Kapitulo Disinuebe

Ginbuyagyag ang Pagkasalimpapaw!

Isaias 58:1-14

1. Paano ginatamod ni Jesus kag ni Jehova ang pagkasalimpapaw, kag sa ano ini nga porma sang adlaw ni Isaias?

“KON tulukon sa guwa, daw matarong [kamo] sa mga tawo,” siling ni Jesus sa relihioso nga mga lider sang iya adlaw, “apang sa sulod puno kamo sing pagkasalimpapaw kag pagkamalinapason.” (Mateo 23:28) Ang pagpakamalaut ni Jesus sa pagkasalimpapaw nagapabanaag sang pagtamod sang iya langitnon nga Amay. Ang kapitulo 58 sang tagna ni Isaias espesipiko nga nagapatuhoy sing igtalupangod sa pagkasalimpapaw nga lapnag sa Juda. Ang pinuyas, pagpamigos, kag kasingki kinaandan lamang, kag ang pagtuman sa Adlaw nga Inugpahuway nangin isa na lamang ka walay pulos nga ritwal. Ang katawhan pakulahaw lamang nga nagaalagad kay Jehova kag nagapakunokuno nga diosnon paagi sa indi sinsero nga pagpuasa. Indi katingalahan nga ginbuyagyag ni Jehova kon ano gid sila!

‘Sugiri ang Katawhan Sang Ila mga Sala’

2. Ano nga espiritu ang ginpakita ni Isaias samtang ginabantala niya ang mensahe ni Jehova, kag sin-o sa karon ang kaangay niya?

² Bisan pa nangil-ad si Jehova sa paggawi sang Juda, ang Iya mga pulong naglakip sing tinagipusuon nga pakitluoy nga maghinulsol ang pungsod. Walay sapayan sina, luyag ni Jehova nga mangin maathag ang iya pagsabdong. Busa, ginsugo niya si Isaias: “Singgit sing mabaskog; dili magpugong. Baskuga ang imo tingog kaangay sang budyong, kag sugiri ang akon katawhan sang ila pagribok, kag ang panimalay ni Jacob sang ila mga sala.” (Isaias 58:1) Bangod sang masidla nga pagbantala sang mga pulong ni Jehova, mahimo nga magahinakit ang katawhan kay Isaias, apang wala sia mag-isol. Pareho gihapon nga espiritu sang pagsakripisyo ang iya ginpakita sang nagsiling sia: “Yari ako! Ipadala ako.” (Isaias 6:8) Isa ka maayo gid nga huwaran sa pagbatas si Isaias para sa modernong-adlaw nga mga Saksi ni Jehova, nga ginsugo man sa pagbantala sang Pulong sang Dios kag sa pagbuyagyag sang relihioso nga pagkasalimpapaw!​​—Salmo 118:6; 2 Timoteo 4:​1-5.

3, 4. (a) Ano nga pakunokuno ang ginhimo sang katawhan sang adlaw ni Isaias? (b) Ano ang matuod nga kahimtangan sa Juda?

³ Mahimo nga ang katawhan sang adlaw ni Isaias nagpangita kay Jehova kag nagpabutyag sing kahamuot sa iya matarong nga mga paghukom. Mabasa naton ang mga pulong ni Jehova: “Ako ang padayon nga ginapangita nila sa adlaw-adlaw, kag ang ihibalo tuhoy sa akon mga dalanon ang ginasiling nila nga ginakahamut-an nila, kaangay sang isa ka pungsod nga naghimo sing pagkamatarong kag wala magbiya sa katarungan sang ila Dios, kay padayon nga nagpangayo sila sa akon sing matarong nga mga paghukom, kag nagapalapit sa Dios nga ila nahamut-an.” (Isaias 58:2) Matuod gid bala ining ginapangangkon nga kahamuot sa mga dalanon ni Jehova? Indi. “Kaangay [sila] sang isa ka pungsod nga naghimo sing pagkamatarong,” apang ini nga pagkaanggid salimpapaw lamang. Ang matuod, ini nga pungsod ‘nagbiya sa katarungan sang ila Dios.’

⁴ Ang kahimtangan nagaanggid gid sa ginpahayag sang ulihi kay manalagna Ezequiel. Ginsugiran ni Jehova si Ezequiel nga ang mga Judiyo nagasinilingay: “Kari kamo, palihug, kag pamatii ninyo kon ano ang pulong nga nagagikan kay Jehova.” Apang ginpaandaman sang Dios si Ezequiel sang ila pagkadisinsero: “Sila magakadto sa imo, . . . kag pat-od nga mabatian nila ang imo mga pulong apang indi nila paghimuon ini, kay sa ila baba nagapabutyag sila sing malaw-ay nga mga kailigbon kag ang ila tagipusuon nagasunod sa di-matarong nga daug. Kag, yari karon! ikaw sa ila subong sang isa ka ambahanon sang mainit nga gugma, kaangay sang isa nga may matahom nga tingog kag maayo magtokar sing de-kuwerdas nga tulunggon. Kag pat-od nga mabatian nila ang imo mga pulong, apang wala sing bisan sin-o nga nagahimo sini.” (Ezequiel 33:​30-​32) Ang mga katubotubo ni Isaias nagapangangkon man nga ginapangita nila pirme si Jehova, apang wala nila ginatuman ang iya mga pulong.

Salimpapaw nga Pagpuasa

5. Paano nagtinguha ang mga Judiyo nga matigayon ang kahamuot sang Dios, kag ano ang nangin reaksion ni Jehova?

⁵ Sa panikasog nga matigayon ang kahamuot sang Dios, nagpuasa ang mga Judiyo subong pormalidad, apang ang ila pakunokuno nga pagkadiosnon nagpahilayo lamang sa ila gikan kay Jehova. Sa pagsalangisag namangkot sila: “Sa anong kabangdanan nga nagpuasa kami kag wala mo makita, kag ginpiutan namon ang amon kalag, kag wala ka nagasapak?” Si Jehova prangka nga nagsabat, nga nagasiling: “Sa pagkamatuod nakasapo kamo sing kalipay sa adlaw gid sang inyo pagpuasa, sang didto ang tanan ninyo nga mamumugon nga ginapilit ninyo sa pagpangabudlay. Matuod gid nga para sa pag-away kag pagsinuay nagapuasa kamo, kag para sa pagsumbag paagi sa inumol sang pagkamalaut. Wala bala kamo padayon nga nagpuasa subong sang adlaw sa pagpabati sang inyo tingog sa hitaas? Dapat bala mangin kaangay sini ang puasa nga pilion ko, ang adlaw nga ang dutan-on nga tawo magapapiot sang iya kalag? Agod iduko ang iya ulo subong sang bagaas, kag agod maghumlad sia sing panapton nga sako kag abo subong higdaan niya? Ini bala ang ginatawag mo nga puasa kag adlaw nga kalahamut-an kay Jehova?”​—Isaias 58:3-5.

6. Ano nga mga buhat sang mga Judiyo ang nagbuyagyag nga ang ila pagpuasa salimpapaw?

⁶ Samtang nagapuasa, nga nagapakunokuno nga matarong sila, kag nagapangayo pa gani sang matarong nga mga paghukom ni Jehova, ginpadayon sang katawhan ang makagod nga paglipaylipay kag pagpatikang. Nagpatuyang sila sa pinuyas, pagpamigos, kag kasingki. Sa pagtinguha nga hipsan ang ila malain nga paggawi, naghimo sila sing pakitakita nga paglalaw​—nagaduko sang ila ulo kaangay sang mga bagaas kag nagalingkod sa panapton nga sako kag abo​—​subong kitaon nga paghinulsol sa ila mga sala. Ano ang kapuslanan sining tanan kon padayon sila nga nagarebelde? Wala gid sila nagapakita sing diosnon nga kasubo kag paghinulsol nga dapat kaupod sang sinsero nga mga pagpuasa. Ang ila paghaya​—bisan pa magahod​—​indi mabatian sa langit.

7. Paano ang mga Judiyo sang adlaw ni Jesus naghikot sing salimpapaw, kag paano ang madamo sa karon nagahimo sing amo man?

⁷ Ang mga Judiyo sang adlaw ni Jesus naghimo sing kaanggid man nga pakitakita nga seremonya sa pagpuasa, ang iban sing makaduha kada semana! (Mateo 6:​16-​18; Lucas 18:​11, 12) Madamo nga relihiosong mga lider ang nag-ilog man sa kaliwatan ni Isaias paagi sa pagkamapintas kag pagkadominante. Busa, maisog nga ginbuyagyag ni Jesus ang relihioso nga mga salimpapaw, kag ginsilingan sila nga ang ila porma sang pagsimba walay pulos. (Mateo 15:​7-9) Sa karon man, minilyon ang ‘nagapahayag sing dayag nga kilala nila ang Dios, apang ginapanghiwala nila sia paagi sa ila mga buhat, bangod kalangil-aran sila kag di-matinumanon kag wala ginakahamut-an para sa bisan ano nga sahi sang maayong buhat.’ (Tito 1:16) Ini nga mga tawo mahimo nga nagalaum sa kaluoy sang Dios, apang ginapakita sang ila paggawi ang ila pagkadisinsero. Sa kabaliskaran, ang mga Saksi ni Jehova nagapakita sing matuod nga diosnon nga debosyon kag matuod nga utudnon nga gugma.​​—Juan 13:35.

Kon Ano ang Nadalahig sa Matuod nga Paghinulsol

8, 9. Anong positibo nga mga buhat ang dapat kaupod sang sinsero nga paghinulsol?

⁸ Kapin pa ang luyag ni Jehova nga himuon sang iya katawhan sangsa magpuasa lamang sila bangod sang ila mga sala; luyag niya nga maghinulsol sila. Nian matigayon nila ang iya kahamuot. (Ezequiel 18:​23, 32) Ginpaathag niya nga agod mangin mapuslanon ini, ang pagpuasa dapat updan sang pagtadlong sa nagligad nga mga sala. Binagbinaga ang nagapangusisa-sa-tagipusuon nga mga pamangkot ni Jehova: “Indi bala amo ini ang puasa nga pilion ko? Nga hubaron ang mga gapos sang pagkamalaut, paluson ang mga higot sang gota, kag hilwayon ang mga ginapigos, kag balion ninyo ang tagsa ka gota?”​​—Isaias 58:6.

⁹ Ang mga gapos kag mga gota nagakaigo nga mga simbulo sang mapintas nga pag-ulipon. Gani sa baylo nga magpuasa kag sa amo man nga tion magpigos sa mga masigkatumuluo, dapat tumanon sang katawhan ang sugo: “Higugmaon mo ang imo isigkatawo subong sang imo kaugalingon.” (Levitico 19:18) Dapat nila buy-an ang tanan nga ginapigos nila kag di-makatarunganon nga ginaulipon.a Ang pakitakita nga relihiosong mga buhat, subong sang pagpuasa, indi tal-us sa matuod nga diosnon nga debosyon kag mga buhat nga nagapakita sing utudnon nga gugma. Ang katubotubo ni Isaias, nga si manalagna Miqueas, nagsulat: “Ano bala ang ginapatuman ni Jehova sa imo kundi ang paghimo sing katarungan kag ang paghigugma sa kaayo kag ang paglakat sing maugdang upod sa imo Dios?”​​—Miqueas 6:8.

10, 11. (a) Para sa mga Judiyo, ano ang mas maayo sangsa pagpuasa? (b) Paano maaplikar sang mga Cristiano karon ang laygay ni Jehova sa mga Judiyo?

¹⁰ Ginapangayo sang katarungan, kaayo, kag kaugdang nga himuon ang maayo sa iban, nga amo ang kahulugan sang Kasuguan ni Jehova. (Mateo 7:12) Mas maayo pa sangsa pagpuasa amo ang pagpaambit sang ila bugana nga materyal sa mga imol. Si Jehova namangkot: “Indi bala [ang pagpuasa nga ginapili ko amo] ang pagpaambit sang imo tinapay sa ginagutom, kag ang dalhon mo sa imo balay ang mga tawo nga ginapiutan kag wala sing puluy-an? Nga kon may makita ka nga hubo panaptan mo sia, kag dili ka magpanago gikan sa imo kaugalingon nga unod?” (Isaias 58:7) Huo, sa baylo nga magpakitakita sing pagpuasa, ang bisan sin-o nga may ikasarang sa paghimo sini dapat maghatag sing pagkaon, panapton, ukon balay sa imol nga mga masigkapumuluyo sang Juda​​—nga ila kaugalingon nga unod.

¹¹ Ining matahom nga mga prinsipio sang utudnon nga gugma kag kaawa nga ginpabutyag ni Jehova indi lamang naaplikar sa mga Judiyo sang tion ni Isaias. Ginatuytuyan man sini ang mga Cristiano. Busa, si apostol Pablo nagsulat: “Sa pagkamatuod, nian, samtang may kahigayunan kita sa sini, magbuhat kita sing maayo sa tanan, apang labi na gid sa mga may labot sa aton sa pagtuo.” (Galacia 6:10) Ang Cristianong kongregasyon dapat mangin isa ka dalangpan nga may gugma kag utudnon nga gugma, ilabi na bangod nagakabuhi kita sa makahalanguyos nga mga tion nga nagabudlay pa.​​—2 Timoteo 3:1; Santiago 1:27.

Ang Pagkamatinumanon Nagadala Sing Bugana nga mga Pagpakamaayo

12. Ano ang himuon ni Jehova kon ang iya katawhan magtuman sa iya?

¹² Kon may yara lamang kuntani ang katawhan ni Jehova sing paghantop nga pamatian ang iya mahigugmaon nga pagsabdong! Si Jehova nagsiling: “Nian ang imo kapawa magasilak subong sang kaagahon; kag ang imo pag-ayo magaabot sing madali. Kag ang imo pagkamatarong pat-od nga magalakat nga una sa imo; ang himaya mismo ni Jehova mangin imo bantay sa imo likod. Nian magatawag ka, kag si Jehova mismo magasabat; mangayo ka sing bulig, kag sia magasiling, ‘Yari ako!’” (Isaias 58:8, 9a) Daw ano ka mapinalanggaon kag makagalanyat nga mga pulong! Ginapakamaayo kag ginaamligan ni Jehova ang mga nagakalipay sa mahigugmaon nga kaayo kag pagkamatarong. Kon ang katawhan ni Jehova maghinulsol sa ila kapintas kag pagkasalimpapaw kag magtuman sa iya, magaayo ang ila kahimtangan. ‘Ayuhon’ sila ni Jehova, isa ka espirituwal kag pisikal nga pagpasag-uli para sa pungsod. Amligan man niya sila, subong sang ginhimo niya sa ila mga katigulangan sang magbiya sila sa Egipto. Kag sabton niya sa gilayon ang ila pagpangayo sing bulig.​​—Exodo 14:​19, 20, 31.

13. Anong mga pagpakamaayo ang nagahulat sa mga Judiyo kon batunon nila ang laygay ni Jehova?

¹³ Gindugangan pa ni Jehova ang iya nauna na nga laygay, nga nagasiling: “Kon kuhaon mo sa tunga nimo ang gota [sang mapintas kag di-makatarunganon nga pag-ulipon], ang pagturisok sang tudlo [ayhan ang pagyubit ukon butig nga panumbungon] kag masakit nga panghambal; kag ihatag mo sa ginagutom ang ginahandum sang imo kaugalingon nga kalag, kag busgon mo ang kalag sang ginapiutan, ang imo kapawa man pat-od nga magasilak sa kadudulman, kag ang imo kadulom mangin subong sang kaudtuhon.” (Isaias 58:9b, 10) Ang kakagod kag kapintas wala sing kaayuhan nga mahatag sa kaugalingon kag nagapukaw sang kasingkal ni Jehova. Apang, ang kaayo kag kaalwan, ilabi na kon ginapakita sa mga ginagutom kag ginapiutan, nagaresulta sa bugana nga pagpakamaayo sang Dios. Kon batunon lamang kuntani sang mga Judiyo ining mga kamatuoran! Nian ang ila espirituwal nga kasanag kag kauswagan magapasilak sa ila kaangay sang adlaw sa kaudtuhon, nga ginadula ang bisan ano man nga kadulom. Labaw sa tanan, padunggan kag dayawon nila si Jehova, ang Tuburan sang ila himaya kag mga pagpakamaayo.​​—1 Hari 8:​41-​43.

Isa ka Napasag-uli nga Pungsod

14. (a) Ano ang nangin reaksion sang mga katubotubo ni Isaias sa iya ginpamulong? (b) Ano ang padayon nga gintanyag ni Jehova?

¹⁴ Makapasubo nga wala ginsapak sang pungsod ang hanuot nga pakitluoy ni Jehova kag labi pa nga nabuyo sa kalautan. Sang ulihi, wala na sing mahimo sa ila si Jehova kundi tugutan sila nga mabihag, subong sang iya ginpaandam sa ila. (Deuteronomio 28:​15, 36, 37, 64, 65) Walay sapayan sini, ang masunod nga mga pulong ni Jehova paagi kay Isaias nagahatag gihapon sing paglaum. Nagtagna ang Dios nga ang nadisiplina kag mahinulsulon nga nagkalabilin malipayon nga magabalik sa duta sang Juda, bisan pa nahapay ini.

15. Anong makalilipay nga pagpasag-uli ang gintagna ni Jehova?

¹⁵ Nagapatuhoy sa pagpasag-uli sang iya katawhan sang 537 B.C.E., si Jehova, paagi kay Isaias, nagsiling: “Si Jehova magatuytoy sa imo sing dalayon kag magabusog sang imo kalag bisan sa kigas nga duta, kag sia magapabakod sang imo mismo mga tul-an; kag mangin kaangay ka sang hardin nga natubigan sing maayo, kag kaangay sang tuburan sang tubig, nga may tubig nga wala nagabinutig [“nagakahubsan,” The New English Bible].” (Isaias 58:11) Ipasag-uli ni Jehova ang kigas nga dutang natawhan sang Israel sa bugana nga pagkamabungahon sini. Ang dalayawon pa, pakamaayuhon niya ang iya mahinulsulon nga katawhan, nga ginapabakod ang ila “mga tul-an” gikan sa walay kabuhi nga kahimtangan sa espirituwal padulong sa isa nga puno sing kapagsik. (Ezequiel 37:​1-​14) Ang katawhan mangin kaangay sang “hardin nga natubigan sing maayo” nga puno sing espirituwal nga bunga.

16. Paano ipasag-uli ang pungsod?

¹⁶ Ang pagpasag-uli magalakip sang pagpatindog liwat sa mga siudad nga ginlaglag sang nagsalakay nga mga Babilonianhon sang 607 B.C.E. “Bangod sa imo sugo pat-od nga patindugon sang mga tawo ang mga duog nga nahapay sa malawig nga tion; patindugon mo bisan ang mga sadsaran sang masunod nga mga kaliwatan. Kag tawgon gid ikaw nga manugkaayo sang bulho, ang manugpahauli sang mga banas nga pagapuy-an sa luyo sini.” (Isaias 58:12) Ang magkaanggid nga mga ekspresyon nga “ang mga duog nga nahapay sa malawig nga tion” kag “ang mga sadsaran sang masunod nga mga kaliwatan” (ukon, ang mga sadsaran nga nahapay sa mga kaliwatan) nagapakita nga ang ginhilway nga mga nagkalabilin magapatindog liwat sang nahapay nga mga siudad sang Juda, ilabi na ang Jerusalem. (Nehemias 2:​5; 12:​27; Isaias 44:28) Kay-uhon nila ang “bulho”​—isa ka kabilugan nga termino nga nagapatuhoy sa mga buho sa mga pader sang Jerusalem kag walay duhaduha sang iban man nga mga siudad.​​—Jeremias 31:​38-​40; Amos 9:14.

Mga Pagpakamaayo nga Nagagikan sa Matutom nga Pagtuman sa Adlaw nga Inugpahuway

17. Paano si Jehova hanuot nga nagpangabay sa iya katawhan nga tumanon ang kasuguan may kaangtanan sa Adlaw nga Inugpahuway?

¹⁷ Ang Adlaw nga Inugpahuway isa ka ekspresyon sang daku nga pagkabalaka sang Dios sa pisikal kag espirituwal nga kaayuhan sang iya katawhan. Si Jesus nagsiling: “Ang adlaw nga inugpahuway ginhimo tungod sa tawo.” (Marcos 2:27) Ini nga adlaw nga ginpakabalaan ni Jehova naghatag sa mga Israelinhon sing pinasahi nga kahigayunan nga ipakita ang ila gugma sa Dios. Makapasubo nga sang tion ni Isaias nangin isa na lamang ini ka adlaw sang pagtuman sa walay pulos nga mga ritwal kag pagpatuyang sa makagod nga mga kailigbon. Gani, ginpakamalaut liwat ni Jehova ang iya katawhan. Kag sa liwat, gintinguhaan niya nga malab-ot ang ila tagipusuon. Sia nagsiling: “Kon bangod sa adlaw nga inugpahuway ilikaw mo ang imo tiil sa paghimo sang imo mga nahamut-an sa akon balaan nga adlaw, kag tawgon mo gid nga tuman nga kalipay ang adlaw nga inugpahuway, isa ka balaan nga adlaw ni Jehova, isa nga ginahimaya, kag himayaon gid ini sa baylo nga himuon ang imo kaugalingon nga mga dalanon, sa baylo nga pangitaon ang nagapahamuot sa imo kag maghambal sing pulong; nian masapwan mo ang imo tuman nga kalipay kay Jehova, kag pasakyon ko ikaw sa mataas nga mga duog sang duta; kag pakan-on ko ikaw gikan sa pinanubli ni Jacob nga imo katigulangan, kay ang baba mismo ni Jehova ang nagpamulong sini.”—Isaias 58:13, 14.

18. Ano ang mangin resulta sang kapaslawan sang Juda sa pagpadungog sa Adlaw nga Inugpahuway?

¹⁸ Ang Adlaw nga Inugpahuway isa ka adlaw para sa espirituwal nga pagpamalandong, pangamuyo, kag pagsimba sang pamilya. Dapat ini magbulig sa mga Judiyo nga binagbinagon ang dalayawon nga mga binuhatan ni Jehova para sa ila kag ang katarungan kag gugma nga dayag sa iya Kasuguan. Sa amo, ang matutom nga pagtuman sining balaan nga adlaw dapat magbulig sa katawhan nga mangin malapit pa sa ila Dios. Sa baylo, ginlapas nila ang Adlaw nga Inugpahuway kag busa yara sa katalagman nga untaton ni Jehova ang pagpakamaayo sa ila.​​—Levitico 26:​34; 2 Cronica 36:21.

19. Anong bugana nga mga pagpakamaayo ang nagahulat sa katawhan sang Dios kon tumanon nila liwat ang Adlaw nga Inugpahuway?

¹⁹ Walay sapayan, kon manuto lamang ang mga Judiyo gikan sa disiplina kag padunggan nila liwat ang kahimusan para sa Adlaw nga Inugpahuway, bugana nga mga pagpakamaayo ang nagahulat sa ila. Ang maayong mga epekto sang matuod nga pagsimba kag sang pagtahod sa Adlaw nga Inugpahuway magaawas sa tanan nga bahin sang ila kabuhi. (Deuteronomio 28:​1-​13; Salmo 19:​7-​11) Halimbawa, “pasakyon [ni Jehova ang katawhan] sa mataas nga mga duog sang duta.” Ini nga ekspresyon nagapahangop sing kalig-unan kag paglutos sa mga kaaway. Kon sin-o man ang nagakontrol sang mataas nga mga duog​​—ang mga pukatod kag ang mga bukid​—​sia ang nagakontrol sang duta. (Deuteronomio 32:​13; 33:29) Sang isa ka tion anay ang Israel nagtuman kay Jehova, kag natigayon sang pungsod ang iya pag-amlig kag gintahod ini, kag ginkahadlukan pa gani, sang iban nga mga pungsod. (Josue 2:​9-​11; 1 Hari 4:​20, 21) Kon tumanon nila liwat si Jehova, ang pila sina nga kahimayaan anay ipasag-uli. Hatagan ni Jehova ang iya katawhan sing bug-os nga bahin sa “pinanubli ni Jacob”​—ang mga pagpakamaayo nga ginsaad paagi sa Iya katipan upod sa ila mga katigulangan, ilabi na ang pagpakamaayo nga pagpanag-iya sa Ginsaad nga Duta nga may kalig-unan.​​—Salmo 105:​8-​11.

20. Ano ang “adlaw nga inugpahuway” para sa mga Cristiano?

²⁰ May leksion bala sa sini para sa mga Cristiano? Sang mapatay si Jesucristo, ang Mosaikong Kasuguan gindula, lakip ang mga ginapatuman sini tuhoy sa Adlaw nga Inugpahuway. (Colosas 2:​16, 17) Apang, ang espiritu nga dapat ginpalambo sa Juda sang pagtuman sa Adlaw nga Inugpahuway​​—ang pag-una sa espirituwal nga mga interes kag pagtinguha nga mangin suod kay Jehova​​—importante gihapon para sa mga sumilimba ni Jehova. (Mateo 6:​33; Santiago 4:8) Dugang pa, sa sulat ni Pablo sa mga taga-Hebreo, sia nagsiling: “May nabilin pa nga adlaw nga inugpahuway para sa katawhan sang Dios.” Ang mga Cristiano nagasulod sa sining “adlaw nga inugpahuway” paagi sa pagtuman kay Jehova kag padayon nga pagsakdag sa pagkamatarong pasad sa pagtuo sa ginpaagay nga dugo ni Jesucristo. (Hebreo 3:​12, 18, 19; 4:​6, 9-11, 14-​16) Para sa mga Cristiano, ini nga sahi sang pagtuman sa adlaw nga inugpahuway ginahimo, indi lamang sing makaisa kada semana, kundi kada adlaw.​​—Colosas 3:​23, 24.

Ang Espirituwal nga Israel ‘Nagasakay sa Mataas nga mga Duog Sang Duta’

21, 22. Sa anong paagi ‘ginpasakay [ni Jehova ang Israel sang Dios] sa mataas nga mga duog sang duta’?

²¹ Halin sang ginhilway sila gikan sa pagkabihag sa Babilonia sang 1919, matutom nga ginatuman sang hinaplas nga mga Cristiano ang ginalaragway sang Adlaw nga Inugpahuway. Subong resulta, ‘ginpasakay sila [ni Jehova] sa mataas nga mga duog sang duta.’ Sa anong kahulugan? Sang 1513 B.C.E., nakigkatipan si Jehova sa mga kaliwat ni Abraham nga kon magmatinumanon sila, himuon sila nga isa ka ginharian sang mga saserdote kag isa ka balaan nga pungsod. (Exodo 19:​5, 6) Sa sulod sang 40 ka tuig sa kahanayakan, gindala sila ni Jehova, kaangay sang agila nga nagadala sang iya mga buto, kag ginpakamaayo sila sing bugana nga mga aman. (Deuteronomio 32:​10-​12) Apang, kulang sing pagtuo ang pungsod, kag sang ulihi nadula nila ang tanan nga pribilehiyo nga matigayon nila kuntani. Walay sapayan sina, may yara karon si Jehova sing isa ka ginharian sang mga saserdote. Amo ini ang espirituwal nga Israel sang Dios.​​—Galacia 6:​16; 1 Pedro 2:9.

²² Sa “tion sang katapusan,” ginhimo sining espirituwal nga pungsod ang wala mahimo sang dumaan nga Israel. Ginhuptan nila ang ila pagtuo kay Jehova. (Daniel 8:17) Samtang bug-os nga ginatuman sang mga katapo sini ang mataas nga mga talaksan kag halangdon nga mga dalanon ni Jehova, sa espirituwal nga kahulugan ginapataas sila ni Jehova. (Hulubaton 4:​4, 5, 8; Bugna 11:12) Bangod ginaamligan sila gikan sa pagkadimatinlo sa palibot nila, may yara sila maayo nga estilo sang pagkabuhi, kag sa baylo nga mag-insister sa paghimo sang ila kaugalingon nga mga dalanon, nagasapo sila sing “tuman nga kalipay kay Jehova” kag sa iya Pulong. (Salmo 37:4) Ginatipigan sila ni Jehova nga may kalig-unan sa espirituwal sa atubangan sang determinado nga pagpamatok sa bug-os nga kalibutan. Sugod sang 1919 ang ila espirituwal nga “duta” wala ginsulod. (Isaias 66:8) Nagapabilin sila nga isa ka katawhan para sa iya halangdon nga ngalan, nga ila ginabantala sing malipayon sa bug-os nga kalibutan. (Deuteronomio 32:3; Binuhatan 15:14) Dugang pa, nagadamo pa nga kadamuon sang mga mahagop gikan sa tanan nga pungsod ang nagapakigbahin karon upod sa ila sa dungganon nga pribilehiyo nga matudluan sang mga dalanon ni Jehova kag mabuligan sa paglakat sa iya mga banas.

23. Paano ginhimo ni Jehova nga ang iya hinaplas nga mga alagad ‘nagakaon gikan sa pinanubli ni Jacob’?

²³ ‘Ginapakaon [ni Jehova ang iya hinaplas nga mga alagad] gikan sa pinanubli ni Jacob.’ Sang ginpakamaayo ni Isaac si Jacob sa baylo nga si Esau, ang mga pulong sang patriarka nagtagna sing mga pagpakamaayo para sa tanan nga magatuo sa ginsaad nga Binhi ni Abraham. (Genesis 27:​27-​29; Galacia 3:​16, 17) Kaangay ni Jacob​—kag indi kaangay ni Esau​—​‘ginaapresyar [sang hinaplas nga mga Cristiano kag sang ila mga kaupod] ang sagrado nga mga butang,’ ilabi na ang espirituwal nga pagkaon nga ginaaman sang Dios sing bugana. (Hebreo 12:​16, 17; Mateo 4:4) Ining espirituwal nga pagkaon​—nga nagalakip sang ihibalo tuhoy sa kon ano ang ginahimo ni Jehova paagi sa ginsaad nga Binhi kag sa mga kaupod sina nga Binhi​—makapalig-on, makapabakod, kag kinahanglanon para sa ila espirituwal nga kabuhi. Busa, importante gid nga padayon nga magkaon sila sing espirituwal nga pagkaon paagi sa pagbasa kag pagpamalandong sa Pulong sang Dios. (Salmo 1:​1-3) Kinahanglan makig-upod sila sa ila mga masigkatumuluo sa Cristianong mga miting. Kag importante nga sakdagon nila ang mataas nga mga talaksan sang putli nga pagsimba samtang malipayon nga ginapaambit nila sa iban ina nga pagkaon.

24. Paano nagagawi ang matuod nga mga Cristiano karon?

²⁴ Samtang malangkagon nga ginahulat ang katumanan sang mga saad ni Jehova, kabay nga padayon nga sikwayon sang matuod nga mga Cristiano ang tanan nga sahi sang pagkasalimpapaw. Bangod ginapakaon sang “pinanubli ni Jacob,” kabay nga padayon nila nga maagom ang espirituwal nga kalig-unan sa “mataas nga mga duog sang duta.”

[Nota]

[Piktyur sa pahina 278]

Ang mga Judiyo nagpuasa kag nagduko sang ila mga ulo sa pakunokuno nga paghinulsol​—apang wala nila ginbag-o ang ila mga dalanon

[Piktyur sa 283]

Ang mga may ikasarang sa paghimo sini naghatag sing balay, panapton, ukon mga aman sa mga imol

[Piktyur sa pahina 286]

Kon maghinulsol ang Juda, patindugon niya liwat ang iya nahapay nga mga siudad