Pagkaluwas Padulong sa Bag-ong Duta: Kapitulo 23

“Kinahanglan Ninyo ang Pagbatas”

ANG mga naghimo kay Jehova nga ila pagsalig amo gid ang malipayon nga katawhan sa duta karon. Nahibaloan nila kon sa diin makita ang labing maayo nga laygay sa kon paano malandas ang mga problema sang kabuhi—sa Pulong sang Dios. Wala sila mahadlok, samtang ginatan-aw nila ang palaabuton, bangod nahibaloan nila ang katuyoan sang Dios para sa sini nga duta. (Jeremias 17:7, 8; Salmo 46:1, 2) Walay sapayan, si apostol Pablo nagsulat sa mga masigka-Cristiano: “Kinahanglan ninyo ang pagbatas, agod nga, sa tapos ninyo mahimo ang kabubut-on sang Dios, mabaton ninyo ang katumanan sang saad.” (Hebreo 10:36) Ano ang nagapautwas sang kinahanglanon nga magbatas?

² Sa wala pa sia mapatay, ginpaalisto ni Jesus ang iya mga apostoles sa kon ano ang yara sa ila unhan, nga nagasiling: “Kon kamo iya sang kalibutan, ang kalibutan magahigugma sang iya kaugalingon. Apang bangod nga kamo indi iya sang kalibutan, kundi ginpili ko kamo gikan sa kalibutan, busa ang kalibutan nagadumot sa inyo. Dumduma ang pulong nga ginsiling ko sa inyo, Ang ulipon indi daku pa sa iya agalon. Kon ginhingabot nila ako, hingabuton man nila kamo; kon ginbantayan nila ang akon pulong, bantayan nila ang inyo man. Apang tanan ini himuon nila batok sa inyo bangod sa akon ngalan, kay wala sila makakilala sa nagpadala sa akon.” (Juan 15:19-21) Daw ano ka matuod gid ina!

³ Ginakaugtan ang mga sumulunod ni Jesus bangod nagakabuhi sila sa tunga sang kalibutan nga nagasikway sa ginarepresentaran sang matuod nga Cristianismo. Ang Cristo nagakahulugan sing “Hinaplas.” Si Jesucristo amo ang isa nga hinaplas ni Jehova agod mangin Hari, nga nagagahom sa bug-os nga duta. Sa amo sang magsiling si Jesus nga ang iya mga disipulo hingabuton ‘bangod sa iya ngalan,’ ang buot niya silingon amo nga sila hingabuton bangod sang ila pagpasakop sa iya subong ang Mesianikong Hari ni Jehova, bangod sang ila matutom nga pagpasakop sa iya Ginharian kag wala nagapasilabot sa mga hilikuton sang pangulohan sang tawo. Gindugang ni Jesus nga ang kabangdanan sang pagpamatok amo nga ang mga manughingabot “wala makakilala sa nagpadala sa akon”—kon sayoron, nagadumili sila sa pagkilala kay Jehova nga Dios subong ang Unibersal nga Soberano. (Ipaanggid ang Exodo 5:2.) Sin-o ang pangulo nga manugsutsot sining paghingabot? Si Satanas nga Yawa.—Bugna 2:10.

⁴ Labi na sugod sang gintabog si Satanas gikan sa langit sa tapos mabun-ag ang Mesianikong Ginharian ni Jehova sang 1914, ang pag-ipit batok sa matuod nga mga Cristiano nagbaskog. Indi ini pagpakadiutaya. Ang Yawa kag ang iya mga demonyo bug-os nga nagapakig-away batok sa tanan nga nagdampig sa Ginharian sang Dios sa mga kamot ni Jesucristo. Nahanungod sini, ang Bugna 12:17 nagasiling: “Kag ang dragon [Satanas nga Yawa] naakig sa babayi [langitnon nga tulad-asawa nga organisasyon sang Dios], kag nagkadto sa pagpakig-away sa nagkalabilin [hinaplas sang espiritu nga mga sumulunod ni Cristo sa duta], sang iya binhi, nga nagabantay sang mga sugo sang Dios kag nagapanaksi kay Jesus.” Ang “iban nga mga karnero,” nakasapo man sang ila kaugalingon nga naulamid sa inaway. Paagi sa malalangon nga mga padihot, nagatinguha si Satanas nga hayluhon ukon piliton sila sa pag-untat sa pagsunod sa mga sugo sang Dios. Luyag niya nga paluyahon kag dayon laglagon sing bug-os ang ila espirituwalidad. Ang iya katuyuan amo nga pahipuson ang pagbantala tuhoy kay Jesus subong ang Mesianikong Hari ni Jehova. Apang nagadaug sa sining espirituwal nga inaway ang matutom nga mga alagad sang Dios.

Ano Dapat ang Reaksion sang mga Cristiano?

⁵ Madamo nga opisyales sang pangulohan ang nagakilala nga ang mga Saksi ni Jehova masinulundon sa kasuguan nga mga tawo kag maayo sila nga impluwensia sa komunidad. Apang, ang tanan nga pangulohan sang tawo bahin sang bug-os kalibutan nga sistema sang mga butang ni Satanas. (1 Juan 5:19; Bugna 13:2) Gani indi kita dapat makibot kon ang iban nga pangulohan magdumili sang pagtipon sang mga nagasimba sa matuod nga Dios, sang ila mga literatura sa Biblia, sang ila pagbantala nahanungod sa Ginharian sa Dios, huo, magbilanggo pa gani kag pisikal nga mag-abuso sa ila. Kon ikaw personal nga mapadailom sa sina nga pag-ipit, ano ang imo himuon?

⁶ Gintahod sang mga apostoles ni Jesucristo ang mga opisyales sang pangulohan. Sang ginhingabot, wala sila magbalos. Apang sang ginmanduan sila nga mag-untat sa paghimo sang ginsugo sang Dios, sila malig-on nga nagsabat: “Dapat namon tumanon ang Dios subong manuggahom sa baylo sang mga tawo.” (Binuhatan 5:29; Roma 12:19; 1 Pedro 3:15) Bisan pa sang ginpahog ang ila kabuhi, ang kahadlok sa kamatayon wala magpakompromiso sa ila. Nahibaloan nila nga sila nagaalagad sa “Dios nga nagabanhaw sang mga patay.” (2 Corinto 1:9; Hebreo 2:14, 15) Bisan pa ginhingabot, malipayon sila—malipayon bangod nahibaloan nila nga napahamut-an nila ang Dios, malipayon nga nakaambit sila sa pagbindikar sang iya ngalan kag sa pagpamatuod sang ila katutom sa iya hinaplas nga Hari. (Binuhatan 5:41, 42; Mateo 5:11, 12) Amo ka bala sina nga sahi sang tawo? Ginapakilala mo bala sing dayag ang imo kaugalingon upod sa mga nagabatas sina nga mga eksperiensia? Si Ebed-melec maisugon nga wala mag-isol. Sin-o sia?

⁷ Si Ebed-melec mahinadlukon sa Dios nga Etiopianhon nga nagkabuhi sa Jerusalem sa sulod sang panahon nga nagdul-ong sa pagkalaglag sini sa mga kamot sang mga Babilonianhon. Nagaalagad sia sa panimalay ni Hari Sedequias. Sadto nga tion si Jeremias nagaalagad subong manalagna ni Jehova sa Ginharian sang Juda kag sa palibot nga mga pungsod. Bangod wala sing pagkompromiso nga gindul-ong niya ang mensahe sang paandam sang Dios, ginhingabot sia sing mabaskog. Sa pagsutsot sang pila ka prinsipe sa Jerusalem, ginhaboy sia sa buho agod magsalop sa lunang sini. Bisan pa si Ebed-melec indi Israelinhon, ginkilala niya si Jeremias subong manalagna ni Jehova. Sang mabatian niya ang ginhimo, sa gilayon ginkadtuan ni Ebed-melec ang hari sa gawang sang siudad agod makighambal para kay Jeremias. Suno sa mga mando sang hari, nagkuha sia sa gilayon sing 30 ka lalaki, subong man sing mga lubid kag daan nga mga lapat. Gintudluan niya si Jeremias nga ibutang ang mga lapat sa idalom sang iya mga ilok agod indi mapilasan sang mga lubid, kag dayon ginbatak nila ang manalagna gikan sa buho.—Jeremias 38:4-13.

⁸ Halangpunon nga nabalaka si Ebed-melec kon basi ano ang himuon sa iya sang mga prinsipe bangod ginpaslaw niya ang ila plano, apang ang iya kabalaka ginlabawan sang iya pagtahod sa manalagna ni Jehova kag sang iya pagsalig sa Dios. Subong resulta, ginpasalig ni Jehova si Ebed-melec paagi kay Jeremias: “‘Yari karon, dalhon ko ang akon mga pulong sa sini nga siudad nga sa kalaut kag indi nga sa kaayuhan, kag matuman sila sa imo atubangan sa sadto nga adlaw. Kag luwason ko ikaw sa sadto nga adlaw,’ siling ni Jehova, ‘kag indi ikaw itugyan sa kamot sang mga tawo nga ginakahadlukan mo. Kag sa pagkamatuod luwason ko ikaw, kag indi ka mapukan sa espada; kag ang imo kalag mangin inagaw sa imo, bangod nga nagsalig ka sa akon,’ siling ni Jehova.”—Jeremias 39:16-18.

⁹ Daw ano ka bilidhon ina nga saad para sa mga alagad ni Jehova karon! Kaangay ni Ebed-melec, nakita sang “iban nga mga karnero” ang mga inhustisya nga ginahimo sa modernong adlaw nga Jeremias nga klase, ang hinaplas nga nagkalabilin, kag ang mga panikasog nga ginahimo sa pagpauntat sang ila pagbantala sang mensahe ni Jehova. Wala sila magpangalag-ag sa paghimo sang bisan anong buhat nga masarangan nila sa pag-amlig kag sa pagsakdag sa hinaplas nga klase. Busa, sing nagakaigo ang saad ni Jehova kay Ebed-melec nagapalig-on sa ila, nagapabakod sang ila pagsalig nga indi pagtugutan sang Dios ang mga manugpamatok sa paglaglag sa ila kundi amligan Niya sila subong isa ka klase sa nagapakari nga kalaglagan sang kalibutan padulong sa Iya matarong nga “bag-ong duta.”

¹⁰ Indi tanan sang nagalakat sa mga tikang ni Jesucristo may katalagman nga mabilanggo, apang ang tanan nagaeksperiensia sing paghingabot sa nanuhaytuhay nga paagi. (2 Timoteo 3:12) Linibolibo ka Cristianong mga asawa, kag mga bana, ang sa madamo nga tinuig matutom nga nagbatas sing mabaskog nga paghingabot sa sulod gid sang ila puluy-an. Ang mga kabataan, man, bangod sang ila handom nga alagdon si Jehova, ginsikway sang mga ginikanan. (Mateo 10:36-38) Ang Cristianong mga pamatan-on mahimo nga hingabuton man sa eskwelahan; ang may edad-edad nga mga tawo, sa ila duog sang palamugnan. Ang tanan nga Saksi ni Jehova makatilaw sini samtang nagapakigbahin sila sa pagpanaksi sing dayag nahanungod sa Ginharian sang Dios. Para sa ila tanan, ang mga pulong ni Jesus naaplikar: “Paagi sa inyo pagbatas maangkon ninyo ang inyo mga kalag.”—Lucas 21:19.

¹¹ Indi sa pila lamang, may yara iban pa nga mga kahimtangan nga nagatilaw sa ila. Mahimo nga may grabe sila nga balatian, nga nagakuha sang daku nga kalipay gikan sa kabuhi. Ukon, ayhan ginaatubang sila sing mabudlay nga mga kahimtangan sa ekonomiya. Mahimo nga kon kaisa, ang mga komento sang suod nga mga kaupod indi makatarunganon kag indi maluluy-on. Sa bahin sang patriarka nga si Job, gingamit ni Satanas ining tanan nga paagi sa panikasog nga bungkagon ang iya integridad. Ano ang aton reaksion kon masapwan naton ang aton kaugalingon sa kaanggid nga mga kahimtangan?—Santiago 5:11.

¹² Sa pihak nga bahin, ano kon personal nga masapwan naton nga diutay lamang ang nagapakita sing interes sa aton mga panikasog nga magpanaksi nahanungod sa mga katuyuan ni Jehova? Ina, man, nagakinahanglan sing pagbatas. Dumduma, sa sulod sang tanan nga tinuig nga nagbantala si Noe sa wala pa ang Anaw, ang iya asawa lamang kag mga anak nga lalaki kag ang ila mga asawa ang nagbuylog sa iya sa pag-alagad kay Jehova. Ang tanan nga nabilin sa katawhan “wala magtalupangod.” (Mateo 24:39) Sa karon man, ang kalabanan ‘wala nagatalupangod.’ Apang, sa iban nga mga duog, nga sang una diutay lamang ang nagapakita sing interes sa mensahe sang Ginharian, may bugana karon nga pag-ani sing mga sumilimba sa matuod nga Dios. Malipayon nga ginbatas nila ang mga tinuig sang indi pagsapak ukon sang dayag nga pagpamatok kag karon nagapakigbahin sa sining dalayawon nga pagtipon!

‘Malipayon Sila nga Nagapadayon sa Pagbatas’

¹³ Agod indi mawasi ang dalayawon nga paglaum sang kabuhi sa “bag-ong duta,” importante nga athagon sa hunahuna ang dakung hulusayon nga nagaatubang sa tanan nga tinuga—ang hulusayon sang unibersal nga pagkasoberano. Kita bala wala nagakompromiso nga dampig sa bahin ni Jehova? Nahangpan bala naton sing bug-os nga may duha ka bahin, nga indi mahimo ang pagkompromiso? Agod indi kita malaglag sa sining inaway, dapat naton kilalahon nga ang kapintas kag panghaylo mga metodo nga ginagamit ni Satanas sa pagbungkag sang aton integridad, agod mag-untat kita sa pagtuman sa Dios, agod magtalikod kita gikan sa importante nga hilikuton sang pagpanaksi sa Mesianikong Ginharian.—1 Pedro 5:8, 9; Marcos 4:17-19.

¹⁴ Dapat man naton palambuon ang bug-os nga pagsalig kay Jehova. Daw ano ka binuang nga magtinguha sa aton lamang kusog sa paglikaw sa malalangon nga mga siod sang labaw sa tawo nga kaaway! Apang kon nagasalig kita kay Jehova sa bug-os naton nga tagipusuon, nian kon may kabudlayan kita kag nagaatubang sing pagsulay magapalapit kita sa iya. (Efeso 6:10, 11; Hulubaton 3:5, 6) Wala kita ginapilit ni Jehova sa isa ka dalanon. Indi niya kita pagtuytuyan batok sa aton kabubut-on. Apang kon magpatuytoy kita sa iya Pulong, magpangamuyo sa iya para sa kusog kag magpabilin nga suod sa iya organisasyon, tuytuyan niya ang aton mga tikang. Kag palig-unon niya kita paagi sa bag-o nga pamatuod sang iya wala nagauntat nga gugma.—Roma 8:38, 39.

¹⁵ Ang mga kabudlayan kag mga pagsulay nga imo maatubang magatilaw sa imo. Sin-o ang imo ginauna sa imo kabuhi? Nagapangatarungan si Satanas nga kita tanan interesado lamang sa aton kaugalingon. Ang kalabanan nga tawo kaangay sina. Tuhay si Jesucristo. Ikaw bala? Naton-an mo na bala nga unahon ang pagpadaku sa ngalan ni Jehova? Kon amo, nian, sa baylo nga likawan ang mga kahimtangan nga nagatilaw sang imo pagtuo, maatubang mo ini sing malig-on, nga nagapangamuyo kay Jehova nga hatagan ikaw sing kaalam sa paggamit sini para sa iya kadungganan. Ang kapipit-an nga imo atubangon magapatubas sing pagbatas; ang pagbatas bangod ginahigugma mo si Jehova mangin kalahamut-an sa iya. “Malipayon ang tawo nga nagapadayon sa pagbatas, kay sa tapos mahamut-an magabaton sia sing purongpurong sang kabuhi, nga ginsaad ni Jehova sa mga nagapadayon nga nagahigugma sa iya.”—Santiago 1:2-4, 12; Roma 5:3, 4.

¹⁶ Indi pa tuman nga mag-umpisa lamang sa pag-alagad kay Jehova ukon magbatas sa makadali. Yara kita sa isa ka palumba, kag ang premyo magakadto sa mga makatabok sa katapusan nga linya. Malipayon ang mga nagapanikasog gihapon nga ang ila mga mata nagatulok sa premyo kon ining daan nga sistema malaglag! Daw ano ka mahimayaon nga paglaum ang nagahulat sa ila!—Hebreo 12:1-3; Mateo 24:13.

[Mga Pamangkot sa Pagtinuon]

1. (a) Ngaa ang mga Saksi ni Jehova malipayon gid nga katawhan? (b) Apang ano nga laygay sa Hebreo 10:36 ang naaplikar sa aton tanan?

2. Ngaa kinahanglan sang mga disipulo ni Jesus ang pagbatas?

3. (a) Paano nga ‘sa ngalan ni Jesus’ ginahingabot ang iya mga disipulo? (b) Sa anong kahulugan nga ang mga manughingabot “wala makakilala” sa Isa nga nagpadala kay Jesus? (c) Sin-o ang una nga may salabton sa paghingabot?

4. (a) Paano ang katumanan sang Bugna 12:17 nagaapektar sang aton kabuhi? (b) Ano ang katuyuan ni Satanas?

5. Ano nga mga aksion ang ginhimo sang mga pangulohan batok sa mga Saksi ni Jehova?

6. (a) Ano dapat ang panimuot naton sa mga opisyales sang pangulohan? (b) Apang malig-on kita nga desidido sa paghimo sing ano? (c) Bisan pa ginahingabot, paano kita mangin malipayon gihapon?

7. (a) Sin-o si Ebed-melec, kag ngaa interesado kita karon sa iya? (b) Sang mabatian nga si Jeremias ginhaboy sa lunangon nga buho, ano ang ginhimo ni Ebed-melec, kag ngaa?

8. Anong makapasalig nga saad ang ginpadala ni Jehova kay Ebed-melec, kag ngaa?

9. (a) Paano ang “iban nga mga karnero” nangin kaangay ni Ebed-melec? (b) Gani, ano ang kahulugan sang saad ni Jehova kay Ebed-melec sa “iban nga mga karnero” karon?

10. Sa anong mga bahin sang kabuhi ang mga Cristiano nagaeksperiensia sing paghingabot?

11. (a) Anong iban pa nga mga kahimtangan ang nagahatag sing mabudlay nga pagtilaw sa madamo? (b) Sin-o pa ang nagaeksperiensia sining mga butang, kag ngaa?

12. (a) Ngaa labi na nga ginkinahanglan ni Noe ang pagbatas sa iya ministeryo? (b) Paano ang kahimtangan kaanggid sa aton adlaw?

13. (a) Agod padayon nga makabatas, sa ano naton isentro ang aton panan-aw? (b) Ano ang dapat naton kilalahon tuhoy sa mga metodo ni Satanas?

14. (a) Anong kaangtanan ang dapat naton palambuon, kag upod kay sin-o? (b) Paano niya kita mabuligan?

15. (a) Sin-o ang dapat unahon sa aton kabuhi? (b) Paano naton dapat tamdon ang kahimtangan nga nagatilaw sang aton pagtuo?

16. Anong tulumuron ang dapat naton tinguhaan nga ma­lab-ot?