Kapitulo 8

Pagpalagyo Gikan sa Isa ka Mapintas nga Hari

GINPUKAW ni Jose si Maria agod isugid sa iya ang hilingagawon nga balita. Bag-o lang magpakita sa iya ang anghel ni Jehova, nga nagasiling: “Bangon ka, kag dalha ang bata kag ang iya iloy kag palagyo pa Egipto, kag pabilin didto tubtob nga magsiling ako sa imo; kay si Herodes magapangita sang bata sa pagpatay sa iya.”

Sa gilayon, nalagyo sila nga tatlo. Kag sibu gid sa tion ang ila pagpalagyo kay narealisar ni Herodes nga gindayaan sia sang mga astrologo kag nakaguwa na sila sa pungsod. Dumduma, dapat sila kuntani magbalik sa iya agod isugid sa iya kon makita nila si Jesus. Naakig gid si Herodes. Gani sa pagtinguha nga patyon si Jesus, naghatag sia sing mando nga pamatyon ang tanan nga bata nga lalaki sa Betlehem kag sa mga distrito sini nga nagaedad sing duha ka tuig paubos. Ginpasad niya ining kalkulasyon sa edad sa impormasyon nga natigayon niya gikan sa naghapit nga mga astrologo nga naghalin sa Sidlangan.

Makakulugmat gid tan-awon ang pagpamatay sa tanan nga bata nga lalaki! Isa-isa nga ginsulod sang mga soldado ni Herodes ang mga balay. Kag kon may makita sila nga bata nga lalaki, ginaagaw nila sia gikan sa mga butkon sang iya iloy. Wala kita sing ideya kon pila ka bata ang ila ginpatay, apang ang daku nga paghaya kag panalabiton sang mga iloy nagtuman sang tagna sang manalagna sang Dios nga si Jeremias sa Biblia.

Samtang, si Jose kag ang iya pamilya nakalab-ot sa Egipto nga may kalig-unan, kag nagpuyo sila didto. Apang isa ka gab-i nagpakita liwat ang anghel ni Jehova kay Jose paagi sa isa ka damgo. “Bangon ka, dalha ang bata kag ang iya iloy,” siling sang anghel, “kag kadto sa duta sang Israel, kay patay na ang mga nagtinguha sang kalag sang bata.” Gani bilang katumanan sang isa pa ka tagna sa Biblia nga nagasiling nga ang Anak sang Dios tawgon gikan sa Egipto, nagbalik ang pamilya sa ila kaugalingon nga banwa.

Mahimo gid nga tuyo ni Jose nga magpuyo sa Judea, nga sa diin nagapuyo sila anay sa banwa sang Betlehem sa wala pa sila magpalagyo pa Egipto. Apang nabatian niya nga ang malaut nga anak ni Herodes nga si Archelus amo karon ang hari sang Judea, kag sa isa pa ka damgo ginpaandaman sia ni Jehova tuhoy sa katalagman. Gani si Jose kag ang iya pamilya naglakbay pa aminhan kag nagpuyo sa banwa sang Nazaret sa Galilea. Diri sa sini nga komunidad, nga malayo sa sentro sang Judiyong relihiosong pagkabuhi, nagdaku si Jesus. Mateo 2:13-23; Jeremias 31:15; Oseas 11:1.

▪ Sang wala magbalik ang mga astrologo, anong makakulugmat nga butang ang ginhimo ni Hari Herodes, apang paano naamligan si Jesus?

▪ Sang magbalik sila sa Egipto, ngaa wala liwat magpuyo si Jose sa Betlehem?

▪ Ano nga mga tagna sa Biblia ang natuman sa sulod sini nga hut-ong sang tion?