Kapitulo 20

‘Ang Diutay Mangin Mabakod nga Pungsod’

ANG mga sumilimba ni Jehova madugay na nga diutay lamang kon ipaanggid sa populasyon sang tanan nga kadam-an. Apang sa aton adlaw ang ila kadamuon nagadugang sa kadasigon nga makapakunyag sa mga nagahigugma sa pagkamatarong. Tuhoy sa kadakuon sang pag-uswag, si Jehova gid nagtagna: “Ang diutay mangin isa ka libo, kag ang diutay mangin mabakod nga pungsod. Ako si Jehova, magapadali sini sa iya tion.” (Isaias 60:22) Subong ginasiling sina nga kasulatan, si Jehova ang magapahanabo sini. Paano? Paagi sa pagtugot nga magluntad sa tunga sang iya mga alagad ang isa ka kahimtangan nga magapatuhay sa ila sa mga pungsod sa palibot nila kag mabaskog nga magaganyat sa mga bunayag sing tagipusuon.

² Gintagna ini sa Isaias 60:1, 2, nga sa diin ginahambal ni Jehova ang iya “babayi,” ang iya organisasyon nga nahuman sang matutom nga espiritu nga mga tinuga subong man sang hinaplas sang espiritu nga mga anak sa duta, nga nagasiling: “Magtindog ka, O babayi, magdilag, kay ang imo kapawa nagaabot kag ang himaya ni Jehova nagasilak sa imo. Kay, yari karon! ang kadudulman magatabon sang duta, kag ang pitipit nga kadudulman sang mga katawhan; apang si Jehova magasilak sa imo, kag ang iya himaya makita sa imo.” Ang sadsaran sining pagkatuhay amo ang pagkabun-ag sang Mesianikong Ginharian sa mga kamut ni Jesucristo sang 1914. Amo sadto nga ang “himaya ni Jehova” nagsilak sa iya langitnon nga organisasyon, nga nagpahanabo sang pagkabun-ag sang Ginharian. Nagkinasadya sila sing daku. (Bugna 12:1, 2, 5, 10-12) Kag sa duta ang hinaplas nga nagkalabilin sang mga manunubli sang Ginharian nag-ambit sa sadto nga kalipay. Sugod sang 1919, sila ‘nagdilag’ samtang ginawali nila sa bug-os nga kalibutan ang Ginharian sang Dios subong amo ang matuod kag lamang nga paglaum sang katawhan.—1 Pedro 2:9; Mateo 5:14-16.

³ Sa pagpatuhay, sang 1914 ang mga pungsod sang kalibutan, nga nagpakig-away sa paghupot sang ila pagkasoberano, nagsulod sa dag-on sang kasingki kag pagkawalay kalig-onan nga gikan sa amo wala na gid sila makaguwa. Bangod sang kakulang sing kalig-onan, madamo ang nakarealisar nga, walay sapayan sang “sientipiko nga pag-uswag,” wala sila sing malig-on nga palaabuton. Sa pagkamatuod, ang ‘kadudulman nagatabon sang duta.’ Ngaa indi sila makakita sing dalan paguwa? Bangod ginsikway sang mga pungsod si Jehova subong ang Soberano. Sa masami, ang pila ka manuggahom nagaalagad sa “Dios” sa baba lamang kag wala gid nila ginagamit ang iya ngalan. Determinado sila sa pagpalakat sang mga butang sa ila kaugalingon lamang, apang ang mga problema nga ginaatubang nila indi gid malubad sang ikasarang sang tawo. (Jeremias 8:9; Salmo 146:3-6) Ang kalibutan karon, upod ang kakagod kag kaduluntan sini, nagsulod sa “katapusan nga mga adlaw” sini. Wala sing paagi nga malikawan sini ang kalaglagan nga nagahulat sa sini. Ang mga tawo lamang nga nagatuo sing bug-os sa Ginharian sang Dios ang makatulok sa palaabuton nga may pagsalig. Sa nagadugang nga kadamuon, narealisar ini sang mga bunayag sing tagipusuon kag sila aktibo nga nagapakig-upod sa mga Saksi ni Jehova, nga wala lamang nagahambal nahanungod sa Ginharian kundi hanuot nga nagatinguha sa pagkabuhi nahisanto sa ila ginabantala.

‘ANG DIUTAY MANGIN ISA KA LIBO’

⁴ Sang matapos ang Inaway Kalibutanon I, wala pa makompleto ang pagtipon sa mga manunubli sang Ginharian. Kinahanglan pa ang dugang nga “mga anak nga lalaki” kag “mga anak nga babayi” sang langitnon nga Jerusalem agod makompleto ang gintagna nga 144,000 nga magagahom upod kay Cristo sa langit. Apang, gintagna ni Jehova ang katapusan sining hilikuton, nga nagasiling: “Bayawa ang imo mga mata sa palibot kag tan-awa! Natipon sila tanan; nagkari sila sa imo. Gikan sa malayo ang imo mga anak nga lalaki nagaabot, kag ang imo mga anak nga babayi kuguson sa mga butkon.” (Isaias 60:4) Subong resulta sang pagwali sa Ginharian sugod kag sa tapos sang 1919, linibo pa ang nagdedikar sang ila kaugalingon kay Jehova, nagpabawtismo kag ginhaplasan sing balaan nga espiritu. Apang, sa kabilogan, ang bug-os nga grupo sang mga manunubli sang Ginharian gintawag ni Jesus nga isa lamang ka “diutay nga panong.” (Lucas 12:32) Agod matuman ang gintagna sa Isaias 60:22, pat-od nga dugang pa ang tipunon sa matuod nga pagsimba. Amo gid sina ang natabo!

⁵ Ginhambal sila sa Isaias 55:5 sa sining paagi: “Yari karon! Magatawag ka sing pungsod nga wala mo makilala, kag ang pungsod nga wala makakilala sa imo magadalagan sa imo, bangod kay Jehova nga imo Dios, kag sang Balaan sang Israel, kay ginpatahom ka niya.” Mga tawo ini nga sa guwa sang espirituwal nga Israel. Naghalin sila sa madamo nga pungsod apang sila nangin nahiusa nga katawhan, ang tanan matutom nga nagasakdag sa Ginharian sang Dios. Sila isa ka “pungsod” nga wala anay ‘makilala’ sang nagkalabilin sang espirituwal nga Israel suno sa ila pagkahangop sa Kasulatan, kag ining katawhan wala man anay maghatag sing nagakaigo nga pagkilala sa mga alagad sang Dios. Apang bangod sang ila pagbantala sing maayong balita, naganyat sila bangod narealisar nila nga ining espirituwal nga mga Israelinhon nagasimba sa matuod nga Dios kag bangod nahantop nila sa ila ang espirituwal nga katahom nga resulta lamang sang pagpakamaayo sang Dios.

⁶ Walay sapayan sang tanan nga nahimo ni Satanas agod punggan ang pagbantala sing mensahe sang Ginharian kag lisuon ang igtalupangod sang katawhan sa iban nga mga hilimud-osan, ang kapawa sang kamatuoran padayon nga nagalab-ot bisan sa naligwin nga mga bahin sang duta. Ang resulta amo ang madugay na gintagna sang Dios sa iya “babayi”: “Sa sadto nga tion makit-an mo kag magabanaag gid, kag ang imo tagipusuon makunyag kag magadaku, bangod nga ang kabugana sang dagat magasaylo sa imo; ang manggad sang mga pungsod magaabot sa imo. . . . Kag ibantala nila ang mga kadayawan ni Jehova.” (Isaias 60:5, 6) Huo, ang isa ka “dakung kadam-an” sang mga tawo nga bahin anay sang “dagat” sang katawhan nga napain sa Dios, mga tawo nga ang ila kabuhi gindulman sang “pitipit nga kadudulman” nga nagatabon sa mga pungsod, nagbuylog sa espirituwal nga Israel. Sa mga mata sang Dios, amo gid ini sila ang mga bilidhon sang tanan nga pungsod.

⁷ Sang ginapatindog liwat ang templo ni Jehova sa Jerusalem, ginpahulag niya ang iya manalagna nga si Hageo sa pagpahibalo: “‘Uyugon ko ang tanan nga pungsod, kag ang mga bilidhon nga mga butang sang tanan nga pungsod magaabot; kag pun-on ko ining balay sing himaya,’ siling ni Jehova sang mga kasoldadosan.” (Hageo 2:7) Ina nga pag-uyog kag pagtay-ug sa mga pungsod magadul-ong sa ulihi sa ila kalaglagan, apang sa wala pa ina mahanabo “ang bilidhon nga mga butang sang tanan nga pungsod” dapat tipunon gikan sa ila kag pasudlon sa dakung espirituwal nga templo ni Jehova, ang iya unibersal nga balay sang pagsimba. Makasapo sila diri sing kalig-on kon ang kalibutan marumpag sa kalaglagan. Bilidhon kay Jehova ining buhi nga mga sumilimba. Indi ang ila materyal nga manggad ang ginahandum niya. (Miqueas 6:6-8) Ang pinakabilidhon nga butang nga ila mahatag kay Jehova amo ang ila bug-os kalag nga pagsimba. Nagaabot sila nga may mga halad sang tinagipusuon nga debosyon kag makugi nga pag-alagad, tanan sila ‘nagapahibalo sang mga kadayawan ni Jehova.’ Daw ano nga kalipay ang ginadala sang ila pag-abot sa matutom nga mga alagad ni Jehova sa langit kag sa duta!

⁸ Daw ano kadamo ining mga sumilimba ni Jehova nga nagalaum sang kabuhi sa Paraiso nga duta? Ang Biblia wala nagasambit sing sibu nga numero. Ginbilin ini nga bukas tubtob sa kon ano kadamo nga tawo sang tanan nga pungsod ang magabaton sa mahigugmaon nga mga aman ni Jehova. Apang, ang ideya kon pila ang paabuton, masapwan sa Isaias 60:8, nga nagalaragway sa ila kaangay sang mga salampati nga “nagalupad subong sang panganod”—ang panganod nga halos nagapadulom sa duta sa ubos. Nagatudlo ini sa hublag sang madamo nga tawo sa malip-ot nga tion. Upod sining daku nga pag-abot sang mga sumilimba ni Jehova, gintagna nga “ang diutay” sang espirituwal nga Israel “mangin isa ka libo, kag ang diutay mangin mabakod nga pungsod,” kag nagsiling si Jehova nga iya ‘padalion ini sa iya tion.’ (Isaias 60:22) Amo gid bala sina ang natabo?

⁹ Sa tapos sang una nga kalibutanon nga inaway, pila lamang ka libo ang aktibo nga nagpakigbahin sa paghatag sing panaksi sa publiko nahanungod sa Ginharian. Sang 1935 ang kabug-osan nila malapit sa 60,000 sa bug-os nga kalibutan. Sang 1941 ang kadamuon sang mga manugwali sang Ginharian lumampas sa 100,000. Sang 1953, may kapin sa 500,000. Napulo ka tuig sang ulihi ang ila kadamuon isa ka milyon. Sang umpisa sang 1984, may 2,652,323. Sa promedyo, nagahugod sila sing kapin sa isa ka milyon ka oras kada adlaw sa pagpakita sa iban kon ngaa ang Ginharian sang Dios lamang ang nagatanyag sing matuod nga paglaum sa palaabuton. Bilang pagpaanggid sa kadamuon nga, subong mga Saksi ni Jehova, nagahatag sing pamatuod nga sila mga sakop sang Mesianikong Ginharian ni Jehova, talalupangdon nga mga 60 ka pungsod sa kalibutan karon ang may indibiduwal nga populasyon nga diutay pa sa sining nagauswag nga “pungsod.” Apang, ining tumalagsahon nga “pungsod,” wala nagapakigbahin sa kalibutanon nga politika kundi debotado lamang para sa pag-alagad sa matuod nga Dios.

¹⁰ Amo bala ini ang bug-os nga kasangkaron sang katumanan sini nga tagna? Ang natabo tuman na sa pagbagay sa paglaragway sang Biblia. Kag makatilingala man, kon binagbinagon naton ang mga kahimtangan nga sa idalom sini nahimo ini—ang mga balagbag nga nalandas, ang pamatuod sang pagtuytoy sang Dios agod magmadinalag-on ini, ang debosyon nga ginapakita sang mga nagapakigbahin sa sini. Makatilingala man, ang mga pagbalhin nga ginpatubas sini sa kabuhi sang katawhan. Apang ang pagdugang sang mga tawo nga nagapakita sing dayag sang ila pagdampig kay Jehova wala nagadulog, ukon nagahinay. Sang nagligad nga mga tinuig, sa promedyo, kapin sa 10,000 kada bulan ang nagapresentar sang ila kaugalingon para sa pagpatugmaw sa tubig, kag ang kabug-osan nagataas kada tuig. Ini sila tanan, paagi sa pagkabuhi nahisanto sa ginasimbulohan sang ila bawtismo, may makapasalig nga paglaum nga maluwas pasulod sa “bag-ong duta.”

¹¹ Ining minilyon ka tawo indi independiente nga mga estudyante sang Biblia, nga ang tagsa nagaalagad sa Dios suno sa iya kaugalingon nga paagi. Sila mga tawo nga sing mapinasakupon nangin bahin sang kitaon nga organisasyon ni Jehova. Subong nakita na naton, ang una nga ‘gintipon’ amo ang mga manunubli sang Ginharian. Sa karon ang iban pa gikan sa mga pungsod, nga nagalaum sa dutan-on nga kabuhi, ‘nagaabot sa ila.’ (Isaias 60:4, 5) Sila nahiusa sa “isa ka panong” sa idalom sang “isa ka manugbantay,” si Jesucristo. (Juan 10:16) Ginlaragway ni apostol Pedro ang matuod nga mga Cristiano subong isa ka bug-os kalibutan nga ‘katilingban sang mga kauturan,’ kag si Pablo naglaygay sa ila nga indi magpain sang ila kaugalingon kundi ‘magtipon,’ kag labi na samtang nagahilapit ang adlaw sang paghukom sang Dios. (1 Pedro 5:9; Hebreo 10:23-25) Sa sina nga paagi mapalig-on sila kag masangkapan sa pagpakigbahin sa dakung katuyoan sang pagluntad sining organisasyon. Kag ano ina? Amo ang pagpadaku sang ngalan ni Jehova.—1 Pedro 2:9; Isaias 12:4, 5.

HILIKUTON NGA DAPAT TAPUSON

¹² Sa indi madugay nasayasat sang tanan nga nagapakig-upod sa organisasyon ni Jehova nga ang mga yara sa sulod sini mga manugpangabudlay. Bilang pag-ilog kay Jesucristo sila tanan aktibo nga mga manugbantala sang Ginharian sang Dios, nga amo ang paagi nga ang ngalan ni Jehova mabindikar. Si Jesus nagsiling: “Dapat ko iwali ang maayong balita sang ginharian sang Dios, kay ginpadala ako sa sining katuyoan.” (Lucas 4:43) Naghambal sia nga dapat tukuron sang iban ang ila kabuhi sa palibot sang paghimo sang kabubut-on sang Dios. Gintudloan niya ang iya mga sumulunod nga himuon ang iya ginhimo man. Para sa tion nga aton ginakabuhian, sia nagtagna nga “ining maayong balita sang ginharian” “ibantala sa bug-os napuy-an nga duta subong panaksi sa tanan nga pungsod.” (Mateo 24:14) Amo ini ang labing importante nga hilikuton nga mahimo naton karon. Ngaa? Bangod paagi sa sini ginasakdag naton ang may kinamatarong nga pagkasoberano ni Jehova nga Dios, nga sa amo nasandig ang kaayohan sang tanan nga tinuga. Paagi sa bug-os tagipusuon nga pagpakigbahin sa sining hilikuton, ginapasundayag naton ang aton apresasyon sa bugana nga dibagay nga kaluoy ni Jehova. Ginabuligan man naton ang aton mga isigkatawo sa pagbaton sang lamang nga paagi nga sila maluwas sa nagapakari nga dakung kapipit-an.—Ipaanggid ang 1 Timoteo 4:15, 16.

¹³ Ang mga kahimtangan nga ila masapwan sa sulod sang organisasyon ni Jehova nagapahalipay sang ila tagipusuon. Subong gintagna ni Jehova paagi kay Isaias: “Itangdo ko ang paghidait subong imo mga manugtatap kag ang pagkamatarong subong imo manughatag sing hilikuton.” (Isaias 60:17) Ang paghidait nga nagaluntad indi sa teoriya lamang kundi matuod gid, isa ka bunga sang balaan nga espiritu sang Dios. Wala ini nagakahulugan nga ang isa ka indibiduwal makaeksperiensia sina nga paghidait sing bug-os bangod lamang nagapakig-upod sia sa organisasyon. Sia mismo magtuon sa ‘pagtinguha sang mga butang nga para sa paghidait kag ang mga butang nga makapalig-on sa isa kag isa.’ (Roma 14:19) Dapat sia magtuon sa pagpakita sing diosnon nga kaalam sa paglandas sang mga dikahimpitan sang iban, sa paghatag sing pamatuod sang pagkamainantuson kag pagpugong sa kaugalingon, mangin mapinatawaron sa iban subong nga luyag niya nga patawaron man sia sang Dios. Huo, sia man dapat mangin ‘mahidaiton.’ (Santiago 3:17, 18; Galacia 5:22, 23; Colosas 3:12-14) Ang mga nagahimo sini nagakalipay sing daku nga sila bahin sang “mabakod nga pungsod” nga karon nagaporma kag debotado sa pag-alagad kay Jehova, “ang malipayon nga Dios.” (1 Timoteo 1:11) Ang mga katapo sining “pungsod” amo ang luwason kon hukman na ni Jehova ang bug-os nga kalibutan nga nagapasakop kay Satanas subong manuggahom sini.

[Mga Pamangkot sa Pagtinuon]

1. (a) Tuhoy sa kadakuon sang pag-uswag sang matuod nga mga sumilimba, ano ang gintagna ni Jehova? (b) Sin-o ang aktuwal nga nagapahanabo sini, kag paano?

2. (a) Sa kay sin-o ginhambal ang Isaias 60:1, 2? (b) Sa anong paagi ang “himaya ni Jehova” nagsilak sa iya? (c) Paano ang nagkalabilin “nagdilag”?

3. (a) Ngaa, labi na sugod sang 1914, ang ‘kadudulman nagtabon sang duta’? (b) Ano ang lamang matuod nga solusyon?

4. Sa katumanan sang Isaias 60:4, anong pagtipon nga hilikuton ang una nga ginhatagan sing igtalupangod?

5. Ano anay ang ginhalinan sang dugang pa nga pag-uswag subong ginlaragway sa Isaias 55:5?

6. Tubtob diin ginadala ang mensahe sang Ginharian, kag ano ang makapakunyag nga mga resulta?

7. Suno sa paagi nga gintagna ang pag-uswag, paano ginapakita ni Jehova kon ano gid ang bilidhon sa iya mga mata?

8. Ano nga mga ideya ang ginahatag sang Biblia tuhoy sa kasangkaron sang pagtipon sa palaabuton nga dutan-on nga mga manunubli sang Ginharian?

9. Tubtob sa anong kasangkaron natabo ina nga pag-uswag kutob sang 1935?

10. (a) Anong mga kahimtangan ang nagahimo sang pag-uswag nga makadalayaw sa aton mga mata? (b) Ano ang nagapakita nga dugang pa ang magaabot?

11. (a) Paano ginapakita sang Biblia nga ining minilyon nangin bahin sang isa ka organisasyon? (b) Ano ang una nga katuyoan sina nga organisasyon?

12. (a) Paano ginpakita ni Jesus ang hilikuton nga dapat naton tanan pakigbahinan? (b) Daw ano ka importante ini, kag ngaa?

13. (a) Sa Isaias 60:17, anong kahimtangan ang gintagna para sa organisasyon ni Jehova? (b) Ano ang dapat naton himuon agod maeksperiensiahan ini sing bug-os? (c) Ano ang palaabuton sang mga nagahimo sini?