Pagkaluwas Padulong sa Bag-ong Duta: Kapitulo 10

“Indi Na Sila Paggutumon”

1. Daw ano ka serioso ang kabalaka sang kalibutan sa kalan-on?

ANG isa sang daku nga mga palaligban nga nagaatubang sa kalibutan karon amo ang tuhoy sa kalan-on. Madamo ang nabudlayan bangod sang mataas nga mga bili. Ang iban pa nagakagutman. Ginreport kasan-o lang nga kada tuig 40 milyones ka tawo—sang iban nga mga tuig subong kadamo sa 50 milyones—ang nagakapatay bangod wala sila sing kalan-on nga ila ginakinahanglan. Mga napulo ka beses sina ang nagaantos sing sobra nga malnutrisyon. Bisan pa ang patubas sang iban nga mga pungsod kapin sa ila makaon, ang pagribalay sa politika kag ang komersial nga kakagud masami nga nagaupang sa mga panikasog nga ang sobra nga kalan-on madala sa mga nagakinahanglan sini.—Ipaanggid ang Bugna 6:5, 6.

2. Bisan sa mga pungsod nga may kabuganaan, ngaa may rason ang mga tawo nga mabalaka?

² Bisan gani ang daw bugana nga mga pungsod may makatulublag nga palaabuton. Ngaa? Ang mga metodo karon sa pagpanguma masami nga nagasandig sa petrolyo, kag limitado lamang ang suplay sa bilog nga globo. Ang daku nga pagsandig sa komersial nga mga abuno nagahigko sang ila tubig. Ang sobra nga paggamit sing mga pestisidio, sa tuyo nga amligan ang mga tanum, nagalaglag man sang mga organismo nga sa amo nasandig ang palaabuton nga pagkamabungahon sang duta. Sa halos tanan nga latagon sang pagtinguha sang tawo, ang serioso nga mga palaligban nagadamo. Si Aurelio Pec­cei, presidente sang isa ka internasyonal nga forum sang mga intelektuwal, nagpaangay sang kalibutan sa “isa ka nagaumpok nga bala nga nagalumpat-lumpat gikan sa isa ka kapahamakan padulong sa lain nga kapahamakan.” Realistiko bala nga ibutang ang imo paglaum sa palaabuton sa isa ka kalibutan nga may subong sina nga rekord?—Jeremias 10:23; Hulubaton 14:12.

3. Sin-o ang makagarantiya sing bugana nga kalan-on para sa tanan nga katawhan, kag ano ang nagahatag sa imo sina nga pagsalig?

³ Sing makatarunganon, minilyon ka tawo ang nakarealisar sang bulig nga ang Dios lamang makahatag. Sa tapos mausisa ang tagna sang Biblia, nahibaloan nila nga ginpalingkod na ni Jehova nga Dios ang iya langitnon nga Anak nga si Jesucristo kag ginhatag sa iya ang bug-os nga duta. (Salmo 2:7, 8) May kaalam sia kag ikasarang sa paggarantiya nga ang tanan nga katawhan bugana nga suplayan sang patubas sang duta. (Salmo 72:7, 8, 16; Colosas 1:15-17) Kon madula na ang makagud nga sistema karon, si Cristo ang magatuytoy sang mga panikasog sang makalampuwas nga mga tawo agod nga ang bug-os nga duta mangin isa ka mabungahon nga Paraiso.

4. Agod makabenepisyo gikan sa sinang pisikal nga mga aman, ano ang dapat himuon naton karon?

⁴ Apang, ang mga makabenepisyo sing dayon gikan sa iya paggahom amo sila nga nakahantop nga ang tawo indi lamang sa tinapay mabuhi, mga tawo nga nagaapresyar sang espirituwal nga mga prinsipio kag sang kinahanglanon nga magkuha sing kusog gikan sa pagtuon kag paghimo sang kabubut-on sang Dios. Sulit-sulit nga ginapadaku sang Biblia ang pagkaimportante sini. (Juan 4:34; 6:27; Jeremias 15:16) Ginpadaku ini ni Jesus sang magsiling sia: “Nasulat na, ‘Indi lamang sa tinapay mabuhi ang tawo, kundi sa tagsa ka pulong nga nagaguwa sa baba ni Jehova.’” (Mateo 4:4) Kinahanglan naton inang espirituwal nga kalan-on karon, agod maluwas kita sa katapusan sang karon nga kalibutan. Kon paano naton matigayon ini, gin-ilustrar para sa aton sa kasaysayan sang Biblia nahanungod kay Jose kag sa iya mga utod.

“KADTO KAMO KAY JOSE”

5. Paano naulipon si Jose sa Egipto?

⁵ Ang Dios naghatag kay Jose, nga apo sa tuhod ni Abraham, sing mga damgo nga nagapakita nga si Jose mangin bantog. Bangod sini, subong man sang kamatuoran nga sia hinigugma gid sang iya amay, gindumtan si Jose sang iya napulo ka utod sa amay. Nagplano sila nga patyon sia apang sang ulihi ginbaligya na lang nila sia subong isa ka ulipon, kag gindala sia sa Egipto. Paano karon matuman ang katuyoan sang Dios tuhoy kay Jose?—Genesis 37:3-11, 28.

6. (a) Paano natawag ang igtalupangod ni Paraon kay Jose? (b) Ano ang mga damgo nga nagtublag kay Paraon?

⁶ Sang 30 anyos si Jose, ginpadamgo ni Jehova si Paraon, nga manuggahom sang Egipto, sing duha ka damgo nga nagtublag sa iya. Sa una nakakita sia sing pito ka baka nga “matahom kag matambok,” nakakita man sia sing pito pa ka baka nga “malaw-ay kag kagalkal.” Ginkaon sang kagalkal nga mga baka ang matambok nga mga baka. Sa isa pa ka damgo nakakita si Paraon sing pito ka uhay nga “matinggas kag maayo,” nga nag-ulhot sa isa ka dagami kag sing pito pa ka uhay nga “kupos kag ginpakigas sang salatan.” Sa liwat, ginhalunhon sang mga kupos ang mga matinggas nga uhay. Ano ang kahulugan sini? Wala sing isa sa maalam nga mga tawo sang Egipto ang makapatpat sang mga damgo. Apang nadumduman sang manugtagay ni Paraon nga, sang nabilanggo sia, ang isa ka kaupod nga bilanggo, nga si Jose, husto nga nagpatpat sing mga damgo. Sa gilayon ginpatawag ni Paraon si Jose.—Genesis 41:1-15.

7. (a) Paano si Jose nangin manugdumala sang kalan-on sa Egipto? (b) Sang magdaku ang tiggulutom, ano ang ginhimo sang mga Egiptohanon agod mabuhi?

⁷ Wala nagaangkon sang dungog para sa iya kaugalingon, si Jose nagsiling kay Paraon: “Ang damgo ni Paraon isa. Ang Dios nagpahayag kay Paraon sang buot na niya himuon.” (Genesis 41:16, 25) Ginpaathag ni Jose nga ang kahulugan sang ikaduha nga damgo pareho sa una nga damgo kag isa ini ka pagpadaku sang pagkapat-od sini. Ang pito ka tuig sang kabuganaan sa Egipto pagasundan sang pito ka tuig nga tiggulutom. Ginlaygayan niya si Paraon nga magtangdo sing sangkol nga mga tawo nga magatago sing mga uhay sa tion sang mga tuig sang kabuganaan bilang paghanda para sa tiggulutom. Sa pagkilala nga ginpahayag sang Dios ining tanan kay Jose, gintangdo ni Paraon si Jose subong manugdumala sa kalan-on kag ginhatagan sia sing awtoridad sa Egipto nga ikaduha kay Paraon. Sibu gid sa gintagna, nag-abot ang pito ka tuig sang indi tumalagsahon nga kabuganaan, kag madamo nga kalan-on ang natago ni Jose. Nian ginhugakom sang gintagna nga tiggulutom ang duta. Sang mangayo sing tinapay ang mga tawo kay Paraon, sia nagsabat: “Kadto kamo kay Jose. Himua ang iya isiling sa inyo.” Gani ginpadalawat sa ila ni Jose ang uhay—sang primero ginbayaran nila sing kuwarta, nian sang ila mga sapat, kag sang ulihi bilang baylo sa ila kaugalingon kag sa ila duta. Agod mabuhi sila, dapat nila ihatag sing bug-os ang ila kaugalingon sa pag-alagad kay Paraon.—Genesis 41:26-49, 53-56; 47:13-26.

8. (a) Agod makatigayon sing ginakinahanglan nga kalan-on, ano ang ginkinahanglan sa mga utod sa amay ni Jose? (b) Ngaa gintipigan ang rekord tuhoy sa sini?

⁸ Naapektohan man sang tiggulutom ang mga pungsod sa palibot sang Egipto. Sang ulihi ang mga utod sa amay ni Jose nagdulhog gikan sa Canaan. Kapin sa 20 ka tuig ang nagligad kutob sang ginbaligya nila sia sa pagkaulipon, kag wala nila makilala sia. Nagyaub sila sa atubangan niya, subong gintagna anay sang mga damgo ni Jose, kag nagtinguha sa pagbakal sing kalan-on. (Genesis 37:6, 7; 42:5-7) Gintilawan sila ni Jose kag nakita niya ang makapakombinse nga pamatuod nga ang ila panimuot sa iya kag sa ila amay nagbalhin. Sang ulihi nagpakilala sia kag nagpaathag nga sa pagkamatuod ang Dios ang nagpadala sa iya sa Egipto sing una sa ila “sa pagtipig sang kabuhi.” Suno sa iya sugo, ginsaylo nila ang ila amay kag ang ila mga pamilya sa Egipto. (Genesis 45:1-11) Ini tanan ginrekord para sa aton kaayohan, kag ang matagnaon nga kahulugan sini nagadalahig sang mga hitabo sa aton adlaw.—Roma 15:4.

PAGPAUMPAW SANG ATON PAGKAGUTOM KAG PAGKAUHAW KARON

9. (a) Ano ang kabangdanan sang espirituwal nga tiggulutom sa kalibutan karon? (b) Ngaa isa ini sang gamut nga mga kabangdanan sang mga palaligban sang katawhan?

⁹ Ang isa sang gamut nga mga kabangdanan sang mga palaligban sang katawhan amo ang espirituwal nga tiggulutom. Bangod ginbiyaan nila si Jehova, wala niya ginapaboran sila sing paghangop sa iya Pulong, kag, subong resulta, nagaeksperiensia sila sing “tiggulutom, indi sa tinapay, kag sing kauhaw, indi sa tubig, kundi sa pagpamati sa mga pulong ni Jehova.” (Amos 8:11) Bangod sang espirituwal nga pagkagutom ang mga tawo nagapangalapkap para sa mga sabat sa mga pamangkot subong sang: Ano ang kahulugan sang kabuhi? Ngaa nagakapatay ang mga tawo? May paglaum bala sa palaabuton? Nagabuang bangod sa espirituwal nga pagkagutom, masami nga ginahalitan sina nga mga tawo ang ila kaugalingon kag ang iban man samtang nagapakigbahin sila sa imoral kag kriminal nga paggawi sa pagpaumpaw sang ila mga handum.

10. (a) Sa katumanan sang Isaias 65:13, 14, anong kahimtangan ang nagaluntad sa tunga sang mga alagad ni Jehova? (b) San-o ang panahon sang espirituwal nga tiggulutom kag sang espirituwal nga kabuganaan?

¹⁰ Sa kabaliskaran, ginhatagan ni Jehova sing espirituwal nga kabuganaan ang iya matutom nga mga alagad, kag nagaluntad sa tunga nila ang matuod nga gugma. Ginbuksan niya sa ila paghangop ang makaalayaw nga espirituwal nga mga kamatuoran sa iya inspirado nga Pulong kag ginhatagan sila sing hilikuton subong iya mga saksi. Malipayon nga ginapaambit nila ining mga kamatuoran sa iban nga gutom sa espirituwal kag nagapangita sing kabuhi sa pagpakig-angot sa Dios. (Isaias 65:13, 14; Lucas 6:21) Didto anay sa dumaan nga Egipto ang pito ka tuig sang tiggulutom nagsunod sa pito ka tuig sang kabuganaan. Apang sa aton adlaw ang panahon sang espirituwal nga tiggulutom kag sang espirituwal nga kabuganaan nagadunganay.

11. (a) Sin-o ang ginlaragway ni Paraon kag ni Jose, kag ngaa? (b) Paano ang ginahimo sang “dakung kadam-an” kaangay sa ginhimo sang nagutman nga mga Egiptohanon?

¹¹ Sa karon indi si Paraon ang manuggahom. Si Jehova nga Dios, ang Daku Pa nga Paraon, amo ang Unibersal nga Soberano. Ginhatagan niya si Jesucristo sing awtoridad nga ikaduha lamang sa iya. Subong ang Daku Pa nga Jose, si Jesus ang gintugyanan ni Jehova sing salabton sa pagpanagtag sing makasakdag-kabuhi nga espirituwal nga kalan-on. Bangod sang relihioso kag sekular nga mga pilosopiya sang kalibutan, ang katawhan nagapalangluya sa espirituwal nga pagkagutom. Paagi lamang sa pagliso kay Jesucristo kag pagtigayon sing espirituwal nga kalan-on sa paagi nga iya ginatudlo nga sila mapabaskog. Minilyon ka tawo, nga ginlaragway sang gingutom nga mga Egiptohanon, ang nagahimo sina. Paagi kay Jesucristo ginadedikar nila sing bug-os ang ila kaugalingon kay Jehova sa tanan nga tion, kag sa amo nalakip sila sa dakung kadam-an sang mga makalampuwas sa nagapakari nga kaakig sang Dios.

12. (a) Paano ginaaman ni Jesus nga didto sa langit ang espirituwal nga kalan-on para sa aton diri sa duta? (b) Ano ang nagakombinse sa inyo tuhoy sa identidad sang “matutom kag mainandamon nga ulipon”?

¹² Apang si Jesus didto sa langit. Paano sia nagaaman sing espirituwal nga kalan-on agod makabenepisyo kita diri sa duta? Nagtagna sia nga himuon niya ini paagi sa iya “matutom kag mainandamon nga ulipon.” (Mateo 24:45-47) Isa ini ka grupo nga “ulipon,” nga ginahuman sang iya kongregasyon sang mga hinaplas sang espiritu nga yari pa sa duta. (Ipaanggid ang Isaias 43:10.) Ang nagkalabilin sini yari pa sa duta. Ining matuod nga Cristianong kongregasyon madali nga makilala paagi sa pagpaanggid sang mga panudlo kag mga buhat sini sa Biblia. Ginatudlo gid sini ang ginsugo ni Jesus. Busa wala ini nadalahig sa politika sang kalibutan, kundi ang tanan nga katapo sini dayag nga mga manugbantala sang Ginharian sang Dios. Wala sila nabahinbahin sa mga sekta sang Cristiandad. Nahiusa sila, subong nga siling ni Jesus mangin amo sila—tanan sila mga Saksi ni Jehova bilang pag-ilog sa ila Ginuo. (Tan-awa ang Juan 17:16, 20, 21; Mateo 24:14; 28:19, 20; Bugna 1:5.) May yara sila espirituwal nga kabuganaan kag handa sa pagpakig-ambit sini sa iban.

13. (a) Sa anong mga paagi ginpakita sang madamo nga tawo ang ila kaugalingon nga kaangay sang napulo ka utod sa amay ni Jose? (b) Paano kita tanan makabenepisyo gikan sa espirituwal nga kalan-on nga ginaaman ni Cristo paagi sa “ulipon” nga klase?

¹³ Madamo nga tawo ang nagyaguta sa sining hinaplas nga mga Cristiano, nga nagasiling: ‘Nagadumdom bala kamo nga mas maayo kamo sa amon? Nagadumdom bala kamo nga kamo lamang ang husto?’ Apang sang ulihi ang iban sa ila mapainubuson nga nagkilala nga si Jehova matuod gid nga may mga saksi sa duta kag nga ginabantala gid nila ang Iya pulong. Nahangpan nila nga ginapakita sang Biblia nga may isa lamang ka matuod nga Cristianong kongregasyon kag nga may paghiusa ang mga katapo sini. (Efeso 4:5; Roma 12:5) Ang bunayag kag mapainubuson nga pag-usisa sang mga kamatuoran nagdul-ong sa ila sa sina nga organisasyon. Ginlaragway sang napulo ka utod sa amay ni Jose ina nga mga tawo, nga sang una naghingabot sa hinaplas nga mga sumulunod ni Jesus ukon naghatag sing moral nga suporta sa sina nga mga manughingabot apang karon nagpakita sing matuod gid nga pagbalhin sang tagipusuon. (Juan 13:20) Mapasalamaton nga ginabaton nila ang espirituwal nga kalan-on nga ginaaman ni Jesucristo paagi sa iya ‘matutom nga ulipon’ nga klase. Nagatigayon sila sing espirituwal nga kusog samtang nagakaon sila sing mga kamatuoran sang Biblia nga ginapaathag sa mga publikasyon sang ­Watch Tow­er, tayuyon nga nagatambong sa mga miting sang mga Saksi ni Jehova kag aktibo nga nagahimo sang kabubut-on sang Dios. Isa bala ikaw sa sining mga mapainubuson?—Hebreo 10:23-25; ipaanggid ang Juan 4:34.

14. Anong espirituwal nga mga kahimtangan ang ginaagom sang mga nagakabuhi nahisuno sa mga prinsipio nga naton-an gikan sa sining drama sa Biblia?

¹⁴ Makalilipay nga nabugnawan ang tanan nga mahigugmaon nga nagagamit sang ila kabuhi sa pag-alagad sa ila Manunuga paagi kay Jesucristo. Sa espirituwal, “indi na sila paggutumon ukon pag-uhawon pa, . . . kay ang Kordero [Jesucristo], nga yara sa tunga sang trono, mangin ila manugbantay, kag magatuytoy sa ila sa mga tuburan sang tubig nga nagahatag sing kabuhi.”—Bugna 7:16, 17; Isaias 25:6-9.