Kapitulo 13
Pagtuon Gikan sa mga Pagsulay kay Jesus
SA TAPOS gid sang iya bawtismo, gindala si Jesus sang espiritu sang Dios sa kamingawan sang Judea. Madamo sia sing binagbinagon, kay sang ginbawtismuhan sia, “nabuksan ang mga langit,” agod nga mahantop niya ang langitnon nga mga butang. Sa pagkamatuod, madamo sia sing pamalandungon!
Naghinguyang si Jesus sing 40 ka adlaw kag 40 ka gab-i sa kamingawan kag nagpuasa sa sulod sining tion. Nian, sang gutom na gid si Jesus, nagpalapit ang Yawa agod sulayon sia, nga nagasiling: “Kon ikaw ang Anak sang Dios, sugua ining mga bato nga mangin tinapay.” Apang nahibaluan ni Jesus nga sayop gamiton ang iya gahom sa paghimo sing milagro agod busgon ang iya personal nga mga handum. Gani wala sia magpasulay.
Apang wala mag-untat ang Yawa. Gintilawan niya ang lain naman nga tikang. Ginhangkat niya si Jesus nga maglukso gikan sa alibungan sang templo agod nga luwason sia sang mga anghel sang Dios. Apang wala masulay si Jesus sa paghimo sinang tumalagsahon nga butang. Nagabalikwat gikan sa Kasulatan, ginpakita ni Jesus nga sayop nga tilawan ang Dios sa sining paagi.
Sa ikatlo nga pagsulay, ginpakita sang Yawa kay Jesus ang tanan nga ginharian sang kalibutan sa isa ka milagruso nga paagi kag nagsiling: “Tanan ini nga butang ihatag ko sa imo kon magyaub ka kag magsimba sa akon.” Apang sa liwat wala magpadaug si Jesus sa pagsulay sa paghimo sing malain, kag ginpili niya nga magpabilin nga matutom sa Dios.
May matun-an kita gikan sa sining mga pagsulay kay Jesus. Halimbawa, ginapakita sini nga ang Yawa indi lamang isa ka malaut nga kinaiya, subong ginapangangkon sang iban nga mga tawo, kundi nga sia matuod gid kag dikitaon nga persona. Ginapakita man sang pagsulay kay Jesus nga ang tanan nga gobierno sang kalibutan pagkabutang sang Yawa. Kay paano ang pagtanyag sa ila sang Yawa kay Jesus mangin matuod nga pagsulay kon indi sia ang nagapanag-iya sa ila?
Kag hunahunaa ini: Nagsiling ang Yawa nga padyaan niya si Jesus sa isa ka buhat sang pagsimba, kag ihatag sa iya ang tanan nga ginharian sang kalibutan. Mahimo nga tilawan kita sang Yawa sa kaanggid nga paagi, ayhan ibutang sa atubangan naton ang makagalanyat nga mga kahigayunan sa pagtigayon sing kalibutanon nga manggad, gahom, ukon posisyon. Apang daw ano ka mangin maalamon kita nga sundon ang halimbawa ni Jesus paagi sa pagpabilin nga matutom sa Dios bisan ano man ang pagsulay! Mateo 3:16; 4:1-11; Marcos 1:12, 13; Lucas 4:1-13.
▪ Ano ang mga butang nga mahimo ginpamalandungan ni Jesus sa tion sang iya 40 ka adlaw sa kamingawan?
▪ Paano gintinguhaan sang Yawa nga sulayon si Jesus?
▪ Ano ang matun-an naton gikan sa mga pagsulay kay Jesus?