Mga Paagi nga Ginagamit Nila sa Pagpaambit sing Maayong Balita
GINASUGO ang mga Cristiano nga “maghimo sing mga disipulo sa mga tawo sa tanan nga kapungsuran,” apang wala ini nagakahulugan nga piliton ukon kumbertihon ang iban sing puwersahan. Ang komisyon ni Jesus amo ang “pagwali sing maayong balita sa mga mahagop,” ang “pagbugkos sang mga buong sing tagipusuon,” ang paglipay sa tanan nga nagakalisod.” (Mateo 28:19; Isaias 61:1, 2; Lucas 4:18, 19) Ginatinguhaan sang mga Saksi ni Jehova nga himuon ini paagi sa pagbantala sing maayong balita gikan sa Biblia. Kaangay ni manalagna Ezequiel sang una, nagatinguha ang mga Saksi ni Jehova karon nga pangitaon ang mga “nagapanghayhay kag nagabakho sa tanan nga kalangil-aran nga ginahimo.”—Ezequiel 9:4.
Ang kilala gid nga paagi nga ginagamit nila sa pagpangita sa mga nagakalisod sa mga kahimtangan karon amo ang pagpamalaybalay. Sa amo nagahimo sila sing positibo nga panikasog agod malab-ot ang publiko, subong sang ginhimo anay ni Jesus sang “naglibot sia sa mga siudad kag mga minuro, nga nagabantala kag nagawali sing maayong balita sang ginharian sang Dios.” Amo man ang ginhimo sang iya una nga mga disipulo. (Lucas 8:1; 9:1-6; 10:1-9) Sa karon, kon posible, ang mga Saksi ni Jehova nagatinguha sa pagduaw sa tagsa ka puluy-an sing makapila kada tuig, agod mahambal ang tagbalay sing pila ka minuto tuhoy sa pila ka interesante ukon ginakabalak-an nga topiko sa lokal ukon sa kalibutan. Ang isa ukon duha ka kasulatan mahimo itanyag agod binagbinagon, kag kon magpakita sing interes ang tagbalay, mahimo nga makigsugot ang Saksi nga magbalik sa kombeniente nga oras para sa dugang pa nga paghambalanay. Ang mga Biblia kag literatura nga nagapaathag sang Biblia ginahanda, kag kon luyag sang tagbalay, ang isa ka pagtuon sa Biblia sa puluy-an ginadumalahan nga wala sing bayad. Minilyon sining makabulig nga pagtuon sa Biblia ang ginadumalahan sing regular upod sa mga indibiduwal kag mga pamilya sa bug-os nga kalibutan.
Ang isa pa ka paagi nga ang “maayong balita sang ginharian” ginasugid sa iban amo ang mga miting nga ginahiwat sa lokal nga mga Kingdom Hall. Ang mga Saksi nagahiwat diri sing mga miting kada semana. Ang isa ka miting amo ang pamulongpulong publiko tuhoy sa isa ka interesante nga tema, nga ginasundan sang pagtinuon tuhoy sa Biblikanhon nga tema ukon tagna, nga ginagamit ang magasin nga Lalantawan subong kuluhaan nga materyal. Ang isa pa ka miting amo ang eskwelahan para sa paghanas sa mga Saksi agod mangin maayo nga mga manugwali sing maayong balita, nga ginasundan sang isa ka bahin agod hambalan ang hilikuton sa pagpanaksi sa lokal nga teritoryo. Subong man, makaisa kada semana nagatipon ang mga Saksi sa pribado nga mga puluy-an, sa diutay nga mga grupo, agod tun-an ang Biblia.
Ini tanan nga miting bukas sa publiko. Wala sing ginakolekta nga mga amot. Ini nga mga miting mapuslanon para sa tanan. Ang Biblia nagasiling: “Dapat naton pat-uron kon paano ang tagsatagsa sa aton makapukaw sing maayo gid sa iban sa paghigugma kag sa aktibo nga pagkamainayuhon, nga wala nagapalayo sa aton mga miting, subong sang ginahimo sang iban, kundi nagapalig-unay, sing labi na bangod makita ninyo nga nagahilapit na ang Adlaw.” Kinahanglanon ang pribado nga pagtuon kag pagpanalawsaw, apang ang pagtipon upod sa iban pa makapulukaw: “Subong nga ang salsalon nagapatalom sang salsalon, gani man ang tawo nagapatalom sa kinaalam sang isa.”—Hebreo 10:24, 25; Hulubaton 27:17, The New English Bible.
Ginahimuslan man sang mga Saksi ang mga kahigayunan nga makasugid tuhoy sa maayong balita kon masumalang nila ang iban nga mga tawo sa ila adlaw-adlaw nga pagkabuhi. Mahimo nga ini isa ka pagbalusay sing pila lamang ka tinaga upod sa kaingod ukon sa kaupod sa bus ukon sa eroplano, isa ka malawiglawig nga paghambalanay upod sa isa ka abyan ukon paryente, ukon pagpaathaganay upod sa kaupod sa trabaho sa tion sang panyaga. Amo sini nga sahi sang pagpanaksi ang masami nga ginhimo ni Jesus sang yari sia sa duta—samtang nagalakat sia sa higad sang baybay, nagalingkod sa kiliran sang pukatod, nagakaon sa balay sang iban, nagatambong sa kasal, ukon nagalakbay sa inugpangisda nga sakayan sa Dagat sang Galilea. Nagpanudlo sia sa mga sinagoga kag sa templo sa Jerusalem. Bisan diin man sia, nakakita sia sing mga kahigayunan sa paghambal tuhoy sa Ginharian sang Dios. Nagatinguha ang mga Saksi ni Jehova nga sundon ang iya mga tikang sa sini man.—1 Pedro 2:21.
PAGBANTALA PAAGI SA HUWARAN
Ang bisan diin sini nga mga paagi sa pagsugid sa imo sing maayong balita mangin walay pulos kon ang isa nga nagasugid sini sa imo wala nagaaplikar sang mga panudlo sa iya mismo kaugalingon. Ang pagsiling sing isa ka butang kag paghimo sing lain nga butang pagkasalimpapaw, kag bangod sang relihioso nga pagkasalimpapaw minilyon ang nagtalikod sa Biblia. Indi husto nga ang basulon amo ang Biblia. Ang mga escriba kag mga Fariseo sang una may Hebreong Kasulatan, apang ginpakamalaut sila ni Jesus subong mga salimpapaw. Naghambal sia tuhoy sa ila pagbasa gikan sa Kasuguan ni Moises, nian nagsiling sia sa iya mga disipulo: “Ang tanan nga butang nga ila ginasiling sa inyo, buhata ninyo kag sunda, apang indi pagbuhata ang suno sa ila mga buhat, kay sila nagasiling apang wala nagabuhat.” (Mateo 23:3) Ang huwaran nga husto nga pagkabuhi sang isa ka Cristiano mas makakumbinsi sangsa inoras nga pagsermon. Ginpatalupangod ini sa Cristianong mga asawa nga may di-tumuluo nga mga bana: “Madaug sila sa walay pulong paagi sa paggawi sang ila mga asawa, bangod nasaksihan nila ang inyo putli nga paggawi nga may tudok nga pagtahod.”—1 Pedro 3:1, 2.
Busa, nagatinguha ang mga Saksi ni Jehova nga irekomendar ang maayong balita sa iban sa sini man nga paagi: pagpakita sing huwaran sa Cristianong paggawi nga ila ginarekomendar sa iban. Nagatinguha sila nga ‘himuon sa iban ang luyag nila nga himuon sang iban sa ila.’ (Mateo 7:12) Nagatinguha sila nga himuon ini sa tanan nga tawo, indi lamang sa ila masigka-Saksi, mga abyan, mga kaingod, ukon mga paryente. Bangod di-himpit sila, indi sa tanan nga tion nga 100 porsiento nga nagamadinalag-on sila sa paghimo sini. Apang handum sang ila tagipusuon nga maghimo sing maayo sa tanan nga tawo indi lamang sa pagsugid sa ila sing maayong balita sang Ginharian kundi sa paghatag man sing bulig kon mahimo.—Santiago 2:14-17.
[Retrato sa pahina 19]
Hawaii
[Retrato sa pahina 19]
Venezuela
[Retrato sa pahina 19]
Yugoslavia
[Retrato sa pahina 20]
Ang mga Kingdom Hall, nga may praktikal nga mga desinyo, mga duog para sa paghambalanay sa Biblia
[Retrato sa pahina 21]
Sa ila pamilya kag mga pagpakig-angot sa iban, ang mga Saksi sinsero nga nagatinguha sa paghimo sang mga butang nga ginasakdag nila