Ang Maayong Balita nga Luyag Nila Ipabati sa Inyo

SANG si Jesus yari sa duta, ang iya mga disipulo nagpalapit sa iya kag namangkot: “Ano ang mangin tanda sang imo presensia kag sang katapusan sang sistema sang mga butang?” Nagsabat sia nga matabo ang mga inaway nga nagadalahig sa madamo nga pungsod, mga tiggulutom, mga pesti, mga linog, pagdugang sang pagkamalinapason, butig nga relihiosong mga manunudlo nga nagapatalang sa madamo, pagdumot kag paghingabot sa iya matuod nga mga sumulunod, kag pagbugnaw sang gugma sa pagkamatarong sang madamo nga tawo. Kon magsugod na nga mahanabo ining mga butang, magakahulugan ini nga ang di-kitaon nga presensia ni Cristo nagsugod na kag malapit na ang langitnon nga Ginharian. Mangin balita ini​—⁠maayong balita! Gani gindugang ni Jesus ining mga pulong subong bahin sang tanda: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.”​—⁠Mateo 24:​3-​14.

Ang mga nagakatabo sa kalibutan sining karon lang malain, apang maayo ang ginapatimaan sini, nga amo, ang presensia ni Cristo. Ang mga kahimtangan nga ginsambit kaina nagsugod nga makita sadtong ginbalita gid nga tuig 1914! Gintandaan sini ang katapusan sang Panag-on sang mga Gentil kag ang panugod sang pagliton gikan sa paggahom sang tawo padulong sa Isa ka Libo ka Tuig (Milenyo) nga Paggahom ni Cristo.

Ginapakita sang ika-110 sang Salmo, bersikulo 1 kag 2, kag sang Bugna 12:​7-​12 nga mahanabo ining tion sang pagliton. Ginapakita diri nga si Cristo magalingkod sa tuuhan sang Dios sa langit tubtob sa tion nga sia mangin Hari. Nian ang inaway sa langit magaresulta sa pagtagbong kay Satanas sa duta, sa amo magaabot ang kailo sa duta, kag si Cristo magagahom sa tunga sang iya mga kaaway. Ang bug-os nga katapusan sang kalautan mahanabo paagi sa “dakung kapipit-an,” nga matapos sa inaway sa Har⁠–​Magedon kag sundan sang Isa ka Libo ka Tuig nga Paggahom ni Cristo nga may paghidait.​—⁠Mateo 24:​21, 33, 34; Bugna 16:​14-​16.

“Apang hibalua ini,” siling sang Biblia, “nga sa katapusan nga mga adlaw magaabot ang makahalanguyos nga mga tion nga mabudlay pakigbagayan. Kay ang mga tawo mangin mga mahigugmaon sang kaugalingon, mga mahigugmaon sang kuwarta, mga bugalon, mga palabilabihon, mga mapasipalahon, mga malalison sa mga ginikanan, mga di-mapinasalamaton, mga di-matutom, mga wala sing kinaugali nga gugma, mga indi tampad sa bisan anong kasugtanan, mga mapatupatuon, mga wala sing pagpugong sa kaugalingon, mga mabangis, mga wala sing gugma sa kaayuhan, mga maluib, mga matig-a sing ulo, mga nagahabok sa pagpadayaw, mga mahigugmaon sa kinasadya sa baylo sang sa Dios, nga may dagway sang diosnon nga debosyon apang nagapanghiwala sang gahom sini; kag likawi ini sila.”​—⁠2 Timoteo 3:​1-5.

Ang iban mahimo magbais nga ining mga butang natabo na sang una sa maragtas sang tawo, apang ang kamatuoran amo nga wala pa gid ini magkalatabo sa pareho nga kadakuon. Subong sang ginasiling sang mga istoryador kag mga komentarista, ang naeksperiensiahan sa duta sugod sang 1914 wala pa gid sing kaanggid. (Tan-awa ang pahina 7.) Mas daku karon ang mga kailo kay sang una. Dugang pa, tuhoy sa iban pa nga mga bahin sang tanda ni Cristo tuhoy sa katapusan nga mga adlaw, dapat binagbinagon ining mga katunayan: Ang presensia ni Cristo kag ang Ginharian ginabantala sa bug-os nga kalibutan sa kasangkaron nga wala pa matabo sa maragtas. Ang paghingabot sa mga Saksi ni Jehova bangod sa pagbantala wala sing tupong. Ginatos sa ila ang ginpatay sa mga kampo konsentrasyon sang Nazi. Tubtob sa karon ang mga Saksi ni Jehova ginadumilian sa iban nga mga duog, kag sa iban naman ginadakop sila, ginabilanggo, ginapaantos, kag ginapatay. Bahin ini tanan sang tanda nga ginhatag ni Jesus.

Subong sang gintagna sa Bugna 11:​18, “naakig ang kapungsuran” batok sa matutom nga mga Saksi ni Jehova, kag nagapakita ini nga ang “kasingkal” ni Jehova ipabutyag batok sa mga pungsod. Ini gihapon nga kasulatan nagasiling nga ‘laglagon sang Dios ang mga nagalaglag sang duta.’ Wala pa gid sing tion sa maragtas sang tawo nga ang ikasarang sang duta sa pagsakdag sang kabuhi nabutang sa katalagman. Apang, tuhay na karon! Madamo nga sientipiko ang nagapaandam nga kon padayon nga dagtaan sang tawo ang duta, indi na ini mapuy-an sa ulihi. Apang ‘ginhuman ini ni Jehova agod puy-an,’ kag dulaon niya ang mga nagadagta antes nila malaglag ang duta.​—⁠Isaias 45:⁠18.

ANG MGA PAGPAKAMAAYO SA DUTA SA IDALOM SANG GINHARIAN

Ang ideya nga ang mga tawo magakabuhi sa duta subong mga sakop sang Ginharian sang Dios mahimo nga daw makatilingala sa madamo nga nagapati sa Biblia nga nagahunahuna nga ang tanan nga maluwas magakadto sa langit. Ginapakita sang Biblia nga limitado lamang nga kadamuon ang magakadto sa langit kag ang magakabuhi sing dayon sa duta mangin isa ka dakung kadam-an nga wala sing limite sa kadamuon. (Salmo 37:​11, 29; Bugna 7:⁠9; 14:​1-5) Ginapakita sang isa ka tagna sa tulun-an sang Daniel sa Biblia nga ang Ginharian sang Dios sa idalom ni Cristo magahil-ob sa duta kag magagahom sa sini.

Ang Ginharian ni Cristo ginalaragway diri subong sang isa ka bato nga gintiphag gikan sa tulad-bukid nga pagkasoberano ni Jehova. Gin-igo sini kag ginlaglag ang isa ka larawan nga nagalaragway sa gamhanan nga mga pungsod sang duta, kag ‘ang bato nga nag-igo sa larawan nangin isa ka daku nga bukid kag naghil-ob sang bug-os nga duta.’ Ang tagna nagpadayon: “Sa mga adlaw sadto nga mga hari ang Dios sang langit magapatindog sing ginharian nga indi gid malaglag. Kag ang ginharian mismo indi iliton sa iban nga katawhan. Dugmukon sini kag papason ini tanan nga ginharian, kag magapadayon ini tubtob sa walay katubtuban.”​—⁠Daniel 2:​34, 35, 44.

Amo ini ang Ginharian kag ang ginasakdag sang Kasulatan nga paglaum sa walay katapusan nga kabuhi sa isa ka natinluan kag napatahom nga duta ang luyag ibalita sa inyo sang mga Saksi ni Jehova. Minilyon sang nagakabuhi karon kag madamo nga milyon sang yara karon sa ila mga lulubngan ang makatigayon sing kahigayunan nga magpuyo sa sini sing dayon. Nian, sa idalom sang Isa ka Libo ka Tuig nga Paggahom ni Cristo Jesus, matuman ang orihinal nga katuyuan ni Jehova sa pagtuga sa duta kag sa pagbutang sa sini sang una nga mag-asawa. Ining dutan-on nga Paraiso indi gid mangin makatalaka. Subong nga si Adan ginhatagan sing hilikuton sa hardin sang Eden, ang katawhan makabaton man sing makahalangkat nga mga proyekto sa pag-atipan sang duta kag sang mga tanom kag mga sapat sa sini. Sila “magakalipay sing malawig sa binuhatan sang ila mga kamot.”​—⁠Isaias 65:​22, Revised Standard Version; Genesis 2:⁠15.

Madamo nga kasulatan ang mapresentar agod ipakita ang mga kahimtangan nga magaluntad kon sabton na ang pangamuyo nga gintudlo sa aton ni Jesus: “Magkari ang imo ginharian. Paghimuon ang imo kabubut-on, kon paano sa langit, subong man sa duta.” (Mateo 6:10) Apang, ini lang anay sa karon: “Nabatian ko ang mabaskog nga tingog gikan sa trono nga nagasiling: ‘Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.’ Kag ang Isa nga nagalingkod sa trono nagsiling: ‘Yari karon! Ginahimo ko nga bag-o ang tanan nga butang.’ Nagsiling man sia: ‘Isulat ini, kay ining mga pulong matutom kag matuod.’ ”​​—⁠Bugna 21:​3-5.

[Blurb sa pahina 15]

“Makahalanguyos nga mga tion nga mabudlay pakigbagayan,”

APANG “nian magaabot ang katapusan”

[Retrato sa pahina 18]

Netherlands

[Retrato sa pahina 18]

Nigeria