Kapitulo Singko
Ginapakahuy-an ni Jehova ang mga Matinaastaason
1, 2. Ngaa interesado kita sa matagnaon nga mensahe ni Isaias sa mga Judiyo sang panahon niya?
SA KAUGOT sa kahimtangan sang Jerusalem kag Juda, nagliso karon si manalagna Isaias kay Jehova nga Dios kag nagsiling: “Ginbayaan mo ang imo katawhan, ang panimalay ni Jacob.” (Isaias 2:6a) Ano ang nagpaakig sa Dios nga ginsikway niya ang katawhan nga iya mismo ginpili subong iya “pinasahi nga propiedad”?—Deuteronomio 14:2.
2 Interesado gid kita sa pagpakamalaut ni Isaias sa mga Judiyo sang panahon niya. Ngaa? Bangod ang kahimtangan sang Cristiandad karon pareho gid sa kahimtangan sadto sang katawhan ni Isaias, kag gani amo man ang paghukom nga ginbungat ni Jehova. Ang pagtalupangod sa ginsiling ni Isaias magahatag sa aton sing maathag nga paghangop sa kon ano ang ginapakamalaut sang Dios kag magabulig sa aton sa paglikaw sa mga buhat nga wala niya ginakahamut-an. Gani, upod ang daku nga kalangkag, binagbinagon naton ang matagnaon nga pulong ni Jehova nga narekord sa Isaias 2:6–4:1.
Sa Pagkabugalon Nagyaub Sila
3. Ano nga sala sang iya katawhan ang gintu-ad ni Isaias?
3 Sa pagtu-ad sang sala sang iya katawhan, si Isaias nagsiling: “Napuno sila sing mga butang nga gikan sa Sidlangan, kag mga madyikero sila kaangay sang mga Filistinhon, kag madamo sila sing mga anak sang mga dumuluong.” (Isaias 2:6b) Mga 800 ka tuig antes sini, ginsugo ni Jehova ang iya pinili nga katawhan: “Dili kamo magpadagta paagi sa bisan ano sining mga butang [nga paagi sa sini] ang mga pungsod nga tabugon ko gikan sa inyo atubangan nagdagta sang ila kaugalingon.” (Levitico 18:24) Tuhoy sa ila nga iya ginpili subong pinasahi nga propiedad, ginpilit ni Jehova si Balaam sa pagsiling: “Gikan sa putukputukan sang mga igang makita ko sila, kag gikan sa kabakuluran ginatan-aw ko sila. Didto subong isa ka katawhan nagapuyo sila nga napain, kag wala nila ginaisip ang ila kaugalingon sa tunga sang mga pungsod.” (Numeros 23:9, 12) Apang, sang panahon ni Isaias ginsunod sang mga pinili ni Jehova ang makangilil-ad nga mga buhat sang mga pungsod sa palibot nila kag “napuno sila sing mga butang nga gikan sa Sidlangan.” Sa baylo nga magtuo kay Jehova kag sa iya pulong, nagahimo sila sing ‘madyik kaangay sang mga Filistinhon.’ Sa baylo nga magpain sa mga pungsod, “madamo” sa duta ang “mga anak sang mga dumuluong”—walay duhaduha, mga dumuluong nga nagtudlo sing didiosnon nga mga buhat sa katawhan sang Dios.
4. Sa baylo nga pasalamatan nila si Jehova, ano ang nangin epekto sang mga manggad kag kusog militar sa mga Judiyo?
4 Nakita ang kahamungaya sa ekonomiya kag ang kusog militar sang Juda sa idalom ni Hari Uzzias, si Isaias nagsiling: “Ang ila duta puno sing pilak kag bulawan, kag wala sing latid ang ila mga bahandi. Kag ang ila duta puno sing mga kabayo, kag wala sing latid ang ila mga kangga.” (Isaias 2:7) Ginapasalamatan bala sang katawhan si Jehova bangod sini nga manggad kag kusog militar? (2 Cronica 26:1, 6-15) Wala gid! Sa baylo, ginpahamtang nila ang ila pagsalig sa manggad mismo kag nagtalikod sa Ginhalinan sini, si Jehova nga Dios. Ang resulta? “Ang ila duta puno sang walay pulos nga mga dios. Ginayaub nila ang binuhatan sang mga kamot sang isa, ina nga ginhimo sang iya mga tudlo. Kag ang dutan-on nga tawo nagayaub, kag ang tawo nangin manubo, kag indi mo gid sila mapatawad.” (Isaias 2:8, 9) Ginliso nila ang ila nawong gikan sa buhi nga Dios kag nagyaub sa walay kabuhi nga mga idolo.
5. Ngaa ang pagyaub sa mga idolo indi isa ka buhat sang pagkamapainubuson?
5 Ang pagyaub mahimo mangin isa ka tanda sang pagkamapainubuson. Apang ang pagyaub sa walay kabuhi nga mga butang walay pulos, nagahimo sa sumilimba sa idolo nga “manubo,” malaut. Paano mapatawad ni Jehova ini nga sala? Ano ang himuon sining mga sumilimba sa idolo kon makighusay sa ila si Jehova?
‘Ang Matinaastaason nga mga Mata Paubson’
6, 7. (a) Ano ang matabo sa mga matinaastaason sa adlaw sang paghukom ni Jehova? (b) Sa ano kag kay sin-o ipabutyag ni Jehova ang iya kaakig, kag ngaa?
6 Nagpadayon si Isaias: “Sulod ka sa igang kag panago ka sa yab-ok bangod sang kakugmat kay Jehova, kag gikan sa iya mahimayaon nga pagkalabaw.” (Isaias 2:10) Apang wala sing igang nga bastante ang kadakuon agod amligan sila, wala sing tabon nga bastante ang kadamulon agod itago sila, gikan kay Jehova, ang Labing Gamhanan. Kon mag-abot sia agod maghukom, “ang matinaastaason nga mga mata sang dutan-on nga tawo paubson, kag ang pagkapalabilabihon sang mga tawo panubuon; kag si Jehova lamang ang pakataason sa amo nga adlaw.”—Isaias 2:11.
7 ‘Ang adlaw ni Jehova sang mga kasuldadusan’ magaabot. Mangin tion ini agod ipabutyag sang Dios ang iya kaakig “sa tanan nga sedro sang Libano nga daku kag mataas kag sa tanan nga dalagku nga kahoy sang Basan; kag sa tanan nga mataas nga kabukiran kag sa tanan nga kabakuluran nga mataas; kag sa tagsa ka torre nga mataas kag sa tagsa ka pader nga napamakuran; kag sa tanan nga barko sang Tarsis kag sa tanan nga matahom nga mga sakayan.” (Isaias 2:12-16) Huo, ang tagsa ka organisasyon nga gintukod sang tawo subong simbulo sang iya bugal kag ang tagsa ka di-diosnon nga indibiduwal pagahatagan sing igtalupangod sa adlaw sang kasingkal ni Jehova. Sa amo, “ang pagkamatinaastaason sang dutan-on nga tawo paubson, kag ang pagkapalabilabihon sang mga tawo panubuon; kag si Jehova lamang ang pakataason sa amo nga adlaw.”—Isaias 2:17.
8. Paano ang gintagna nga adlaw sang paghukom nag-abot sa Jerusalem sang 607 B.C.E.?
8 Ang gintagna nga adlaw sang paghukom nag-abot sa mga Judiyo sang 607 B.C.E. sang ginlaglag ni Hari Nabocodonosor sang Babilonia ang Jerusalem. Nakita sang mga pumuluyo ang ila hinigugma nga siudad nga nasunog, ang matahom nga mga tinukod sini naguba, ang daku nga pader sini narumpag. Ang templo ni Jehova nadugmok. Nangin wala sing kabilinggan ang ila mga bahandi ukon ang ila mga kangga ‘sang adlaw ni Jehova sang mga kasuldadusan.’ Kag ang ila mga idolo? Natabo gid ang gintagna ni Isaias: “Ang walay pulos nga mga dios magataliwan sing bug-os.” (Isaias 2:18) Ang mga Judiyo—mga prinsipe kag pati ang gamhanan nga mga tawo—gindala nga bihag sa Babilonia. Ang Jerusalem nahapay sing 70 ka tuig.
9. Sa anong paagi ang kahimtangan sang Cristiandad pareho sa kahimtangan sang Jerusalem kag sang Juda sang panahon ni Isaias?
9 Ang kahimtangan sang Cristiandad pareho gid sa kahimtangan sang Jerusalem kag sang Juda sang panahon ni Isaias! Nakigsuod gid ang Cristiandad sa mga pungsod sining kalibutan. Isa sia ka mapagsik nga sumalakdag sang Nasyones Unidas kag ginpuno niya ang iya balay sing mga idolo kag di-makasulatanhon nga mga buhat. Ang iya mga sumulunod materyalistiko kag nagasalig sa kusog militar. Kag wala bala nila ginatamod ang ila mga klero subong takus sa daku nga ngalan, ginahatagan sila sing mga titulo kag mga kadungganan? Ang pagpalabilabi sang Cristiandad pat-od nga madula. Apang san-o?
Ang Nagahilapit nga “Adlaw ni Jehova”
10. Ano nga “adlaw ni Jehova” ang ginapatuhuyan ni apostol Pablo kag ni apostol Pedro?
10 Ginapatuhuyan sang Kasulatan ang “adlaw ni Jehova” nga mangin mas talalupangdon sangsa adlaw sang paghukom sa dumaan nga Jerusalem kag Juda. Sa idalom sang inspirasyon, gin-angot ni apostol Pablo ang nagapakari nga “adlaw ni Jehova” sa presensia sang nagalingkod sa trono nga si Hari Jesucristo. (2 Tesalonica 2:1, 2) Ginsambit ni Pedro ina nga adlaw may kaangtanan sa pagtukod sing ‘bag-ong mga langit kag bag-ong duta diin magapuyo ang pagkamatarong.’ (2 Pedro 3:10-13) Amo ina ang adlaw nga hukman ni Jehova ang bug-os nga malaut nga sistema sang mga butang, lakip ang Cristiandad.
11. (a) Sin-o ang “makaagwanta” sa nagapakari nga “adlaw ni Jehova”? (b) Paano naton mahimo si Jehova nga aton dalangpan?
11 “Kailo sang adlaw,” siling ni manalagna Joel, “bangod ang adlaw ni Jehova malapit na, kag kaangay sang pagpang-ati gikan sa Isa nga Labing Gamhanan ini magaabot!” Bangod sang kalapit sina nga “adlaw,” indi bala dapat mabalaka ang tagsatagsa sa iya kalig-unan sa tion sining makahaladlok nga tion? “Sin-o ang makaagwanta sini?” pamangkot ni Joel. Sia nagsabat: “Si Jehova mangin dalangpan para sa iya katawhan.” (Joel 1:15; 2:11; 3:16) Mangin dalangpan bala si Jehova nga Dios para sa ila nga may matinaastaason nga espiritu kag nagapahamtang sang ila pagsalig sa kamanggaran, kusog militar, kag sa hinimo sang tawo nga mga dios? Indi mahimo! Ginbiyaan gani sang Dios ang iya pinili nga katawhan sang ginhimo nila ini. Daw ano ka importante nga ‘pangitaon [sang tanan nga alagad sang Dios] ang pagkamatarong, pangitaon ang pagkahagop,’ kag usisaon sing maayo kon ano ang bahin sang pagsimba kay Jehova sa ila kabuhi!—Sofonias 2:2, 3.
“Sa Musaranya kag sa mga Kabog”
12, 13. Ngaa nagakaigo nga ihaboy sang mga sumilimba sa idolo ang ila mga dios “sa musaranya kag sa mga kabog” sa adlaw ni Jehova?
12 Paano tamdon sang mga sumilimba sa idolo ang ila mga idolo sa tion sang daku nga adlaw ni Jehova? Si Isaias nagsabat: “Ang katawhan magasulod sa mga gikab sang mga igang kag sa mga buho sa yab-ok bangod sang kakugmat kay Jehova kag gikan sa iya mahimayaon nga pagkalabaw, kon magtindog sia agod mag-uyog ang duta. Sa amo nga adlaw ihaboy sang dutan-on nga tawo ang iya walay pulos nga mga dios nga pilak kag ang iya walay pulos nga mga dios nga bulawan . . . sa musaranya kag sa mga kabog, agod magsulod sa mga buho sang mga igang kag sa mga litik sang gasanggasang nga mga igang, bangod sang kakugmat kay Jehova kag gikan sa iya mahimayaon nga pagkalabaw, kon magtindog sia agod mag-uyog ang duta. Para sa inyo kaugalingon nga kaayuhan, layui ninyo ang dutan-on nga tawo, nga ang iya ginhawa yara sa mga buho sang iya ilong, kay ano ang sadsaran nga hatagan sia sing kabilinggan?”—Isaias 2:19-22.
13 Ang musaranya nagaistar sa mga buho sang duta, kag ang mga kabog nagahulon sa mga lungib nga madulom kag wala ginasayuhan sang tawo. Dugang pa, kon madamo nga kabog ang maghulon sa isa ka duog, nagapangsot ang baho kag nagahantal ang mga tinumpok nga guano. Nagakaigo nga ihaboy ang mga idolo sa sini nga mga duog. Takus gid ini sa isa ka duog nga madulom kag mahigko. Kon tuhoy sa katawhan, mangita sila sing dalangpan sa mga lungib kag mga gikab sa igang sa adlaw sang paghukom ni Jehova. Gani mangin pareho ang madangatan sang mga idolo kag sang ila mga sumilimba. Subong sang gintagna ni Isaias, wala maluwas sang walay kabuhi nga mga idolo ang ila mga sumilimba ukon ang Jerusalem gikan sa mga kamot ni Nabocodonosor sang 607 B.C.E.
14. Sa tion sang nagapakari nga adlaw sang paghukom ni Jehova sa bug-os kalibutan nga emperyo sang butig nga relihion, ano ang himuon sang kalibutanon sing panghunahuna nga mga tawo?
14 Sa tion sang nagapakari nga adlaw sang paghukom ni Jehova sa Cristiandad kag sa iban nga mga bahin sang bug-os kalibutan nga emperyo sang butig nga relihion, ano ang himuon sang katawhan? Bangod sang nagalain nga mga kahimtangan sa bug-os nga duta, mahimo gid nga marealisar sang kalabanan nga ang ila mga idolo wala sing pulos. Sa baylo sini, mahimo nga mangita sila sing dalangpan kag pangamlig sa indi espirituwal, dutan-on nga mga organisasyon, ayhan lakip ang Nasyones Unidas, ang “duag-eskarlata nga sapat nga mapintas” sang Bugna kapitulo 17. Ang “napulo ka sungay” sining simbuliko nga sapat nga mapintas amo ang magalaglag sang Babilonia nga Daku, ang bug-os kalibutan nga emperyo sang butig nga relihion, nga ang talalupangdon nga bahin sini amo ang Cristiandad.—Bugna 17:3, 8-12, 16, 17.
15. Paano si Jehova lamang ang “pakataason” sa iya adlaw sang paghukom?
15 Bisan pa ang paghapay kag pagsunog sa Babilonia nga Daku mahimo nga direkta nga pahikot sang simbuliko nga napulo ka sungay, sa kamatuoran, amo ini ang paghukom ni Jehova. Tuhoy sa Babilonia nga Daku, ang Bugna 18:8 nagasiling: “Amo kon ngaa sa isa ka adlaw magaabot ang iya mga kalalat-an, kamatayon kag pagkalisod kag gutom, kag sunugon sia sing bug-os sa kalayo, kay si Jehova nga Dios, nga nagahukom sa iya, makusog.” Gani, ang padunggan sa paghilway sa katawhan gikan sa paggahom sang butig nga relihion amo si Jehova nga Dios, ang Labing Gamhanan. Subong sang ginsiling ni Isaias, “si Jehova lamang ang pakataason sa amo nga adlaw. Kay adlaw ina ni Jehova sang mga kasuldadusan.”—Isaias 2:11b, 12a.
‘Nagadalangdalang Kamo Bangod Sang mga Lider’
16. (a) Ano ang ‘sakdag kag tukod’ sang katilingban sang tawo? (b) Paano ang katawhan ni Isaias magaantos bangod sang pagdula sa ‘sakdag kag tukod’ sang ila katilingban?
16 Agod mangin mabakod ang katilingban sang tawo, dapat ini may ‘sakdag kag tukod’—mga kinahanglanon subong sang pagkaon kag tubig kag, kapin ka importante, masaligan nga mga lider nga may ikasarang sa pagtuytoy sa katawhan kag sa paghupot sang kahim-ong sa katilingban. Apang, tuhoy sa dumaan nga Israel, si Isaias nagtagna: “Yari karon! ang matuod nga Ginuo, si Jehova sang mga kasuldadusan, nagakuha gikan sa Jerusalem kag gikan sa Juda sang sakdag kag sang tukod, sang bug-os nga sakdag nga tinapay kag sang bug-os nga sakdag nga tubig, sang gamhanan nga tawo kag hangaway, sang hukom kag manalagna, kag sang manugpakot kag tigulang nga lalaki, sang pangulo sang kalim-an kag talahuron gid nga tawo kag manuglaygay kag lantip sa salamangka, kag sang sampaton nga engkantador.” (Isaias 3:1-3) Mga bata lamang ang mangin prinsipe kag magagahom sing di-makatarunganon.Indi lamang piguson sang mga manuggahom ang katawhan kundi “ang katawhan magapigos sa isa kag isa . . . Sila magasalakay, ang bata nga lalaki batok sa tigulang nga lalaki, kag ang ginakabig nga kubos batok sa isa nga dapat padunggan.” (Isaias 3:4, 5) Ang mga kabataan “magasalakay” sa mga tigulang sa ila, wala sing pagtahod sa ila. Maganubo gid ang kahimtangan sang kabuhi amo kon ngaa ang isa magasiling sa isa pa nga wala sing kalipikasyon sa paggahom: “May kunop ka. Ikaw ang dapat mangin diktador sa amon, kag ining mga napukan dapat mapaidalom sa imo kamot.” (Isaias 3:6) Apang ang mga agdahon mangindi, nagainsister nga wala sila sing ikasarang sa pagbulong sa napilasan nga duta ukon wala sila sing manggad sa pag-uyat sing salabton. Sila magasiling: “Indi ako mangin manugbulong sang pilas; kag sa akon balay wala sing tinapay ukon kunop. Indi ninyo dapat himuon ako nga diktador sa katawhan.”—Isaias 3:7.
17. (a) Sa anong kahulugan ang sala sang Jerusalem kag sang Juda “subong sang sa Sodoma”? (b) Sin-o ang ginabasol ni Isaias sa sala sang iya katawhan?
17 Si Isaias nagpadayon: “Ang Jerusalem natumba, kag ang Juda napukan, kay ang ila dila kag ang ila mga pagpakig-angot batok kay Jehova, sa paggawi sing rebelyuso sa mga mata sang iya himaya. Ang hitsura mismo sang ila mga nawong nagasaksi gid batok sa ila, kag ginapadayag sini ang ila sala nga subong sang sa Sodoma. Wala nila ini ginatago. Kailo sa ila kalag! Kay nagdala sila sa ila kaugalingon sing kahalitan.” (Isaiah 3:8, 9) Ang katawhan sang Dios nagrebelde sa matuod nga Dios sa mga pulong kag sa mga buhat. Bisan gani ang wala mahuya kag di-mahinulsulon nga mga hitsura sang ila mga nawong nagapadayag sang ila mga sala, nga subong ka makangilil-ad sa sala sang Sodoma. Nakigkatipan sila kay Jehova nga Dios, apang indi niya pagbag-uhon ang iya mga talaksan para sa ila. “Magmaayo ang matarong, kay kaunon nila ang bunga mismo sang ila mga pagpakig-angot. Kailo sa malauton!—Kahalitan; kay ang ginhimo sang iya kaugalingon nga mga kamot himuon sa iya! Kon tuhoy sa akon katawhan, ang mga manughatag sing buluhaton sini nagapakig-angot nga may kapintas, kag mga babayi lamang ang nagagahom sa sini. O katawhan ko, ginapatalang ka sang mga nagatuytoy sa imo, kag ginapagumon nila ang dalanon sang imo mga banas.”—Isaias 3:10-12.
18. (a) Ano ang paghukom ni Jehova sa mga tigulang kag sa mga prinsipe sang panahon ni Isaias? (b) Ano nga leksion ang matun-an naton gikan sa paghukom ni Jehova sa mga tigulang kag sa mga prinsipe?
18 Sa mga tigulang kag sa mga prinsipe sa Juda, si Jehova ‘naghatag sing pamatbat’ kag ‘naghukom’: “Ginsunog ninyo ang ulubasan. Ang kinawat sa nagaantos yara sa inyo mga balay. Ano ang buot ninyo silingon nga ginadugmok ninyo ang akon katawhan, kag ginaligis ninyo ang mga nawong mismo sang mga nagaantos?” (Isaias 3:13-15) Sa baylo nga magpangabudlay para sa kaayuhan sang katawhan, ang mga lider naghimo sing malimbungon nga mga buhat. Nag-abuso sila sa ila awtoridad paagi sa pagpamanggad sang ila kaugalingon kag pagdingot sa mga imol kag mga kubos. Apang dapat manabat ining mga lider kay Jehova sang mga kasuldadusan bangod sang ila pagpigos sa mga nagaantos. Daw ano ini nga paandam sa mga nagauyat sing responsable nga mga posisyon karon! Kabay nga maghalong gid sila nga indi mag-abuso sa ila awtoridad.
19. Ano nga pagpamigos kag paghingabot ang sala sang Cristiandad?
19 Ang Cristiandad—labi na ang iya mga klero kag mga kadalagkuan—madaya nga nagkuha sing madamo nga butang nga ila sang kinaandan nga mga tawo, nga iya ginpigos kag ginapigos gihapon. Iya man ginsakit, ginhingabot, kag ginpintasan ang katawhan sang Dios kag nagdala sing daku nga kahuy-anan sa ngalan ni Jehova. Sa iya sibu nga tion, pat-od nga hukman sia ni Jehova.
“Isa ka Pat-in sa Baylo Sang Katahom”
20. Ngaa ginpakamalaut ni Jehova “ang mga anak nga babayi sang Sion”?
20 Sa tapos mapakamalaut ang mga sala sang mga lider, ginpakamalaut naman ni Jehova ang mga babayi sang Sion, ukon Jerusalem. Ayhan subong uso, “ang mga anak nga babayi sang Sion” nagatakod sing “mga kadena sa tiil”—mga pulseras nga ginatakod sa ila mga bukobuko—nga nagakilingkiling. Ginaikit sang mga babayi ang ila paglakat kag nagalakat nga “daw nagatihin,” nga mahimo ginatun-an ang ginakabig nga elegante nga paglakat sang isa ka babayi. Ano gid ang malain sa sini? Amo ang panimuot sining mga babayi. Si Jehova nagsiling: “Ang mga anak nga babayi sang Sion nagmatinaastaason kag nagalakat sila nga nagatiskog ang ila mga liog kag ginatulok ang ila mga mata sing mahayluhon.” (Isaias 3:16) Ini nga pagkamatinaastaason indi makaluwas sa silot.
21. Ano ang epekto sang paghukom ni Jehova sa Jerusalem sa Judiyong mga babayi?
21 Gani, kon mag-abot ang paghukom ni Jehova sa duta, madula sining matinaastaason nga “mga anak nga babayi sang Sion” ang tanan nga butang—bisan ang katahom nga ila gid ginapabugal. Si Jehova nagtagna: “Himuon man ni Jehova nga magkugankugan ang alimpudwan sang ulo sang mga anak nga babayi sang Sion, kag ipadayag ni Jehova ang ila mismo agtang. Sa amo nga adlaw kuhaon ni Jehova ang katahom sang mga pulseras sa tiil kag sang mga higot sa ulo kag sang korte-bulan nga mga puni, ang mga pakabit sa dulunggan kag ang mga pulseras kag ang mga takurong, ang mga gura kag ang mga kadena sa tiil kag ang mga wagkus sa dughan kag ang ‘mga balay sang kalag’ [ayhan mga suludlan sang pahumot] kag ang mga puni nga nagahugong nga pakinhason [ukon, mga anting-anting], ang mga singsing sa tudlo kag ang mga singsing sa ilong, ang halangdon nga malaba nga mga panapton kag ang mga pang-ibabaw nga tunika kag ang mga kunop kag ang mga puyopuyo.” (Isaias 3:17-22; tan-awa ang mga footnote.) Daw ano ka makapasubo nga pagbaliskad sang kahimtangan!
22. Luwas sa ila mga puni, ano pa ang nadula sang mga babayi sang Jerusalem?
22 Ang matagnaon nga mensahe nagpadayon sa pagsiling: “Sa baylo sang lana sang balsamo amo lamang ang malang-og nga baho; kag sa baylo sang paha, lubid; kag sa baylo sang artistiko nga husay sang buhok, pagkaupaw; sa baylo sang isa ka malahalon nga panapton, pagwagkus sing tela nga sako; isa ka pat-in sa baylo sang katahom.” (Isaias 3:24) Sang 607 B.C.E., ang bugalon nga mga babayi sang Jerusalem nag-imol. Nadula nila ang ila kahilwayan kag nakabaton sing “pat-in” sang pagkaulipon.
“Sia Bug-os nga Haw-asan”
23. Ano ang ginsiling ni Jehova tuhoy sa Jerusalem?
23 Nagapatuhoy karon sa siudad sang Jerusalem, si Jehova nagsiling: “Ang imo mga lalaki magakapukan paagi sa espada, kag ang imo pagkagamhanan paagi sa inaway. Kag ang iya mga gawang magalalaw kag magakalisod, kag sia bug-os nga haw-asan. Magalingkod sia sa duta mismo.” (Isaias 3:25, 26) Ang mga lalaki sang Jerusalem, bisan ang iya mga gamhanan, mapatay sa inaway. Ang siudad pagahapayon. Para sa “iya mga gawang,” mangin tion ini sang ‘paglalaw kag pagkalisod.’ Ang Jerusalem ‘pagahaw-asan’ kag mahapay.
24. Anong daku nga pagbag-o ang gintuga sang pagkadula sang mga lalaki paagi sa espada para sa mga babayi sang Jerusalem?
24 Ang pagkadula sang mga lalaki paagi sa espada magatuga sing daku nga pagbag-o para sa mga babayi sang Jerusalem. Sa paghinakop sini nga bahin sang iya matagnaon nga tulun-an, si Isaias nagtagna: “Pito ka babayi ang magabuyot sa isa ka lalaki sa amo nga adlaw, nga nagasiling: ‘Magakaon kami sang amon kaugalingon nga tinapay kag magasul-ob sang amon kaugalingon nga kunop; lamang tawgon kami sa imo ngalan agod madula ang amon kahuluy-an.’” (Isaias 4:1) Ang kakulang sing palamanhon mangin daku gid amo kon ngaa pila ka babayi ang magaupod sa isa ka lalaki agod matawag sa iya ngalan—buot silingon, agod makilala sa publiko subong iya mga asawa—sa amo malikawan nila ang kahuluy-an nga wala sila sing bana. Ginpatuman sang Mosaikong Kasuguan nga mag-aman ang bana sing pagkaon kag panapton para sa iya asawa. (Exodo 21:10) Apang, bangod nakigsugot sila nga ‘magkaon sang ila kaugalingon nga tinapay kag magsul-ob sang ila kaugalingon nga kunop,’ handa ining mga babayi nga hilwayon ang lalaki gikan sa iya legal nga mga obligasyon. Daw ano ka masubo gid nga kahimtangan para sa “mga anak nga babayi sang Sion” nga matinaastaason anay!
25. Ano ang nagahilapit para sa mga matinaastaason?
25 Ginapakahuy-an ni Jehova ang mga matinaastaason. Sang 607 B.C.E., ‘ginpaubos’ niya matuod ang pagkamatinaastaason sang iya pinili nga katawhan kag “ginpanubo” niya ang ila “pagkapalabilabihon.” Kabay nga indi gid pagkalipatan sang matuod nga mga Cristiano nga “ginasumpong sang Dios ang mga matinaastaason, apang nagahatag sia sing di-bagay nga kaayo sa mga mapainubuson.”—Santiago 4:6.
[Retrato sa pahina 50]
Ang mga idolo, kamanggaran, kag kusog militar wala makaluwas sa Jerusalem sa adlaw sang paghukom ni Jehova
[Retrato sa pahina 55]
Sa “adlaw ni Jehova,” ang bug-os kalibutan nga emperyo sang butig nga relihion pagahapayon