Kapitulo 11

“Palagyo Gikan sa Tunga sang Babilonia”

MADAMO nga tawo ang nagsaylo gikan sa isa ka relihion padulong sa lain, nga nagapangita sing makaalayaw nga mga sabat sa ila mga pamangkot nahanungod sa kabuhi. Nakasapo sila sing mga pagkaanggid sa mga pagtuluohan kag sa mga buhat, subong man sing madamo nga pagkatuhay. Apang paagi lamang sa paggamit sa Pulong sang Dios subong tuytoy nga ang isa makapat-od kon diin nga mga sabat ang matuod kag kon ano nga mga buhat ang nagapahamuot gid sa Dios. Paagi sa Biblia, ginapakilala sang Manunuga ang iya kaugalingon sa aton kag ang iya katuyoan. Ginabuyagyag man niya sa aton ang mga gamut sang dimatuod nga pagsimba. Paagi sa sini, ginapaandaman niya kita batok sa iya ginalaragway subong “Babilonia nga Daku” kag nagalaygay sa aton nga ‘magpalagyo’ gikan sa tunga niya. Ginpamatian mo bala ina nga paandam?—Bugna 18:4, 21; Jeremias 51:6.

² Ano ang “Babilonia nga Daku”? Sa tingob nga pagtamod, ang tanan nga relihion nga nagasakdag sa mga panimuot, mga pagtuluohan ukon mga buhat nga nanggamut sa relihion sang dumaan nga Babilonia nagahuman sa Babilonia nga Daku. Busa ang nagapakilala nga mga batasan sini mapat-od paagi sa pag-usisa sang ginhalinan kag sang relihion sang dumaan nga Babilonia.

³ Kapin sa isa ka siglo sa tapos sang Anaw sang adlaw ni Noe, ang siudad sang Babel (sang gintawag nga Babilonia) gintukod sa palibot sang isa ka torre—isa ka proyekto nga ginsakdag ni Nimrod. Ginpukaw ni Nimrod sa iya mga kaupod ang espiritu sang pagrebelde batok kay Jehova kag ang handum nga kilalahon sila. (Genesis 10:9, 10; 11:1-9) Matalupangdan mo bala ina nga espiritu karon—isa ka pagsikway sa Pulong sang Dios, bisan sa bahin sang mga nagapangangkon nga relihioso, kag ang paggamit sa relihion sa pagtawag sing igtalupangod sa ila ukon agod mangin kilala?

⁴ Kilala anay sa relihion sang Babilonia ang tatlo ka dios. May tatlo nga ginahuman nanday Anu, Bel kag Ea; ang isa pa nanday Sin, Sha­mash kag Ish­tar. Dugang pa, ang mga duog sang pagsimba sa Babilonia puno sing mga imahen. Ini tanan nagkuha sang igtalupangod gikan sa kamatuoran nga may isa lamang ka matuod nga Dios, nga ang iya ngalan amo si Jehova. (Deuteronomio 4:39; Juan 17:3) Ang mga kinaiya kag paggawi nga ginpatungod sa ila mga diosdios, upod ang paggamit sing walay kabuhi nga mga imahen, naghatag sa madamo nga tawo sing tiko nga pagtamod sa Manunuga.—Jeremias 10:10, 14; 50:1, 38; 1 Corinto 10:14, 19-22.

⁵ Nagpati ang mga Babilonianhon nga ang kamatayon isa lamang ka alagyan padulong sa lain nga sahi sang kabuhi, apang supak ini sa gintudlo sang Dios sa aton unang mga ginikanan. Ginpadaku sang Griegong mga pilosopo ining ideya, nga nagasiling nga ang mga tawo may yara dimamalatyon nga kalag. Ang una nga butig sang Yawa amo nga kon lalison nanday Adan kag Eva ang Dios, sila ‘dili mapatay nga totoo’ sa unod. Ang katawhan karon ginasugiran nga ang nagakabuhi sing dayon amo ang isa ka nasulod nga bahin nila nga indi nila makita. Ining dimatuod nga panudlo nagdul-ong sa pagtuo sa kalayuhon nga impierno, purgatoryo, pagsimba sa katigulangan kag sa madamo pa.—Genesis 3:1-5; Manugwali 9:5, 10; Ezequiel 18:4.

⁶ Ang relihion sang Babilonia naglakip man sang buhat nga astrolohiya, pagpamakot, madyik kag diwatahan, nga paagi sa sini gintinguhaan sang mga tawo ang tuytoy sang labaw sa kinaugali nga sarang magamit sa pagpamanggad sang ila kaugalingon kag sa pagkontrol sa iban. (Daniel 2:27; Ezequiel 21:21) Daw ano ka kinaandan ining mga buhat karon, bisan pa tanan sila ginapaandaman batok sa sini sa Biblia! Paagi sa paghimo sini, ang mga tawo direkta nga nagakadto sa mga kamut sang demonyo nga mga espiritu, nga nagapangayo sing mapintas nga bili sa mga pabor nga ila ginahatag.—Deuteronomio 18:10-12; Isaias 8:19; Binuhatan 16:16; Bugna 18:21, 23.

⁷ Sa dugang pa nga pagpakilala sa Babilonia nga Daku, ang Biblia nagasugid sang iya ginadumilian nga pagpakigrelasyon sa politikal nga mga manuggahom, sang iya manggad kag sang iya salabton sa pagpaagay sing dugo, lakip ang dugo sang matuod nga mga alagad sang Dios. (Bugna 17:1-6; 18:24) Kilala ang rekord sang mga relihion sang kalibutan sa sini.

DAW ANO KA DAKU ANG IMO GUGMA SA KAMATUORAN?

⁸ Kon ang isa ka tawo katapo sang bisan ano nga bahin sang Babilonia nga Daku, nagapakigbahin sa iya mga selebrasyon ukon nagailog sang iya mga dalanon, sin-o ang ginapadunggan? Sa pagkamatuod indi si Jehova. Sa baylo, ina nga tawo, sa epekto, nagayaub sa atubangan sang “dios sining sistema sang mga butang,” nga nagbulag sang mga painoino sang katawhan.—2 Corinto 4:4.

⁹ Apang paano napatalang ang madamo nga tawo sa sining paagi? Ang Biblia nagasabat nga nabiktima sila sang siod ni Satanas “kay nagdumili sila sa paghigugma sang kamatuoran.” (2 Tesalonica 2:9-12) Indi kita dapat makibot sa sini. Pila ka tawo ang kilala mo nga pirme nagahambal sing kamatuoran—sa puluy-an, sa negosyo, kon sila ang may sala? Kon pakitaan kon ano ang ginasiling sang Biblia nga Pulong sang kamatuoran sang Dios, pila ang handa sa pagbiya sang ila daan nga mga pagtuluohan ukon mga kinabatasan, sa pagbalhin sang ila estilo sang pangabuhi, sa pagsunod sa sini? Amo ka bala sina?

¹⁰ Ginapangita ni Jehova ang mga tawo nga may subong sina nga gugma sa kamatuoran. Sia gid amo “ang Dios sang kamatuoran.” (Salmo 31:5) Ang mga panudlo sang iya Pulong indi handurawan lamang. Kamatuoran sila. Sa isa ka babayi sa Samaria, si Jesus nagsiling: “Ang matuod nga mga manugsimba magasimba sa Amay sa espiritu kag kamatuoran, kay, sa pagkamatuod, ang Amay nagapangita sing subong nga mga manugsimba sa iya. Ang Dios espiritu, kag ang mga nagasimba sa iya kinahanglan magsimba sa espiritu kag kamatuoran.” (Juan 4:23, 24) Luyag mo bala nga mangin subong ka sina nga tawo?

ANG AMAN SANG DIOS PARA SA KAHILWAYAN

¹¹ Sa pag-aman sing tuytoy para sa aton, ginparekord sang una ni Jehova sa Biblia ang isa ka saad sang kaluwasan gikan sa mapiguson nga pagkontrol sang Babilonia. Natuman ini sang ginhilway ni Ciro Daku ang mga Judiyo, subong man ang di-Israelinhon nga mga Netinim, agod nga makabalik sila sa Jerusalem kag patindugon liwat didto ang templo ni Jehova. Apang indi lamang amo sadto ang katuyoan. Ang natabo sadto nagtudlo sa dugang pa nga kaluwasan gikan sa Daku Pa nga Ciro, ang Ginuong Jesucristo. Ang aton pagsunod sa iya mga tuytoy magaamlig sa aton nga indi mapatalang sang mga tawo nga luyag lamang mangin kilala. Labi na nga naaplikar kay Jesus ang tagna nga nagasiling: “Amo ini ang ginsiling ni Jehova: ‘Sa tion nga nahamut-an ginsabat ko ikaw, kag sa adlaw sang kaluwasan gintabangan ko ikaw; kag gintipigan ko ikaw agod nga mahatag ko ikaw nga katipan sa katawhan, sa pagbangon sang duta, sa pagpapanubli sa ila sang mamingaw nga mga panublion, sa pagsiling sa mga binilanggo, “Guwa kamo!” sa mga yara sa kadudulman, “Pakita kamo!”’” (Isaias 49:8, 9) Paano ini natuman kay Jesus?

¹² Ginsabat ni Jehova ang mga pangamuyo ni Jesus. Gintabangan niya matuod kag gintipigan ang iya Anak samtang maisugon nga ginbuyagyag ni Jesus ang relihioso nga kabutigan kag ginpakilala ‘ang kamatuoran nga magahilway sa mga tawo.’ (Juan 8:32) Walay sapayan sang mga panikasog ni Satanas nga laglagon si Jesus, gin-amligan ni Jehova ang iya Anak tubtob nga natapos niya ang iya hilikuton sa duta. Nian ginbanhaw niya si Jesus sa dimamalatyon nga kabuhi sa langit, agod ipadayon didto ang iya hilikuton sa paghilway. Ginhatag sia sang Dios subong isa ka “katipan,” ukon saad, nga hilwayon ang katawhan gikan sa pagkaulipon sa Babilonia nga Daku. Subong kapat-od nga si Jesucristo ginbanhaw kag ginhimaya sa langit, pat-od man nga ang matarong sing tagipusuon nga mga tawo luwason gikan sa relihioso nga kadudulman sang Babilonia nga Daku. Makabenepisyo ka bala gikan sa sina nga pagluwas?

¹³ Tuhoy sa kasangkasaron sang paghilway, si Jehova nagtagna: “Ginhatag ko man ikaw nga kapawa sang mga pungsod, agod nga ang akon pagluwas mangin tubtob sa ukbong sang duta.” (Isaias 49:6) Busa, sang 36 C.E. ang mga Gentil, ukon ang katawhan sang di-Judiyo nga mga pungsod, ginsugdan nga pasudlon sa kongregasyon sang espirituwal nga Israel. Apang, ang pagdugang sang mga Gentil sa hinaplas sang espiritu nga Cristianong kongregasyon, indi ang bug-os nga kasangkaron sang pag-alagad ni Jesus subong “kapawa sang mga pungsod.”

¹⁴ Nahibaloan ni Jesus nga tipunon man niya ang “iban nga mga karnero” nga makaagom sing dayon nga kabuhi sa duta. (Juan 10:16) Ginlandong sila sang di-Israelinhon nga mga Netinim kag sang mga anak sang mga alagad ni Solomon nga nagbuylog sa mga Judiyo sang 537 B.C.E. sa ila pagguwa gikan sa Babilonia. (Esdras 2:1, 43-58) Isa na ka dakung kadam-an sini sa modernong tion ang namati sa sugo nga ‘magguwa’ sa Babilonia nga Daku. Sila karon nagaagom sing makapabugnaw nga espirituwal nga mga pagpakamaayo nga gintagna sa Isaias 49:10: “Indi sila paggutumon, ukon pag-uhawon, ang init ukon ang adlaw indi magsakit sa ila. Kay ang Isa nga nagakaluoy sa ila magatuytoy sa ila, kag ubayan sila sa ubay sang mga tuburan sang tubig.” Sa Bugna 7:9, 16, 17, ining mga pagpakamaayo nagakaigo nga gin-aplikar sa “dakung kadam-an” sang “iban nga mga karnero.”

“GUWA KA SA IYA, KATAWHAN NAKON”

¹⁵ Sa isa ka inspirado nga palanan-awon ginpakitaan si apostol Juan kon ano ang mangin kahulugan sang paghukom sang Dios sa Babilonia nga Daku. Bangod sang pagkapat-od sini, ang isa ka anghel gikan sa langit, nga nagahambal para sa Dios, naglaygay: “Guwa ka sa iya, katawhan nakon, kon indi ninyo luyag nga makaambit sa iya mga sala, kag kon indi ninyo luyag makabaton sing bahin sa iya mga kalalat-an. Kay ang iya mga sala natumpi tubtob sa langit, kag ang Dios nakadumdom sang iya mga kalautan.”—Bugna 18:4, 5.

¹⁶ Ginpamatian sang mga katapo sang espirituwal nga Israel ina nga sugo, kag ginalaygayan nila karon ang iban nga amo man ang himuon. Nahibaloan nila nga kon samuon sang isa ka tawo ang matuod nga pagsimba sa dimatuod, indi niya mapahamut-an ang Dios. Kon ang bisan sin-o nagapakig-upod sa mga Saksi ni Jehova apang wala pa niya mabugto ang iya mga kaangtanan sa Babilonia nga Daku, paano sia makasiling nga indi sia bahin sini? Bisan kon wala na sia nagatambong sa iya relihioso nga mga serbisyo, apang kon nagapakigbahin gihapon sia sa iya relihioso nga mga selebrasyon sa iya ginaobrahan ukon upod sa iya mga paryente, nagatandog gihapon sia sing butang nga dimatinlo. (Isaias 52:11) Kon nagapakigbahin sia sa tradisyon sang pamilya nga nagapakita sing pagtuo sa pagkadimamalatyon sang kalag ukon sa disparatis nga kahadlok sa malaut nga mga espiritu, nagaambit gihapon sia sa iya mga sala. Indi kita makakimpangkimpang. Kon nagatuo kita nga si Jehova amo ang matuod nga Dios, nian sia lamang ang aton alagdon.—1 Hari 18:21.

¹⁷ Ang pangagda ginatanyag sa katawhan sang tanan nga pungsod kag tribo kag hambal: Magbuylog sa pagsimba kay Jehova, ang lamang matuod nga Dios! (Bugna 14:6, 7) Agod mahimo ini, dapat man nimo ilugon ang dumaan nga mga alagad sang Dios nga namati sa sugo: “Palagyo gikan sa tunga sang Babilonia, magluwas ang tagsa ka tawo sang iya kabuhi.”—Jeremias 51:6.

[Mga Pamangkot sa Pagtinuon]

1. (a) Paano naton mahibal-an kon ano nga sahi sang pagsimba ang kalahamut-an sa Dios? (b) Gikan sa ano ginalaygayan kita sang Dios nga malagyo?

2. Ano ang “Babilonia nga Daku”?

3. (a) Paano nag-umpisa ang dumaan nga Babilonia, kag ano nga espiritu ang ginpalig-on sang tagtukod sini? (b) Sa anong mga paagi ina nga espiritu ginapakita sa mga relihion karon?

4. Paano ginpatiko sang Babilonianhon nga relihion ang kamatuoran nahanungod sa Dios?

5. (a) Paano ang Babilonianhon nga pagtuo nahanungod sa kamatuoran isa ka bahin sang kabutigan ni Satanas kay Eva? (b) Nagdul-ong ini sa anong iban pa nga mga panudlo?

6. (a) Anong iban pa nga mga buhat nga kinaandan karon ang nanggamut sa Babilonianhon nga relihion? (b) Daw ano ka serioso ini?

7. Ano nga pamatuod ang makita mo nga ang Babilonia nga Daku (a) may ginadumilian nga relasyon sa politikal nga mga manuggahom? (b) may daku nga manggad? (c) may salabton sa pagpaagay sing dugo?

8. Sin-o gid ang dios sang Babilonia nga Daku?

9. Paano napatalang ni Satanas ang madamo gid nga katawhan paagi sa relihion?

10. (a) Ano nga sahi sang mga tawo ang ginapangita ni Jehova? (b) Paano naton mapakita nga kita ina nga tawo?

11. (a) Ano ang gintagna sa Isaias 49:8, 9? (b) San-o ang una nga katumanan sini? (c) Ngaa interesado kita sa sini?

12. (a) Paano ina nga tagna natuman kay Jesus? (Lucas 4:16-18) (b) Ano nga pagpalig-on ang yari sa sini para sa aton?

13. Kutob sang 36 C.E., paano si Jesus nagpamatuod subong ang “kapawa sang mga pungsod”?

14. (a) Para kay sin-o pa gikan sa “mga pungsod” si Jesus mangin kapawa? (b) Ano nga mga grupo nga nagbiya sa dumaan nga Babilonia ang naglaragway sa ila sini? (c) Anong espirituwal nga mga pagpakamaayo ang ila na ginaagom, sa katumanan sang Isaias 49:10?

15. Ngaa nagalaygay ang Biblia sa mga tawo nga mangin katawhan sang Dios nga magguwa sa Babilonia nga Daku?

16. Ano ang nagapakita kon bala ginpamatian gid naton ina nga sugo?

17. (a) Subong ginpakita sa Bugna 14:6, 7, ang katawhan bisan diin ginaagda sa paghimo sing ano? (b) Agod masimba si Jehova sing kalahamut-an, anong iban pa nga sugo ang dapat nila tumanon?