Kapitulo 15

Pagbahinbahin sa Katawhan Tuhoy sa Hulusayon sa Ginharian

ANG KADA isa sa aton nagaatubang sa isa ka mabudlay nga desisyon. Yara sa hulusayon ang aton panimuot sa Mesianikong Ginharian ni Jehova sa mga kamut ni Jesucristo. Ginabahinbahin karon ang katawhan sang tanan nga pungsod tuhoy sa sining hulusayon. Pasad sa ginahimo sang tagsa ka tawo ginabutang sia sa isa sining duha ka grupo. Isa lamang sa sining duha ka grupo ang makalampuwas sa nagapakari nga kalaglagan sang kalibutan.—Mateo 24:40, 41.

² Ginpalingkod na ni Jehova ang iya hinaplas nga Anak, ang iya Mesias, sa mga langit. Sang matapos ang “gintangdo nga mga tion sang mga pungsod” sang 1914, ginhatag sang Dios kay Jesucristo ang mga pungsod subong iya palanublion—ang bug-os nga duta subong iya pagkabutang. (Salmo 2:6, 8) Ang Mesianikong pangulohan, nga sa trono sini amo ang hinaplas nga Hari ni Jehova, amo ang paagi sang Dios sa pagtuman sang iya maalamon kag mahigugmaon nga katuyoan tuhoy sa duta. Busa, ang imo panimuot sa Ginharian nagapakita kon ano ang imo ginabatyag nahanungod sa unibersal nga pagkasoberano ni Jehova. Sa dili madugay ‘dugmukon kag papason’ sinang Mesianikong Ginharian ang bug-os politikal nga sistema nga nagadumala karon sa mga hilikuton sang tawo kag mangin isa ka pangulohan sa ibabaw sang bug-os nga duta. (Daniel 2:44; Bugna 19:11-21) Kon himuon na sini ang duta nga isa ka Paraiso, diin ka ayhan? Malakip ka bala sa ila nga pagatuytuyan sini padulong sa pag-agom sing himpit nga kabuhi? Ginsambit ni Jesus ang sadsaran agod ang katawhan nga nagakabuhi karon makaambit sa sina nga palaabuton.

Ang Hari kag ang Iya “mga Utod”

³ Sang nagasugid sa iya mga apostol nahanungod sa “katapusan sang sistema sang mga butang,” naggamit si Jesus sing pila ka parabola, ukon mga ilustrasyon. Sa katapusan nga ilustrasyon sia nagsiling: “Kon magkari ang Anak sang tawo sa iya himaya, kag ang tanan nga manugtunda kaupod niya, nian magalingkod sia sa iya mahimayaon nga trono. Kag tipunon sa atubangan niya ang tanan nga pungsod, kag painpainon niya sila subong sang manugbantay nga nagapain sang mga karnero sa mga kanding. Kag ipahamtang niya ang mga karnero sa iya tuo, apang ang mga kanding sa iya wala.”—Mateo 24:3; 25:31-33.

⁴ Talupangda nga gintawag diri ni Jesus ang iya kaugalingon subong “Anak sang tawo,” nga makapila na niya gingamit antes sini nga tagna. (Mateo 24:27, 30, 37, 39, 44) Ang iya paggamit sining ekspresyon nagapahanumdom sang matagnaon nga palanan-awon nga ginhatag kay Daniel halos anum ka siglo ang nagligad na, nga tuhoy sini ang manalagna nagsulat: “Nagtan-aw ako sa mga palanan-awon sa kagab-ihon, kag, yari karon! may nag-abot upod sa mga panganod sang langit nga isa nga kaangay sa anak sang tawo [Jesucristo]; kag nag-abot sia bisan tubtob sa Dumaan sang mga Adlaw [Jehova nga Dios], kag gindala nila sia malapit sa atubangan Niya. Kag ginhatagan sia sing pagbulut-an kag himaya kag ginharian, agod nga ang tanan nga mga katawhan, mga pungsod, kag mga hambal mag-alagad sa iya. Ang iya pagbulut-an dayon nga pagbulut-an nga indi magtaliwan, kag ang iya ginharian indi malaglag.” (Daniel 7:13, 14; Hebreo 2:5-8) Inang pagbulut-an nahatag na kay Jesucristo. Kutob sang 1914 nagagahom na sia gikan sa iya langitnon nga trono. Ano ang imo personal nga reaksion sa iya paggahom? Ang imo bala pagkabuhi nagapamatuod nga nagapakita ka sing nagakaigo nga pagtahod sa sining Isa nga ginhimo sang Dios nga Manuggahom sa bug-os nga duta?

⁵ Ang mga pulong lamang indi pa tuman. Mahapos para sa isa ka tawo ang magsiling nga nagatuo sia sa Ginharian sang Dios kag nga ginahigugma niya si Jesucristo. Apang sa iya parabola sang mga karnero kag mga kanding ginpakita ni Jesus nga, sanglit indi sia makita sa mga langit, ang importante nga butang nga iya binagbinagon sa pagpat-od sang pagkamatuod sang pangangkon sang isa ka tawo amo ang iya pagtratar sa mga nagatiglawas kay Cristo sa duta, ang iya “mga utod.”—Mateo 25:40, 45.

⁶ Sin-o sila? Amo sila ang ginpili sang Dios gikan sa katawhan nga mangin mga manunubli upod kay Cristo sa langitnon nga Ginharian. Ang ila kadamuon 144,000 kag karon nagkalabilin na lamang ang yari pa sa duta. (Bugna 14:1, 4) Bangod ‘natawo liwat’ sila paagi sa pagpanghikot sang espiritu sang Dios, sila mga anak sang Dios, kag bangod sina ginatawag sila sa Kasulatan subong “mga utod” ni Jesucristo. (Juan 3:3; Hebreo 2:10, 11) Ginaisip ni Jesus ang ginahimo sang mga tawo sa sining “mga utod” niya, bisan sa “labing kubos” sa ila, subong ginhimo sa iya mismo.

⁷ Sa diin karon ining “mga utod” ni Cristo? Makita mo bala sila sa mga sumilimba sang Cristiandad? Bueno, ano ang ginsiling ni Jesus nahanungod sa iya matuod nga mga sumulunod? “Sila indi bahin sang kalibutan, subong nga ako indi bahin sang kalibutan.” (Juan 17:16) Masiling gid bala ina sa mga iglesia sang Cristiandad kag sa ila mga katapo? Sa dakung kasangkaron, ang ila panimuot kag paggawi nagasalaming lamang sang panimuot kag paggawi nga kinaandan sa bahin sang kalibutan nga ila ginapuy-an. Nahibaloan gid ang pagbuylog sang mga iglesia sa politika. Sang ginahimo ang Karta sang Nasyones Unidas sang 1945, ang Protestante, Katoliko kag Judiyo nga mga delegasyon nagpakigbahin subong mga palamangkotan. Sining karon nga mga tinuig, gindayaw sang mga papa sang Roma ang Nasyones Unidas subong “ang katapusan nga paglaum sang paghiusa kag paghidait” kag “ang supremo nga forum sang paghidait kag katarungan.” Ang ­World Coun­cil of ­Churches, nga ginatapoan sing mga 300 ka relihioso nga mga grupo, nagahatag pa gani sing mga pundo nga ginagamit para sa politikal nga mga rebolusyon. Apang, si Jesucristo nagsiling sa Romanong gobernador nga si Pilato: “Ang akon ginharian indi bahin sining kalibutan.”—Juan 18:36.

⁸ Ginapakita sang mga kamatuoran nga isa lamang ka grupo ang malig-on nga nagatindog para sa Ginharian, nga nagapanikasog sing mabaskog sa pagbantala sini sa bug-os nga kalibutan, samtang nagalikaw sa pagpakigbahin sa bisan anong paagi sa politika sang kalibutan. Ini nga grupo amo ang mga Saksi ni Jehova. Masapwan sa tunga nila ang mga nagkalabilin sang “mga utod” ni Cristo. Bilang pag-ilog sa ila Ginuo kag sa iya mga apostoles, makugi sila nga nagaduaw sa siudad kag siudad kag balay kag balay, nga nagabantala sa mga tawo sing maayong balita sang Ginharian sang Dios. (Lucas 8:1; Binuhatan 8:12; 19:8; 20:20, 25) Sang 1919, sa kombension sang mga Saksi ni Jehova (sadto nakilal-an subong In­ter­na­tion­al Bi­ble Stu­dents) sa Cedar ­Point, Ohio, ginpahanumdom ang mga kombensionista nga ang ila “bokasyon amo anay kag amo gihapon ang pagbantala sang nagapakari nga mahimayaon nga ginharian sang Mesias.” Sa kaanggid man sadto nga kombension sang 1922 ginpadaku ini liwat, kag ginlaygayan sila: “Ibantala, ibantala, ibantala, ang Hari kag ang iya ginharian.” Ginagamit ang tanan nga paagi nga bukas sa ila, nagapadayon sila sa paghimo sina sa bug-os nga kalibutan tubtob karon. (Mateo 24:14) Bangod sang ila hilikuton, ang hulusayon sang Ginharian ginapresentar sa imo. Ano ang imo ginahimo sa sini?

‘Ginhimo Ninyo Ini sa Isa sang Akon mga Utod’

⁹ Ang hinaplas sang espiritu nga “mga utod” ni Cristo mabaskog nga gintilawan bangod sang masidla nga pagbantala sang Ginharian sang Dios, samtang nagapabilin nga napain sa kalibutan. (Juan 15:19, 21) Ang iban ginutom, inuhaw kag nakulangan sing panapton. Madamo ang nagbiya sang ila mga puluy-an agod mag-alagad sa mga duog nga diin mga dumuluong sila. Samtang nagahimo sang ila ministeryo, nagmasakit sila kag ginbilanggo, kag ginpatay pa gani sang mga manughingabot. Ining mga eksperiensia sang “mga utod” ni Cristo isa ka pagtilaw sa katawhan sang tanan nga pungsod. Pahulagon bala sila sang gugma sa Dios kag kay Cristo nga buligan ining mga embahador sang langitnon nga Ginharian? (Mateo 25:35-40; ipaanggid ang 2 Corinto 5:20.) Indi ang tawhanon nga kaluoy kundi ang bulig nga ginahatag bangod sila iya ni Cristo ang ginaisip sang Hari subong ginahimo sa iya sing personal.—Marcos 9:41; Mateo 10:42.

¹⁰ Ang mga nagahatag sina nga bulig ginpaangay ni Jesus sa mga karnero. Ang mga tawo nga napaslawan sa pagbulig sa iya “mga utod” gintawag sa parabola ni Jesus subong mga kanding. Ang “mga kanding” mahimo magprotesta nga wala nila makita si Jesucristo. Apang ginpadala niya ang iya mga alagad sa ila, kag ini sila maathag nga nagpakilala sang ila kaugalingon. Ang tanan nga “mga kanding” mahimo nga indi maghingabot sa “mga utod” ni Cristo, apang wala man sila ginapahulag sang gugma sa langitnon nga Hari sa pagbulig sa iya mga tiglawas. (Mateo 25:41-45) Nagapanguyapot sila sa kalibutan nga ang dimakita nga manuggahom sini amo si Satanas nga Yawa. Ang “mga karnero” wala man makakita sing literal kay Cristo. Apang, tuhay sa “mga kanding,” ginapamatod-an nila nga wala sila nahadlok sa pagpakilala sang ila kaugalingon upod sa “mga utod” ni Cristo, kag ginasakdag nila ining mga manugwali sang Ginharian sang Dios. Nahibaloan sang “mga karnero” kon ano ang ila ginhimo, sila positibo nga nagapili pabor sa Ginharian sang Dios paagi kay Jesucristo. Amo kon ngaa ang ila ginahimo may bili sa mga mata sang Hari.

¹¹ Apang, paano mahukman ang katawhan sang tanan nga pungsod pasad sa sini? Wala bala magsiling si Jesus nga ang iya “mga utod,” nga hatagan sang Amay sing langitnon nga Ginharian, isa lamang ka “diutay nga panong”? (Lucas 12:32) Madamo nga tawo ang wala makakita sing personal sa isa sa ila. Matuod, apang ang “mga utod” ni Cristo nagahuman sang ubod sang internasyonal nga organisasyon sang mga Saksi ni Jehova. Paagi sa sining organisado nga katawhan, ang importante nga hulusayon sang Ginharian ginapresentar sa mga tawo bisan diin. Ini tanan ginatuytuyan ni Cristo mismo gikan sa iya langitnon nga trono kag upod sa bulig sang mga anghel. Sa mga 200 ka kadutaan kag mga pulo sa bilog nga globo—bisan sa mga duog nga ginadumilian sang pangulohan ang pagbantala sang Ginharian sang Dios—ang pagbahinbahin nga hilikuton indi mapunggan nga nagaabante, kag dakung kadam-an sang mga tawo ang nagadampig sa Ginharian sang Dios.

¹² Paano nila ginahimo ini? Paagi sa pagpangabudlay upod sa mga hinaplas, makugi nga nagawali nga ang Ginharian nagagahom na kag sa dili madugay laglagon sini ang kalibutanon nga sistema. Sa amo dayag nga ginapakilala nila ang ila kaugalingon subong nagadampig sa Mesianikong Ginharian ni Jehova kag mahigugmaon nga ginalaygayan nila ang iban nga himuon man ini. Indi lamang handum nga maluwas ang nagapahulag sa sining matarong sing tagipusuon nga mga tawo. Ginahigugma gid nila si Jehova kag ang iya mga dalanon. Ang aman sang iya Ginharian nga ginaharian ni Cristo nagapuno sang ila tagipusuon sing pasalamat, kag luyag nila nga ang iban makabenepisyo sa sini. Gani nagapakigbahin sila sa pinakabug-os nga masarangan nila sa paghatag sing panaksi sa Ginharian. Subong gintugon ni Jesus sa iya mga disipulo, ila ‘ginapangita anay ang ginharian,’ nga wala ginatugutan ang kabalaka sa materyal nga mga kinahanglanon sa pagduso sini sa ikaduha nga duog. Sa sining paagi nagalinya sila para sa dakung pagpakamaayo.—Mateo 6:31-33.

Imo Bala ‘Mapanubli ang Ginharian’?

¹³ Dalayawon gid ang nagahulat para sa mga nagapamatuod nga mga “karnero” sa parabola ni Jesus. Gikan sa iya langitnon nga trono, sia nagasiling sa ila: “Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob pa sang pagtukod sang kalibutan.” (Mateo 25:34) Kutob sang ‘gintukod ang kalibutan,’ sang tion nga si Adan kag si Eva nagpanganak sing mga anak nga makabenepisyo sa aman sang Dios sa paggawad sa katawhan, suno sa Genesis 3:15, 16, ginahunahuna na ni Jehova ang padya para sa sining “mga karnero.” (Ipaanggid ang Lucas 11:50, 51.) May kahigayunan sila nga makatigayon sa napasag-uli nga Paraiso sing himpit nga kabuhi nga nadula ni Adan. Ang ila ‘pagpanubli sang ginharian’ wala nagakahulugan nga makadto sila sa langit, bangod ginapakita sang parabola nga ang “mga karnero” indi pareho sa “mga utod” sang Hari, nga mga manunubli sa langitnon nga Ginharian. Gani ang “mga karnero” dutan-on nga mga sakop sinang langitnon nga pangulohan. Ang Greek-English Lexicon nanday Lid­dell kag ­Scott nagasiling nga ang Griegong termino nga basileiʹa, nga ginabadbad diri “ginharian,” sarang mahangop sa indi aktibo nga kahulugan, nga buot silingon “ginagamhan sang isa ka hari.” Amo ini nga kahulugan ang maathag nga naaplikar diri.

¹⁴ Kon ang “mga kanding” magataliwan sa “silot nga walay katapusan,” padulong sa kalaglagan nga subong kabug-os sang ginpaagi sa kalayo, ang “mga karnero” pagaamligan sang Mesianikong Hari. (Mateo 25:41, 46; ipaanggid ang Bugna 21:8.) Indi na dapat mapatay, amligan sila tabok sa dakung kapipit-an padulong sa mahimayaon nga “bag-ong duta” nga mangin hilway na sa malaut nga impluwensia ni Satanas kag sang iya malaut nga sistema sang mga butang. Mangin ila ina nga pagpakamaayo bangod nagahimo sila sing husto nga desisyon sa hulusayon sang Ginharian karon.

¹⁵ Isa ka daku nga sayop ang mangatarungan nga, bangod ang kalaglagan sang “mga kanding” walay katapusan, ang parabola naaplikar sa ulihi pa, ayhan sa tion sang Milenio nga Paghari ni Cristo. Sa kabaliskaran, ginhatag ni Jesus ining parabola subong bahin sang tanda sang “katapusan sang sistema sang mga butang.” (Mateo 24:3) Ang iya ginlaragway natabo sa tapos sia ginpalingkod sa trono kag padayon gihapon samtang yara pa sa unod ang iya “mga utod” kag nagaeksperiensia sing mga kabudlayan nga iya ginsambit. Nagakabuhi kita sa sina nga tion, kag malapit na ini matapos. Busa, daw ano ka importante nga indi lamang magsalig sing bug-os sa Ginharian kundi buligan man ang iban nga makita ang pagkaimportante sang paghimo sini karon.

[Mga Pamangkot sa Pagtinuon]

1. Ngaa ang pagbahinbahin tuhoy sa hulusayon sang Gin­harian isa ka importante nga butang para sa kada isa sa aton?

2. (a) Paano ining Mesianikong Ginharian naangot sa hulusayon sang pagkasoberano ni Jehova? (b) Mangin ano ang Ginharian sa dili madugay, kag gani ano ang dapat naton hunahunaon sing serioso?

3. Sa Mateo 25:31-33, ano ang ginlaragway ni Jesus?

4. (a) Paano ining parabola naangot sa Daniel 7:13, 14? (b) Anong mga pamangkot ang mapuslanon nga ipamangkot naton sa aton kaugalingon?

5. Paano ginapat-od ni Cristo ang pagkamatuod sang ginapangangkon nga debosyon sang isa sa iya subong Hari?

6. Sin-o ining “mga utod” ni Cristo?

7. Ngaa ang “mga utod” ni Cristo indi mga katapo sang mga iglesia sang Cristiandad?

8. (a) Ano ang nakabulig sa imo agod makilala ang “mga utod” ni Cristo? (b) Daw ano ka importante sa ila ang hilikuton nga pagbantala sang Ginharian?

9. (a) Paano ang mga kahimtangan nga ginlaragway sa Mateo 25:35-40 naangot sa ministeryo sa Ginharian? (b) Ano ang pagtilaw sa mga tawo bisan diin?

10. (a) Ngaa wala sing sadsaran ang protesta sang “mga kanding”? (b) Sing tuhay, ano nga tindog ang ginpili sang “mga karnero”?

11. (a) Sanglit madamo nga tawo ang wala gid makakita sa isa sang “mga utod” ni Cristo, paano sila mahukman pasad sa ginlaragway diri? (b) Ano ang nagapasalig sang kadalag-an sining hilikuton?

12. (a) Paano ginapaathag sang “mga karnero” ang tindog nga ila ginpili? (b) Ngaa ginahimo nila ini?

13. (a) Kutob san-o pa ginhunahuna na ni Jehova ang pagpadya sa sining mga tulad-karnero? (b) Ano ang kahulugan sang ila ‘pagpanubli sang ginharian’?

14. Paano ang paghukom sa “mga kanding” tuhay sa panublion sang “mga karnero”?

15. (a) Paano naton nahibaloan nga ining parabola naaplikar karon? (b) Gani, anong hilikuton ang importante gid?