Kingdom News No. 34

Ngaa Ang Kabuhi Puno Gid sing mga Problema?

Posible bala ang wala sing problema nga paraiso?

ANG DALAGKU NGA MGA PROBLEMA LABI NGA NAGALALA—NGAA?

Ang mga tawo pirme may mga problema. Bisan pa madamo ang nagahunahuna nga malubad ini sang modernong teknolohiya, ang dalagku nga mga problema labi nga nagalala.

Krimen: Pila lamang ang nagabatyag nga walay peligro sa paglakat sa mga dalan ukon bisan sa pagpungko sa ila kaugalingon nga mga puluy-an. Sa isa ka pungsod sa Europa, halos 1 sa kada 3 ka tawo ang nabiktima sang krimen sining karon lang nga tuig.

Palibot: Ang polusyon sa hangin, duta, kag tubig labi kag labi nga nagalapnag. Sa imol nga mga pungsod, un-kuwarto sang mga tawo ang wala sing makuha nga matinlo nga tubig.

Kaimulon: Mas madamo karon ang imol kag ginagutom nga mga tawo. Kapin sa 90 porsiento sang mga tawo sa pila ka kadutaan ang nagakabuhi sa kaimulon; 30 porsiento sang mahimo magtrabaho sa kalibutan, mga 800 milyones, ang wala ukon kulang sing trabaho—kag nagadamo pa ini.

Gutom: Bisan pa may bastante nga kalan-on ikaw, ang nagadugang nga minilyon wala sing makaon. Sa tuman ka imol nga mga pungsod, kada tuig sa dimagkubos 13 milyones ka tawo, kalabanan mga bata, ang nagakapatay bangod sang mga epekto sang gutom.

Inaway: Ginatos ka libo ang napatay sa sining karon lang nga pag-inaway sang minoridad nga mga rasa. Kag sa ika-20 nga siglo, kapin sa isa ka gatos ka milyon ka tawo ang napatay sa mga inaway.

Iban Pa nga mga Problema: Idugang sa ibabaw, ang nagalala nga pagkalusod sang pamilya, ang dugang pa nga mga pinamataan, ang nagadugang nga pagkawalay puluy-an, ang lapnag nga pag-abuso sa droga, kag ang lapnag nga imoralidad. Ang isa anay ka katapo sang gabinete sang E.U. husto sa pagsiling: “Kadamo gid sing mga tanda sang . . . paglain sang sibilisasyon.” Sa sulod sining nagligad lang nga 30-ka-tuig nga panahon, ang populasyon sang E.U. nagdugang sing 41 porsiento, apang ang masingki nga krimen madasig nga nagdugang sing tubtob sa 560 porsiento, ang mga bastardo sing 400 porsiento, ang mga diborsio sing 300 porsiento, ang naghikog nga mga tin-edyer sing kapin sa 200 porsiento. Ang kahimtangan nagaanggid sa iban nga mga pungsod.

Ngaa Naglala ang mga Problema?

Ang aton Manunuga nagahatag sing sabat. Ginatawag sang Iya Pulong ining puno sing problema nga mga tion subong ang “katapusan nga mga adlaw,” ang panag-on nga ang “ital-ital nga mga tion nga mabudlay atubangon” magaabot. (2 Timoteo 3:1) Ang katapusan nga mga adlaw sang ano? Ti, ang Biblia nagapamulong tuhoy sa “katapusan sang kalibutan.”—Mateo 24:3, King James Version.

Ang nagadugang nga mga problema karon maathag nga pamatuod nga ang katapusan sining sistema malapit na, lakip ang katapusan sang kalautan kag sang mga may salabton sa sini. (Mateo 24:3-14; 2 Timoteo 3:1-5; Bugna 12:7-12) Sa dili madugay ang Dios magapasilabot kag pat-uron niya nga ang tanan nga mga problema karon malubad sing bug-os.—Jeremias 25:31-33; Bugna 19:11-21.

ANG MGA RELIHION SINING KALIBUTAN NAPASLAWAN

Sa baylo nga magbulig sa paglubad sa mga problema Karon, ginadugangan ini sang relihiosong mga sistema sining kalibutan. Sa tion sang mga inaway, ginapatay sang mga Katoliko ang mga Katoliko, ginapatay sang mga Protestante ang mga Protestante—sing minilyon. Sining karon lang sa Rwanda, diin Katoliko ang kalabanan, ginatos ka libo ang nagpinatyanay! (Tan-awa ang laragway sa wala.)

Magakadto bala si Jesus sa inaway nga may dala nga riple ukon talibong kag patyon ang iya mga disipulo bangod tuhay ang ila nasyonalidad sangsa iya? Pat-od nga indi! “Ang nagahigugma sa Dios,” siling sang Biblia, “dapat nga maghigugma man sa iya utod.” (1 Juan 4:20, 21) Ang mga relihion sining kalibutan napaslawan sa paghimo sina. “Ginapahayag nila sing dayag nga kilala nila ang Dios, apang ginapanghiwala nila sia paagi sa ila mga buhat.”—Tito 1:16.

Dugang pa, paagi sa indi pagsakdag sa mga talaksan sang Biblia sa moralidad, ang mga relihion sang kalibutan nagaamot sa makakulugmat nga pagkalusod sang moral sa bug-os nga duta.

Nagsiling si Jesus nga mahimo nimo makilala ang butig nga relihion gikan sa matuod nga relihion ‘paagi sa iya mga bunga’—paagi sa ginahimo sang iya mga katapo. Nagsiling man sia: “Ang tagsa ka kahoy nga wala nagapamunga sing maayo nga bunga ginapulod kag ginadap-ong sa kalayo.” (Mateo 7:15-20) Ang Pulong sang Dios nagalaygay sa aton nga magpalagyo gikan sa relihion nga nagapamunga sing malain nga bunga kag sa amo nagaatubang sing kalaglagan.—Bugna 18:4.

Ang Matuod nga Relihion Wala Mapaslawan

Ang matuod nga relihion “nagapamunga sing maayo nga bunga,” ilabi na sing gugma. (Mateo 7:17; Juan 13:34, 35) Anong nahiusa nga internasyonal nga paghiliutod sang mga Cristiano ang nagapakita sina nga gugma? Sin-o ang nagadumili sa pagpatay sang ila mga kaupod sa relihion ukon kay bisan sin-o?—1 Juan 3:10-12.

Ang mga Saksi ni Jehova may reputasyon nga nagapamunga sinang “maayo nga bunga.” Sa bug-os nga globo, sa kapin sa 230 ka kadutaan, ‘ginsalsal nila ang ila mga espada nga mga punta sang arado.’ (Isaias 2:4) Ang ila gugma para sa mga tawo ginapakita man paagi sa ila pagtuman sa sugo ni Cristo nga ibantala ang “maayong balita” sang Ginharian sang Dios sa bug-os nga kalibutan. (Mateo 24:14) Ginabuhat kag ginasakdag man nila ang mataas nga mga moral nga ginatudlo sa Biblia.—1 Corinto 6:9-11.

Ang matuod nga relihion wala mapaslawan. Ginatuytuyan sini ang mga tawo sa Isa lamang nga makasarang sa paglubad sang mga problema sang katawhan. Sa dili madugay paluntaron sinang Isa ang bug-os nga bag-ong kalibutan. Sin-o inang Isa? (Tan-awa palihug ang likod nga pahina.)

ANG PARAISO NGA WALA SING PROBLEMA ISA KA KAPAT-URAN

Kon mahimo mo, indi mo bala paglubaron ang tanan nga mga problema nga nagapalisod sa katawhan? Sa pagkamatuod himuon mo! Dapat bala kita maghunahuna nga ang aton mahigugmaon nga Manunuga, nga amo lamang ang may gahom kag kaalam sa paglubad sang mga problema sang tawo, indi maghimo sini?

Ginapakita sang Biblia nga ang Dios magapasilabot sa mga hilikuton sang tawo paagi sa iya langitnon nga panguluhan sa mga kamot ni Jesucristo. ‘Dugmukon’ sini ang garok nga mga panguluhan sa duta. (Daniel 2:44; Mateo 6:9, 10) Kag ngaa? Nagapakighambal sa Dios, ang salmista nagasabat: “Agod nga makilala nila nga ikaw lamang, nga ang ngalan amo si Jehova, amo ang Labing Mataas sa bug-os nga duta.”—Salmo 83:18.

Kon malaglag ining kalibutan, may mga makalampuwas bala? “Ang kalibutan nagataliwan,” siling sang Biblia, “apang sia nga nagahimo sang kabubut-on sang Dios magapabilin sa walay katubtuban.” (1 Juan 2:17) Diin magapuyo ining mga makalampuwas sa walay katubtuban? “Ang mga matarong magapanubli sang duta, kag magapuyo sila diri sa walay katubtuban,” ang sabat sang Biblia.—Salmo 37:9-11, 29; Hulubaton 2:21, 22.

Sa bag-ong kalibutan sang Dios, “wala na sing kamatayon, ukon kalisod ukon paghibi ukon kasakit pa.” (Bugna 21:4) Wala na sing krimen, kaimulon, gutom, balatian, kasubo, ukon kamatayon! Ti, bisan ang mga patay magakabuhi liwat! “May pagkabanhaw.” (Binuhatan 24:15) Kag ang duta mismo pagahimuon nga isa ka literal nga paraiso.—Isaias 35:1, 2; Lucas 23:43.

Ano ang dapat naton himuon agod mabuhi sa bag-ong kalibutan sang Dios? Si Jesus nagsiling: “Ini nagakahulugan sing kabuhi nga walay katapusan, ang pagkuha nila sing ihibalo nahanungod sa imo, ang lamang matuod nga Dios, kag nahanungod sa isa nga imo ginpadala, si Jesucristo.” (Juan 17:3) Minilyon ka bunayag sing tagipusuon nga mga tawo sa bug-os nga kalibutan ang nagakuha sina nga ihibalo. Nagabulig ini sa ila nga malandas ang ila madamong personal nga mga problema karon, apang sing labi ka importante, nagahatag ini sa ila sing bug-os nga pagsalig nga ang mga problema nga indi nila masarangan nga lubaron pagalubaron sing bug-os sa bag-ong kalibutan sang Dios.

[Picture Credit Line sa pahina 2]

Retrato sa WHO ni P. Almasy

[Picture Credit Line 3]

Jerden Bouman/Sipa Press