Kapitulo 14
Sa Tapos sang Bag-ong Katipan—Ang Milenyo nga Ginharian
MINILYON ka tawo na sa bilog nga duta ang nakabaton sing daku nga mga benepisyo gikan sa pagpanghikot sang bag-ong katipan, bisan pa indi sila katapo sini. Kaangay sila sang di-Israelinhon nga mga pumuluyo nga nagpuyo sa Israel sang mga adlaw nga ang Mosaikong Kasuguan nagapanghikot pa. (Exodo 20:10) Paano ini natabo sa nagadugang nga minilyon ka benepisyaryo nga nagapakig-upod sa nagkalabilin sang espirituwal nga mga Israelinhon karon?
2 Sa tagna sang Jeremias 31:31-34, ang Isa nga nagahatag sang mga kondisyon sang bag-ong katipan nagsiling: “Ibutang ko ang akon kasuguan sa sulod nila, kag isulat ko ini sa ila tagipusuon. Kag ako mangin ila Dios, kag sila mangin akon katawhan.”
3 Tuhoy sa Kasuguan nga katipan, si Jehova nga Dios, paagi kay manalagna Moises subong manugpatunga, naghatag sa kinaugali nga Israel sing “nasulat nga dokumento . . . , nga nag-unod sing mga mando.” (Colosas 2:14) Kamusta, naman, sa kasuguan sang bag-ong katipan? Ang Manugpatunga sini wala magtigib sini sa bato, ukon magsulat sini sa isa ka manuskrito. Ang Manugpatunga sini wala magbilin sing mga sinulatan. Mapat-od naton kon ano ang kasuguan sang bag-ong katipan gikan sa inspirado nga Cristianong Griegong Kasulatan. (2 Timoteo 3:16) Apang bisan sa wala pa ginsugdan ang pagsulat sang Griegong Kasulatan, kutob sang mga 41 C.E., si Jehova nga Dios nagsugod sa pagsulat sang iya kasuguan sang bag-ong katipan. San-o? Sang adlaw sang Pentecostes, 33 C.E. Sa diin? Didto gid sa madugay na niya ginsaad nga isulat ini: “Ibutang ko ang akon mga kasuguan sa ila mga hunahuna, kag sa ila mga tagipusuon isulat ko sila.”—Hebreo 8:10.
4 Bangod natigib sa tagipusuon, mabudlay matabo nga yadtong mga kasuguan untatan sa paghigugma sang mga nagatuman sa ila. Kon yadtong mga kasuguan ginbutang “sa ila mga hunahuna,” mabudlay nila malipatan ini. Busa, ang mga manugtuman sa sadtong mga kasuguan nagasiling, sa mga pulong sang Salmo 119:97: “Daw ano ang paghigugma ko sang imo kasuguan! Pamalandungan ko ini sa bug-os nga adlaw.” Gikan sa alibutod sang ila kaugalingon, ginahigugma nila ang mga kasuguan ni Jehova nga ginhatag paagi sa iya Manugpatunga, si Jesucristo. Sa amo, upod ang husto nga motibo, determinado sila nga tumanon yadtong hamili nga mga kasuguan. Naaplikar ini sa “diutay nga panong” sa bag-ong katipan kag sa “dakung kadam-an” sang “iban nga mga karnero” nga indi katapo sang bag-ong katipan, apang yara sa idalom sini.—Ipaanggid ang 1 Juan 5:3; Juan 14:15.
Ang Hulusayon sa Ginharian Yara sa Unahan!
5 Ang mga manugtuman sang mga kasuguan sang bag-ong katipan wala nagapadaug sa gintagna sang Manugpatunga, si Jesucristo, nga bahin sang “tanda . . . sang katapusan sang sistema sang mga butang”: “Bangod sang pagbuad sang pagkamalinapason ang gugma sang madamo magabugnaw. Apang sia nga nagbatas tubtob sa katapusan amo ang maluwas. Kag iwali ining maayong balita sang ginharian sa bug-os napuy-an nga duta subong panaksi sa tanan nga kapungsuran.”—Mateo 24:3, 12-14.
6 Ining katapusan nga pinamulong nahanungod sa bug-os duta nga panaksi sa Ginharian indi isa ka tagna lamang. Isa ini ka sugo para sa iya mga disipulo nga nagakabuhi sa “katapusan sang sistema sang mga butang.” Isa ini ka tuytoy para sa ila husto nga paghikot tubtob sa kompleto nga katapusan sang sistema sang mga butang nga wala sing gugma kag puno sing pagkamalinapason sa kabilugan, indi pagtamay lamang sa kasuguan sang Dios. Sin-o sa karon ang nagapamatuod subong matuod nga mga Cristiano, nga nagatamod sa sadtong mga pulong ni Jesucristo subong sugo sa ila? Ang maragtason nga mga kamatuoran nga nagdamo kutob sang 1919 maminatud-on nga nagasabat, “Ang mga Saksi ni Jehova”! Ang ila kampanya sa pagtudlo sing Biblia tuhoy sa Ginharian amo ang pinakadaku nga narekord, kag nagpakita sila sing pagbatas sa sulod sang nagligad nga 67 ka tuig. Sa kada tuig karon, nagauswag ini sa kasangkaron kag sa gahom.
7 Nagtinguha si Satanas nga Yawa nga punggan ining talalupangdon nga kampanya sa pagtudlo sing Biblia paagi sa paglaglag sa diutay nga nagkalabilin sang espirituwal nga mga Israelinhon sa tion sang Inaway Kalibutanon I. Napaslawan sia! Sa gilayon, sa tapos sila makapasag-uli gikan sa daw patay nga kahimtangan sang tig-ilinit sang 1919, naghiwat sila sang ila nahauna nga kombension sa tapos sang inaway sa Cedar Point, Ohio, sang Septiembre sadto nga tuig. Sa ikaduha nga kombension sa Cedar Point sang Septiembre 1922, ang hulusayon sa Ginharian nangibabaw. Sang ikap-at nga adlaw sadto nga kombension, nga natig-uluhan “The Day,” ang presidente sang Watch Tower Society nagdala sang iya makakulunyag nga diskurso sa daku nga putukputukan sini paagi sa pagtuaw:
8 “Nian balik kamo sa latagon, O kamo nga mga anak sang Labing Mataas nga Dios! Isuklob ang inyo mga hinganiban! Magmaligdong kamo, magbantay, mag-aktibo, magmaisog. Mangin matutom kag matuod nga mga Saksi para sa Ginuo. Lakat kamo sa inaway tubtob mapanas ang tanan nga agi sang Babilonia. Iwali ang mensahe sing lapnag. Dapat mahibaluan sang kalibutan nga si Jehova amo ang Dios kag si Jesucristo amo ang Hari sang mga hari kag Ginuo sang mga ginuo. Amo ini ang adlaw sang tanan nga mga adlaw. Toloka, ang Hari nagagahom! Kamo ang iya mga manugbantala. Busa ibantala, ibantala, ibantala ang Hari kag ang iya Ginharian.”
Pagkilala kay Jehova sing Kapin ka Mahinantupon
9 Kapin na sa 70 ka tuig karon kutob sang ginpalingkod si Cristo sa Ginharian sang 1914. Kutob sadto, nagdugang sing daku ang pamatuod tuhoy sa matarong nga pangulohan sang Dios. Ang katawhan sang kalibutan dapat magdesisyon sa Ginharian nga hulusayon, kon bala dampig sa Ginharian ukon batok sa sini. Kag para sa mga nagadampig sa balaan nga pangulohan, ginatuman sa ila ining importante nga mga pulong sang bag-ong katipan: “Kag indi na sila magtudlo ang tagsatagsa sa iya isigkatawo kag ang tagsa ka tawo sa iya utod, nga nagasiling, ‘Kilalaha si Jehova!’ kay sila tanan makakilala sa akon, kutob sa labing magamay sa ila tubtob sa labing daku.”—Jeremias 31:34.
10 Sang 1935 ang nagkalabilin sang espirituwal nga mga Israelinhon nagsugod sa pag-abiabi sa “iban nga mga karnero” sang Maayong Manugbantay sa aktibo nga pagpakig-upod sa ila sa “isa ka panong” sa idalom ni Jesucristo, tanan sila mga Saksi ni Jehova. Nian yadtong “iban nga mga karnero,” nga nagsugod sa paghuman sing “dakung kadam-an” nga wala ginsambit ang kadamuon, nagsugod, upod sa ginpanganak sang espiritu nga nagkalabilin, sa “pagtuman sang mga sugo sang Dios” kag sa paghimo sang “hilikuton sang pagpanaksi kay Jesus.” (Bugna 7:9-17; 12:17) Sa amo kutob sang umpisa sang 1935, ining “iban nga mga karnero” nakakilala man kay Jehova “kutob sa labing magamay sa ila tubtob sa labing daku.”
11 Apang, sa anong paagi nga ang Cristianong ihibalo tuhoy kay Jehova tuhay kag maayo pa sa ihibalo sang mga Judiyo anay sa idalom sang daan nga Mosaikong Kasuguan nga katipan? Ang langitnon nga Magbubuhat sang bag-ong katipan nagapadayon sa pagsugid sa aton: “Kay patawaron ko ang kalautan nila, kag indi na pagdumdumon ang ila sala.” (Jeremias 31:34; Hebreo 8:12) Bangod ini sa kamatuoran nga ang bag-ong katipan napasad sa maayo pa nga halad paagi sa maayo pa nga Manugpatunga. (Hebreo 8:6; 9:11, 12, 22, 23) Ang maayo pa nga halad sang maayo pa nga Manugpatunga indi na dapat suliton, subong anay sa tuigan nga Adlaw sang Katumbasan sa idalom sang daan nga Mosaikong Kasuguan nga katipan. (Hebreo 10:15-18) Bangod sining tanan, ang ihibalo tuhoy kay Jehova nga ginapanag-iyahan sang mga yara sa sulod kag sa idalom sang bag-ong katipan mas maayo gid, kapin ka mainuswagon, kapin ka mahinantupon, kapin ka kompleto sang sa nahibaluan anay sang mga Judiyo tuhoy sa Dios sa idalom sang Kasuguan nga katipan.
12 Labaw sa tanan, si Jehova nga Dios, ang Magbubuhat sing Katipan, amo ang Hari sa mga ginadala niya pasulod sa bag-ong katipan kag sa mga ginapaidalom niya sa sini. (Mateo 5:34, 35; Jeremias 10:7) Si apostol Pablo, 1,850 ka tuig sa wala pa ginpalingkod si Jesus sa trono subong Hari sa langit sang 1914, nagpatuhoy sa pagkahari ni Jehova sa ibabaw sang mga nagatuman sa kasuguan sang bag-ong katipan, nga nagasiling: “Sa Hari nga Dayon, nga dimamalatyon, dimakita, ang isa lamang ka Dios, ang kadungganan kag himaya sing dayon. Kabay pa.”—1 Timoteo 1:17.
Ang Milenyo nga Ginharian sa Tapos sang “Dakung Kapipit-an”
13 Ang “dakung kadam-an” sang “iban nga mga karnero,” nga wala sa bag-ong katipan apang yara sa idalom sini, nagapaabot nga maluwas sa “dakung kapipit-an.” Sa tapos malaglag ining karon nga sistema sang mga butang, ila maeksperiensiahan, sa isa ka libo ka tuig, ang paghari ni Jesucristo kag sang iya kaupod nga mga manunubli sa ibabaw sang natinluan nga duta. (Bugna 7:9-14) Nian matuman na ang katuyuan sang bag-ong katipan, nga amo ang pagpatubas sing “pinasahi nga katawhan” agod mangin mga manunubli sang langitnon nga Ginharian sang Dios. (1 Pedro 2:9; Binuhatan 15:14) Paagi sa Ginharian sang Dios, ang mga pagpakamaayo magailig sa kabug-osan sa “dakung kadam-an” sang naluwas nga “iban nga mga karnero.” Si Satanas nga Yawa kag ang iya dimakita nga organisasyon sang mga demonyo itagbong sa kadadalman kag indi makapahilabot.—Bugna 21:1-4; 20:1-3.
14 Ang maluwas nga “dakung kadam-an” sang “iban nga mga karnero” may maayo nga paghanda sa pagbaton sing kabuhi sa bag-ong sistema sang mga butang. Kaangay sang nagkalabilin sang espirituwal nga mga Israelinhon, makilala nila ang Dios “kutob sa magamay sa ila tubtob sa labing daku.” (Jeremias 31:34) Sa pangamuyo sa Dios, ang nagagahom nga Hari nagsiling anay: “Nagakahulugan ini sing kabuhi nga walay katapusan, nga pagkilalahon ka nila nga ikaw lamang ang matuod nga Dios, kag ang imo ginpadala nga si Jesucristo.” (Juan 17:3) Gani ining tugob sa uniberso nga ihibalo tuhoy kay Jehova nga Dios magaresulta sa walay katapusan nga kaluwasan. Mangin matuod ini indi lamang para sa “unod” nga maluwas sa “dakung kapipit-an” kundi para man sa binilyon ka tawo nga patay nga makabati sa tingog sang Hari kag magaguwa gikan sa ila mga lulubngan. Ang tanan nga kinahanglanon nga ihibalo tuhoy kay Jehova ipaambit sa mga binanhaw.—Mateo 24:21, 22; Juan 5:28, 29; Bugna 20:11-15.
15 Sing makalilipay, ang pagtuman sa bag-ong katipan sang Dios tubtob sa dakung kadalag-an indi magaresulta sa kadulaan sa “dakung kadam-an” sang mga tulad karnero nga makalampuwas sa kalaglagan sining napamatbatan na nga sistema sang mga butang. Sa baylo, buksan sini ang dalan para sa daku pa nga mga pagpakamaayo diri sa natinluan nga duta nga panublion nila kag sila ang una nga makapakigbahin sa paghimo sini nga isa ka tugob globo nga paraiso. (Mateo 25:34; Lucas 23:43) Sa dili madugay karon, ang mga nagalaglag sa duta madula na, “apang ang mga nagalaum kay Jehova amo ang magapanag-iya sang duta. . . . Ang mga mahagop magapanubli sang duta, kag magakalipay sila sa kabuganaan sang paghidait.” (Salmo 37:9-11) Abiabihon sang tanan ang Milenyo nga Ginharian ni Jehova nga Dios paagi sa “Prinsipe sang Paghidait” nga magasunod sa katumanan sang bag-ong katipan!
[Mga Pamangkot sa Pagtinuon]
1, 2. (a) Sa kay sin-o mapaanggid ang minilyon ka benepisyaryo sa pagpanghikot sang bag-ong katipan karon? (b) Ano ang ginasiling sang kondisyon sang bag-ong katipan?
3. (a) Sa ano nga porma ginhatag ang kasuguan sang daan nga Mosaikong katipan sa Israel? (b) Sa wala pa ginsugdan ang pagsulat sa Cristianong Griegong Kasulatan, sa diin ginsulat sang Dios ang mga kasuguan sang bag-ong katipan?
4. Ano ang maayong mga epekto sang pagsulat sang Dios sang iya mga kasuguan sa tagipusuon kag sang pagbutang sini sa hunahuna sang iya mga alagad?
5. Ano ang gintagna sang Manugpatunga sang bag-ong katipan sa Mateo 24:12-14?
6. (a) Isa lamang bala ka tagna ang Mateo 24:14? (b) Sin-o ang nagbaton nga indi lamang ini tagna, kag ano ang masiling tuhoy sa ila pagbatas?
7, 8. (a) Sang Inaway Kalibutanon I, ano ang gintinguhaan ni Satanas nga himuon sa mga yara sa bag-ong katipan? (b) Sa panahon sa tapos sang inaway, paano ang Ginharian nga hulusayon nangibabaw?
9. (a) Bangod sang pagdugang sang pamatuod tuhoy sa matarong nga pangulohan, ano ang dapat desisyunan sang katawhan? (b) Ano nga ihibalo ang ginahatag sa mga nagadampig?
10. (a) Gani sa idalom sang ano nga ngalan ang nagkalabilin sang espirituwal nga mga Israelinhon nagsugod sa pag-abiabi sa “iban nga mga karnero”? (b) Ano nga ihibalo ang natigayon sang “iban nga mga karnero”?
11. Paano ang Cristianong ihibalo tuhoy kay Jehova tuhay kag maayo pa sa nahibaluan anay sang mga Judiyo sa idalom sang Kasuguan nga katipan?
12. Labaw sa tanan, ano ang palangakuan ni Jehova tuhoy sa mga ginadala sa bag-ong katipan kag sa mga napaidalom sa sini?
13. (a) San-o kag sa idalom sang anong mga kahimtangan ang “dakung kadam-an” sa kabug-osan magasulod sa mga pagpakamaayo nga nagailig gikan sa bag-ong katipan? (b) Anong dakung katuyuan ang matuman sang bag-ong katipan?
14. Anong maayong paghanda ang mahimo sang makalampuwas nga “dakung kadam-an”?
15. Ngaa ang katumanan sang bag-ong katipan indi magaresulta sa kadulaan sa “dakung kadam-an” sang “iban nga mga karnero”?