Kapitulo Beinte
Ang Kamot ni Jehova Indi Nangin Malip-ot
1. Ano ang kahimtangan sa Juda, kag ano ang ginapaligban sang madamo?
ANG pungsod sang Juda nagapangangkon nga nakigkatipan kay Jehova. Apang, magamo bisan diin. Ang katarungan maiwat, ang krimen kag pagpamigos lapnag, kag ang pag-uswag nga ginalauman wala matuman. May butang nga sayop gid. Madamo ang nagapalibog kon tadlungon pa ni Jehova ang kahimtangan. Amo sini ang kahimtangan sang mga adlaw ni Isaias. Apang ang panaysayon ni Isaias nahanungod sini nga tion indi isa ka dumaan nga maragtas lamang. Ang iya mga pulong nagaunod sing matagnaon nga mga paandam para kay bisan sin-o nga nagapangangkon nga nagasimba sa Dios apang nagasikway sang Iya kasuguan. Kag ang inspirado nga tagna nga narekord sa Isaias kapitulo 59 nagahatag sing mahigugmaon nga pagpalig-on para sa tanan nga nagapanikasog sa pag-alagad kay Jehova walay sapayan nga nagakabuhi sa mabudlay kag makatalagam nga mga tion.
Nabulag Gikan sa Matuod nga Dios
2, 3. Ngaa wala gin-amligan ni Jehova ang Juda?
2 Handurawa lamang—ang nakigkatipan nga katawhan ni Jehova nahulog sa apostasya! Gintalikdan nila ang ila Magbubuhat, sa amo nagbiya sila gikan sa iya nagaamlig nga kamot. Bangod sini, nag-antos sila sing daku nga kapiutan. Ginbasol bala nila si Jehova sa ila mabudlay nga mga tion? Ginsugiran sila ni Isaias: “Yari karon! Ang kamot ni Jehova indi nangin tuman kalip-ot nga indi ini makaluwas, ni ang iya igdulungog nangin tuman kabug-at nga indi ini makabati. Indi, kundi ang inyo mismo mga kasaypanan ang nangin mga butang nga ginabangdan sang pagbulagay sa tunga ninyo kag sang inyo Dios, kag ang inyo mga sala amo ang ginbangdan sang paglipod niya sang iya nawong gikan sa inyo agod indi sia makabati.”—Isaias 59:1, 2.
3 Yadtong mga pulong prangka apang matuod. Si Jehova amo gihapon ang Dios sang kaluwasan. Subong ang “Manugpamati sang pangamuyo,” nagapamati sia sa mga pangamuyo sang iya matutom nga mga alagad. (Salmo 65:2) Apang, wala niya ginapakamaayo ang mga makasasala. Ang katawhan mismo ang balasulon tungod sang ila pagpahilayo kay Jehova. Bangod sang ila kalautan, ginlipdan niya ang iya nawong gikan sa ila.
4. Ano ang mga panumbungon batok sa Juda?
4 Ang matuod, malain gid ang rekord sang Juda. Ginlista sang tagna ni Isaias ang pila ka panumbungon batok sa ila: “Ang inyo mga palad nadagtaan sing dugo, kag ang inyo mga tudlo sing kasaypanan. Ang inyo mga bibig nagpamulong sing kabutigan. Ang inyo dila padayon nga nagamitlang sing bug-os nga pagkadimatarong.” (Isaias 59:3) Ang katawhan nagabinutig kag nagahambal sing di-matarong nga mga butang. Ang pagpatuhoy sa ‘mga palad nga nadagtaan sing dugo’ nagapakita nga ang iban nakapatay pa gani. Daw ano ini nga pagpakahuya sa Dios, nga ang iya Kasuguan wala lamang nagadumili sang pagpatay kundi nagadumili man sang ‘pagdumot sa imo utod sa imo tagipusuon’! (Levitico 19:17) Ang pagpatuyang sa pagpakasala sang mga pumuluyo sang Juda kag ang di-malikawan nga resulta dapat magpahanumdom sa tagsatagsa sa aton karon nga dapat naton kontrolon ang makasasala nga mga panghunahuna kag mga balatyagon. Kay kon indi, mahimo nga makahimo kita sing malaut nga magahamulag sa aton gikan sa Dios.—Roma 12:9; Galacia 5:15; Santiago 1:14, 15.
5. Daw ano ka daku ang kalautan sang Juda?
5 Ang sala nga balatian naglaton sa bug-os nga pungsod. Ang tagna nagsiling: “Wala gid sing nagatawag sa pagkamatarong, kag wala gid sing nagakadto sa hukmanan sa katutom. Kabutigan ang ginasaligan, kag walay pulos ang ginapamulong. Kagamo ang ginapanamkon, kag butang nga makasakit ang ginabun-ag.” (Isaias 59:4) Wala sing nagahambal sing pagkamatarong. Bisan sa mga hukmanan sang kasuguan, talagsa lang makakita sing isa nga masaligan ukon matutom. Nagtalikod ang Juda kay Jehova kag nagsalig sa iya pagpakig-alyado sa mga pungsod, bisan sa walay kabuhi nga mga idolo. Ini tanan “kabutigan,” wala sing bisan ano man nga kabilihanan. (Isaias 40:17, 23; 41:29) Subong resulta, madamo sing hinambalanay, apang ini tanan walay pulos. May mga plano nga ginahimo, apang nagresulta ini sa kagamo kag kasakitan.
6. Paano ang rekord sang Cristiandad nagaanggid sa rekord sang Juda?
6 Talalupangdon nga ang pagkadimatarong kag kasingki sa Juda nagaanggid sa Cristiandad. (Tan-awa ang “Apostata nga Jerusalem—Ang Kaanggid Sang Cristiandad,” sa pahina 294.) Duha ka mapintas nga bug-os kalibutan nga inaway ang natabo nga nagdalahig sa ginatawag nga Cristianong mga pungsod. Tubtob sa karon, ang relihion sang Cristiandad wala sing nahimo sa pagpadulog sang pagpapas sa pangayaw nga minoridad kag sang pagpinatyanay sang mga tribo sa tunga sang iya mga katapo. (2 Timoteo 3:5) Bisan pa gintudluan ni Jesus ang iya mga sumulunod nga magsalig sa Ginharian sang Dios, padayon gihapon nga nagasalig ang mga pungsod sang Cristiandad para sa kalig-unan sa arsenal (talaguan sang mga hinganiban) sang militar kag sa politikal nga mga alyansa. (Mateo 6:10) Sa pagkamatuod, ang kalabanan sang nagapanguna nga mga manughimo sing hinganiban sang kalibutan masapwan sa mga pungsod sang Cristiandad! Huo, kon ang Cristiandad nagasalig sa mga panikasog kag mga institusyon sang tawo para sa isa ka may kalig-unan nga palaabuton, nagasalig man sia sa “kabutigan.”
Pag-ani Sing Mapait nga Bunga
7. Ngaa ang mga pahito sang Juda nagresulta lamang sa kahalitan?
7 And idolatriya kag pagkadibunayag indi makapatubas sing isa ka maayo nga katilingban. Bangod sang pagliso sa sini nga mga butang, nagaani karon ang di-matutom nga mga Judiyo sing kagamo nga ila mismo ginsab-ug. Aton mabasa: “Nagpabuto sila sing mga itlog sang dalitan nga man-ug, kag naghabol sila sing lawa sang damang. Ang makakaon sang ila mga itlog mapatay, kag ang itlog nga ginbuka mapusa kag man-ug ang magaguwa.” (Isaias 59:5) Kutob sa umpisa tubtob sa paghimo sini, ang mga pahito sang Juda wala magpatubas sing butang nga mapuslanon. Ang ila malain nga panghunahuna nagresulta lamang sa kahalitan, subong nga ang lamang nga mapatubas sang mga itlog sang isa ka dalitan nga man-ug dalitan nga mga man-ug man. Kag nag-antos ang pungsod.
8. Ano ang nagapakita sang sayop nga panghunahuna sang Juda?
8 Ang iban nga mga pumuluyo sang Juda mahimo nga magpakita sing kasingki sa panikasog nga amligan ang ila kaugalingon, apang mapaslawan sila. Ang pisikal nga puwersa indi mahimo makatal-us sa pagsalig kay Jehova kag sa mga buhat sang pagkamatarong subong nga ang mga lawa indi mahimo makatal-us sa matuod nga panapton subong pangamlig batok sa malain nga tiempo. Si Isaias nagsiling: “Ang ila lawa indi mangin panapton, ni tabunan nila ang ila kaugalingon sang ila mga binuhatan. Ang ila mga binuhatan makasakit nga mga binuhatan, kag ang masingki nga hilikuton yara sa ila mga palad. Ang ila mga tiil padayon nga nagadalagan padulong sa bug-os nga kalainan, kag nagadalidali sila agod magpaagay sing dugo nga walay sala. Ang ila mga hunahuna makasakit nga mga hunahuna; ang pag-ati kag paglaglag amo ang yara sa ila daku nga mga dalan.” (Isaias 59:6, 7) Ang panghunahuna sang Juda sayop. Paagi sa pagliso sa kasingki agod lubaron ang iya mga problema, nagpakita sia sing di-diosnon nga panimuot. Wala sia nagakabalaka nga ang madamo sang iya mga biktima inosente kag ang iban sa ila matuod nga mga alagad sang Dios.
9. Ngaa indi gid matigayon sang mga lider sang Cristiandad ang matuod nga paghidait?
9 Ining inspirado nga mga pulong nagapahanumdom sa aton sang maduguon nga rekord sang Cristiandad. Pat-od nga makighusay si Jehova sa iya bangod sang iya daku nga pagmisrepresentar sa Cristianismo! Kaangay sang mga Judiyo sang adlaw ni Isaias, ang Cristiandad nangin malaut sa moral bangod nagapati ang iya mga lider nga amo lamang ini ang praktikal. Samtang nagahambal sila tuhoy sa paghidait, nagahimo sila sing inhustisya. Daw ano nga paglimbong! Bangod padayon nga ginahimo sang mga lider sang Cristiandad ini nga taktika, indi gid nila matigayon ang matuod nga paghidait. Amo sini ang matabo subong sang padayon nga ginasiling sang tagna: “Ang dalanon sang paghidait ginsikway nila, kag wala sing katarungan sa ila mga banas. Ginpatiko nila ang ila mga dalan. Wala gid sing nagalakat sa sini ang makakilala sa paghidait.”—Isaias 59:8.
Nagapangapkap sa Espirituwal nga Kadudulman
10. Ano ang gintu-ad ni Isaias tuhoy sa Juda?
10 Indi mahimo nga pakamaayuhon ni Jehova ang malimbungon kag malaglagon nga mga dalanon sang Juda. (Salmo 11:5) Gani nagapamulong para sa bug-os nga pungsod, gintu-ad ni Isaias ang sala sang Juda: “Malayo sa amon ang katarungan, kag ang pagkamatarong indi makalambot sa amon. Padayon kami nga nagapaabot sing kapawa, apang, yari karon! kadudulman; sing kasanag, apang nagalakat kami gihapon sa dalayon nga kadulom. Padayon nga ginapangapkap namon ang pader kaangay sang mga bulag, kag nagapangapkap kami subong sang mga walay mata. Nagakasandad kami sa kaudtuhon subong sang sa kadudulman sang kagab-ihon; sa tunga sang mga kusganan daw subong kami sang patay nga mga tawo. Padayon kami nga nagaagunto, kami tanan, kaangay sang mga oso; kag kaangay sang mga salampati nagakurukutok kami nga may pagpangalisod.” (Isaias 59:9-11a) Wala ginhimo sang mga Judiyo ang Pulong sang Dios nga mangin suga sa ila mga tiil kag kapawa sa ila banas. (Salmo 119:105) Subong resulta, nangin daw madulom ang kahimtangan. Bisan sa kaudtuhon, nagapangapkap sila subong nga daw gab-i. Daw subong nga patay sila. Sa ila kalangkag nga maumpawan sila, nag-agunto sila sing mabaskog kaangay sang gutom ukon napilasan nga mga oso. Ang iban makaluluoy nga nagakurukutok, kaangay sang masubo nga mga salampati.
11. Ngaa mapaslawan ang ginalauman nga katarungan kag kaluwasan sang Juda?
11 Nahibaluan gid ni Isaias nga ang kabangdanan sang kahimtangan sang Juda amo ang pagribok sini batok sa Dios. Sia nagsiling: “Padayon kami nga nagpaabot sing katarungan, apang wala gali; sing kaluwasan, apang nagpabilin ini nga malayo sa amon. Kay ang amon mga pagribok nagdamo sa atubangan mo; kag tuhoy sa amon mga sala, ang tagsatagsa nagpamatuod batok sa amon. Kay ang amon mga pagribok yari sa amon; kag tuhoy sa amon mga kasaypanan, nahibaluan gid namon ini. May paglapas kag pagpanghiwala kay Jehova; kag may pagtalikod sa amon Dios, pagpamulong sing pagpamigos kag pagribok, paghunahuna kag pagmitlang sing mga pulong sang kabutigan gikan gid sa tagipusuon.” (Isaias 59:11b-13) Bangod wala maghinulsol ang mga pumuluyo sang Juda, wala gihapon mapatawad ang ila mga sala. Ang katarungan nagbiya sa pungsod bangod ang katawhan nagbiya kay Jehova. Nangin butigon gid sila, kag ginpigos pa nila ang ila kauturan. Kaangay gid sini ang Cristiandad karon! Indi lamang nga ginasikway sang madamo ang katarungan kundi aktibo nga ginahingabot pa nila ang matutom nga mga Saksi ni Jehova, nga nagatinguha sa paghimo sang kabubut-on sang Dios.
Magahukom si Jehova
12. Ano ang panimuot sang mga may salabton sa pagpadapat sing katarungan sa Juda?
12 Daw wala sing katarungan, pagkamatarong, ukon kamatuoran sa Juda. “Ang katarungan ginpilit sa pag-isol, kag ang pagkamatarong nagtindog lamang sa malayo. Kay ang kamatuoran nasandad sa plasa, kag ang butang nga matadlong indi makasulod.” (Isaias 59:14) Sa sulod sang mga gawang sang siudad sa Juda, may yara mga plasa diin nagatipon ang mga gulang nga lalaki agod hambalan ang legal nga mga kaso. (Rut 4:1, 2, 11) Ini nga mga tawo dapat maghukom sa pagkamatarong kag dapat nila sakdagon ang katarungan, nga wala nagabaton sing mga hamham. (Deuteronomio 16:18-20) Sa baylo, naghukom sila suno sa ila makagod nga mga ideya. Ang malain pa, gintamod nila ang bisan sin-o nga sinsero nga nagatinguha sa paghimo sing maayo subong mahapos nga biktima. Aton mabasa: “Ang kamatuoran wala, kag ang bisan sin-o nga nagatalikod sa kalainan ginaagawan.”—Isaias 59:15a.
13. Bangod ang mga hukom sa Juda nagpatumbaya sa ila katungdanan, ano ang himuon ni Jehova?
13 Ang mga wala maghambal batok sa paglain sang moral nalipat nga ang Dios indi bulag, ignorante, ukon wala sing gahom. Si Isaias nagsulat: “Nakita ini ni Jehova, kag malain sa iya panulok nga wala sing katarungan. Kag sang nakita niya nga wala sing tawo, natingala sia nga wala sing isa nga nagapatunga. Kag ang iya butkon nagluwas sa iya, kag ang iya pagkamatarong amo ang butang nga nagsakdag sa iya.” (Isaias 59:15b, 16) Bangod nagapatumbaya ang gintangdo nga mga hukom sa ila katungdanan, magapasilabot si Jehova sa nagakatabo. Kon himuon niya ini, magahikot sia sa pagkamatarong kag may gahom.
14. (a) Ano ang panimuot sang madamo karon? (b) Paano si Jehova nagahanda para sa paghikot?
14 May kaanggid man nga kahimtangan karon. Nagakabuhi kita sa kalibutan diin madamo ang “nawad-an sang tanan nga igbalatyag sa moral.” (Efeso 4:19) Pila lamang ang nagapati nga si Jehova magapasilabot gid agod dulaon ang kalautan sa duta. Apang ginapakita sang tagna ni Isaias nga ginapanilagan sing maayo ni Jehova ang mga nagakatabo sa tawo. Nagahimo sia sang iya mga paghukom, kag sa iya tion, magahikot sia suno sa sini nga mga paghukom. Matarong bala ang iya mga paghukom? Ginapakita ni Isaias nga matarong ini. Sa kaso sang pungsod sang Juda, sia nagsulat: “Nian ginsul-ob [ ni Jehova] ang pagkamatarong subong kutamaya, kag ang helmet sang kaluwasan sa iya ulo. Dugang pa, ginsul-ob niya ang mga panapton sang pagtimalos subong panapton kag ginpanaptan niya ang iya kaugalingon sing kakugi nga subong daw panapton nga wala sing pako.” (Isaias 59:17) Ining matagnaon nga mga pulong nagalaragway kay Jehova subong isa ka hangaway nga nagahanda sang iya kaugalingon para sa inaway. Determinado sia sa pagluwas. Sigurado sia sa iya mismo bug-os kag indi maduhaduhaan nga pagkamatarong. Kag mangin maisog sia kag makugi sa iya mga buhat sang paghukom. Indi maduhaduhaan nga magadaug ang pagkamatarong.
15. (a) Paano magagawi ang matuod nga mga Cristiano kon maghukom na si Jehova? (b) Ano ang masiling sa mga paghukom ni Jehova?
15 Sa pila ka kadutaan karon, ginatinguhaan sang mga kaaway sang kamatuoran nga upangan ang hilikuton sang mga alagad ni Jehova paagi sa pagpalapnag sing butig kag mapasipalahon nga propaganda. Ang matuod nga mga Cristiano wala nagapangalag-ag sa pagpangapin sa kamatuoran, apang wala gid sila nagatinguha sa pagtimalos. (Roma 12:19) Bisan kon makighusay na si Jehova sa apostata nga Cristiandad, ang iya mga sumilimba sa duta indi makigbahin sa paglaglag sa iya. Nahibaluan nila nga ginatigana ni Jehova ang pagtimalos para sa iya kaugalingon kag nga magahimo sia sing nagakaigo nga aksion kon mag-abot na ang tion. Ang tagna nagapasalig sa aton: “Nahisuno sa mga pagpakig-angot sia magapadya sing kasubong, kasingkal sa iya mga kasumpong, nagakaigo nga pagpakig-angot sa iya mga kaaway. Magabalos sia sa kapuluan sing nagakaigo nga pagpakig-angot.” (Isaias 59:18) Subong sang adlaw ni Isaias, indi lamang mangin matarong ang mga paghukom sang Dios kundi mangin bug-os man ini. Makalambot ini bisan “sa kapuluan,” sa malayo nga mga duog. Wala sing tuman kabaw-ing ukon naligwin kaayo nga indi malab-ot sang mga paghukom ni Jehova.
16. Sin-o ang maluwas sa paghukom ni Jehova, kag ano ang matun-an nila gikan sa ila kaluwasan?
16 Ang mga nagapanikasog sa paghimo sing matarong hukman sing matarong ni Jehova. Gintagna ni Isaias nga gikan sa isa ka ukbong tubtob sa pihak nga ukbong—sa bug-os nga duta—maluwas ini sila. Kag ang ila pag-agom sang pag-amlig ni Jehova magapabakod gid sang ila debosyon kag pagtahod sa iya. (Malaquias 1:11) Aton mabasa: “Gikan sa tunuran sang adlaw magasugod sila sa pagkahadlok sa ngalan ni Jehova, kag sa himaya niya gikan sa bulutlakan sang adlaw, kay magaabot sia subong sang nagalambas nga suba, nga ginahuyop sang espiritu mismo ni Jehova.” (Isaias 59:19) Kaangay sang mabaskog nga buhawi nga nagaduso sang malaglagon nga pader sang tubig kag nagadaldal sang tanan nga yara sa dalanon sini, ang espiritu ni Jehova magawasak sang tanan nga balagbag agod matuman ang iya kabubut-on. Ang iya espiritu mas gamhanan sangsa bisan ano nga puwersa sang tawo. Kon gamiton na niya ini sa paghukom sa mga tawo kag sa mga pungsod, pat-od nga magamadinalag-on sia sing bug-os.
Paglaum kag Pagpakamaayo Para sa mga Mahinulsulon
17. Sin-o ang Manunubos sang Sion, kag san-o niya gintubos ang Sion?
17 Sa idalom sang Kasuguan ni Moises, ang isa ka Israelinhon nga nagbaligya sang iya kaugalingon sa pagkaulipon sarang matubos gikan sa pagkaulipon sang isa ka manunubos. Sa matagnaon nga tulun-an ni Isaias, ginlaragway anay si Jehova subong Manunubos sang mahinulsulon nga mga indibiduwal. (Isaias 48:17) Sa liwat, ginalaragway sia karon subong Manunubos sang mga mahinulsulon. Ginrekord ni Isaias ang saad ni Jehova: “ ‘Pat-od nga magaabot sa Sion ang Manunubos, kag sa ila nga nagaliso gikan sa paglalis sa Jacob,’ siling ni Jehova.” (Isaias 59:20) Natuman ining makapasalig nga saad sang 537 B.C.E. Apang may dugang pa ini nga katumanan. Ginbalikwat ni apostol Pablo ining mga pulong gikan sa Septuagint nga bersion kag gin-aplikar ini sa mga Cristiano. Sia nagsulat: “Sa sining paagi ang bug-os nga Israel maluwas. Subong sang nasulat na: ‘Magagikan sa Sion ang manluluwas kag ipahilayo ang di-diosnon nga mga buhat gikan kay Jacob. Kag amo ini ang akon katipan sa ila, kon kuhaon ko ang ila mga sala.’” (Roma 11:26, 27) Sa pagkamatuod, ang tagna ni Isaias may dugang pa nga aplikasyon—isa nga nagalambot sa aton tion kag lampas pa. Ngaa?
18. San-o kag paano ginpaluntad ni Jehova ang “Israel sang Dios”?
18 Sang nahauna nga siglo, isa ka diutay nga nagkalabilin sang pungsod sang Israel ang nagbaton kay Jesus subong Mesias. (Roma 9:27; 11:5) Sang adlaw sang Pentecostes 33 C.E., ginbubo ni Jehova ang iya balaan nga espiritu sa mga 120 sadtong mga tumuluo kag ginpasulod sila sa iya bag-ong katipan nga ginpatung-an ni Jesucristo. (Jeremias 31:31-33; Hebreo 9:15) Sadto nga adlaw nagluntad ang “Israel sang Dios,” isa ka bag-o nga pungsod nga may mga katapo nga ginpakilala, indi bangod undanon nga kaliwat sila ni Abraham, kundi bangod ginpanganak sila paagi sa espiritu sang Dios. (Galacia 6:16) Sugod kay Cornelio, ang bag-o nga pungsod naglakip sa di-sirkunsidado nga mga Gentil. (Binuhatan 10:24-48; Bugna 5:9, 10) Sa amo ginbaton sila ni Jehova nga Dios kag nangin iya espirituwal nga mga anak, mga masigkamanunubli ni Jesus.—Roma 8:16, 17.
19. Ano nga katipan ang ginhimo ni Jehova upod sa Israel sang Dios?
19 Nian nakigkatipan si Jehova sa Israel sang Dios. Aton mabasa: “‘Nahanungod sa akon, amo ini ang akon katipan upod sa ila,’ siling ni Jehova. ‘Ang akon espiritu nga yara sa imo kag ang akon mga pulong nga ginbutang ko sa imo baba—indi ini pagkuhaon gikan sa imo baba ukon gikan sa baba sang imo kaliwat ukon gikan sa baba sang kaliwat sang imo kaliwat,’ siling ni Jehova, ‘kutob karon kag bisan tubtob sa walay latid nga tion.’ ” (Isaias 59:21) Naaplikar man kay Isaias ining mga pulong ukon indi, natuman ini sing pat-od kay Jesus, nga ginpasalig nga “makita niya ang iya kaliwatan.” (Isaias 53:10) Ginpamulong ni Jesus ang mga pulong nga natun-an niya gikan kay Jehova, kag nagpabilin sa iya ang espiritu ni Jehova. (Juan 1:18; 7:16) Sing nagakaigo, ang iya mga kauturan kag mga masigkamanunubli, ang mga katapo sang Israel sang Dios, nakabaton man sing balaan nga espiritu ni Jehova kag nagabantala sing mensahe nga natun-an nila gikan sa ila langitnon nga Amay. Sila tanan “mga tawo nga gintudluan ni Jehova.” (Isaias 54:13; Lucas 12:12; Binuhatan 2:38) Paagi kay Isaias ukon paagi kay Jesus, nga sing matagnaon ginlaragway ni Isaias, nakigkatipan karon si Jehova nga indi gid sila pagbuslan kundi gamiton sila tubtob sa walay latid nga tion subong mga saksi niya. (Isaias 43:10) Apang, sin-o ang ila “kaliwat” nga nagabenepisyo man gikan sa sining katipan?
20. Paano ang saad ni Jehova kay Abraham natuman sang nahaunang siglo?
20 Sang dumaan nga mga tion nagsaad si Jehova kay Abraham: “Paagi sa imo binhi ang tanan nga pungsod sang duta pat-od nga magapakamaayo sang ila kaugalingon.” (Genesis 22:18) Nahisanto sa sini, ang diutay nga nagkalabilin sang kinaugali nga mga Israelinhon nga nagbaton sa Mesias nagkadto sa madamo nga pungsod, nga ginabantala ang maayong balita nahanungod kay Cristo. Sugod kay Cornelio madamo nga di-sirkunsidado nga Gentil ang ‘nagpakamaayo sang ila kaugalingon’ paagi kay Jesus, ang Binhi ni Abraham. Nangin bahin sila sang Israel sang Dios kag ikaduha nga bahin sang binhi ni Abraham. Bahin sila sang “balaan nga pungsod” ni Jehova, nga ginsugo nga ‘ipahayag sing lapnag ang pagkahalangdon sang isa nga nagtawag sa ila gikan sa kadudulman pakadto sa iya makatilingala nga kapawa.’—1 Pedro 2:9; Galacia 3:7-9, 14, 26-29.
21. (a) Ano nga “kaliwat” ang ginpatubas sang Israel sang Dios sa modernong mga tion? (b) Paano ang “kaliwat” ginlipay sang katipan, ukon kontrata, nga ginhimo ni Jehova upod sa Israel sang Dios?
21 Sa karon ang bug-os nga kadamuon sang Israel sang Dios daw natipon na. Apang, ginapakamaayo gihapon ang mga pungsod—kag sa daku nga kasangkaron. Paano? Bangod ang Israel sang Dios may “kaliwat,” ang mga disipulo ni Jesus nga ang paglaum amo ang kabuhi nga walay katapusan sa isa ka paraiso nga duta. (Salmo 37:11, 29) Ining mga “kaliwat” ginatudluan man ni Jehova kag ginahatagan sing instruksion tuhoy sa iya mga dalanon. (Isaias 2:2-4) Bisan pa wala ginbawtismuhan sa balaan nga espiritu ukon ginakabig nga mga umalambit sa bag-ong katipan, ginapabakod sila sang balaan nga espiritu ni Jehova sa paglandas sang tanan nga balagbag nga ginabutang ni Satanas sa dalanon sang ila pagbantala nga hilikuton. (Isaias 40:28-31) Minilyon na karon ang ila kadamuon kag nagadamo pa sila samtang nagapatubas sila sang ila kaugalingon nga mga “kaliwat.” Ang katipan, ukon kontrata, ni Jehova sa mga hinaplas nagahatag sa sining mga kaliwat sing pagsalig nga si Jehova padayon nga magagamit man sa ila subong mga humalambal niya tubtob sa walay latid nga tion.—Bugna 21:3, 4, 7.
22. Ano ang masaligan naton kay Jehova, kag paano ini dapat mag-apektar sa aton?
22 Kabay, nian, nga huptan naton tanan ang aton pagtuo kay Jehova. Luyag gid niya kag may ikasarang sia sa pagluwas! Ang iya kamot indi gid mangin malip-ot; luwason niya pirme ang iya matutom nga katawhan. Ang tanan nga nagasalig sa iya magapadayon sa pagdala sang iya maayong mga pulong sa ila mga baba “kutob karon kag bisan tubtob sa walay latid nga tion.”
[Kahon sa pahina 294]
Apostata nga Jerusalem—Ang Kaanggid Sang Cristiandad
Ang Jerusalem, ang kapital nga siudad sang pinili nga pungsod sang Dios, nagalaragway sa langitnon nga organisasyon sang espiritu nga mga tinuga sang Dios kag sa hubon man sang hinaplas nga mga Cristiano nga ginbanhaw padulong sa langit subong nobya ni Cristo. (Galacia 4:25, 26; Bugna 21:2) Apang, masami nga ang mga pumuluyo sang Jerusalem nangin di-matutom kay Jehova, kag ang siudad ginlaragway subong salamwanan kag makihilahion. (Ezequiel 16:3, 15, 30-42) Sa sina nga kahimtangan, ang Jerusalem nangin isa ka nagakaigo nga modelo sang apostata nga Cristiandad.
Gintawag ni Jesus ang Jerusalem nga “nagapatay sang mga manalagna kag nagabato sang mga ginpadala sa iya.” (Lucas 13:34; Mateo 16:21) Kaangay sang di-matutom nga Jerusalem, ang Cristiandad nagapangangkon nga nagaalagad sa matuod nga Dios apang daku gid ang pagsipak sini gikan sa iya matarong nga mga dalanon. Makasalig kita nga hukman ni Jehova ang Cristiandad suno sa pareho man nga matarong nga mga talaksan nga gingamit niya sang ginhukman niya ang apostata nga Jerusalem.
[Piktyur sa pahina 296]
Ang isa ka hukom dapat maghukom sa pagkamatarong, magpadapat sing katarungan, kag indi magbaton sing mga hamham
[Piktyur sa pahina 298]
Kaangay sang nagabaha nga suba, ang mga paghukom ni Jehova magalambas sa tanan nga nagaupang sa paghimo sang iya kabubut-on
[Retrato sa pahina 302]
Nakigkatipan si Jehova nga indi gid madula sang iya katawhan ang ila pribilehiyo subong mga saksi niya