ang sundang nga iya ipatay sa iya sang magpasilabot ang anghel ni Jehova. Ang pagtilaw nakalab-ot tubtob sa punto sa pagpamatuod nga si Abraham wala sing idingot nga bisan ano gikan sa Dios. Busa ginpalig-on sang Dios ang iya katipan kay Abraham, subong ginasiling sang Biblia:
4 “‘Sa akon kaugalingon nagsumpa ako,’ nagasiling si Jehova, ‘bangod nga naghimo ka sining butang, kag wala mo pag-idumili ang imo anak, ang imo bugtong nga anak, sa pagkamatuod pakamaayuhon ko ikaw kag pabuaron ko ang imo binhi subong sang kabituonan sang langit kag subong sang balas nga yara sa baybayon sang dagat; kag ang imo binhi magatag-iya sang gawang sang iya mga kaaway. Kag paagi sa imo binhi pakamaayuhon ang tanan nga pungsod sang duta bangod nagtuman ka sa akon tingog.’”—Genesis 22:15-18.
5 Kon mahangpan naton nga ang Daku Pa nga Abraham amo si Jehova kag nga si Isaac naglandong kay Jesucristo, mahangpan naton kon paano ining hitabo importante sa aton sing personal. Sa kamatuoran, ang aton palaabuton ginapat-od sang kon paano kita nagahikot ayon kay Jehova nga Dios. Posible kita nga makatigayon sing dayon nga kabuhi bangod ginhatag sang Dios ang iya bugtong nga Anak subong halad para sa aton mga sala, subong gin-ilustrar sang pagtinguha ni Abraham nga ihalad si Isaac. (Juan 3:16) Ang bisan sin-o nga nagapadayon sa ‘pagpakamalaut’ kay Jehova, nga nagatamay ukon nagapasapayan sang iya mahigugmaon nga mga katuyoan, pakamalauton nga magakahulugan sang ila dayon nga kalaglagan. (Ipaanggid ang 1 Samuel 3:12-14; 2:12.) Apang kon mainapresyahon kita nga mga tawo, “pakamaayuhon” naton ang Daku Pa nga Abraham. Paano? Paagi sa pagkilala nga ang tanan nga maayong butang nagagikan kay Jehova, lakip ang dibagay nga dulot sang kabuhi paagi sa iya Anak. Subong man, sugiran naton ang iban nahanungod sa pagkaayo ni Jehova kag sang dalayawon nga mga kinaiya sang iya pagkahari. (Santiago 1:17; Salmo 145:7-13) Sa sining paagi makabaton kita sing mga pagpakamaayo gikan sa iya sing dayon.
ANG GINSAAD NGA “SAAD” NI ABRAHAM
6 Subong bahin sang iya kahimusan para sa pagpakamaayo sa katawhan nagtuyo si Jehova sing isa ka matarong nga langitnon nga pangulohan. Si Jesucristo natawo subong isa ka kaliwat ni Abraham, subong ang iya labing importante nga anak, ukon ang “binhi,” kag ginhatag sa iya ni Jehova ang pagkahari. (Galacia 3:16; Mateo 1:1) Gani, subong ginapakita sang sumpa sang Dios kay Abraham, ang katawhan gikan sa tanan nga pungsod sang duta pakamaayuhon paagi kay Jesucristo. Ginahimo mo bala kon ano ang kinahanglanon agod matigayon ina nga pagpakamaayo para sa imo kaugalingon? Halimbawa, ginapakita bala sang imo pagkabuhi nga ginaapresyar mo kon daw ano ka importante sa imo ang halad nga kabuhi ni Jesus? Nagapasakop gid bala ikaw sa iya awtoridad subong Hari?—Juan 3:36; Binuhatan 4:12.
7 Ginhatagan si apostol Juan sing matagnaon nga laragway sang mga hitabo sa langit nga sa diin may iban pa sia nga nakita nga kaupod ni Jesucristo sa langitnon nga Bukid nga Sion. Sila, man, bahin sang “binhi ni Abraham.” Subong ginasiling sa Bugna 14:1-5, sila “ginbakal gikan sa katawhan” kag ang kadamuon 144,000. (Galacia 3:26-29) Sin-o ang ila ginalakip? Maathag nga ginapakita sang Biblia nga indi gid katuyoan sang Dios nga kuhaon ang tanan nga matarong nga tawo pakadto sa langit. (Mateo 11:11; Binuhatan 2:34; Salmo 37:29) Ang dakung pribilehiyo sa pag-ambit upod kay Cristo sa Ginharian sang langit limitado sa “diutay nga panong” nga mangin mga hari kag mga saserdote kaupod niya sa sulod sang isa ka libo ka tuig.—Lucas 12:32; Bugna 5:9, 10; 20:6.
8 Paano ginpili ang “diutay nga panong”? Ang mahigugmaon nga imbitasyon sa pagpakigbahin sa langitnon nga Ginharian una nga ginhatag sa kinaugali nga mga Israelinhon. Apang bangod sang ila kakulang sing pagtuo, wala nila mahuman ang bug-os nga 144,000. Gani ang mga Samariahanon kag, sang ulihi, ang katawhan sang tanan nga pungsod gin-agda. (Binuhatan 1:8) Ang nahauna sa mga masigkamanunubli ni Cristo ginhaplasan sing balaan nga espiritu sang Pentecostes sang 33 C.E. Ang pagpili sini nga grupo nagapadayon tubtob mapat-inan sang Dios ang 144,000 subong nahamut-an niya. Nian ginapatuhoy ang igtalupangod sa pagtipon sa mga tawo nga magakabuhi sa duta subong mainapresyahon nga mga sakop sang langitnon nga pangulohan.
9 Ang mga manunubli sang langitnon nga Ginharian kaupod ni Cristo ginapatuhuyan sa Kasulatan subong “mga pinili,” “mga balaan,” mga tawo nga “hinaplas . . . [sang] Dios.” (2 Timoteo 2:10; 1 Corinto 6:1, 2; 2 Corinto 1:21) Ginalaragway man sila sing kolektibo subong “nobya” ni Cristo. (Bugna 21:2, 9; Efeso 5:22-32) Gikan sa iban nga pagtamod, ginatawag sila nga “mga utod” ni Cristo, “masigkamanunubli ni Cristo” kag “mga anak” sang Dios. (Hebreo 2:10, 11; Roma 8:15-17; Efeso 1:5) Walay sapayan sang ila nasyonalidad, sa espirituwal nga hambal, sila “Israel sang Dios.” (Galacia 6:16; Roma 2:28, 29; 9:6-8) Sang gintapos ni Jehova ang iya Kasugoan nga katipan upod sa undanon nga Israel, gindala niya ang espirituwal nga Israel sa bag-ong katipan upod sa iya. Apang ang iya mga pagpakig-angot sa undanon nga Israel samtang yara sila sa idalom sang Kasugoan nangin sulundan sang mga butang nga maabot. (Hebreo 10:1) Sin-o, nian, ang ginlandong sang pungsod sang undanon nga Israel, nga ginpili sang Dios subong iya “pinasahi nga pagkabutang”? Ang mga kamatuoran nagatudlo sa espirituwal nga Israel, nga ginpili sang Dios sa paggahom upod kay Cristo sa langit. (Ipaanggid ang Exodo 19:5, 6 sa 1 Pedro 1:3, 4 kag 2:9.) Upod kay Cristo sila nagahuman sing isa ka ahensya nga paagi sa amo ang mga pagpakamaayo ihatag sa tanan nga iban pa nga matinumanon sa tunga sang katawhan. Ang apresasyon sa sini amo ang yabi sa paghangop sa Biblia.
ANG MGA GINPAKAMAAYO PAAGI SA “BINHI”
10 Sang tion nga ang Dios nagapakig-angot sa isa ka pinasahi nga paagi sa pungsod sang Israel, naghimo man sia sing mahigugmaon nga mga aman para sa mga tawo nga indi bahin sadto nga pungsod apang ginpahulag sang ila tagipusuon sa pagpakigbahin sa matuod nga pagsimba upod sa mga Israelinhon. Takus talupangdon ang pagsambit sa ila sa rekord sang Biblia. May yara man bala sila katumbas sa karon? Huo, sa pagkamatuod. Ginalaragway nila sa madamong paagi ang mga indi bahin sang espirituwal nga mga Israelinhon apang nagakalangkag sa dalayawon nga paglaum sing dayon nga kabuhi subong dutan-on nga mga sakop sang Ginharian sang Dios. Amo ini sila ang ginhambal sang Dios kay Abraham, nga nagasiling nga ang katawhan sang “tanan nga pungsod sang duta” magapakamaayo sang ila kaugalingon paagi sa iya “binhi.”—Genesis 22:18; Deuteronomio 32:43.
11 Katuyoan gid sang Dios nga ang tanan nga katawhan mahiusa sa matuod nga pagsimba. Sing nagakaigo, sa dedikasyon sang templo nga gintukod ni Solomon sa Jerusalem, nangamuyo ang hari nga kabay nga pamatian ni Jehova ang pangamuyo sang mga dumuluong nga nagtinguha sa paghalad sing kalahamut-an nga pagsimba upod sa Israel. (2 Cronica 6:32, 33) Kag, sa Isaias 56:6, 7, ang Dios nagsaad: “Ang mga dumuluong man nga nagsimpon kay Jehova sa pag-alagad sa iya kag sa paghigugma sang ngalan ni Jehova, agod mangin mga alagad niya, . . . dalhon ko man sila sa akon balaan nga bukid kag lipayon sila sa akon balay sang pangamuyo. . . . Kay ang akon balay tawgon nga balay sang pangamuyo para sa tanan nga katawhan.” Nagapakita sang espiritu nga ginpakita diri, ang modernong-adlaw nga “mga dumuluong” nagatipon karon gikan sa tanan nga pungsod, indi lamang subong kaswal nga mga tumalan-aw, kundi subong mga tawo nga ‘nagsimpon kay Jehova.’ Ginahimo nila ini paagi sa pagdedikar sang ila kabuhi sa iya, nga ginasimbulohan ini paagi sa pagpatugmaw sa tubig kag dayon nagaalagad sa paagi nga nagapasundayag sang ila gugma “sa ngalan ni Jehova” kag sang tanan nga ginarepresentar sini.—Mateo 28:19, 20.
12 Dapat sila mangin matutom subong sang hinaplas sing espiritu nga mga Cristiano. Sa idalom sang Mosaikong Kasugoan, ginpatuman ni Jehova sa “dumuluong” nga nagbaton sa matuod nga pagsimba nga sundon ang pareho man nga kasugoan nga ginasunod sang Israel. (Numeros 15:15, 16) Wala sila nagabatas lamang sa isa kag isa kundi ang ila kaangtanan may matuod gid nga gugma. (Levitico 19:34) Subong man, ang mga ginlandong sang mga dumuluong nagatinguha sa pagpahisuno sing bug-os sang ila kabuhi sa mga kinahanglanon ni Jehova kag sa pag-alagad nga may mahigugmaon nga paghiusa sa mga nagkalabilin sang espirituwal nga Israel.—Isaias 61:5.
13 Paagi sa iya manalagna nga si Isaias, ginlaragway ni Jehova ang malangkagon nga panong sang mga tawo gikan sa “tanan nga pungsod” nga sa karon nagapanong sa unibersal nga balay sang pagsimba ni Jehova. Sia nagtagna: “Madamo nga katawhan ang magakadto kag magasiling: ‘Kari kamo, magataklad kita sa bukid ni Jehova, sa balay sang Dios ni Jacob; kag tudloan niya kita sang iya mga dalanon, kag magalakat kita sa iya mga banas.’” Subong resulta, ‘ginsalsal [nila] ang ila mga espada nga mga punta sang arado’ kag, bisan sa tunga sining nagapinuyas nga kalibutan, ‘wala [sila] nagatuon sing inaway.’ (Isaias 2:1-4) Makita mo bala ang imo kaugalingon sa sinang malipayon nga panong? Nagaambit ka bala sa ila handum nga ton-an ang mga kinahanglanon ni Jehova, nga iaplikar ini sa inyo kabuhi kag mag-untat sa pagsandig sa mga hinganiban sang inaway? Nagsaad ang Dios nga ang dakung kadam-an nga nagatinguha sining dalanon “magaguwa sa dakung kapipit-an” subong mga nakalampuwas pasulod sa iya malinong nga “bag-ong duta.”—Bugna 7:9, 10, 14; Salmo 46:8, 9.
[Mga Pamangkot sa Pagtinuon]
1. Ano nga saad kay Abraham ang nagapakita nga ang kahamuot sang Dios posible para “sa tanan nga panimalay” sang katawhan?
2. (a) Kaangay ni Abraham, ano nga kinaiya ang kinahanglanon naton? (b) Subong ginpakita sa Hebreo 11:8-10, paano si Abraham naghatag sing pamatuod sa sining kinaiya?
3. Ano nga pagtilaw sa pagtuo ang naeksperiensiahan ni Abraham tuhoy kay Isaac?
4. Sadto nga okasyon, anong importante pa nga saad ang ginhatag sang Dios tuhoy sa katawhan sang tanan nga pungsod?
5. (a) Ano ang ginlandong sang pagtinguha ni Abraham nga ihalad si Isaac? (b) Sa katumanan sang Genesis 12:3, paano ang katawhan ‘nagapakamalaut’ sa Daku Pa nga Abraham, kag ano ang resulta? (c) Paano naton “mapakamaayo” sia?
6. (a) Sin-o ang panguna nga “binhi” ni Abraham? (b) Paano naton matigayon ang pagpakamaayo nga nagaabot paagi sa iya?
7. (a) Sin-o pa ang nalakip sa “binhi ni Abraham”? (b) Paano naton mahibal-an nga indi tanan nga nagaalagad sa Dios sing matutom makadto sa langit?
8. San-o nagsugod ang pagpili sa “diutay nga panong,” kag daw ano kadugay nagapadayon ini?
9. (a) Anong mga ekspresyon sa Biblia ang naaplikar sa sining langitnon nga klase? (b) Sin-o ang ginlandong sang kinaugali nga mga Israelinhon?
10. Sin-o ang ginlaragway sang di-Israelinhon nga mga sumilimba ni Jehova?
11. (a) Paano ginsambit ini nga grupo sa dedikasyon sang templo ni Solomon? (b) Paano ang “mga dumuluong” ‘nagasimpon kay Jehova’ sa aton adlaw, subong gintagna sa Isaias 56:6, 7?
12. Paano ginapakita sang Mosaikong Kasugoan kon bala ang mga nagalaum nga mangin dutan-on nga mga sakop sang Ginharian sang Dios dapat magsunod sa mataas nga mga talaksan nga naaplikar sa espirituwal nga Israel?
13. Anong mga detalye sa Isaias 2:1-4 ang dapat naton binagbinagon kon luyag naton makalampuwas pasulod sa “bag-ong duta”?