Kingdom News Num. 35

Magahigugmaanay Pa Ayhan ang Tanan nga Tawo?

Ang Gugma sa Isigkatawo Nagbugnaw

MINILYON ang desperado kag makaluluoy, nga wala sing makadtuan. Ang isa ka retirado na nga negosyante nga babayi nagsiling: ‘Sang isa ka gab-i ang isa ka balo nga babayi nga nagapuyo sa panalgan nga akon man ginapuy-an nanuktok sa akon ganhaan kag nagsiling nga masubo sia. Sing prangka apang sa maayong paagi ginsingganan ko sia nga masako ako. Nangayo sia sing pasaylo sa pagtublag sa akon kag dayon naglakat.’

Sing makapasubo, sadto gid nga gab-i, naghikog yadtong balo nga babayi. Pagkatapos sadto, ang negosyante nga babayi nagsiling nga nakatuon sia sing “leksion sa masakit nga paagi.”

Ang kakulang sing gugma sa isigkatawo masami nga makapasubo. Sang matabo ang pag-inaway sang mga tribo sa Bosnia kag Herzegovina, bahin anay sang Yugoslavia, kapin sa isa ka milyon ang napilitan sa pagpalagyo gikan sa ila mga puluy-an kag linibo ang ginpatay. Sin-o ang nagpatay? “Ang amon mga kaingod,” panganduhoy sang isa ka lin-ay nga gintabog gikan sa iya minuro. “Kilala namon sila.”

Sa Rwanda ginatos ka libo ka tawo ang ginpamatay, masami sang ila mga kaingod. “Ang mga Hutu kag mga Tutsi magkaupod anay nga [nagakabuhi], nagaasawahay, nga wala nagasapak ukon wala gani nakahibalo kon sin-o ang Hutu kag kon sin-o ang Tutsi,” report sang The New York Times. “Nian hinali nga nagbag-o ang kahimtangan,” kag “nagsugod ang pagpinatyanay.”

Sing kaanggid man, ang mga Judiyo kag mga Arabo sa Israel nagapuyo sa isa lamang ka duog, apang madamo sa ila ang nagadinumtanay. Amo man sini ang kahimtangan sa tunga sang madamo nga Katoliko kag Protestante sa Ireland kag sa tunga sang madamo pa nga tawo sa iban nga mga pungsod. Wala pa gid anay matabo sa maragtas nga ang kalibutan kulang sing gugma.

Ngaa Nagbugnaw ang Gugma sa Isigkatawo?

Ginahatag sang aton Manunuga ang sabat. Ginatawag sang iya Pulong, ang Biblia, ang tion nga nagakabuhi kita subong “ang katapusan nga mga adlaw.” Isa ini ka panahon nga, suno sa tagna sang Biblia, ang mga tawo “wala sing kinaugali nga gugma.” Tuhoy sa sining “makahalanguyos nga mga tion nga mabudlay pakigbagayan,” nga ginatawag man sa Kasulatan nga “katapusan sang sistema sang mga butang,” gintagna ni Jesucristo nga ang “gugma sang madamo magabugnaw.”—2 Timoteo 3:1-5; Mateo 24:3, 12.

Busa, ang kakulang sing gugma karon, bahin sang ebidensia nga nagakabuhi kita sa katapusan nga mga adlaw sining kalibutan. Sing makalilipay, nagakahulugan man ini nga ining kalibutan sang didiosnon nga katawhan buslan sa indi madugay sang isa ka matarong nga bag-ong kalibutan nga ginagamhan sang gugma.—Mateo 24:3-14; 2 Pedro 2:5; 3:7, 13.

Apang may rason gid bala kita sa pagpati nga posible ini nga pagbag-o—nga ang tanan nga tawo mahimo maghigugmaanay kag magpuyo sing tingob nga may paghidait sa isa kag isa?

Gugma sa Isigkatawo—Isa Ka Katunayan

“Sin-o gid ang akon isigkatawo?” amo ang pamangkot sang isa ka abogado sang unang siglo kay Jesus. Wala sing duhaduha nga ginpaabot niya si Jesus sa pagsiling, ‘Ang imo masigka-Judiyo.’ Apang sa isa ka sugilanon tuhoy sa mabinuligon nga Samaritano, ginpakita ni Jesus nga ang mga tawo gikan sa iban nga mga nasyonalidad aton man mga isigkatawo.—Lucas 10:29-37; Juan 4:7-9.

Ginpadaku ni Jesus nga, masunod sa gugma sa Dios, ang gugma sa isigkatawo amo dapat ang magtuytoy sa aton kabuhi. (Mateo 22:34-40) Apang may grupo bala sang mga tawo nga naghigugma gid sa ila mga isigkatawo? Ginhimo ini sang unang mga Cristiano! Nakilal-an sila sa ila gugma sa iban.—Juan 13:34, 35.

Kamusta naman sa karon? May nagapakita bala sing tulad-Cristo nga gugma? Ang Encyclopedia Canadiana nagsiling: “Ang hilikuton sang mga Saksi ni Jehova amo ang pagpanumbalik kag pagtukod liwat sa unang Cristianismo nga ginbuhat ni Jesus kag sang iya mga disipulo . . . Ang tanan mag-ululutod.”

Ano ang kahulugan sini? Nagakahulugan ini nga wala ginatugutan sang mga Saksi ni Jehova ang bisan ano—bisan ang kaliwatan, nasyonalidad, ukon tribo nga ginhalinan—nga magpahulag sa ila nga dumtan ang ila mga isigkatawo. Indi man sila magpatay kay bisan sin-o, bangod sa malaragwayon nga paagi ginsalsal na nila ang ila mga espada nga mga punta sang arado kag ang ila mga bangkaw nga mga galab nga inughagbas. (Isaias 2:4) Ang matuod, kilala ang mga Saksi nga may inisyatibo sa pagbulig sa ila mga isigkatawo.—Galacia 6:10.

Indi katingalahan nga ang isa ka editoryal sa Sacramento Union sang California nagsiling: “Tuman na ang ihambal nga kon ang bug-os nga kalibutan nagasunod sa pagtuluuhan sang mga Saksi ni Jehova wala na kuntani sing pagpaagay sing dugo kag pagdinumtanay, kag magahari ang gugma.” Ang isa ka manunulat sa Ring nga magasin sa Hungary nagsiling: “Nakadangat ako sa paghinakop nga kon ang mga Saksi ni Jehova amo lamang ang mga pumuluyo sa duta, madula na ang inaway, kag ang lamang nga katungdanan sang mga pulis amo ang pagkontrol sa trapiko kag paghatag sing mga pasaporte.”

Apang ang matuod, isa ka daku, bug-os kalibutan nga pagbag-o ang kinahanglanon agod ang tanan nga tawo maghigugmaanay. Paano matabo ini nga pagbag-o? (Tan-awa palihug ang likod nga pahina.)

Ang Tion nga ang Tanan nga Tawo Magahigugmaanay

Ginapakita sang pangamuyo nga gintudlo ni Jesucristo nga malapit na ang isa ka daku nga pagbag-o. Sa iya bantog nga Wali sa Bukid, gintudluan kita ni Jesus nga mangamuyo: “Magkari ang imo ginharian. Paghimuon ang imo kabubut-on sa duta, subong sang sa langit.”—Mateo 6:10, King James Version.

Ano ang Ginharian sang Dios? Isa ini ka matuod nga panguluhan, nga magagahom sa langit. Amo kon ngaa ginatawag ini nga “ginharian sang mga langit.” Si Jesus, ang “Prinsipe sang Paghidait,” amo ang gintangdo sang iya Amay nga mangin manuggahom sa sini.—Mateo 10:7; Isaias 9:6, 7; Salmo 72:1-8.

Kon mag-abot na ang Ginharian sang Dios, ano ang matabo sa sining puno sing dumot nga kalibutan? ‘Dugmukon kag papason sang ginharian’ ang tanan malaut nga mga panguluhan sining kalibutan. (Daniel 2:44) Ang Biblia nagapaathag: “Ang kalibutan nagataliwan . . . , apang sia nga nagahimo sang kabubut-on sang Dios nagapabilin sing dayon.”—1 Juan 2:17.

Tuhoy sa bag-ong kalibutan sang Dios, ang Biblia nagasiling: “Ang mga matarong magapanag-iya sang duta, kag magapuyo sa sini sing dayon.” (Salmo 37:9-11, 29; Hulubaton 2:21, 22) Mangin matahom gid ini nga tion! “Wala na sing kamatayon, ukon kalisod ukon paghibi ukon kasakit pa.” (Bugna 21:4) Bisan gani ang mga patay mabuhi liwat, kag ang bug-os nga duta himuon nga isa ka literal nga paraiso.—Isaias 11:6-9; 35:1, 2; Lucas 23:43; Binuhatan 24:15.

Agod makapuyo sa bag-ong kalibutan sang Dios, dapat kita maghigugmaanay, subong amo ang ginapahimo sa aton sang Dios. (1 Tesalonica 4:9) Ang isa ka taga-Sidlangan nga nagatuon sing Biblia nagsiling: “Ginapaabot ko ang tion nga, suno sa ginasaad sang Biblia, ang tanan nga tawo nakatuon na sa paghigugmaanay.” Kag mapat-od naton nga tumanon gid sang Dios ang iya mga saad! “Napamulong ko ini,” siling niya, “himuon ko man ini.”—Isaias 46:11.

Apang agod maagom ang mga pagpakamaayo sa idalom sang Ginharian sang Dios, dapat ikaw makatigayon sing ihibalo sa Biblia, subong sang ginahimo sang minilyon ka bunayag sing tagipusuon nga mga tawo sa bug-os nga kalibutan. (Juan 17:3) Makabulig sa imo ang 32-pahina nga brosyur nga Ano ang Ginapatuman sang Dios sa Aton? Agod makatigayon sing isa ka kopya sini, sulati ang kupon sa nauna nga pahina kag ipadala ini sa direksion nga pinakamalapit sa inyo puluy-an.

□ Luyag ko makabaton sing brosyur nga Ano ang Ginapatuman sang Dios sa Aton?

□ Pakigkitai ako palihug para sa isa ka wala sing bayad nga pagtuon sa Biblia.

[Picture Credit Line sa pahina 2]

Sniper kag lubong sa Bosnia: Reuters/Corbis-Bettmann