Kapitulo 83

Gin-abiabi sang Isa ka Kilala nga Fariseo

SI Jesus yara pa gihapon sa puluy-an sang isa ka kilala nga Fariseo, kag bag-o lang niya gin-ayo ang tawo nga bilbilon. Sang mapanilagan ni Jesus ang mga bisita nga nagapili sing pinasulabi nga lugar sa sinalusalo, nagtudlo sia sang isa ka leksion tuhoy sa pagpaubos.

“Kon may mag-agda sa imo sa sinalusalo sang kasal,” paathag ni Jesus, “dili ka maglingkod sa pinasulabi nga duog. Basi may inagda sia nga labing dungganon pa sa imo, kag ang nag-agda sa imo kag sa iya magpalapit sa imo kag magsiling, ‘Sia ang papungkua dira.’ Kag nian magasugod ka sa pagkuha nga may kahuya sang labing kubos nga duog.”

Gani si Jesus naglaygay: “Kon ginaagda ikaw, kadto ka kag maglingkod sa labing kubos nga duog, agod nga kon mag-abot ang nag-agda sa imo makasiling sia sa imo, ‘Abyan, paibabaw ka.’ Nian may himaya ka sa atubangan sang mga nagalingkod sa pagkaon kaupod nimo.” Bilang paghinakop, si Jesus nagsiling: “Kay ang tagsatagsa nga nagapakataas sang iya kaugalingon paubson kag ang nagapaubos sang iya kaugalingon pataason.”

Masunod, ginhambal ni Jesus ang Fariseo nga nag-agda sa iya kag ginlaragway kon paano ang pagpakaon may daku nga kadungganan sa Dios. “Kon nagahimo ikaw sing panyaga ukon panihapon, dili pag-agdaha ang imo mga abyan ukon ang imo mga utod ukon ang imo mga himata ukon ang imo mga kasilingan nga manggaranon. Basi nga sila mag-agda man sa imo kag mahimo sa imo ang balos. Apang kon nagahimo ikaw sing sinalusalo, agdaha ang mga imol, ang mga pingkaw, ang mga piang, ang mga bulag; kag mangin malipayon ikaw, bangod wala sila sing ibalos sa imo.”

Ang paghatag sing sinasalusalo para sa mga kubos magadala sing kalipay sa naghatag sini bangod, subong sang ginpaathag ni Jesus sa iya tagbalay, “Balusan ka sa pagkabanhaw sang mga matarong.” Ang paglaragway ni Jesus tuhoy sining dungganon nga sinalusalo nagapahanumdom sa kaupod nga bisita nahanungod sa isa pa ka sahi sang sinalusalo. “Malipayon yadtong magakaon sa ginharian sang Dios,” siling sining bisita. Apang, wala ginpabaloran sing nagakaigo sang tanan inang malipayon nga paglaum, subong sang padayon nga ginapakita ni Jesus paagi sa isa ka ilustrasyon.

“May tawo nga naghimo sing dakung sinalusalo, kag nag-agda sia sing madamo. Kag . . . ginpakadto niya ang iya ulipon sa pagsiling sa mga inagda, ‘Kari kamo, kay ang tanan nahanda na.’ Apang tanan sila nagsugod sa pagpamalibad. Ang nahauna nagsiling sa iya, ‘Nakataba ako sing uma kag kinahanglan nga kadtuan ko kag tan-awon ini; ginapangabay ko sa imo, Pasayluhon mo ako.’ Kag ang isa nagsiling, ‘Nakabakal ako sing lima ka paris nga baka kag malakat ako sa pagtilaw sa ila; ginapangabay ko sa imo, Pasayluhon mo ako.’ Kag ang isa nagsiling, ‘Nakapangasawa ako busa indi ako makakadto.’ ”

Daw ano kanabaw nga mga balibad! Ang uma ukon hayop kinaandan nga ginatilawan antes ini ginabakal, gani wala gid sing kadagmit nga tan-awon ini pagkatapos. Sing kaanggid, ang pagpangasawa sang isa indi dapat magpugong sa iya gikan sa pagbaton sa sinang importante nga pangagda. Gani pagkabati sining mga balibad, ang agalon naakig kag nagsugo sa iya ulipon:

“ ‘Guwa ka sing dalidali sa mga dalan kag sa mga banas sang siudad kag dalha diri ang mga imol kag mga pingkaw kag mga bulag kag mga piang.’ Kag nagsiling ang ulipon, ‘Agalon, nahimo ang imo ginsugo, kag may duog pa.’ Kag ang agalon nagsiling sa ulipon, ‘Kadto ka sa mga dakung dalan kag sa mga hinabungan, kag pilita ang katawhan sa pagkari, agod nga mapuno ang akon balay.  . . . Wala sing isa sadtong mga tawo nga gin-agda nga makatilaw sang akon sinalusalo.’ ”

Ano bala nga kahimtangan ang ginalaragway sang ilustrasyon? Ti, “ang agalon” nga naghatag sing sinalusalo nagarepresentar kay Jehova nga Dios; “ang ulipon” nga nagpaalinton sing pangagda, kay Jesucristo; kag ang “dakung sinalusalo,” sa mga kahigayunan nga mangin yara sa linya para sa Ginharian sang mga langit.

Yadtong una sa pagbaton sa pangagda nga mangin yara sa linya para sa Ginharian amo, labaw sa tanan, ang Judiyong relihiosong mga lider sang adlaw ni Jesus. Apang, ginsikway nila ang pangagda. Busa, sugod labi na sang Pentecostes 33 C.⁠E., ang ikaduha nga pangagda ginpaalinton sa mga gintamay kag mga kubos sang Judiyong pungsod. Apang indi bastante ang nagbaton sa pagpuno sa 144,000 ka duog sa langitnon nga Ginharian sang Dios. Gani sang 36 C.⁠E., tatlo kag tunga ka tuig sang ulihi, ang ikatlo kag katapusan nga pangagda ginpaalinton sa disirkunsidado nga mga di-Judiyo, kag ang pagtipon sa ila nagapadayon tubtob sa aton adlaw. Lucas 14:​1-24.

▪ Anong leksion sang pagpaubos ang ginatudlo ni Jesus?

▪ Paano ang tagbalay makahatag sing sinalusalo nga dungganon sa Dios, kag ngaa nagahatag ini sa iya sing kalipay?

▪ Ngaa ang mga balibad sang gin-agda nga mga bisita manabaw?

▪ Ano ang ginarepresentar sang ilustrasyon ni Jesus nahanungod sa “dakung sinalusalo”?