Sin-o Gid ang Nagagahom sa Kalibutan?

Madamo nga tawo ang magasabat sa pamangkot sa ibabaw sa isa ka tinaga​—⁠ang Dios. Apang sing talalupangdon, ang Biblia wala nagasiling nga si Jesucristo ukon ang iya Amay amo ang matuod nga mga gumalahom sining kalibutan. Sa kabaliskaran, si Jesus nagsiling: “Ang punuan sini nga kalibutan subulon.” Kag nagdugang sia: “Nagapakari ang manuggahom sang kalibutan. Wala sia sing gahom sa akon.”​—⁠Juan 12:​31; 14:​30; 16:⁠11.

Gani ang gumalahom sini nga kalibutan nagapamatok kay Jesus. Sin-o ayhan ini?

Ideya Gikan sa mga Kahimtangan sa Kalibutan

Walay sapayan sang mga panikasog sang may maayo sing tinutuyo nga mga tawo, ang kalibutan nag-antos sing daku sa bug-os nga maragtas. Nagpalibog ini sa mahunahunaon nga mga tawo, kaangay kay anhing David Law­rence nga isa ka manunulat sang editoryal: “ ‘Paghidait sa duta’​—⁠halos tanan maluyag sini. ‘Maayo nga kabubut-on sa mga tawo’​—⁠halos tanan nga mga tawo sa kalibutan nagabatyag sini sa isa kag isa. Nian ano ang sayop? Ngaa ang inaway nagapamahog walay sapayan sang kinaugali nga mga handum sang katawhan?”

Makalilibog, indi bala? Bisan pa ang kinaugali nga handum sang katawhan amo ang magkabuhi sing malinong, kinaandan na nga nagadinumtanay kag nagapinatyanay sila sa isa kag isa​—⁠kag sing tuman gid kalain. Binagbinaga ang sobra nga pagkawalay balatyagon sa dimapatihan nga kapintas. Ang mga tawo nagagamit sing mga gas chamber, mga kampo konsentrasyon, mga flame­throw­er, napalm nga mga bomba, kag iban pa sobra kalain nga mga paagi sa pagpaantos kag walay kaluoy nga pagpatyanay sa isa kag isa.

Nagapati ka bala nga ang mga tawo, nga nagahandum sang paghidait kag kalipay, makahimo, sa ila kaugalingon, sinang daku nga kalainan sa iban? Anong mga puwersa ang nagatiklod sa mga tawo sa sinang makangilil-ad nga mga buhat ukon nagamaniobra sa ila sa mga kahimtangan diin nagabatyag sila nga napilitan sa paghimo sing malain? Napamangkot mo na ayhan kon bala ang pila ka malaut, dikitaon nga gahom nagaimpluwensia sa mga tawo sa paghimo sinang masingki nga mga buhat?

Ang mga Gumalahom sang Kalibutan Ginpakilala

Indi na kinahanglan nga magpakutpakot, kay ang Biblia maathag nga nagapakita nga isa ka intelihente, dikitaon nga persona ang nagakontrol sa mga tawo kag sa mga pungsod. Ini nagasiling: “Ang bug-os nga kalibutan yara sa gahom sang malauton.” Kag ginapakilala sia sang Biblia, nga nagasiling: “Ang ginatawag nga Yawa kag Satanas . . . nagadaya sang bug-os napuy-an nga duta.”​—⁠1 Juan 5:​19; Bugna 12:⁠9.

Sang isa ka okasyon sang si Jesus ‘ginsulay sang Yawa,’ wala ginpangduhaduhaan ni Jesus ang papel ni Satanas subong gumalahom sining kalibutan. Ang Biblia nagapaathag kon ano ang natabo: “Gindala sia sang Yawa sa isa ka bukid nga labing mataas, kag ginpakita sa iya ang tanan nga ginharian sa kalibutan kag ang ila himaya, kag nagsiling sia sa iya: ‘Tanan ini nga butang ihatag ko sa imo kon magyaub ka kag maghimo sing isa ka buhat sang pagsimba sa akon.’ Nian si Jesus nagsiling sa iya: ‘Palayo ka, Satanas!’ ”​—⁠Mateo 4:​1, 8-10.

Hunahunaa ini. Ginsulay ni Satanas si Jesus paagi sa pagtanyag sa iya sang “tanan nga ginharian sa kalibutan.” Apang, mangin daku gid bala nga pagsulay ang tanyag ni Satanas kon indi sia ang aktuwal nga gumalahom sining mga ginharian? Indi, indi ini mahimo. Kag talupangda, wala ginpanghiwala ni Jesus nga ining tanan nga kalibutanon nga mga panguluhan iya ni Satanas, nga ginhimo niya kuntani kon si Satanas wala sing gahom sa sini. Gani, nian, si Satanas nga Yawa amo gid ang dikitaon nga gumalahom sang kalibutan! Ang Biblia, sa katunayan, nagatawag sa iya nga “dios sining sistema sang mga butang.” (2 Corinto 4:4) Apang, paano ining malaut nga persona nakalab-ot sa sining gamhanan nga posisyon?

Ang isa nga nangin Satanas isa anay ka anghel nga gintuga sang Dios, apang nagkahisa sia sa posisyon sang Dios. Ginhangkat niya ang matarong nga pagginahom sang Dios. Sa sining katuyuan gingamit niya ang isa ka man-ug subong humalambal agod sulayon ang unang babayi, si Eva, kag gani nasulay niya sia kag ang iya bana, si Adan, sa pagtuman sang iya sugo sa baylo nga tumanon ang Dios. (Genesis 3:​1-6; 2 Corinto 11:3) Nagsiling man sia nga sarang niya mapatalikod gikan sa Dios ang tanan wala pa natawo nga mga anak ni Adan kag ni Eva. Gani ginhatagan sang Dios sing tion si Satanas nga tinguhaan nga pamatud-an ang iya ginasiling, apang si Satanas wala magmadinalag-on.​—⁠Job 1:​6-12; 2:​1-10.

Sing talalupangdon, si Satanas wala nagaisahanon sa iya paggahom sa kalibutan. Nahaylo niya ang iban pa nga mga anghel nga magbuylog sa iya sa pagrebelde batok sa Dios. Sila nangin mga demonyo, ang iya espirituhanon nga mga kakomplut. Ang Biblia nagapatuhoy sa ila sang naglaygay ini sa mga Cristiano: “Magtindog nga malig-on batok sa mga daya sang Yawa; kay kita magapakig-away, indi batok sa unod kag dugo, kundi . . . batok sa mga manugdumala sang kalibutan sining kadudulman, batok sa espirituhanon nga mga kabon sang kalautan sa langitnon nga mga duog.”​—⁠Efeso 6:​11, 12.

Batui ang Malauton nga mga Espiritu

Ining dikitaon, malauton nga mga gumalahom sang kalibutan determinado nga patalangon ang bug-os nga katawhan, patalikuron sila gikan sa pagsimba sa Dios. Ang isa ka paagi nga ginahimo ini sang malauton nga mga espiritu amo ang pagpauswag sang ideya sang padayon nga pagkabuhi sa tapos mapatay, bisan pa maathag nga ginapakita sang Pulong sang Dios nga ang patay wala sing hinalung-ong. (Genesis 2:​17; 3:​19; Ezequiel 18:​4; Salmo 146:3, 4; Manugwali 9:​5, 10) Busa, ang malauton nga espiritu, nga nagailog sang tingog sang isa nga napatay, mahimo magapakigsugilanon sa iya buhi nga mga himata ukon mga abyan, ayhan paagi sa isa ka palaagyan sang espiritu ukon paagi sa isa ka “tingog” gikan sa dikitaon nga duog. Ang “tingog” nagapakunokuno nga iya sang isa nga nagtaliwan, apang sa pagkamatuod iya ini sang isa ka demonyo!

Gani kon makabati ka gid man sina nga “tingog,” indi magpadaya. Sikwaya ang bisan ano nga ginasiling sini, kag iluga ang mga pinamulong ni Jesus: “Palayo ka, Satanas!” (Mateo 4:​10; Santiago 4:7) Indi pagtuguti ang pagkamausisaon tuhoy sa espirituhanon nga duog nga magasiod sa imo sa malauton nga mga espiritu. Ina nga pagkanasiod ginatawag nga espiritismo, kag ang Dios nagapaandam sa iya mga sumilimba batok sini sa iya tanan nga dagway. Ang Biblia nagatagudili kay “bisan sin-o nga nagagamit sing pagpamakot . . . ukon kay bisan sin-o nga nagakonsulta sa palaagyan sang espiritu ukon propesyonal nga manugpakot sang mga hitabo ukon manugpamangkot sa mga napatay.”​—⁠Deuteronomio 18:​10-12; Galacia 5:​19-21; Bugna 21:⁠8.

Sanglit ang espiritismo nagadala sa isa ka tawo sa idalom sang impluwensia sang mga demonyo, batui ang tanan sini nga mga buhat walay sapayan kon daw ano kasadya, ukon daw ano ka makakulunyag ini. Ining mga buhat nagalakip sang pagtan-aw sa bola nga kristal, paggamit sang Ouija boards, ESP, pagtan-aw sa mga badlit sang palad (panghimalad), kag astrolohiya. Ang mga demonyo nagahimo man sing mga gahud kag iban pa pisikal nga dikinaandan nga hitabo sa mga balay nga ginahimo nila nga ila teritoryo.

Dugang pa, ginahingalitan sang malauton nga mga espiritu ang makasasala nga huyog sang mga tawo paagi sa pagpauswag sang mga literatura, mga sine, kag mga programa sa telebisyon nga nagapakita sang imoral kag dikinaugali nga buhat sa sekso. Nakahibalo ang mga demonyo nga ang malain nga mga panghunahuna kon indi pagdulaon sa hunahuna magatuga sing dimapanas nga mga agi kag magadul-ong sa mga tawo sa paggawi sing imoral​—⁠kaangay sang mga demonyo mismo.​—⁠Genesis 6:​1, 2; 1 Tesalonica 4:​3-8; Judas 6.

Matuod, madamo ang mahimo magayaguta sa ideya nga ining kalibutan ginagahuman sang malauton nga mga espiritu. Apang ang ila dipagpati indi makakilibot, kay ang Biblia nagasiling: “Si Satanas nagapakamanugtunda sang kapawa.” (2 Corinto 11:14) Ang iya pinakatuso nga daya amo ang pagbulag sa madamo sa katunayan nga sia kag ang iya mga demonyo tunay nga nagaluntad. Apang indi magpadaya! Ang Yawa kag ang iya mga demonyo matuod, kag kinahanglan nga padayon mo sila batuan.​—⁠1 Pedro 5:​8, 9.

Sing makalilipay, malapit na karon ang tion nga si Satanas kag ang iya mga kabon mawala na! “Ang kalibutan [lakip ang iya demonyo nga mga gumalahom] nagataliwan,” pasalig sang Biblia, “apang ang nagahimo sang kabubut-on sang Dios nagapadayon sing dayon.” (1 Juan 2:17) Daw ano nga paumpaw nga inang impluwensia sang demonyo pagadulaon! Busa, kabay nga mangin isa kita sadtong nagahimo sang kabubut-on sang Dios kag nagaagom sang kabuhi nga dayon sa matarong nga bag-ong kalibutan sang Dios.​—⁠Salmo 37:​9-11, 29; 2 Pedro 3:​13; Bugna 21:​3, 4.

Matanyag bala ni Satanas kay Jesus ining tanan nga mga panguluhan sa kalibutan kon indi ini iya?

Luwas kon tuhay ang ginasambit, ang tanan nga mga ginbalikwat sa Kasulatan gikan sa New World Translation of the Holy Scriptures.

© 1992 Watch Tower Bible and Tract Society of Pennsylvania. Amon ang tanan nga kinamatarong sa pagbalhag.

T-22-HV Gin-imprinta sa Hapon