Nagapukaw-Interes nga Introduksion

ANG introduksion importante nga bahin sang bisan ano nga pamulongpulong. Kon mapukaw mo gid ang interes sang imo mga tagpalamati, labi sila nga magapamati sing maayo sa kon ano ang masunod. Sa ministeryo sa latagon, kon ang imo introduksion indi makapukaw sang interes, mahimo nga indi mo na mapadayon ang imo presentasyon. Kon nagapamulongpulong ka sa Kingdom Hall, ang mga tagpalamati indi magaguwa sa Kingdom Hall, apang mahimo sila magsugod sa paghunahuna tuhoy sa iban nga mga butang kon wala mo makuha ang ila interes.

Kon nagahanda sang imo introduksion, dumduma ang masunod nga mga tulumuron: (1) pagkuha sing atension sang imo mga tagpalamati, (2) maathag nga pagpahibalo sang imo topiko, kag (3) pagpakita kon ngaa ang topiko importante sa imo mga tagpalamati. Sa pila ka kahimtangan, ining tatlo ka tulumuron sarang mahimo sing halos dulungan. Apang kon kaisa, mahimo ini hatagan sang atension sing isa-isa, kag ang pagpasunod mahimo nga magkatuhay.

Kon Paano Makuha ang Atension Sang Imo mga Tagpalamati. Ang katunayan nga ang mga tawo nagtipon agod magpamati sing isa ka diskurso wala nagakahulugan nga handa sila sa paghatag sing bug-os nga atension sa topiko. Ngaa indi? Bangod ang ila kabuhi puno sing madamo nga butang nga nagakinahanglan sang ila atension. Mahimo nagakabalaka sila tuhoy sa isa ka problema sa puluy-an ukon iban pa nga kahuol sa kabuhi. Ang ginaatubang mo nga hangkat subong humalambal amo ang pagkuha kag paghupot sing igtalupangod sang imo mga tagpalamati. Mahimo mo ini sa pila ka paagi.

Ang isa sang labing bantog nga diskurso nga ginhatag amo ang Sermon sa Bukid. Paano ini nagsugod? Suno sa kasaysayan sang Lucas, si Jesus nagsiling: “Malipayon kamo nga mga imol, . . . malipayon kamo nga ginagutom karon, . . . malipayon kamo nga nagahibi karon, . . . malipayon kamo kon ginadumtan kamo sang mga tawo.” (Luc. 6:20-22) Ngaa nakapukaw ini sang interes? Sa pila ka tinaga, ginkilala ni Jesus ang pila ka serioso nga problema nga ginaatubang sang iya mga tagpalamati. Nian, sa baylo nga hambalan ang mga problema sing madugay, ginpakita niya nga ang mga tawo nga may amo sini nga mga problema mahimo gihapon mangin malipayon, kag ginhimo niya ini sa paagi nga luyag sang iya mga tagpalamati nga mamati sing dugang pa.

Ang mga pamangkot sarang magamit sing epektibo agod mapukaw ang interes, apang dapat nagakaigo ini. Kon ginapakita sang imo mga pamangkot nga luyag mo lamang maghambal tuhoy sa mga butang nga nabatian na sang imo mga tagpalamati, mahimo nga madula gilayon ang interes. Indi magpamangkot sa paagi nga mahuy-an ang imo mga tagpalamati ukon may malain ini nga epekto sa ila. Sa baylo, panikasugi nga iprase ang imo mga pamangkot sa paagi nga magapahunahuna sa ila. Magdulog sing makadali pagkatapos sang tagsa ka pamangkot agod ang imo mga tagpalamati may tion nga masabat ini sa ila hunahuna. Kon mabatyagan nila nga nagapakighambal sila sa imo sa hunahuna, makuha mo ang ila atension.

Ang paggamit sing matuod nga eksperiensia isa pa ka maayo nga paagi sa pagkuha sing atension. Apang mahimo nga indi mo malab-ot ang imo tulumuron paagi sa pagsugid lamang sing isa ka sugilanon kon ang eksperiensia makapahuya sa isa sang imo mga tagpalamati. Kon ang imo sugilanon madumduman apang ang instruksion nga naangot sa sini nalimtan, wala mo malab-ot ang imo tulumuron. Kon ginagamit ang isa ka eksperiensia sa introduksion, dapat magpahamtang ini sing sadsaran para sa isa ka importante nga bahin sang kaundan sang imo pamulongpulong. Bisan pa kinahanglan ang pila ka detalye agod mangin maathag ang pagsaysay, maghalong nga ang mga eksperiensia indi maglawig sing di-kinahanglanon.

Ginasugdan sang pila ka humalambal ang ila diskurso paagi sa bag-o nga mga balita, isa ka kinutlo gikan sa lokal nga pamantalaan, ukon isa ka pinamulong sang kilala nga may awtoridad. Ini man epektibo kon nagasigo gid ini sa topiko kag nagakabagay sa mga tagpalamati.

Kon ang imo pamulongpulong bahin sang isa ka simposium ukon bahin sang Miting sa Serbisyo, nian masami nga labing maayo nga ang imo introduksion malip-ot kag direkta. Kon nagahatag ka sing pamulongpulong publiko, indi magsobra sa gintalana nga oras para sa introduksion. Ang kaundan sang pamulongpulong amo ang magapaalinton sang impormasyon nga may daku gid nga balor sa imo mga tagpalamati.

Kon kaisa masapwan mo ang imo kaugalingon nga nagahambal sa atubangan sang mga tagpalamati nga maduhaduhaon ukon di-mainabyanon pa gani. Paano mo makuha ang ila atension? Si Esteban, isa ka Cristiano sang una nga ginlaragway nga “puno sang espiritu kag kaalam,” gindala sing pilit sa atubangan sang Judiyong Sanhedrin. Didto naghatag sia sing epektibo nga pagpangapin sa Cristianismo. Paano sia nagsugod? Sa matinahuron nga paagi kag sa pagpatuhoy sa pila ka butang nga ginaugyunan. “Mga lalaki, mga kauturan kag mga amay, pamati kamo. Ang Dios sang himaya nagpahayag sa aton katigulangan nga si Abraham.” (Binu. 6:3; 7:2) Sa Areopago sa Atenas, ginpasibu ni apostol Pablo ang iya introduksion sa tuhay gid nga mga tagpalamati, nga nagasiling: “Mga lalaki sa Atenas, nakita ko nga sa tanan nga butang mas mahinadlukon kamo sa mga dios sangsa iban.” (Binu. 17:22) Subong resulta sang epektibo nga mga introduksion, ang mga tagpalamati luyag nga mamati sing dugang pa.

Kon yara ka sa pag-alagad sa latagon, kinahanglan makuha mo man ang atension sang mga tawo. Kon wala ginapaabot ang imo pagduaw, mahimo nga ang tagbalay masako sa iban nga mga butang. Sa pila ka bahin sang kalibutan, ang wala ginapaabot nga mga bisita ginalauman nga maghambal gilayon sang ila tuyo sa pagduaw. Sa iban nga mga duog, bangod sang kinabatasan kinahanglan nga maghimo anay sing pila ka pormalidad antes mo isiling ang rason sang imo pagduaw.​—Luc. 10:5.

Sa bisan ano nga kahimtangan, ang tunay nga pagkamainabyanon makabulig sa pagpaluntad sing kahimtangan nga magadul-ong sa paghambalanay. Masami nga maayo ang magsugod sa pila ka butang nga may direkta nga kaangtanan sa ginahunahuna sang tawo. Paano mo mapat-od kon ano ang gamiton? Ti, samtang nagapalapit ka sa tawo, may ginahimo bala sia? Ayhan nagapanguma sia, nagapanghardin, nagakay-o sang salakyan, nagaluto, nagapanglaba, ukon nagaatipan sang kabataan. May ginatan-aw bala sia​—isa ka pamantalaan ukon isa ka hitabo sa kalye? Ang iya bala palibot nagapakita nga interesado gid sia sa pagpangisda, isport, musika, paglakbay, mga kompyuter, ukon iban pa nga butang? Masami nga nagakabalaka ang mga tawo tuhoy sa bag-o lang nila nabatian sa radyo ukon nakita sa telebisyon. Ang isa ka pamangkot ukon malip-ot nga komento tuhoy sa bisan diin sini nga mga butang mahimo magdul-ong sa isa ka mainabyanon nga paghambalanay.

Ang pagpakighambal ni Jesus sa isa ka Samaritana sa bubon malapit sa Sicar isa ka talalupangdon nga halimbawa kon paano sugdan ang isa ka paghambalanay sa tuyo nga makapanaksi.​—Juan 4:5-26.

Kinahanglan mo ihanda sing maayo ang imo introduksion, ilabi na kon masunson nagapanghikot ang inyo kongregasyon sa teritoryo sini. Kay kon indi, mahimo nga indi ka makapanaksi.

Ipahibalo ang Imo Topiko. Sa Cristianong kongregasyon, ang tsirman ukon ang isa nga nauna sa imo sa programa masami nga amo ang nagapahibalo sang tig-ulo sang imo pamulongpulong kag nagapakilala sa imo. Apang, maayo para sa imo nga pahanumdumon ang imo mga tagpalamati tuhoy sa imo topiko sa tion sang imo introduksion. Mahimo ini, apang indi man gid kinahanglan, nga mangin isa ka tinaga por tinaga nga pagsambit sa tema. Sa bisan ano nga paagi, ang tema dapat amat-amat nga magaathag samtang nagapadayon ang pamulongpulong. Sa pila ka paagi sa introduksion, dapat mo ipatalupangod ang imo topiko.

Sang ginpadala ni Jesus ang iya mga disipulo sa pagbantala, maathag nga ginpahibalo niya ang mensahe nga ila ibantala. “Samtang nagalakat kamo, magbantala, nga nagasiling, ‘Ang ginharian sang mga langit malapit na.’ ” (Mat. 10:7) Tuhoy sa aton adlaw, si Jesus nagsiling: “Ining maayong balita sang ginharian ibantala.” (Mat. 24:14) Ginapalig-on kita nga “ibantala ang pulong,” buot silingon, kon nagapanaksi dapat nahisuno gid ini sa Biblia. (2 Tim. 4:2) Apang, antes buksan ang Biblia ukon ipatalupangod ang Ginharian, sa masami kinahanglan nga sambiton anay ang pila ka butang nga ginakabalak-an karon. Mahimo ka magkomento tuhoy sa krimen, pagkawalay palamugnan, inhustisya, inaway, kon paano buligan ang mga pamatan-on, balatian, ukon kamatayon. Apang indi magpadugay sa negatibo nga mga butang; ang imo mensahe positibo. Panikasugi nga ipatuhoy ang paghambalanay sa Pulong sang Dios kag sa paglaum sa Ginharian.

Ipakita Kon Ngaa ang Topiko Importante sa Imo mga Tagpalamati. Kon magapamulongpulong ka sa kongregasyon, makapat-od ka nga ang imo mga tagpalamati sa kabug-usan mangin interesado sa imo ihambal. Apang magapamati bala sila subong sang pagpamati sang isa ka tawo nga nagatuon sang pila ka butang nga nagadalahig gid sa iya? Magapamati bala sila bangod narealisar nila nga ang ila ginapamatian nagasibu sa ila kahimtangan sa kabuhi kag bangod ginapukaw mo sa ila ang handum nga maghimo sing pila ka butang tuhoy sini? Mangin matuod lamang ini kon ginbinagbinag mo sing maayo ang imo mga tagpalamati​—ang ila mga kahimtangan, ang ila mga ginakabalak-an, ang ila mga panimuot​—​sang ginahanda mo ang imo pamulongpulong. Kon ginhimo mo ini, nian ilakip sa imo introduksion ang pila ka butang nga nagapakita sini.

Nagapamulongpulong ka man sa plataporma ukon nagapanaksi sa isa ka tawo, ang isa sang labing maayo nga paagi agod mapukaw ang interes sa isa ka topiko amo ang pagdalahig sa imo tagpalamati. Ipakita kon paano ang ila mga problema, ang ila mga kinahanglanon, ukon ang mga pamangkot nga yara sa ila mga hunahuna may kaangtanan sa topiko nga imo ginahinun-anon. Kon ginapakita mo nga magluwas sa kabilugan nga bahin sang imo topiko pagabinagbinagon mo ang espesipiko nga bahin sang butang, mamati pa gid sila sing maayo. Agod mahimo ini, dapat maghanda ka sing maayo.

Ang Pagpresentar Mo Sini. Importante gid kon ano ang imo ginasiling sa imo introduksion, apang kon paano mo ini isiling makapukaw man sang interes. Bangod sini, ang imo paghanda dapat maglakip indi lamang sa kon ano ang imo isiling kundi kon paano mo man ini isiling.

Ang paggamit sing husto nga mga tinaga importante sa paglab-ot sang imo tulumuron, busa masapwan mo nga mapuslanon nga ihanda ang una nga duha ukon tatlo ka dinalan sing maayo gid. Ang malip-ot kag simple nga mga dinalan masami nga labing maayo. Para sa pamulongpulong sa kongregasyon, ayhan luyag mo nga isulat ini sa imo mga nota, ukon mahimo pakamaayuhon mo nga sauluhon ini agod ang imo nahauna nga mga tinaga may epekto gid sa ila. Ang paghatag sing epektibo nga introduksion nga wala nagadali makabulig sa imo nga matigayon ang kompiansa nga kinahanglanon sa paghatag sang nabilin nga bahin sang imo pamulongpulong.

Kon San-o Ini Ihanda. Nanuhaytuhay ang opinyon sa sini nga bahin. Ang pila ka eksperiensiado nga humalambal nagapati nga ang paghanda sang pamulongpulong dapat magsugod sa introduksion. Ang iban nga nagatuon sa paghambal sa publiko nagasiling nga ang introduksion dapat ihanda pagkatapos nga makumpleto ang kaundan.

Dapat mahibaluan mo gid kon ano ang imo topiko kag kon ano ang panguna nga mga punto nga ginaplano mo nga pasangkaron antes ka makahanda sing mga detalye sang nagakaigo nga introduksion. Apang ano abi kon nagahanda ka sang imo pamulongpulong pasad sa ginbalhag nga balayan? Pagkatapos mabasa ang balayan, kon may ideya ka na sa introduksion, wala gid sing malain kon isulat mo ini. Dumduma man nga agod mangin epektibo ang imo introduksion, dapat mo binagbinagon ang imo mga tagpalamati subong man ang materyal sa balayan.