Pagpabutyag nga may Kombiksion

KON ang isa ka tawo nagahambal nga may kombiksion, makita sang iban nga nagapati gid sia sa iya ginasiling. Ini nga kombiksion makita sa ministeryo ni apostol Pablo. Sa mga nangin tumuluo sa Tesalonica, sia nagsulat: “Ang maayong balita nga ginabantala namon indi masapwan sa tunga ninyo paagi sa hambal lamang kundi paagi sa . . . malig-on nga pagsalig [ukon kombiksion].” (1 Tes. 1:5) Ina nga kombiksion maathag sa iya paghambal kag sa iya pagkabuhi. Ang malig-on nga kombiksion dapat maathag man sa pagpresentar naton sing mga kamatuoran sa Biblia.

Ang pagpabutyag sing kombiksion indi kaangay sang pagpakatig-a sa kaugalingon nga opinyon, dogmatiko, ukon arogante. Sa baylo, kon ang isa ka tawo nga may kombiksion maghambal tuhoy sa mga butang sa Pulong sang Dios, ginahimo niya ini sa paagi nga nagapakita sia sing mabaskog nga pagtuo.​—Heb. 11:1.

Mga Kahigayunan sa Pagpabutyag Sing Kombiksion. Importante ang paghambal nga may kombiksion kon yara ikaw sa ministeryo sa latagon. Masami nga matalupangdan sang mga tawo ang imo panghambal subong man ang imo mensahe. Mamutikan nila kon ano gid ang imo ginabatyag tuhoy sa imo ginasiling. Ang imo kombiksion sarang makapaalinton, sing mas epektibo sangsa mga tinaga lamang, nga may yara ikaw importante nga butang nga ipaambit.

Kinahanglan man nga ipabutyag ang kombiksion kon nagapamulongpulong sa mga masigkatumuluo. Ginsulat ni apostol Pedro ang iya una nga inspirado nga sulat ‘agod magpalig-on kag maghatag sing daku nga panaksi nga amo ini ang matuod nga di-bagay nga kaayo sang Dios.’ Sa sini, ginpalig-on niya ang mga kauturan: “Magtindog sing malig-on.” (1 Ped. 5:12) Sang nagsulat sa kongregasyon sa Roma, si apostol Pablo nagpabutyag sing kombiksion nga naghatag sa ila sing benepisyo. Sia nagsulat: “Kumbinsido ako nga bisan ang kamatayon ni kabuhi ni mga anghel ni mga panguluhan ni mga butang karon ni mga butang nga magaabot ni mga kagamhanan ni kataason ni kadalumon ni tanan iban pa nga mga tinuga indi makapahamulag sa aton sa gugma sang Dios nga yara kay Cristo Jesus nga aton Ginuo.” (Roma 8:​38, 39) Makabuluyok man nga nagsulat si Pablo tuhoy sa kinahanglanon nga magbantala sa iban, kag ang iya kakugi sa sini nga hilikuton maathag nga nagapakita nga kumbinsido gid sia sa importansia sini. (Binu. 20:18-21; Roma 10:​9, 13-15) Ang kaanggid nga kombiksion dapat makita man karon sa bahin sang Cristianong mga gulang samtang nagatudlo sila gikan sa Pulong sang Dios.

Sa mga panahon sang pagtuon kag sa iban pa nga mga tion, dapat may kombiksion ang mga ginikanan kon nagahinun-anon sang espirituwal nga mga butang sa ila mga kabataan. Kinahanglan nga palambuon sang mga ginikanan sa ila mismo tagipusuon ang gugma sa Dios kag sa iya mga dalanon. Sa amo makahambal sila nga may tinagipusuon nga kombiksion sa ila mga kabataan, ‘kay gikan sa kabuganaan sang tagipusuon nagapamulong ang baba.’ (Luc. 6:45; Deut. 6:​5-7) Ang pagtigayon sini nga kombiksion magapahulag man sa mga ginikanan nga magpahamtang sing halimbawa sang ‘pagtuo nga wala sing pagkasalimpapaw.’​—2 Tim. 1:5.

Ilabi na nga importante nga ipabutyag ang imo kaugalingon upod ang kombiksion kon ginaduhaduhaan ang imo pagtuo. Ayhan matingala ang isa ka kabutho, manunudlo, ukon kaupod sa trabaho nga wala ka nagabuylog sa pila ka selebrasyon. Ang malig-on, makatarunganon nga sabat mahimo makabulig sa iya nga tahuron ang imo pasad-sa-Biblia nga panindugan. Kamusta naman kon may magtinguha nga sulayon ikaw sa paghimo sing sayop nga buhat​—pagkadibunayag, pag-abuso sa droga, ukon seksuwal nga imoralidad? Importante nga athagon mo nga indi gid ikaw maghimo sini nga paggawi kag nga wala sing makahaylo sa imo sa pagbag-o sang imo hunahuna. Nagakinahanglan ini nga dapat ka maghambal nga may kombiksion kon nagapangindi sa tanyag. Sang nagpamatok sa imoral nga pagpanghaylo sang asawa ni Potifar, si Jose malig-on nga nagsiling: “Paano ako makahimo sining daku nga kalainan kag magpakasala batok sa Dios?” Sang namilit ang asawa ni Potifar, nalagyo si Jose kag nagguwa sa balay.​—Gen. 39:​9, 12.

Kon Paano Ginapakita ang Kombiksion. Daku ang mahimo sang mga tinaga nga imo ginagamit sa pagpaalinton sang imo kombiksion. Sa pila ka hitabo, ginsugdan ni Jesus ang importante nga mga pinamulong paagi sa pagsiling: “Sa pagkamatuod ginasiling ko sa inyo.” (Juan 3:​3, 5, 11; 5:​19, 24, 25) Ang kombiksion ni Pablo ginapabanaag sa mga ekspresyon subong sang “Kumbinsido ako,” “Nahibaluan ko kag nagapati ako kay Ginuong Jesus,” kag “Nagasugid ako sing matuod, wala ako nagabutig.” (Roma 8:38; 14:14; 1 Tim. 2:7) Tuhoy sa katumanan sang iya pulong, gin-inspirar kon kaisa ni Jehova ang iya mga manalagna agod maghimo sing mabaskog nga mga pinamulong, subong sang, “Pat-od nga magaabot ini.” (Hab. 2:3) Kon ginapatuhuyan mo ini nga mga tagna, mahimo mo man gamiton ang kaanggid nga pinamulong. Kon nagasalig ka indi sa imo kaugalingon kundi kay Jehova kag kon nagahambal ka sa iban sing matinahuron, ang mga ekspresyon nga nagapabanaag sing kaanggid nga kombiksion magapamatuod nga may malig-on ka nga pagtuo.

Ang kombiksion mahimo man mapakita paagi sa pagkasinsero kag pagkaserioso sang imo ekspresyon. Ang imo pangguyahon, ang imo mga kumpas, kag ang imo paghulaghulag nagaamot tanan sa sini, bisan pa nga medyo may kinatuhayan ini sa nagkalainlain nga tawo. Bisan pa kon mahuluy-on ka ukon malulo maghambal, kon nagapati gid ikaw nga ang imo ginasiling amo ang kamatuoran kag kinahanglan nga mabatian ini sang iban, makita gid ang imo kombiksion.

Sa pagkamatuod, dapat matuod gid ang bisan ano nga kombiksion nga aton ginapakita. Kon mabatyagan sang mga tawo nga nagapakunokuno lamang kita sa baylo nga nagahambal sing tinagipusuon, mahimo magahinakop sila nga ang aton mensahe indi importante. Busa, labaw sa tanan, mangin natural. Depende sa kadamuon sang imo mga tagpalamati, ayhan kinahanglan mo nga maghambal sing mas matunog sangsa kinaandan kag sing mas mapagsik. Apang ang imo tulumuron amo ang paghambal sing sinsero kag natural.

Mga Bulig sa Pagpakita Sing Kombiksion. Sanglit ang imo kombiksion nagadalahig sang imo mga balatyagon tuhoy sa imo materyal, importante ang maayo nga paghanda. Ang pagkopya lamang sing materyal gikan sa isa ka publikasyon kag nian basahon ini indi bastante. Kinahanglan nga mahangpan mo sing maayo ang materyal kag mapabutyag ini sa imo kaugalingon nga mga tinaga. Dapat kumbinsido gid ikaw nga matuod ini kag nga ang imo ginasiling mapuslanon sa imo mga tagpalamati. Nagakahulugan ini nga kon nagahanda ka sang imo presentasyon, ginabinagbinag mo ang ila mga kahimtangan kag ang nahibaluan na nila tuhoy sa topiko ukon ang ila balatyagon tuhoy sa sini.

Mas mahapos mamutikan sang iban ang aton kombiksion kon talunsay ang aton pamulongpulong. Busa, dugang sa paghanda sing maayo nga materyal, pangabudlayi gid ang imo pagpamulongpulong. Hatagi sing pinasahi nga igtalupangod ang mga bahin sang imo materyal nga nagakinahanglan sing labi nga pagkasinsero agod mapamulong mo ini nga wala nagasandig sing bug-os sa imo mga nota. Dumduma man nga mangamuyo sang pagpakamaayo ni Jehova sa imo mga panikasog. Sa sini nga paagi ‘makatipon ka sing kaisog paagi sa aton Dios’ agod makahambal ka sa paagi nga nagapabanaag sang imo kombiksion sa pagkamaminatud-on kag importansia sang imo mensahe.​—1 Tes. 2:2.